នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជាភ្លាត់ចាញ់សិង្ហបុរីនៅនាទីទីចុងក្រោយ ក្នុងជំនួបបើកឆាកពានរង្វាន់បាល់​ទាត់តំបន់​អាស៊ី​អាគ្នេយ៍ ​(ASEAN Hyundai Cup 2026)
វ័យ ៤០ ឆ្នាំ Luka Modric បន្តកិច្ចសន្យាថ្មីជាមួយ AC Milan មួយឆ្នាំទៀត
Arsenal នាំយកខ្សែប្រយុទ្ធក្រិក Christos Tzolis ពី Club Brugge ក្នុងតម្លៃ ៣៤ លានផោន
មន្រ្តីជាន់ខ្ពស់ក្រសួងអប់រំ៖ ការប្រកួតកីឡាជាតិ-កីឡាជាតិជនពិការ ត្រូវរៀបចំតាមលំនាំហ្គេមស្តង់ដា លើប្រភេទកីឡានីមួយៗ

ព័ត៌មានកីឡា

អប់រំកាយ និងកីឡាជាវិស័យដ៏ចម្បងមួយដែលរដ្ឋាភិបាល និងក្រសួងអប់រំ យុវជន និងកីឡា​កំពុង​យកចិត្តទុកដាក់

2025/12/04 10:52:35 pm        416
Facebook Telegram Linkin
ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា កិច្ចប្រជុំបូកសរុបការងារនេះធ្វើឡើងដើម្បីពិនិត្យ និងវាយតម្លៃលើសមិទ្ធផលការងារដែលបានសម្រេចរយៈពេលមួយឆ្នាំកន្លងមក បើធៀបជាមួយផែនការយុទ្ធសាស្រ្ត និងផែនការសកម្មភាពឆ្នាំ២០២៥ ដើម្បីរកឲ្យឃើញថា តើយើងនៅមានអ្វីសេសសល់ និងអ្វីជាបញ្ហាប្រឈមសម្រាប់យើងទាំងអស់គ្នា ក្រៅពីនេះ យើងក៏ចង់បាននូវធាតុចូលពី សន្និបាតក្រសួងអប់រំ យុវជន និងកីឡាលើកនេះផងដែរ។ឯកឧត្តមបានលើកឡើងបែបនេះ ក្នុងពិធីបើកសិក្ខាសាលបូកសរុបការងារអនុវិស័យអប់រំកាយ និងកីឡា ឆ្នាំសិក្សា២០២៤-២០២៥ និងលើទិសសៅឆ្នាំសិក្សា២០២៥-២០២៦ នៅថ្ងៃទី៣ ខែធ្នូ នៅភោជនីយដ្ឋាន ទន្លេបាសាក់II រាជធានីភ្នំពេញ។ ដោយមានការអញ្ជើញចូលរួមពី ឯកឧត្តម កែ ប៊ុនខៀង រដ្ឋលេខាធិការក្រសួងអប់រំ យុវជន និងកីឡាតំណាងឲ្យ ឯកឧត្តម បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា ព្រមទំាងគណៈកម្មាធិការជាតិអូឡាំពិកកម្ពុជា គណៈកម្មាធិការជាតិប៉ារ៉ាអូឡាំពិកកម្ពុជា គណៈកម្មាធិការជាតិស្ប៉េស្បាលអូឡាំពិកកម្ពុជា សហព័ន្ធកីឡាជាតិប្រធាន អនុប្រធានមន្ទីរ ប្រធាន អនុប្រធានការិយាល័យ និងមន្ត្រី នៃមន្ទីរអប់រំ យុវជន និងកីឡារាជធានី ខេត្តទាំង២៥ និងអង្គភាពពាក់ព័ន្ធ។រដ្ឋលេខាធិការក្រសួងអប់រំ បានបន្តថា វិស័យអប់រំកាយ និងកីឡា ជាវិស័យដ៏ចម្បងមួយដែលរដ្ឋាភិបាល ក៏ដូចជាក្រសួងអប់រំ យុវជន និងកីឡា បាននឹងកំពុងយកចិត្តទុកដាក់យ៉ាងខ្លាំង ជាពិសេសការលើកកម្ពស់វិស័យកីឡាផ្សារភ្ជាប់និងការអប់រំ និងការបន្តជំរុញចលនា “យុវជនម្នាក់ ចេះលេងកីឡាមួយប្រភេទយ៉ាងតិចប្រចាំជីវិត”។ ក្រសួងអប់រំ យុវជន និងកីឡា បានអនុវត្តយុទ្ធសាស្រ្តអភិវឌ្ឍធនធានមនុស្សផ្តោតទៅលើការសិក្សារបស់សិស្ស ផ្តោតលើការអនុវត្តផែនការសកម្មភាពស្តង់ដាសាលារៀនគំរូស្តីពីការអប់រំកាយ និងកីឡានៅក្នុងម៉ោងសិក្សា និងកីឡា ក្រៅម៉ោងសិក្សា ការបំផុសសកម្មភាពហាត់ប្រាណ និងលេងកីឡា សម្រាប់បង្កើនតម្លៃសេដ្ឋកិច្ចឆ្ពោះទៅរកការអភិវឌ្ឍ ប្រទេសជាតិ។ សូមជម្រាបថា នៅឆ្នាំ២០២៥កន្លងមក អនុវិស័យអប់រំកាយ និងកីឡាបានសម្រេចលទ្ធផលមួយចំនួនដូចជា ការប្រកួតកីឡាសិស្សបឋមសិក្សា និងមធ្យមសិក្សាថ្នាក់ជាតិ ការប្រកួតកីឡាតាមសហព័ន្ធជាតិ ការប្រកួតកីឡាលក្ខណៈអន្តរជាតិ ក្នុងប្រទេស និងក្រៅប្រទេស ការលើកកម្ពស់កីឡាករ ការលើកកម្ពស់សម្មភាពរៀននិងបង្រៀនអប់រំកាយក្នុងម៉ោងសិក្សា ២ម៉ោងក្នុងមួយសប្តាហ៍ និងហ្វឹកហាត់កីឡានៅក្រៅម៉ោងសិក្សា ការអភិវឌ្ឍសមត្ថភាពមន្ត្រីអប់រំកាយ និងកីឡា ការអភិវឌ្ឍហេដ្ឋារចនាសម្ព័ន្ធរូបវន្តកីឡា ការរៀបចំទិវាកីឡាអាស៊ាន និងកីឡាដើម្បីទាំងអស់គ្នា ការផ្តល់ថវិកា គាំទ្រដល់សហព័ន្ធជាតិចំនួន៥១ ការបណ្តុះបណ្តាលគ្រូអប់រំកាយ និងកីឡា និងការកសាងលិខិតបទដ្ឋានផ្សេងៗសម្រាប់វិស័យអប់រំកាយ និងកីឡា។ ដើម្បីទទួលបានជោគជ័យ និងពន្លឿនការអភិវឌ្ឍអនុវិស័យអប់រំកាយ និងកីឡា ឯកឧត្តម វ៉ាត់ ចំរើន ក្នុងមានក្រសួង សំណូមពរដល់អង្គការរដ្ឋ និងអង្គការសង្គមកីឡា អង្គការដៃគូ និងអង្គការឯកជនឱ្យខិតខំប្រឹងប្រែងរួមគ្នាបន្ថែមទៀត យកអស់កម្លាំងកាយ កម្លាំងចិត្ត និងលទ្ធភាពបំពេញភារកិច្ចទៅតាមតួនាទីរៀងៗខ្លួន ដោយការទទួលខុសត្រូវខ្ពស់ ជាពិសេស សមាជិក សមាជិកា នៃកិច្ចប្រជុំបូកសរុបការងារអនុវិស័យ អប់រំកាយ និងកីឡាផ្តល់ធាតុចូលលើប្រធានបទទាំងពីរ សម្រាប់ដាក់ក្នុងសន្និបាតអប់រំ យុវជន និងកីឡានាពេលខាងមុខ និងដាក់ចេញជាទិសដៅសម្រាប់អនុវត្តឆ្នាំ២០២៦៕

