BTV NEWS

ចម្លាក់ទេពអប្សរនៅប្រាសាទអង្គរ មានអាយុកាលជិត១ពាន់ឆ្នាំ បង្អួតសម្រស់ជាមួយភ្ញៀវទេសចរ

កម្ពុជាត្រៀមខ្លួនជាគោលដៅទេសចរណ៍មូស្លីមប្រកបដោយភាពកក់ក្ដៅ សុវត្ថិភាព និងទំនុកចិត្ត

រមណីយដ្ឋាន មរកត ម្លេច ខេត្តកំពតផ្តល់សេវាជិះសេះកម្សាន្តដល់ភ្ញៀវទេសចរ និងអ្នកស្នេហាកីឡាជិះសេះ

ក្រុមហ៊ុនអាកាសចរណ៍លំដាប់ពិភពលោក Etihad Airways បានចុះចតដោយជោគជ័យនៅអាកាសយានដ្ឋានអន្តរជាតិតេជោ

វប្បធម៌ និងទេសចរណ៍

មន្ត្រីជំនាញ នៃក្រសួងវប្បធម៌ កំពុងជួសជុលកុលាលភាជន៍ និងរៀបចំពិព័រណ៍ឡើងវិញនៅក្នុងសារមនី្ទរភូមិស្នាយ ខេត្តបន្ទាយមានជ័យ

មន្ត្រីជំនាញ នៃក្រសួងវប្បធម៌ និងវិចិត្រសិល្បៈ កំពុងជួសជុលកុលាលភាជន៍ និងរៀបចំពិព័រណ៍ឡើងវិញនៅក្នុងសារមនី្ទរភូមិស្នាយ ស្ថិតក្នុងភូមិទេពកោសា ឃុំរហាល ស្រុកព្រះនេត្រព្រះ ខេត្តបន្ទាយមានជ័យ។លោក ទេព សុខា ប្រធានការិយាល័យវិភាគ និងពិសោធន៍ នាយកដ្ឋានបុរាណវិទ្យា និងបុរេប្រវតិ្តវិទ្យា នៃក្រសួងវប្បធម៌ និងវិចិត្រសិល្បៈ ជាទូទៅធ្វើកិច្ចការអភិរក្ស និងជួសជុលកុលាលភាជន៍ រួមទាំងការបង្ហាត់បង្រៀន បណ្តុះបណ្តាលដល់និសិ្សត មហាវិទ្យាល័យបុរាណវិទ្យា នៃសាកលវិទ្យាល័យភូមិន្ទវិចិត្រសិល្បៈ និងមន្រី្តនៅតាមមនី្ទរវប្បធម៌ និងវិចិត្រសិល្បៈរាជធានី ខេត្ត បានថ្លែងប្រាប់BTV ព័ត៌មាន នាព្រឹកថ្ងៃទី១២ ខែកក្កដា ឆ្នាំ២០២៤នេះថា សារមនី្ទរភូមិស្នាយ ត្រូវបានកសាងនៅក្នុងឆ្នាំ២០០៧ ហើយវត្ថុសិល្បៈដែលរៀបចំដាក់តាំងពិព័រណ៍នៅក្នុងសារមនី្ទរនេះ គឺបានមកពីការធ្វើកំណាយនៅក្នុងស្ថានីយភូមិស្នាយ។ ក្នុងគោលបំណងអភិរក្សកុលាលភាជន៍ដែលមាននៅក្នុងសារមនី្ទរភូមិស្នាយ ដោយហេតុថាកុលាលភាជន៍ដែលសេសសល់ពីមុន មិនមានស្តង់ដា និងគ្មានគុណភាពល្អ ដែលបណ្តាលឲ្យកុលាលភាជន៍ខូច និងបាក់ស្រុតចុះក្រោម ក្លាយជាបំណែក។ ដូច្នេះក្រុមការងារមកពីក្រសួងវប្បធម៌ និងមនី្ទរវប្បធម៌ខេត្ត រួមនិងនិសិ្សត បានធ្វើការអភិរក្ស ជួសជុលកុលាលភាជន៍នេះឡើងវិញ ដើម្បីឲ្យប្រសើរ និងរៀបចំបើកពិព័រណ៍នៅក្នុងសារមនី្ទរភូមិស្នាយ។លោក ទេព សុខា បានបញ្ជាក់ទៀតថា ក្នុងឆ្នាំ២០២៤ មន្រី្តជំនាញរបស់យើងកំពុងខិតខំរៀបចំ សារមនី្ទរនានាឲ្យបានស្អាត ដែលមាននៅក្នុងខេត្តបន្ទាយមានជ័យ ដូចជា៖ សារមនី្ទរស្វាយចេក សារមនី្ទរបន្ទាយមានជ័យ និងសារមនី្ទរភូមិស្នាយ ជាពិសេសការងារដែលសំខាន់ និងជាស្នូល គឺយើងបានធ្វើការបណ្តុះបណ្តាលដល់មន្រី្ត សិស្ស និសិ្សត ដែលអាចធ្វើការអភិរក្ស ជួសជុលកុលាលភាជន៍ទៅថ្ងៃក្រោយបាន ដែលជាផ្នែកមួយជួយដល់ការអភិរក្ស មរតកវប្បធម៌ក្នុងព្រះរាជាណាចក្រកម្ពុជា ឲ្យបានល្អប្រសើរ៕ អត្ថបទ រដ្ឋា

