BTV NEWS

Kazuyoshi Miura កីឡាករបាល់ទាត់អាជីពវ័យចំណាស់បំផុតស៊ុតបញ្ចូលទីជាលើកដំបូងក្នុងរយៈពេលជិត ៤ឆ្នាំ នៅវ័យ ៥៩ឆ្នាំ

វីរបុរស World Cup របស់កាប់វែរ Vozinha ព្រមព្រៀងផ្ទេរទៅកាន់ក្លិប Colo-Colo របស់ស៊ីលី

សារដ៏ចម្រូងចម្រាស «The Malvinas are Argentine» ត្រូវបានបោះពុម្ពផ្សាយដោយឥតគិតថ្លៃនៅអាហ្សង់ទីន

ក្រុម ស.ស.យ.ក អលស្ដារ គ្រោងរៀបចំការប្រកួតសប្បុរសធម៌ នាចុងខែសីហា ក្រោយជំនួបមិត្តភាពផ្លូវការលើកដំបូង

ព័ត៌មានកីឡា

ម៉ារ៉ាតុងទីក្រុងឡុងដ៍បំបែកកំណត់ត្រាមានអ្នកបញ្ចប់ទីច្រើនបំផុត

ព្រឹត្តិការណ៍រត់ម៉ារ៉ាតុងអន្តរជាតិទីក្រុងឡុងដ៍ចក្រភពអង់គ្លេសឆ្នាំ ២០២៥ បានបំបែកកំណត់ត្រាពិភពលោកដោយមានចំនួនអ្នកបញ្ចប់ទីច្រើនបំផុត។ ព្រឹត្តិការណ៍ម៉ារ៉ាតុងទីក្រុងឡុងដ៍លើកទី ៤៥ ដែលប្រព្រឹត្តទៅកាលពីថ្ងៃអាទិត្យចុងសប្តាហ៍កន្លងទៅមានអ្នករត់ដល់ទីព្រ័ត្រពេញម៉ារ៉ាតុង ៤២.១៩៥ គីឡូម៉ែត្រដល់ទៅ ៥៦៦៤០ នាក់ ដែលចំនួននេះជាកំណត់ត្រាពិភពលោកថ្មីទទួលស្គាល់ដោយ Guinness World Record។ កំណត់ត្រាចាស់ម៉ារ៉ាតុងដែលមានអ្នករត់បញ្ចប់ទីច្រើនបំផុតពីមុនគឺ ៥៥៦៤៦ នាក់នៅម៉ារ៉ាតុងទីក្រុងញូយ៉កសហរដ្ឋអាមេរិកកាលពីខែវិច្ឆិកាឆ្នាំមុន។ ប្រធានគណៈកម្មាធិការរៀបចំព្រឹត្តិការណ៍ម៉ារ៉ាតុងទីក្រុងឡុងដ៍លោក Hugh Brasher បានបង្ហាញក្តីសង្ឃឹមថា ចំនួនអ្នកបញ្ចប់ទីជាកំណត់ត្រាពិភពលោកថ្មីនេះ នឹងទាក់ទាញអ្នកចូលរួមកាន់តែច្រើននៅឆ្នាំក្រោយ។ ម៉ារ៉ាតុងទីក្រុងឡុងដ៍ជាព្រឹត្តិការណ៍ម៉ារ៉ាតុងដែលមានប្រជាប្រិយភាពជាងគេស្រាប់ទៅហើយ ដោយមានអ្នកចូលរួមសរុបឆ្នាំនេះ ៨៤០៣១៨ នាក់ ដែលជាចំនួនច្រើនបំផុតបំបែកកំណត់ត្រាឆ្នាំចាស់ដែលមានអ្នកចូលរួមសរុបត្រឹម ៥៧៨៣០៤ នាក់ប៉ុណ្ណោះ។ កីឡាការិនីសញ្ជាតិអេចូពី Tigst Assefa ជាអ្នកទទួលបានជ័យជំនះក្នុងការរត់ប្រណាំងផ្នែកនារី ខណៈផ្នែកបុរសបានទៅកីឡាករកេនយ៉ា Sebastian Sawe៕អត្ថបទ៖នាង សុភាវុធ

ទីក្រុង Madrid ប្រទេសអេស្ប៉ាញបង្ហាញទីលានប្រណាំង Formula One របស់ខ្លួនសម្រាប់ឆ្នាំ ២០២៦