អតីតតារាបាល់ទាត់ចែករំលែកការទស្សន៍ទាយ និងចំណាប់អារម្មណ៍ សម្រាប់ព្រឹត្តិការណ៍​បាល់ទាត់ពិភពលោក​ឆ្នាំក្រោយ

2025/12/04 10:41:02 pm        432
Facebook Telegram Linkin
អតីតតារាមកពីប្រទេសប្រេស៊ីល ម៉ិកស៊ិក កាណាដា និងសហរដ្ឋអាមេរិកបានចែករំលែកការជ្រើសរើសរបស់ពួកគេសម្រាប់ការប្រកួតបាល់ទាត់ពិភពលោកឆ្នាំ ២០២៦ ដោយថ្លឹងថ្លែងលើក្រុមដែលអាចឈ្នះជើងឯក ក្រុមដែលធ្វើឱ្យមានការភ្ញាក់ផ្អើល និងកីឡាករលេចធ្លោ។នៅលើសំណួរនៃម្ចាស់ជើងឯក Dunga អតីតកីឡាករជម្រើសជាតិប្រេស៊ីលបានគាំទ្រប្រទេសកំណើតរបស់ខ្លួនដោយទំនុកចិត្ត ក្នុងការបញ្ចប់ការទន្ទឹងរង់ចាំឈ្នះពានក្រោយខកខាន ២៤ ឆ្នាំ ខណៈដែល Luis Hernandez អតីតកីឡាករម៉ិកស៊ិក គិតថាប្រេស៊ីល អាហ្សង់ទីន បារាំង និងអង់គ្លេស នឹងជាបេក្ខភាពដែលមានភាគរយខ្ពស់ក្នុងការឈ្នះជើងឯក។ អតីតខ្សែការពារអាមេរិក Marcelo Balboa ងាកទៅរកអាហ្សង់ទីន ទោះបីជាគាត់មើលឃើញអេស្ប៉ាញ និងព័រទុយហ្គាល់ជាបេក្ខភាពខ្លាំងក៏ដោយ។ Atiba Hutchinson អតីតកីឡាកររបស់កាណាដាបានបន្ទរថា អេស្ប៉ាញ និងប្រេស៊ីលជាក្រុមដែលលោកគិតថាឈ្នះ។សម្រាប់ក្រុមដែលនឹងបង្ករការភ្ញាក់ផ្អើលដ៏មានសក្តានុពលលោក Hernandez បានគិតដល់ប្រទេសម៉ារ៉ុក ដោយរំលឹកពីភាពជោគជ័យរបស់ពួកគេនៅ World Cup 2022។ ចំណែកលោក Balboa បានជ្រើសរើសប្រទេសកូឡុំប៊ីជាក្រុមដែលអាចបង្ករភ្ញាក់ផ្អើល ខណៈដែលលោក Dunga គិតថាក្រុមមកពីអាហ្រ្វិកនឹងមានអ្វីពិសេស។ រីឯលោក Hutchinson ជឿជាក់ថាសហម្ចាស់ផ្ទះកាណាដាអាចធ្វើឱ្យមានសំលេងរំខានជាមួយនៅចំពោះមុខអ្នកគាំទ្ររបស់ខ្លួន។ អតីតកីឡាករបាល់ទាត់ខាងលើ ក៏បានរំលេចកីឡាករដែលនឹងលេចធ្លោក្នុងព្រឹត្តិការណ៍ផងដែរ ក្នុងនោះលោក Dunga បានចង្អុលទៅ Kylian Mbappe និង Erling Haaland ដោយហៅតារាបារាំងថាជាមនុស្សដែលរីកចម្រើនរាល់ថ្ងៃ។ សម្រាប់លោក Hutchinson បានងាកទៅកីឡាករវ័យក្មេង Lamine Yamal របស់អេស្ប៉ាញ ខណៈដែល Hernandez បានគាំទ្រ Haaland របស់ន័រវេស ឯលោក Balboa ជឿថា Christian Pulisic របស់អាមេរិក នឹងធ្វើឱ្យអ្នកគាំទ្រចាប់អារម្មណ៍៕ អត្ថបទ៖នាង សុភាវុធ 