ក្រសួងវប្បធម៌ និងវិចិត្រសិល្បៈនឹងរៀបចំមហោស្រពជាតិភាពយន្តខ្នាតខ្លីកម្ពុជា លើកទី៤ ឆ្នាំ២០២៤

នាយកដ្ឋានសិល្បៈភាពយន្ត និងផ្សព្វផ្សាយវប្បធម៌ ក្រសួងវប្បធម៌ និងវិចិត្រសិល្បៈ នឹងប្រារព្ធមហោស្រពជាតិភាពយន្តខ្នាតខ្លីកម្ពុជាលើកទី៤ ឆ្នាំ២០២៤ ក្រោមពាក្យស្លោក "ភាពយន្តខ្នាតខ្លីជាជំហានឆ្ពោះទៅ កាន់ភាពយន្តខ្លាតវែង" កាលបរិច្ឆេទរៀបចំពិធីបើកមហោស្រព នៅថ្ងៃទី២៥ ខែវិច្ឆិកា ឆ្នាំ២០២៤ និងពិធីបិទនៅថ្ងៃទី២៩ ខែវិច្ឆិកា ឆ្នាំ២០២៤ នៅសាលសន្និសីទចតុម្មុខ រាជធានីភ្នំពេញខាងមុខនេះ។បើតាមលោក ប៉ុក បូរក្ស ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ បានថ្លែងប្រាប់BTV ព័ត៌មាន នារសៀលថ្ងៃទី១១ ខែកក្កដា ឆ្នាំ២០២៤នេះថា ក្នុងគោលបំណងជំរុញលើកទឹកចិត្តដល់យុវជនក្នុងការអភិវឌ្ឍសមត្ថភាព និងការបញ្ចេញគំនិតច្នៃប្រឌិត តាមរយៈអេក្រង់ ឬផ្ទាំងសំពត់ស ដែលជាជំហ៊ានក្លាយជាផលិតករភាពយន្ត ព្រមទាំងដើម្បីរួមចំណែកអភិវឌ្ឍវិស័យភាពយន្តជាតិ ក្រសួងវប្បធម៌និងវិចិត្រសិល្បៈ នឹងប្រារព្ធរៀបចំមហោស្រពជាតិភាពយន្តខ្នាតខ្លីកម្ពុជាលើកទី៤ ឆ្នាំ២០២៤ ក្រោមពាក្យស្លោក "ភាពយន្តខ្នាតខ្លីជាជំហានឆ្ពោះទៅកាន់ភាពយន្តខ្លាតវែង" តាមកាលបរិច្ឆេទខ្លឹមសារលក្ខ ខណ្ឌ ចូលរួម និងគោលការណ៍វិនិច្ឆ័យដូចខាងក្រោម៖ ខ្លឹមសារគោលនៃរឿង ១.