ទីក្រុង Madrid ប្រទេសអេស្ប៉ាញបានដាក់បង្ហាញទីលានប្រណាំងថ្មីដែលមានឈ្មោះថា 'Madring' សម្រាប់រដូវកាល Formula One ឆ្នាំ ២០២៦ ជាមួយនឹងការងារសាងសង់នឹងចាប់ផ្តើមក្នុងពេលឆាប់ៗនេះ។ ទីលានថ្មីនេះនឹងមាន ២២ ផ្លូវបត់ក្នុងចម្ងាយ ៥.៤ គីឡូម៉ែត្រ ជាមួយនឹងពេលវេលាប្រណាំងក្នុងមួយជុំជាមធ្យម ១ នាទី ៣៤ វិនាទី និងល្បឿនអតិបរមា ៣០០ គីឡូម៉ែត្រក្នុងមួយម៉ោង។ អាជ្ញាធរមូលដ្ឋានបាននិយាយថា អាជ្ញាប័ណ្ណ និងឯកសារបានត្រៀមរួចរាល់ហើយចាសម្រាប់ការងារសាងសង់ចាប់ផ្តើម។ ក្រុមហ៊ុនវិស្វកម្មអេស្បាញ Acciona ANA.MC និងគូប្រជែងបារាំង Eiffage FOUG.PA បានឈ្នះកិច្ចសន្យាសាងសង់ទីលាននេះរួមគ្នា។ Acciona បានឱ្យដឹងថា ការសាងសង់ផ្លូវប្រណាំងប្រវែង ៥.៤៧ គីឡូម៉ែត្រ នៅក្នុងតំបន់ទីក្រុងមួយនៅភាគឦសាននៃទីក្រុង Madrid ជុំវិញមជ្ឈមណ្ឌលតាំងពិព័រណ៍ IFEMA ត្រូវបានគេរំពឹងថានឹងបញ្ចប់នៅខែឧសភា ឆ្នាំ ២០២៦ និងចំណាយថវិកាអស់ ៨៣.២ លានអឺរ៉ូ រឺ ៩៤.៥៧ លានដុល្លារអាមេរិក។ ការដាក់បញ្ចូលទីលានថ្មីដែលព្រំដែនទីក្រុងម៉ាឌ្រីដ គឺជាផ្នែកមួយនៃនិន្នាការប្រណាំងរថយន្ត Formula1 បច្ចុប្បន្នក្នុងការព្យាយាមយកការប្រណាំងទៅតំបន់ប្រជុំជនដែលមានប្រជាជនរស់នៅច្រើន ដែលរួមបញ្ចូលទាំងកម្មវិធីកំសាន្តនានាអំឡុងសប្តាហ៍នៃព្រឹត្តិការណ៍ Grand Prix។ កន្លងមក F1 បានបញ្ចូលការប្រណាំងនៅតំបន់ប្រជុំជន ជាការប្រណាំងនៅលើផ្លូវសាធារណក្នុងទីក្រុងរួមមានដូចជា Las Vegas , Jeddah, Miami's Hard Rock Stadium និង Marina Bay របស់ប្រទេសសិង្ហបុរី។ ទីលានប្រណាំងថ្មីនៅ Madrid នឹងជំនួសទីលាន Circuit de Catalunya របស់ Barcelona ដែលបច្ចុប្បន្នជាម្ចាស់ផ្ទះនៃកម្មវិធី Spanish Grand Prix ដែលស្ថិតនៅចម្ងាយប្រហែល ៣២ គីឡូម៉ែត្រពីទីក្រុងកំពង់ផែភាគខាងកើត៕ អត្ថបទ៖នាង សុភាវុធ

ប្រធានក្លឹបព្រះខ័នរាជស្វាយរៀង នឹងផ្ដល់ជូនសំបុត្រ និងវត្ថុអនុស្សាវរីយ៍ដល់អ្នកសារព័ត៌មានកីឡា

ឯកឧត្ដម ឌី វិជ្ជា ប្រធានក្លឹបព្រះខ័នរាជស្វាយរៀង បានជម្រាបជូនដល់បងប្អូនសារព័ត៌មានកីឡាទាំងអស់ថាឯកឧត្ដមនឹងផ្តល់ជូនសំបុត្រទស្សនាការប្រកួតវគ្គផ្តាច់ព្រ័ត្រ AFC Challenge League ក្នុងម្នាក់ចំនួន ២សំបុត្រ រួមទាំងកន្សែងក្លិបបាល់ទាត់ព្រះខ័នរាជស្វាយរៀង សម្រាប់ចូលរួមទស្សនា និងផ្សព្វផ្សាយពីសកម្មភាពនានា ក្នុងការប្រកួតវគ្គផ្តាច់ព្រ័ត្រ ថ្ងៃទី១០ ខែឧសភា ឆ្នាំ២០២៥ នាពេលខាងមុខនេះ។ ដូច្នោះសូមបងប្អូនអញ្ជើញចុះឈ្មោះជាមួយក្រុមការងារផ្សព្វផ្សាយរបស់ក្លិប ដើម្បីទទួលបានការផ្តល់ជូនខាងលើ៕