លោក Scott Cooper នឹងបង្វែបទពិសោធន៍ដឹកនាំក្លិបធំៗក្នុងតំបន់ ដើម្បីជួយស្រោចស្រង់វិសាខា

2025/12/04 10:27:09 pm        374
Facebook Telegram Linkin
លោក Scott Cooper គ្រូបង្វឹកថ្មីក្រុមវិសាខា ដែលកំពុងទទួលលទ្ធផលមិនសូវគាប់ប្រសើរក្នុងលីគកំពូលកម្ពុជា ឆ្នាំ២០២៥/២៦ បានលើកឡើងថា នឹងបង្វែរបទពិសោធន៍ ធ្លាប់ដឹកនាំក្រុមជម្រើសជាតិ និងក្លិបធំៗនៅតំបន់អាស៊ីអាគ្នេយ៍ ទៅជាលទ្ធផលល្អជួយក្លិប ទោះបីឱកាសប្រជែងជើងឯកលីគហាក់ឃ្លៀតឆ្ងាយក្ដី។នៅក្នុងសន្និសីទសារព័ត៌មាន កាលពីថ្ងៃពុធកន្លងទៅ គ្រូបង្វឹកជនជាតិអង់គ្លេសរូបនេះ បានបញ្ជាក់ថា លោកនឹងចូលកាន់តំណែងផ្លូវការ នាខែមករា ឆ្នាំ២០២៦ តែលោកនឹងផ្ដើមការងារបណ្ដើរៗជាមួយក្រុមគ្រូជំនួយ ដោយឈរលើប្រយោជន៍រួម ស្របតាមមហិច្ឆតា និងចក្ខុវិស័យដ៏វែងឆ្ងាយរបស់ក្លិប។លោក Scott Cooper បន្ដថា ក្លិបមានក្រុមការងារបច្ចេកទេស និងកីឡាករល្អៗ ដែលផ្ដល់នូវទំនុកចិត្តសម្រាប់លោកមកដឹកនាំ ហើយលោកនឹងប្រើបទពិសោធន៍ ធ្លាប់ធ្វើការជាមួយក្រុមជម្រើសជាតិ និងក្លិបជាច្រើន ក្នុងតំបន់ ដើម្បីដឹកនាំក្រុមឆ្ពោះទៅរកលទ្ធផលល្អ ពិសេសការប្រកួតលីគកំពូលកម្ពុជា។បុរសវ័យ ៥៥ឆ្នាំដដែលបន្ថែមថា ផ្អែកលើលទ្ធផលកន្លងមក អ្នកគាំទ្រពិតជាមិនសូវសប្បាយចិត្ត តែក្នុងនាមគ្រូបង្វឹកថ្មី លោកថា នឹងធ្វើច្រើនជាងការនិយាយ ឬការសន្យា ដើម្បីបង្ហាញលទ្ធផលជាក់ស្ដែងលើទីលាន តាមរយៈរយៈការបន្ថែមនូវស្ដង់ដារនៃការងារថ្មីកាន់តែខ្ពស់ជាងមុន ដោយផ្ដើមពីរូបលោកផ្ទាល់ ដើម្បីឈានទៅរកការផ្លាស់ប្ដូរ និងទទួលបានលទ្ធផលល្អប្រសើរ៕ អត្ថបទ លី ឈុនឡា

Matheus Cunha ជាពីរបួសរំពឹងចូលលេងបានយប់នេះពេល Manchester United ទទួល West Ham

2025/12/04 10:16:09 pm        330
Facebook Telegram Linkin
ខ្សែប្រយុទ្ធប្រេស៊ីល Matheus Cunha នឹងអាចចូលលេងបានយប់នេះក្រោយជាពីរបួស ១០០% ខណៈ Manchester United ទទួលញញួរធំ West Ham ក្របខណ្ឌ English Premier League នេះជាការលើកឡើងរបស់អ្នកចាត់ការ Ruben Amorim។បុរសសញ្ជាតិព័រទុយហ្កាល់ បានបង្ហាញក្តីរីករាយចំពោះការវិលត្រលប់របស់អតីតខ្សែប្រយុទ្ធ Wolves រូបនេះដើម្បីជួយកម្លាំងជួរមុខ តែលោកក៏បានបញ្ជាក់ថា Harry Maguire និង Benjamin Sesko បន្តអវត្តមាន។កីឡាករវ័យ ២៦ ឆ្នាំ Matheus Cunha បានអវត្តមានពីរប្រកួតចុងក្រោយរបស់ Manchester United ក្រោយទទួលរងរបួសក្បាល។ លោក Ruben Amorim បានទទួលស្គាល់ថា Man United នៅតែមានបញ្ហាស្វែងរកគ្រាប់បាល់ ស្របពេលតំបន់ការពារនៅមិនទាន់ល្អ។ យ៉ាងណាក្តី Manchester United កំពុងឈរលេខ ៧ នៅ Premier League នៅសល់ការប្រកួតក្នុងដៃយប់នេះ ខណៈជ័យជំនះនឹងធ្វើឱ្យពួកគេឡើងឈរលេខ ៥ មាន ២៤ ពិន្ទុស្មើ Chelsea ដែលឈរលេខ ៤។ ការវិលត្រលប់របស់ Cunha ក៏បានជួយសម្រាលការងារប្រយុទ្ធចំពោះមុខ ស្របពេលដែលកីឡាករមួយចំនួនរបស់ក្រុមនឹងត្រូវចាកចេញទៅការប្រកួតជើងឯកទ្វីបអាហ្វ្រិកឆាប់ៗនេះ។ Amad Diallo របស់កូឌីវ័រ និង Bryan Mbeumo របស់កាមេរូន នឹងត្រូវចាកចេញទៅជួយក្រុមជម្រើសជាតិរៀងខ្លួននៅព្រឹត្តិការណ៍បាល់ទាត់ទ្វីបអាហ្រ្វិក Africa Cup of Nations ដែលនឹងចាប់ផ្តើមនៅថ្ងៃទី ២១ ខែធ្នូនេះ៕ អត្ថបទ៖នាង សុភាវុធ