វប្បធម៌ / ការអភិវឌ្ឍសង្គម ខ្លឹមសារនៃសាច់រឿងត្រូវឆ្លុះបញ្ចាំងពីទិដ្ឋភាពសង្គម និងបង្កប់ដោយអត្តសញ្ញាណជាតិ រួមមាន៖ ចំណេះដឹង ជំនឿសាសនា សិល្បៈប្រពៃណីទំនៀមទម្លាប់ ដែលទាក់ទងទៅនឹងជីវិតរស់នៅប្រចាំថ្ងៃរបស់ប្រជាជន។ ភាពច្នៃប្រឌិតនិងការបង្កើតថ្មី ផ្តោតលើភាពស្រមើស្រមៃ បំណងប្រាថ្នា អារម្មណ៍ផ្លូវចិត្ត ការស្រឡាញ់ និងទំនាក់ទំនងក្នុងសង្គម ដោយបង្កប់នូវគំនិតទស្សនវិជ្ជា និងបច្ចេកវិជ្ជាថ្មីៗ។សូមបញ្ជាក់ផងដែរថា កាលបរិច្ឆេទនៃការទទួលពាក្យចូលរួមប្រកួតប្រជែងចាប់ពីថ្ងៃជូនដំណឹងរហូតដល់ថ្ងៃទី៣០ ខែកញ្ញា ឆ្នាំ២០២៤ ដោយអ្នកស្នើសុំត្រូវភ្ជាប់មកជាមួយនូវ៖ ពាក្យស្នើសុំចូលរួមប្រកួតប្រជែង (Google Form), ស្នាដៃភាពយន្តខ្លីជាទម្រង់ MP4, វីដេអូ Trailer ជាទម្រង់ MP4 រយៈពេល៣០វិនាទី, រូបភាពសកម្មភាពនៃការផលិត ចំនួន០៤សន្លឹក ក្នុងទម្រង់ JPEG (High Resolution), រូបថតអ្នកដឹកនាំរឿង (Portrait) ចំនួន ០២សន្លឹកក្នុងទម្រង់ JPEG (High Resolution), រូបភាព Poster ចំនួន ០១សន្លឹកក្នុងទម្រង់ JPEG (High Resolution) សូមភ្ជាប់ឯកសារខាងលើ មកនាយកដ្ឋានសិល្បៈភាពយន្ត និងផ្សព្វផ្សាយវប្បធម៌ដោយផ្ទាល់បន្ទាប់ពីធ្វើការដាក់ពាក្យតាមរយៈ Google Form រួច។ពានរង្វាន់ក្នុងមហោស្រពជាតិភាពយន្តខ្នាតខ្លីកម្ពុជាលើកទី៤ រួមមាន៖ ពានជ័យលាភីលេខ១ (Gold Award) ទទួលបានពានមាស អមដោយថវិកា, ពានជ័យលាភីលេខ២ (Silver Award) ទទួលបានពានប្រាក់ អមដោយថវិកា, ពានជ័យលាភីលេខ៣ (Bronze Award) ទទួលបានពានសំរិទ្ធ អមដោយថវិកា, ពានរង្វាន់របស់មេប្រយោគ (Special Jury Award) ទទួលបានពាន អមដោយថវិកា និងពានរង្វាន់ទស្សនិកជន(Audience Award) ទទួលបានពាន៕ អត្ថបទ រដ្ឋា