ទ្រីយ៉ាត្លុងកម្ពុជា ត្រៀមកីឡាករ ២រូប ចូលរួមប្រកួតកីឡាយុវជនអាស៊ី លើកទី៣ នៅបារ៉ែន

សហព័ន្ធកីឡាទ្រីយ៉ាត្លុងកម្ពុជា បានត្រៀមកីឡាករយុវជនអាយុក្រោម ១៧ឆ្នាំចំនួន ២នាក់ ដើម្បីត្រៀមចូលរួមប្រកួតកីឡាយុវជនអាស៊ី លើកទី៣ ឆ្នាំ២០២៥ នៅប្រទេសបារ៉ែន ដែលគ្រោងនឹងធ្វើឡើងនៅពីថ្ងៃទី២២ ដល់ថ្ងៃទី៣១ ខែតុលា ឆ្នាំ២០២៥ ខាងមុខ ។ នេះបើតាមការបញ្ជាក់របស់លោក ងិន សុខបញ្ញា អគ្គលេខាធិការសហព័ន្ធ ។ លោកបញ្ជាក់ថា ក្នុងនាមម្ចាស់ផ្ទះព្រឹត្តិការណ៍កីឡាយុវជនអាស៊ី ៤ឆ្នាំម្ដងនេះ បារ៉ែន បានកំណត់កីឡាចំនួន ២១ប្រភេទ សម្រាប់ធ្វើការប្រកួត ក្នុងនោះក៏មានកីឡាទ្រីយ៉ាត្លុងផងដែរ ហើយកម្ពុជា ក៏បានត្រៀមកីឡាករថ្នាលរបស់ខ្លួន ២រូប ដើម្បីត្រៀមចូលរួមការប្រកួតនេះដែរ ។ យ៉ាងណាចំពោះថ្នាល ដែលនឹងទទួលបានឱកាសចូលរួមការប្រកួតនេះ នៅមិនទាន់ធ្វើការសម្រេចជ្រើសរើសនៅឡើយទេ ដ្បិតពួកគេទើបធ្វើការប្រមូលផ្ដុំហ្វឹកហាត់ កាលពីដើមខែមេសាកន្លងទៅ ក្រោមគម្រោងថវិការបស់ក្រសួងអប់រំ យុវជន និងកីឡា នៅក្នុងជំរំហ្វឹកហាត់របស់មជ្ឈមណ្ឌលជាតិហ្វឹកហ្វឺនកីឡា ។ តាមរយៈនេះ សហព័ន្ធបានជំរុញដល់កីឡាករថ្នាលទាំងអស់ ត្រូវខិតខំយកចិត្តទុកដាក់ក្នុងការហ្វឹកហាត់ ដើម្បីអភិវឌ្ឍន៍សមត្ថភាព ក៏ដូចជាមានឱកាសក្លាយជាអត្តពលិកតំណាងជាតិ ចូលរួមការប្រកួតកីឡាយុវជនអាស៊ី លើកទី៣ នៅប្រទេសបារ៉ែន ដែលសហព័ន្ធគ្រោងនឹងសម្រេចក្នុងការជ្រើសរើសនាពេលឆាប់ៗ ដើម្បីធ្វើការចុះឈ្មោះកំឡុងខែឧសភាខាងមុខ។ គួរដឹងថា ការប្រកួតកីឡាយុវជនអាស៊ី លើកទី៣ នៅប្រទេសបារ៉ែន នាខែតុលាខាងមុខ ក្នុងចំណោមកីឡា ២១ប្រភេទ កម្ពុជាត្រៀមបញ្ជូនអត្តពលិក ១៧ប្រភេទចូលរួម ក្នុងនោះក៏មានកីឡាទ្រីយ៉ាត្លុងផងដែរ ។ ក្រៅពីចូលរួមការប្រកួតប្រជែងមេដាយជូនជាតិ កម្ពុជាក៏ត្រៀមប្រតិភូពិសេស អមដោយក្រុមសិល្បៈនៃក្រសួងវប្បធម៌ និងវិចិត្រសិល្បៈ ដើម្បីសម្ដែងអបអរសាទរពិធីទទួលទង់ធ្វើម្ចាស់ផ្ទះកីឡាយុវជនអាស៊ី ឆ្នាំ២០២៩ បន្ទាប់ពីប្រទេសបារ៉ែនផងដែរ៕ អត្ថបទ លី ឈុនឡា, រូបភាពពាក់ព័ន្ធ ៕