គ្រូព្រះខ័នរាជ ទទួលស្គាល់ភាពខ្លាំង Johor តែ Takashi ថាគ្មានអ្វីត្រូវខ្លាចឡើយ

2025/12/04 10:03:49 pm        303
Facebook Telegram Linkin
ក្លិបព្រះខ័នរាជស្វាយរៀង នឹងត្រូវជួបក្រុមលំដាប់កំពូលក្នុងតំបន់ Johor Darul Ta’zim FC របស់ម៉ាឡេស៊ី នាវេលាម៉ោង ៧យប់ថ្ងៃទី៤ ខែធ្នូ ឆ្នាំ២០២៥ នេះ នៅ​ពហុកីឡដ្ឋាន​ជាតិ​មរតក​តេជោ ក្នុងយុទ្ធនាការប្រកួតជើងឯកក្លិបបាល់ទាត់អាស៊ីអាគ្នេយ៍ ASEAN Club Championship Shopee Cup ឆ្នាំ២០២៥/២៦។ជុំវិញ​ការ​ប្រកួតទី៣ ក្នុងពូលB នេះដែរ លោក Matthew Mcconkey គ្រូបង្វឹកក្រុមព្រះខ័នរាជស្វាយរៀង បានថ្លែងក្នុងសន្និសីទសារព័ត៌មានមុនការប្រកួត ដោយ​បានចាត់ទុកក្លិប Johor Darul Ta'zim FC គឺជាក្រុមខ្លាំងមួយក្នុងតំបន់ ហើយ​ក៏​ជាកា​រ​រីក​រាយ​សម្រាប់​ការប្រកួតនេះ ដើម្បីបង្ហាញពីកម្រិតលេងរបស់ក្រុម ក្នុងនាមក្លិបតំណាង​កម្ពុជា​ផង​ដែរ​។ដោយឡែកខ្សែការពារស្នូលរបស់ក្រុមជើងឯកលីគកំពូលកម្ពុជា Odawara Takashi វិញ ក៏បានលើកឡើងស្រដៀងគ្នានឹងគ្រូបង្វឹករបស់ខ្លួនផងដែរ តែរូបគេមិនញញើតឡើយ ។ Takashi ថា ក្រោយពីបានទស្សនាការប្រកួតប៉ុន្មានប្រកួតចុងក្រោយរបស់គូប្រជែង គឺគ្មានអ្វីត្រូវខ្លាច ឬព្រួយបារម្ភរឿងចាញ់ឡើយ ស្របពេលក្រុមកំពុងមានស្មារតីល្អ។ក្រឡេកទៅលោក Xisco Munoz គ្រូបង្វឹកក្រុម Johor Darul Ta'zim FC បានសម្ដែងការគោរព ចំពោះក្រុមម្ចាស់ផ្ទះ ហើយបានចាត់ទុកព្រះខ័នរាជស្វាយរៀង គឺជាគូប្រជែងដ៏សំខាន់ទៀតផង។ លោកបានស្វែងយល់ពីក្រុម និងកីឡាករ ហើយបានត្រៀមខ្លួនរួចរាល់ ដើម្បីទទួលបានលទ្ធផលល្អត្រឡប់ទៅវិញ ជាមួយគោលដៅលេងលើសពីដើម្បីក្លិប តែដើម្បីតំណាងប្រទេសម៉ាឡេស៊ីទាំងមូល។សូមបញ្ជាក់ថា នេះគឺជាការប្រកួតទី៣ របស់ក្រុមទាំងពីរ ក្នុងយុទ្ធនាការប្រកួតប្រកួតជើងឯកក្លិបបាល់ទាត់អាស៊ីអាគ្នេយ៍ ដោយបច្ចុប្បន្ន Johor Darul Ta’zim FC  កំពុងឈរកំពូលតារាងបណ្ដោះអាសន្ន ក្រោយឈ្នះ ២ប្រកួតជាប់គ្នា រកបាន ៦ពិន្ទុពេញ លើក្រុមព្រះខ័នរាជស្វាយរៀង ដែលឈរលេខ២ រកបាន ៣ពិន្ទុ បន្ទាប់ពីឆ្លងកាត់ ២ប្រកួតឈ្នះ ១ និងចាញ់ ១ ដែលសុទ្ធតែជាការប្រកួតក្រៅដី។ ដូច្នេះសម្រាប់ការប្រកួតក្នុងដីលើកដំបូង ទល់នឹងក្រុមខ្លាំងម៉ាឡេស៊ីនេះ លោក Matthew Mcconkey សង្ឃឹមថា នឹងមានអ្នកគាំទ្រច្រើនចូលរួមទស្សនា និងលើកទឹកចិត្តដល់ក្រុមតំណាងកម្ពុជា ហើយការប្រកួតនេះ ក៏នឹងមានផ្សាយផ្ទាល់លើកញ្ចក់ទូរទស្សន៍ BTV-News ផងដែរ៕ អត្ថបទ លី ឈុនឡា

កំពង់ចាម ទម្លាក់ក្រុមជើងឯក ឡើងជួបសៀមរាប វគ្គផ្ដាច់ព្រ័ត្រពានសម្ដេចតេជោ-ថ្នាក់ខេត្ត

2025/12/04 09:49:32 pm        214
Facebook Telegram Linkin
ក្រុមជើងឯករងឆ្នាំចាស់ មន្ទីរអប់រំ យុវជន និងកីឡា ខេត្តកំពង់ចាម បានទម្លាក់ក្រុមការពារតំណែងជើងឯក សមាគមកីឡាបាល់ទាត់ខេត្តត្បូងឃ្មុំ ត្រឹមវគ្គពាក់កណ្ដាលផ្ដាច់ព្រ័ត្រ ក្រោយយកឈ្នះដោយការទាត់បាល់ប៉េណាល់ទីកាត់សេចក្ដី ៤-៣ បន្ទាប់ពីបន្ដប្រកួតស្មើគ្នា ១-១ ខណៈក្រុមឡាយអ៊ិនឃីងខេត្តសៀមរាប បានឡើងវគ្គផ្ដាច់ព្រ័ត្រ បន្ទាប់ពីយកឈ្នះក្រុមភ្នំពេញហ្គាឡាក់ស៊ី ៣-២ ក្នុងជំនួបវគ្គពាក់កណ្ដាលផ្ដាច់ព្រ័ត្រ ជើងទី២ នៃពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១៩ (ថ្នាក់ខេត្ត) ឆ្នាំ២០២៥/២៦ កាលពីល្ងាចថ្ងៃទី៣ ខែវិច្ឆិកា ឆ្នាំ២០២៥។ពិតជាភ្ញាក់ផ្អើលសម្រាប់ក្រុមមន្ទីរអប់រំ យុវជន និងកីឡា ខេត្តកំពង់ចាម ដែលធ្វើមិនសូវបានល្អកាលពីជួបគ្នាក្នុងពូល ពោលគឺចាញ់ខេត្តត្បូងឃ្មុំ ទាំង ២ជើង ដោយលទ្ធផលក្រៅដី ៣-១ និងក្នុងដី ៤-១ តែការប្រកួតរហស្សនាម «ជំនួបបងប្អូន» នេះ កាន់តែរន្ថើន បន្ទាប់ពីក្រុមទាំងពីរ បានជួបគ្នាជាថ្មី នៅវគ្គពាក់កណ្ដាលផ្ដាច់ព្រ័ត្រ ដោយជើងទី១ បានស្មើគ្នា ១-១ នៅទឹកដីខេត្តកំពង់ចាម ហើយបន្ដប្រកួតស្មើគ្នា ១-១ ម្ដងទៀត ក្នុងជើងទី២ នៅទឹកដីខេត្តត្បូងឃ្មុំ។សម្រាប់ជំនួបកាត់សេចក្ដីជើងទី២ កាលពីល្ងាចថ្ងៃពុធនេះ កីឡាករ កសឹម នារ៉ទីន បានរកគ្រាប់នាំមុខឲ្យក្រុមភ្ញៀវខេត្តកំពង់ចាម ១គ្រាប់មុន នៅនាទី៥៥ តែប្រមាណ ៨នាទីក្រោយមក កីឡាករ ធី ភារ៉ា ក៏វាយបកគ្រាប់ស្មើឲ្យត្បូងឃ្មុំវិញ នៅនាទី៦៣ ហើយលទ្ធផលនេះ ក៏បានរក្សាដល់ចប់ការប្រកួតពេញម៉ោង ៩០នាទី និងឈានដល់ការទាត់បាល់ប៉េណាល់ទីកាត់សេចក្ដី ដោយកំពង់ចាម បានយកឈ្នះខេត្តត្បូងឃ្មុំ ៤-៣ ឡើងវគ្គផ្ដាច់ព្រ័ត្រតែម្ដង។ក្រឡេកទៅចាប់អារម្មណ៍ជំនួបកាត់សេចក្ដី នៅទីលានវិទ្យាស្ថានជាតិអប់រំកាយ និងកីឡា វិញ ក្រោយស្មើគ្នា ០-០ កាលពីជើងទី១ នៅទឹកដីខេត្តសៀមរាប ក្រុមឡាយអ៊ិនឃីងខេត្តសៀមរាប បានបើកការនាំមុខក្រុមម្ចាស់ផ្ទះ ៣គ្រាប់មុន ដោយកីឡាករ Bruno ១គ្រាប់នៅនាទី១៦ និង ហួច សុនី ២គ្រាប់ នៅនាទី៣០ និងនាទី៣៤ មុនភ្នំពេញហ្គាឡាក់ស៊ី វាយបកបាន ២គ្រាប់វិញ ដោយកីឡាករ ម៉ាត់ សេតម៉ូស្លីម នៅនាទី៤៣ និងកីឡាករ ភឺន ចាន់វិសុទ្ធ នៅនាទី៥១ ហើយលទ្ធផលនេះ ក៏បានរក្សាដល់ចប់ការប្រកួតពេញម៉ោង នាំឲ្យក្រុមឡាយអ៊ិនឃីងខេត្តសៀមរាប ឡើងវគ្គផ្ដាច់ព្រ័ត្រជាផ្លូវការ។ក្រោយចប់ការប្រកួតលោក កែវ សុផល គ្រូបង្វឹកក្រុមឡាយអ៊ិនឃីងខេត្តសៀមរាប បានលើកឡើងថា ជ័យជម្នះនេះ ប្រៀងបានការប្រកួតវគ្គផ្ដាច់ព្រ័ត្រ ហើយលោកក៏បានកម្លាំងសាមគ្គី និងការពង្រឹងស្មារតី ដែលជាក្ដីបារម្ភរបស់ខ្លួន រហូតទទួលបានជ័យជម្នះ ហើយលោកនឹងប្រើប្រាស់ភាពវិជ្ជមាននេះ ដើម្បីតតាំងជាមួយខេត្តកំពង់ចាម នៅវគ្គផ្ដាច់ព្រ័ត្របន្ដទៀត។ចំពោះវគ្គផ្ដាច់ព្រ័ត្រ រវាងក្រុមមន្ទីរអប់រំ យុវជន និងកីឡា ខេត្តកំពង់ចាម និងក្រុមឡាយអ៊ិនឃីងខេត្តសៀមរាប គ្រោងនឹងប្រកួតកាត់សេចក្ដីនាថ្ងៃទី២១ ខែធ្នូ ឆ្នាំ២០២៥ ខាងមុខ នៅពហុកីឡដ្ឋានជាតិ(អូឡាំពិក) រាជធានីភ្នំពេញ។ ដូច្នេះចាំមើលតើរវាងក្រុមទាំងពីរ ក្រុមណានឹងក្លាយជាម្ចាស់ជើងឯកពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១៩ (ថ្នាក់ខេត្ត) ឆ្នាំ២០២៥/២៦? អត្ថបទ លី ឈុនឡា