Alexander Zverev ត្រូវព្រមានក្រោយប្រើទូរស័ព្ទដៃថតខ្សែបន្ទាត់ មុនពេលយកឈ្នះ Davidovich Fokina

កីឡាករវាយកូនបាល់អាល្លឺម៉ង់ Alexander Zverev ត្រូវបានទទួលការព្រមានពីអាជ្ញាកណ្តាល បន្ទាប់ប្រើប្រាស់ទូរស័ព្ទដៃថតខ្សែបន្ទាត់មុនពេលវាយបកយកឈ្នះកីឡាករអេស្ប៉ាញ Davidovich Fokina ២-៦ ៧-៦(៧-៣) និង ៧-៦ (៧-០) ឡើងវគ្គ ១៦ នាក់ចុងក្រោយ Madrid Open។ កីឡាករលំដាប់លេខពីរពិភពលោករូបនេះ បានផ្ទុះការតវ៉ាជាមួយអាជ្ញាកណ្តាលនៅហ្គេមទី ១០ នៃសិតទីពីរ ដោយនិយាយថាគ្រាប់បាល់របស់ Fokina ចេញក្រៅខ្សែបន្ទាត់ ហៅប្រព័ន្ធចាប់បាល់ចេញក្រៅប្រហែលមានកំហុស។ អាជ្ញាកណ្តាលបានព្រមាន Zverev សម្រាប់កាយវិការមិនសមជាអ្នកកីឡា តែកីឡាករវ័យ ២៨ ឆ្នាំរូបនេះបានទុករឿងនេះមួយឡែក ដើម្បីយកឈ្នះការប្រកួតនេះ។ Madrid Open ជាកម្មវិធីមួយក្នុងចំណោមកម្មវិធីទាំងអស់របស់ ATP ដែលត្រូវបានលុបចោលការប្រើប្រាស់អាជ្ញាកណ្តាលខ្សែបន្ទាត់ ជំនួសវិញដោយប្រព័ន្ធខ្សែបន្ទាត់អេឡិចត្រូនិចដើម្បីចាប់គ្រាប់ចេញរឺចូល។ យ៉ាងណាក្តី ព្រឹត្តិការណ៍ Grand Slam, French Open ដែលចាន់ផ្តើមនៅខែក្រោយ នៅតែបន្តប្រើប្រាស់អាជ្ញាកណ្តាលខ្សែបន្ទាត់នៅឡើយ។ ងាកមកលទ្ធផលផ្សេងទៀត កីឡាកររុស្ស៊ី Daniil Medvedev បានយកឈ្នះកីឡាករអាហ្សង់ទីន Juan Manuel Cerundulo ដែលមកពីវគ្គជម្រុះ ៦-២ និង ៦-២ ខណៈដែលកីឡាករកាហ្សាក់ស្ថាន Alexander Bublik យកឈ្នះកីឡាកររុស្ស៊ី Andrey Rublev ៦-៤ ០-៦ និង ៦-៤៕អត្ថបទ៖នាង សុភាវុធ

Arne Slot អរគុណអ្នកចាត់ការមុនខណៈ Liverpool ឈ្នះជើងឯក Premier League ទី ២០ តាមស្មើកំណត់ត្រា Manchester United

ក្រុមហង្សក្រហម Liverpool បានក្លាយជាជើងឯកក្របខណ្ឌកំពូលអង់គ្លេស Premier League ហើយបើទោះនៅសល់ ៤ ប្រកួតទៀតទើបចប់រដូវកាល ក្រោយវាយបកយកឈ្នះ Tottenham Hotspur ៥-១ នៅ Anfield។ នេះជាជើងឯកទី ២០ សម្រាប់ Liverpool តាមស្មើកំណត់ត្រារបស់ Manchester United ក្លាយជាក្លិបជោគជ័យពីរជោគជ័យបំផុតនៅអង់គ្លេស។ ជើងឯក ១៨ លើករបស់ Liverpool គឺឈ្នះមុនឆ្នាំ ១៩៩២ មុនពេលដែល Premier League ត្រូវបានផ្លាស់ប្តូរឈ្មោះពី First Division។ ត្រឹមឆ្នាំ ១៩៩២ នោះ Manchester United ឈ្នះជើងឯកសរុបត្រឹម ៧ លើកប៉ុណ្ណោះ ប្រៀបធៀបនឹង Liverpool ឈ្នះ ១៨ លើក ខណៈរជ្ជកាលជោគជ័យរបស់ហង្សក្រហមគឺនៅទសវត្សរិ៍ទី ៧០ និង ៨០ ពោលគឺឈ្នះជើងឯកសរុប ១១ លើកចន្លោះឆ្នាំ ១៩៧៣ ដល់ឆ្នាំ ១៩៩០។ ចំណែកជើងឯក ១៣ លើករបស់ Manchester United ក្រោយ ១៩៩២ គឺក្រោមការដឹកនាំរបស់ Sir Alex Ferguson ចាប់ផ្តើមពីឆ្នាំ ១៩៩៣ រហូតដល់ជើងឯកចុងក្រោយនៅឆ្នាំ ២០១៣ ជាឆ្នាំចុងក្រោយដែល Sir Alex Ferguson ចូលនិវត្តន៍។ ២០២៤-២៥ ជារដូវកាលដ៏ល្អមួយសម្រាប់ Liverpool ក្រោមការដឹកនាំរបស់អ្នកចាត់ការថ្មីលោក Arne Slot ដែលបន្តតំណែងពី Jurgen Klopp។ អ្នកចាត់ការថ្មីលោក Arne Slot បានថ្លែងអំណរគុណអ្នកចាត់មុនលោក Jurgen Klopp សម្រាប់ ដែលជាមនុស្សទីមួយផ្តល់សេចក្តីទុកចិត្តសម្រាប់លោកដើម្បីមកជំនួសតំណែងនៅ Anfield។ នៅពេលមកដល់ Anfield អ្វីៗសុទ្ធតែរៀបចំរួចហើយក្រោមការដឹកនាំរបស់ Klopp ដូច្នេះ ច្បាស់ណាថាជោគជ័យនៅពេលនេះ គឺជាចំណែករបស់ Klopp។ និយាយតែនៅ Premier League ៣៤ ប្រកួតកន្លងទៅនេះពួកគេឈ្នះ ២៥ ស្មើ ៧ ចាញ់ ២ ដាច់ក្រុមលេខពីរ Arsenal ១៥ ពិន្ទុ ចំពេលជារដូវកាលដ៏លំបាកមួយសម្រាប់ក្រុមការពារជើងឯក Manchester City ដែលកំពុងឈរលេខ ៤ ដែលកំពុងប្រជែងតំណែងកៅអី Champions League នៅឡើយ៕ អត្ថបទ៖នាង សុភាវុធ

Carlo Ancelotti នឹងចាប់ផ្តើមចរចារឿងដឹកនាំក្រុមជម្រើសជាតិប្រេស៊ីលមុន World Cup 2026

អ្នកចាត់ការ Real Madrid លោក Carlo Ancelotti នឹងចាប់ផ្តើមដំណើរការចរចាដឹកនាំក្រុមជម្រើសជាតិប្រេស៊ីល មុន World Cup 2026 ឆាប់ៗនេះ។ បុរសវ័យ ៦៥ ឆ្នាំអ៊ីតាលីរូបនេះ នឹងជួបជាមួយអ្នកតំណាងសហព័ន្ធកីឡាបាល់ទាត់ប្រេស៊ីលដើម្បីជជែកជុំវិញលទ្ធភាពនៃការផ្លាស់ប្តូរក្រុមជម្រើសជាតិប្រេស៊ីល។ លោក Ancelotti បានបញ្ជាក់ថា អនាគតរបស់លោកនឹងត្រូវយកមកពិភាក្សារក្រោយចប់រដូវកាលនេះ មិនមែនពេលនេះ នេះបើតាមការលើកក្រោយ Real Madrid ចាញ់ Barcelona ៣-២ បាត់បង់ពាន Copa del Rey ចុងសប្តាហ៍កន្លងទៅ។ យ៉ាងណាក្តី គេឃើញវត្តមានលោក Diego Fernandes តំណាងសហព័ន្ធបាល់ទាត់ប្រេស៊ីលមានមុខនៅការប្រកួតវគ្គផ្តាច់ព្រ័ត្រនៅទីក្រុង Seville កាលពីថ្ងៃសៅរ៍។ បើតាមសារព័ត៌មានអេស្ប៉ាញមួយចំនួនបានចុះផ្សាយថា លោក Carlo Ancelotti អាចនឹងចាកចេញពី Real Madrid មុនរដូវក្តៅខាងមុខ រឺមុន Club World Cup។ លោក Carlo Ancelotti បានស្ថិតក្នុងជម្រើសទីមួយរបស់សហព័ន្ធបាល់ទាត់ប្រេស៊ីល ក្នុងការមកកាន់តំណែងបន្តពីលោក Dorival Junior ដែលត្រូវបានបណ្តេញចេញក្រោយចាញ់អាហ្សង់ទីន ៤-១ កាលពីខែមុន។ ប្រេស៊ីលកំពុងឈរលេខបួនក្នុងតារាង នៃការប្រកួតជម្រុះ World Cup 2026 តំបន់អាមេរិកខាងត្បូង។ រំលឹកថាលោក Carlo Ancelotti ជាអ្នកចាត់ការជោគជ័យបំផុតម្នាក់ជាមួយក្លិបអាជីព ដោយធ្លាប់ដឹកនាំ Real Madrid ឈ្នះជើងឯក Champions League បីលើក La Liga ពីរលើក នៃអាជីពពីរលើកជាមួយ Real Madrid។ ពាក់ព័ន្ធនឹង Real Madrid ក៏ត្រូវបានគេដឹងថា ចាប់ផ្តើមរកអ្នកជំនួសតំណែងលោក Ancelotti ដែរ ខណៈដែល អ្នកចាត់ការ Leverkusen លោក Xabi Alonso គឺជាជម្រើសដំបូង៕អត្ថបទ៖នាង សុភាវុធ