កញ្ញា Olivia Cooke សមាជិក PGA មកពីឌូបៃថា ក្រៅពីប្រាសាទអង្គរវត្ត កម្ពុជាពិតជាអស្ចារ្យ

2025/12/03 10:29:38 pm        417
Facebook Telegram Linkin
កញ្ញា Olivia Cooke សមាជិកសមាគមអ្នកវាយកូនគោលអាជីព(PGA) មកពីទីក្រុងឌូបៃ បាន​សម្ដែង​ការ​ភ្ញាក់ផ្អើល និងស្ងើចសរសើរនូវភាពអស្ចារ្យរបស់ប្រទេសកម្ពុជា មិនត្រឹម​តែ​កិត្តិនាម​ដ៏​ល្បី​ល្បាញ​នៃ​ប្រាសាទអង្គរវត្តនោះទេ។ការលើកឡើងនេះ បន្ទាប់ពីអ្នកផលិតមាតិកា និងជាកីឡាការិនីវា​យ​កូន​គោល​ដ៏​មាន​ប្រជាប្រិយ​រូប​នេះ បា​នចំណាយពេល ២សប្ដាហ៍ ចូលរួមធ្វើពិធីការិនី និងសម្រួលសម្រួល​ជា​មួយ​ក្រុម ​Legends Tour កំឡុងព្រឹត្តិការណ៍កីឡាវាយកូនគោលជើងឯកវឌ្ឍនៈលេជេនស៍ ឆ្នាំ២០២៥ កាល​ពីថ្មីៗកន្លងទៅ នៅទីលានវឌ្ឍនៈហ្គោលរីហ្សត។កើត និងធំដឹងក្ដីលើទឹកដីអង់គ្លេស មុនមករស់នៅឌូបី Olivia Cooke ថា ខ្លួនបាន​ស្គាល់​ខ្លះ​ពី​កម្ពុជា​ តាមរយៈកិត្តិនាមប្រាសាទអង្គរវត្ត តែដល់ពេលមកជាក់ស្ដែង បានធ្វើឲ្យកញ្ញាពិត​ជា​ភ្ញាក់​ផ្អើល ​ហើយបានដក់ជាប់ជាមួយស្នាមញញឹម និងភាពរួសរាយរាក់ទាក់របស់ប្រជាពលរដ្ឋខ្មែរ ដែល​ធ្វើ​ឲ្យកញ្ញាប៉ងត្រឡប់មកម្ដងទៀត ជាមួយក្រុមគ្រួសារ ហើយ​ថែម​ទាំង​សន្យា​ជួយ​ផ្សព្វ​ផ្សាយ​ពីទឹកដីអច្ឆរិយនេះទៀតផង។គួរដឹងថា កញ្ញា Olivia Cooke បានចំណាយពេល ២សប្ដាហ៍ពេញ​ជាមួយ​ព្រឹត្តិការណ៍វាយ​កូន​គោល​ជើង​ឯកវឌ្ឍនៈលេជេនស៍ កាលពីថ្មីៗ ហើយកញ្ញាក៏បាន​សម្ភាសន៍​ពី​ចំណាប់​អារម្មណ៍​កីឡាករ​វាយកូនគោលអាជីពអន្ដរជាតិជាច្រើន ពីចំណាប់អារម្មណ៍ ក្នុងការមកប្រកួត និង​ដំណើរ​កម្សាន្ដ​នានា​ ជាមួយចម្លើយស្រដៀងៗគ្នា អំពីកីឡាករ ដែលបានស្ងើចសរសើរប្រទេសកម្ពុជា ដែល​មានទីលានវាយកូនគោលស្ដង់ដារ ហើយមានទីក្រុងដ៏ទំនើប ពោលគឺជា​ប្រទេសមា​ន​ការ​អភិវឌ្ឍ និងរីកចម្រើន ជាមួយវប្បធម៌ដ៏អស្ចារ្យ និងមានម្ហូបអាហារដ៏ឆ្ងុយឆ្ងាញ់ទៀតផង៕ អត្ថបទ លី ឈុនឡា