Alex Marquez ឈ្នះការប្រណាំងម៉ូតូ GP លើកដំបូងក្នុងអាជីពក្នុងទឹកដីអេស្ប៉ាញរបស់ខ្លួន

កីឡាករប្រណាំងម៉ូតូអេស្ប៉ាញ Alex Marquez ដែលជាប្អូនប្រុសបង្កើតរបស់ជើងឯកពិភពលោក ៦ សម័យ Marc Marquez ទីបំផុតបានឈ្នះការប្រណាំងម៉ូតូ GP លើកដំបូងក្នុងអាជីព ក្រោយយកឈ្នះការប្រណាំងនៅទឹកដីអេស្ប៉ាញ។ កីឡាករវ័យ ២៩ ឆ្នាំរូបនេះ បានយកឈ្នះការប្រណាំងដ៏ល្អឥតខ្ចោះរបស់ខ្លួននៅ Spanish Grand Prix ដើម្បីឡើងនាំមុខគេក្នុងតារាងជើងឯកពិភពលោកក្រោយប្រណាំងបាន ៥ ទីលាននាំមុខលើបងប្រុង Marc Marquez។ កីឡាកររបស់ក្រុម Ducati-Gresini បានចេញដំណើរនៅលេខរៀងទីបួន មុនពេលមកដល់ទីព្រ័ត្រដាច់អ្នកលេខពីរ កីឡាកររបស់ក្រុម Yamaha, Fabio Quarteraro ដែលបានលេខពីរក្រោយវ៉ាកីឡាករអ៊ីតាលី Francesco Bagnaia។ ចំណែកឯបងប្រុស Marc Marquez ដែលឈ្នះបីទីលានក្នុងចំណោមបួនទីលានមុនការប្រណាំងនេះ មានការប៉ះទង្គិចជាមួយ Bagnaia ខ្ទាតចេញពីផ្លូវនៅជុំទីបី មុនពេលបន្តដំនើរបានវិញបញ្ចប់នៅចំណាត់ថ្នាក់លេខ ១២។ នេះជាការបង្ហាញខ្លួននៅម៉ូតូ GP រដូវកាលទី ៦ សម្រាប់ Alex Marquez តែមិនដែលឈ្នះការប្រណាំង Grand Prix ណាមួយនៅឡើយ តែជ័យជំនះលើកដំបូងនេះបានធ្វើឱ្យនាំមុខមួយពិន្ទុពីបងប្រុស Marc Marquez នៅក្នុងតារាងជើងឯកពិភពលោក ខណៈទីលានបន្ទាប់នឹងធ្វើនៅទឹកដីបារាំងចុងសប្តាហ៍ក្រោយ៕