អ្នកចាំទីដៃទីពីររបស់ Man City, James Trafford ប្រកាសចង់ចាកចេញពីក្លិប

2025/12/03 10:17:18 pm        223
Facebook Telegram Linkin
អ្នកចាំទីដៃទីពីររបស់ក្លិបបាល់ទាត់ Manchester City, James Trafford បានប្រកាសពីគោលបំណងចង់ចាកចេញពីក្លិប។សារព័ត៌មាន Daily Mail បានចុះផ្សាយថា កីឡាករអង់គ្លេសរូបនេះចង់ចាកចេញនៅពេលទីផ្សារដោះដូរកីឡាករ បើកចំហរម្តងទៀតនៅខែមករាខាងមុខ។ James Trafford ធ្លាប់ជាកីឡាករថ្នាលរបស់ City និងបានវិលត្រលប់មកវិញក្រោយចាកចេញ ៨ ឆ្នាំពីក្លិបបាល់ទាត់ Burnley ខណៈការត្រលប់មកវិញនេះស្ថិតក្នុងតម្លៃផ្ទេរ ២៧ លានផោន និងត្រូវបានប្រាប់ថាជាជម្រើសទីមួយសម្រាប់ក្រុម ជំនួសតំណែងអ្នកចាំទីប្រេស៊ីល Ederdon ដែលចាកចេញ។យ៉ាងណាក្តីអ្នកចាំទីដៃស្អិតរបស់អ៊ីតាលី Gianluigi Donnarumma បានផ្ទេរពី Paris Saint Germain ក្នុងថ្ងៃចុងក្រោយនៃទីផ្សារដោះដូរកីឡាកររដូវក្តៅកន្លងទៅ ហើយ City ក៏បានប្រើប្រាស់កីឡាករអ៊ីតាលីរូបនេះគ្រប់ការប្រកួតទាំងអស់នៅ Premier League រដូវកាលនេះ។ កីឡាករវ័យ ២៣ ឆ្នាំរូបនេះ ចង់ចាកចេញពីក្លិបដើម្បីឱកាសលេងបាល់ក្រុមដំបូង ក្នុងគោលដៅមានកៅអីនៅក្រុមជម្រើសជាតិអង់គ្លេសប្រជែងជាមួយកីឡាករដៃទីមួយ Jordan Pickford៕អត្ថបទ៖នាង សុភាវុធ

Erling Haaland ក្លាយជាកីឡាករដំបូងស៊ុតបាន ១០០ គ្រាប់លឿនបំផុតនៅ Premier League

2025/12/03 10:09:21 pm        214
Facebook Telegram Linkin
ខ្សែប្រយុទ្ធ Manchester City, Erling Haaland បានបំបែកប្រវត្តិសាស្រ្ត Premier League កីឡាករដែលស៊ុតបញ្ចូលទីដល់ ១០០ គ្រាប់លឿនបំផុត បន្ទាប់ពីរកបានមួយគ្រាប់ក្នុងជ័យជំនះរបស់ City ៥-៤ នៅទឹកដី Fulham។អតីតខ្សែប្រយុទ្ធ Dortmund រូបនេះរកបានគ្រាប់នាំមុខដំបូងនៅនាទីទី ១៧ ខណៈ Phil Foden រកបានពីរគ្រាប់ម្នាក់ឯង បូកនឹងមួយគ្រាប់របស់ Tijani Reijinders និងមួយគ្រាប់ចូលទីខ្លួនឯងរបស់ Sander Berg។ ក្រុមរបស់លោក Pep Guardiola បាននាំមុខលើ Fulham ៥-១ គិតត្រឹមនាទីទី ៥៤ តែក្រុមម្ចាស់ផ្ទះព្យាយាមវាយបកស្ទើតែបានសម្រេចទៅហើយខណៈដែលពួកគេរកបានបីគ្រាប់តាមពីក្រោយដោយ Iwobi និងកីឡាករបម្រុង Samuel Chukwueze រកបានពីរគ្រាប់ម្នាក់ឯង ខណៈការប្រកួតបញ្ចប់ដោយ Manchester City ឈ្នះយ៉ាងប្រផិតប្រផើយ ៥-៤។ ងាកមក Erling Haaland មួយគ្រាប់បើកការនាំមុខនោះ បានធ្វើឱ្យគេក្លាយជាដែលរកបាន ១០០ គ្រាប់លឿនបំផុតនៅ​ Premier League ពោលគឺបង្ហាញខ្លួន ១១១ លើករកបាន ១០០ គ្រាប់ បំបែកកំណត់ត្រាចាស់របស់ Alan Shearer ដែលរកបាន ១០០ គ្រាប់ក្នុង ១២៤ ប្រកួតដំបូង។ Manchester City បានយកឈ្នះ Fulham ១៩ ប្រកួតចុងក្រោយដែលពួកគេជួបគ្នាពោលគឺរាប់តាំងពីឆ្នាំ ២០១២​ ដែលជាកំណត់ត្រាមួយទល់មួយរយៈពេលវែងបំផុតក្នុងប្រវត្តិសាស្រ្តបាល់ទាត់អង់គ្លេសផងដែរ៕ អត្ថបទ៖នាង សុភាវុធ

ជើងឯក ៨ សម័យ Ronnie O’Sullivan ចាញ់កីឡាករចិន Zhou Yuelong ធ្លាក់ជុំដំបូង UK Championship