Manchester City ឈ្នះ Nottingham ឡើងវគ្គផ្តាច់ព្រ័ត្រ FA Cup ជួប Crystal Palace

ក្រុមជើងឯក ៧ សម័យ Manchester City បានកក់កៅអីវគ្គផ្តាច់ព្រ័ត្រ FA Cup ហើយក្រោយយកឈ្នះ Nottingham Forest ២-០ ឡើងជួប Crystal Palace។ ក្រុមរបស់លោក Pep Guardiola មានរដូវកាលលំបាកមួយក្រោយមិនអាចការពារតំណែងជើងឯក Premier League បាន ក៏ដូចជាបរាជ័យនៅ League Cup និង Champions League។ យ៉ាងណាក្តី FA Cup ដែលជាពានតែមួយគត់ដែលពួកគេអាចឈ្នះនោះ Rico Lewis គឺជាអ្នកបើកការនាំមុខឱ្យ Manchester City តាំងពីនាទីទី ២ នៃការប្រកួតវគ្គពាក់កណ្តាលផ្តាច់ព្រ័ត្រនៅកីឡដ្ឋាន Wembley នេះ។ វគ្គទីពីរខ្សែការពារក្រូអាស៊ី Josko Gvardiol ជាអ្នកធានាគ្រាប់បាល់ជ័យជំនះឱ្យ City នៅនាទីទី ៥១។ ជ័យជំនះនេះធ្វើឱ្យ Manchester City បន្តដំណើរឡើងវគ្គផ្តាច់ព្រ័ត្រ FA Cup លើកទី ១៤ ដោយត្រូវជួបជាមួយ Crystal Palace ដែលបានយកឈ្នះ Aston Villa ៣-០ កាលពីថ្ងៃសៅរ៍។ ជាជ័យជំនះដ៏គួរឱ្យភ្ញាក់ផ្អើលមួយសម្រាប់ Crystal Palace លើក្រុមរបស់លោក Unai Emery បន្ទាប់ពីEberechi Eze បើកការនាំមុខឱ្យ Palace នៅនាទីទី ៣១។ Ismaila Sarr នៅវគ្គទីពីររកបានពីរគ្រាប់ម្នាក់ឯងនៅនាទីទី ៥៨ និង ៩០+៤ នាំ Crystal Palace ឡើងវគ្គផ្តាច់ព្រ័ត្រ FA Cup លើកទី ៣ បន្ទាប់ពីចុងក្រោយបំផុតនៅឆ្នាំ ២០១៦ ចាញ់បិសាចក្រហម Manchester United។ វគ្គផ្តាច់ព្រ័ត្រឆ្នាំនេះនឹងធ្វើឡើងនៅកីឡដ្ឋាន Wembley ដដែលថ្ងៃទី ១៧ ខែឧសភា៕

ជម្រើសជាតិតាហ្ស៊ីគីស្ថាន នឹងប្រកួតមិត្តភាពជាមួយកម្ពុជា មុនជម្រុះពានអាស៊ីជាមួយហ្វីលីពីន