2025/12/03 09:59:18 pm        148
Facebook Telegram Linkin
កីឡាករស្នូកឃ័រជើងឯក ៨ សម័យ UK Championship Ronnie O’Sullivan បានធ្លាក់ត្រឹមជុំដំបូងគួរឱ្យភ្ញាក់ផ្អើលក្រោយចាញ់កីឡាករចិន Zhou Yuelong។ Ronnie O’Sullivan ដែលនឹងឈានចូលវ័យ ៥០ ឆ្នាំនៅថ្ងៃសុក្រនេះ បានចូលរួមការប្រកួតដំបូងក្រោយអវត្តមានជាច្រើនកម្មវិធី ពោលគឺតាំងពីចាញ់កីឡាករចិន Zhao Xintong នៅវគ្គពាក់កណ្តាលផ្តាច់ព្រ័ត្រស្នូកឃ័រពិភពលោកកាលពីខែឧសភា។ទោះបីជាមានជ័យជំនះបួនហ្វ្រេមឈ្នះដាច់ O’Sullivan ក៏បរាជ័យបួនហ្វ្រេមផ្សេងទៀតដោយសារគ្រាប់ខ្មៅចុងក្រោយ។Zhou Yuelong ដែលបច្ចុប្បន្នឈរលេខ ២៩ ពិភពលោកមានការប្រកួតដ៏ល្អរបស់ខ្លួនផងដែរដោយបានយកឈ្នះលទ្ធផលចុងក្រោយ ៦-៤ ហ្វ្រេម ពោលគឺហ្វ្រមចុងក្រោយមុនឈ្នះនោះ គឺបានវាយបកពីការនាំមុខរបស់ជើងចាស់អង់គ្លេសរូបនេះ។ងាកមកលទ្ធផលផ្សេងទៀត ក៏មានការភ្ញាក់ផ្អើលផងដែរដោយកីឡាករលេខពីរពិភពលោក Kyren Wilson ដែលជាជើងឯកពិភពលោកឆ្នាំមុននោះ ក៏ធ្លាក់ត្រឹមជុំដំបូងដែរក្រោយចាញ់ Elliot Slessor ៦-៤ ហ្វ្រេម។ យ៉ាងណាក្តីជើងឯកពីរសម័យនៅ UK Championship នេះ Mark Selby មិនមានបញ្ហាឡើយដោយយកឈ្នះកីឡាករចិន Lei Peifan ៦-២៕ អត្ថបទ៖នាង សុភាវុធ

បណ្ដាញសង្គម

ព័ត៌មានថ្មីៗ

អ៊ីរ៉ង់និយាយថា ខ្លួននឹងបញ្ឈប់ការវាយប្រហារដរាបណាការផ្អាកការទម្លាក់គ្រាប់បែករបស់អាមេរិកនៅតែបន្ត
07/27/2026 08:07 AM
Facebook Telegram Linkin
លោក Zelenskiy ៖ រុស្ស៊ីចង់ជ្រើសរើសទាហាន ៣ម៉ឺននាក់ ពីកូរ៉េខាងជើង
07/26/2026 02:07 PM
Facebook Telegram Linkin
មន្ទីរសាធារណការខេត្តកំពង់ស្ពឺ កំពុង​ពន្លឿន​ជួសជុល និងថែទាំកំណាត់ផ្លូវដែលកំពុងរងការខូចខាតឱ្យប្រសើរឡើងវិញ
07/26/2026 02:07 PM
Facebook Telegram Linkin
គណៈកម្មាធិការគណបក្សប្រជាជនកម្ពុជាឃុំកណ្តឹងស្រុកបាទី ផ្សព្វផ្សាយសេចក្តីសម្រេចស្តីពីផែនការរួម ឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៦ ឆ្នាំ ២០២៧
07/26/2026 02:07 PM
Facebook Telegram Linkin
គណៈកម្មាធិការគណបក្សប្រជាជាជនកម្ពុជារាជធានីភ្នំពេញ ប្រកាសបញ្ចូលជាសមាជិកថ្មីជិត ៣០០០នាក់នៅខណ្ឌព្រែកព្នៅ
07/26/2026 02:07 PM
Facebook Telegram Linkin
បណ្ដេញជនជាតិថៃ ៣៩នាក់ ចេញពីកម្ពុជាពាក់ព័ន្ធបទល្មើសចូលដោយទុច្ចរិតក្នុងទីលានយោធា និងលួចឆ្លងដែនដោយខុសច្បាប់
07/26/2026 02:07 PM
Facebook Telegram Linkin
ចំនួនមនុស្សស្លាប់ដោយសារជំងឺអេបូឡានៅប្រទេសកុងហ្គោកើនឡើងដល់ជាង ១.៣០០នាក់
07/26/2026 01:07 PM
Facebook Telegram Linkin
មនុស្សម្នាក់ស្លាប់ និង ១៥នាក់ រងរបួស ក្រោយរថយន្តមួយគ្រឿងបើកបុកហ្វូងមនុស្សនៅព្យុហយាត្រាឥន្ទធនូក្រុងប៊ែរឡាំង
07/26/2026 01:07 PM
Facebook Telegram Linkin
សមត្ថកិច្ចកម្ពុជាបណ្ដេញជនជាតិចិន ១៥៨នាក់ ចេញពីកម្ពុជាពាក់ព័ន្ធករណី Online Scams និងបទល្មើសផ្សេងៗ
07/26/2026 12:07 PM
Facebook Telegram Linkin
កម្ពុជាចូលរួមសន្និសីទជាន់ខ្ពស់នៃឧត្តមភាគីចុះកិច្ចព្រមព្រៀងនៃសន្ធិសញ្ញាមិត្តភាព និងសហប្រតិបត្តិការនៅតំបន់អាស៊ីអាគ្នេយ៍
07/26/2026 12:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.