ក្រុមបាល់ទាត់ជម្រើសជាតិប្រទេសតាហ្ស៊ីគីស្ថាន នឹងធ្វើដំណើរពីតំបន់អាស៊ីកណ្ដាលមកកាន់ព្រះរាជាណាចក្រកម្ពុជាដើម្បីប្រកួតមិត្តភាពអន្តរជាតិនៅដើមខែមិថុនាខាងមុខនេះ។ នេះបើយោងតាមសេចក្ដីជូនដំណឹងនៅក្នុងផេកហ្វេសប៊ុកផ្លូវការណ៍របស់សហព័ន្ធបាល់ទាត់តាហ្ស៊ីគីស្ថាន។សេចក្ដីជួនដំណឹងបញ្ជាក់ថាក្រុមបាល់ទាត់ជម្រើសជាតិតាហ្ស៊ីគីស្ថាន នឹងប្រកួតមិត្តភាពអន្តរជាតិជាមួយជម្រើសជាតិកម្ពុជា ដើម្បីត្រៀមលក្ខណៈសម្បត្តិប្រកួតជម្រុះពានរង្វាន់បាល់ទាត់ទ្វីបអាស៊ី២០២៧ ថ្ងៃទី៥ ខែមិថុនាឆ្នាំ២០២៥ នៅពហុកីឡដ្ឋានជាតិ រាជធានីភ្នំពេញ។ក្រោយការប្រកួត ជម្រើសជាតិតាហ្ស៊ីគីស្ថានត្រូវធ្វើដំណើរទៅកាន់ប្រទេសហ្វីលីពីនជួបជម្រើសជាតិហ្វីលីពីនជម្រុះពានអាស៊ី២០២៧ នៅទីក្រុងកាប៉ាស ក្នុងពហុកីឡដ្ឋាន New Clark City ជាទីដែលហ្វីលីពីនធ្វើម្ចាស់ស៊ីហ្គេមកាលពីឆ្នាំ២០១៩។លោក ឈូក ពិសិដ្ឋ អ្នកចាត់ការក្រុមជម្រើសជាតិកម្ពុជា បានប្រាប់ឱ្យដឹងកាលពីថ្ងៃទី២៣ ខែមេសាថា ពិតជាមានការប្រកួតនេះមែន។លោកបន្តថាតាមពិតទៅជម្រើសជាតិទាំងពីរបានជជែកគ្នាពីការប្រកួតមិត្តភាពអន្តរជាតិជាមួយគ្នាជាងមួយឆ្នាំហើយ តែមិនទាន់មានពេលសមស្រប ទើបតែពេលនេះ។សូមរម្លឹកថាពីរប្រកួតមិត្តភាពអន្តរជាតិផ្លូវការរបស់កម្ពុជាក្នុងហ្វីហ្វាដេ កាលពីខែមីនា កម្ពុជាចាញ់វៀតណាម ២ទល់នឹង១ក្រៅដី និងចាញ់អារួបា ២ទល់នឹង១ក្នុងដី។ចំណែក តាហ្ស៊ីគីស្ថានបើកយុទ្ធនាការជម្រុះពានរង្វាន់បាល់ទាត់ទ្វីបអាស៊ីជុំទី៣ក្នុងពូលA ដោយយកឈ្នះទីម័រខាងកើត ១ទល់នឹង០ នៅទឹកដីរបស់ខ្លួនទីក្រុងឌូស្ហាន់បេ។គិតត្រឹមពេលនេះ ក្រុមបាល់ទាត់ជម្រើសជាតិតាហ្ស៊ីគីស្ថានមានចំណាត់ថ្នាក់លេខ១០៤ និងកម្ពុជាមានចំណាត់ថ្នាក់លេខ១៨១ក្នុងតារាងចំណាត់ថ្នាក់បាល់ទាត់ពិភពលោករបស់ហ្វីហ្វា៕

បណ្ដាញសង្គម

ព័ត៌មានថ្មីៗ

ជនប៉ាឡេស្ទីនជម្លៀសខ្លួនស្វាគមន៍កងកម្លាំងអន្តរជាតិនៅហ្កាហ្សា និងអំពាវនាវឲ្យកសាងផ្ទះសម្បែងរបស់ពួកគេឡើងវិញ

ពលរដ្ឋវិលត្រឡប់ទៅកាន់តំបន់ភាគខាងត្បូងលីបង់វិញ ក្រោយការដកទ័ពរបស់អ៊ីស្រាអែល

ប្រធានាធិបតីហ្វីលីពីន លោក Marcos ប្រាប់ថា ប្រហែលដល់ពេលត្រូវពិនិត្យថាមពលនុយក្លេអ៊ែរឡើងវិញ

EU បញ្ចូនយន្តហោះ និងអ្នកពន្លត់អគ្គិភ័យទៅជួយទប់ទល់ចំហេះព្រៃ នៅបារាំង និងអេស្ប៉ាញ

ប្រធានាធិបតីអ៊ុយក្រែន ធ្វើដំណើរទៅដល់អង់គ្លេស សម្រាប់ជំនួបជាមួយលោកនាយករដ្ឋមន្រ្តី Burnham

ទីក្រុងប៉េកាំងជំរុញឱ្យសហរដ្ឋអាមេរិកឈប់គំរាមកំហែងដាក់ទណ្ឌកម្ម លើក្រុមហ៊ុន AI របស់ចិន

កងកម្លាំងអ៊ីស្រាអែល វាយប្រហារទីក្រុងជាច្រើននៅតំបន់វ៉េសប៊ែង ខណៈអំពើហិង្សាកាន់តែអាក្រក់ទៅ

អ្នកស្ម័គ្រចិត្តដំបូងទទួលវ៉ាក់សាំងបង្ការជំងឺអេបូឡា ជាផ្នែកមួយនៃការសាកល្បងរបស់សាកលវិទ្យាល័យ Oxford

សម្តេចរដ្ឋសភាធិបតី ឃួន សុដារី អញ្ជើញបំពេញទស្សនកិច្ចផ្លូវការ និងមិត្តភាពនៅសាធារណរដ្ឋសង្គមនិយមវៀតណាម

នគរបាលទីក្រុងប៊ែរឡាំង បាញ់សម្លាប់ជនសង្ស័យសំខាន់ ក្នុងការវាយប្រហារដ៏សាហាវ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877