សួនរុក្ខជាតិអង្គរ ទទួលបានពាន Traveller's Choice Awards Winner 2024 នាថ្ងៃនេះ

សួនរុក្ខជាតិអង្គរ ដែលគ្រប់គ្រងដោយអាជ្ញាធរជាតិអប្សរា ទទួបានពាន Traveller's Choice Awards Winner 2024 ពីគេហទំព័រទេចរណ៍ដ៏ល្បីឈ្មោះTripAdvisor នៅថ្ងៃទី១០ ខែកក្កដា ២០២៤នេះ។សួនរុក្ខជាតិនេះ មានទីតាំងស្ថិតនៅតាមបណ្ដោយរុក្ខវិថីព្រះសីហនុ ក្នុងក្រុងសៀមរាប ខេត្តសៀមរាប ឆ្ពោះទៅប្រាសាទអង្គរ។ សួនរុក្ខជាតិអង្គរ ដំបូងឡើយមានឈ្មោះថា «សួនគ្រឿងទេស» បង្កើតឡើងពីឆ្នាំ២០០៥ ដែលកាលណោះមានផ្ទៃដីប្រមាណ ២ហិកតាប៉ុណ្ណោះ។នាថ្ងៃទី១៩ ខែឧសភា ឆ្នាំ២០២២ សួនរុក្ខជាតិអង្គរដែលមានទំហំផ្ទៃដីជាង ១៥ហិកតា ក៏ត្រូវបានបើកសម្ពោធជាផ្លូវការ ដោយបានក្លាយជាសមិទ្ធផលទេសចរណ៍បន្ថែម នៅក្នុងក្រុងសៀមរាប ដែលអាជ្ញាធរជាតិអប្សរាបានបង្កើតឡើង ដោយមានដាំរុក្ខជាតិចម្រុះរាប់ម៉ឺនដើមនៃពូជជាង ៥០០ប្រភេទ ដូចជា ដើមផ្កា ស្មៅ ឈើហូបផ្លែ ដោយអាចចាត់ទុកថា ជាសួនមានលក្ខណៈពិសេសលើសសួនកម្សាន្តដទៃទៀតនៅប្រទេសកម្ពុជា ដោយសារតែសួននេះ ស្ថិតក្នុងរចនាបទបែបខ្មែរ មានដាំបន្លែចម្រុះជាច្រើនមុខ មានសួនរុក្ខជាតិធ្វើឱសថ សួនគ្រឿងទេស សួនអម្បូរត្នោត សួនលំនៅដ្ឋានខ្មែរ សួនព្រៃឈើនិងបន្ថែមលើនេះ ក៏មានសួនសត្វជាច្រើនប្រភេទ ដូចជា អណ្តើក ក្ងោក ព្រាប ទន្សាយ និងសត្វស្លាបព្វាំងជាដើម។កាលពីខែមីនា ឆ្នាំ២០២៤ អាជ្ញាធរជាតិអប្សរាបានគម្រោងពង្រីកសួនរុក្ខជាតិអង្គរ នេះរហូតដល់ទំហំជាង ១៥០ហិកតា ដោយធ្វើរបងសម្រាប់ដោះលែងសត្វព្រៃ និងការពារព្រៃឈើ រៀបចំផ្លូវដើរ ស្ពានថ្មើរជើងសម្រាប់ទេសចរដើរកម្សាន្តក្នុងព្រៃធម្មជាតិផងដែរ៕

អ្នកប្រកបរបរវិស័យសណ្ឋាគារ និងបដិសណ្ឋារកិច្ចបង្ហាញពីតម្រូវការកម្លាំងពលកម្មជំនាញលើវិស័យនេះ

ស្របពេលដែលក្រសួងការងារ និងបណ្ដុះបណ្ដាលវិជ្ជាជីវៈ បានបង្ហាញពីតម្រូវការកម្លាំងពលកម្មជាច្រើនម៉ឺនកន្លែង។ ម្ចាស់អាជីវកម្មក្នុងវិស័យទេសចរណ៍ និងសណ្ឋាគារ បានឲ្យដឹងពីបញ្ហាប្រឈមក្នុងការជ្រើសរើសកម្លាំងពលកម្មជំនាញ និងខណៈភាគីពាក់ព័ន្ធទាំងវិស័យរដ្ឋ និងឯកជន បាននិងកំពុងរួមគ្នាដោះស្រាយផងដែរ។ជួបសម្ភាសន៍ជាមួយ លោកស្រី ខៃ ចិន្តា ដែលជាម្ចាស់សណ្ឋាគារចំនួន២កន្លែងផ្សេងគ្នា ទី១.ឈ្មោះ ទែរូ ស្ថិតនៅខេត្តរតនគិរី និងទី២.ឈ្មោះ សូរិយា ប៊ូរី ស្ថិតនៅកោះទ្រង់ ខេត្តក្រចេះ នៅព្រឹកថ្ងៃទី១០ កក្កដា ឆ្នាំ២០២៤នេះ នៅក្រុងភ្នំពេញ លោកស្រី បានឲ្យព័ត៌មាន ប៊ីធីវី ដឹងថា គិតមកដល់បច្ចុប្បន្ននេះ លោកស្រីប្រឡូកក្នុងវិស័យសណ្ឋាគារជិត៣០ឆ្នាំ ដោយទទួលបានបទពិសោធន៍ជាច្រើនក្នុងវិស័យមួយនេះ។ លោកស្រីបន្តថា ជាការកត់សម្គាល់ និងមើលឃើញកន្លងមក ការឆ្លើយតបក្នុងការជ្រើសរើសកម្លាំងពលកម្ម មិនថាតែវិស័យសណ្ឋាគារនោះទេ ពោលសឹងតែគ្រប់វិស័យ គឺពិតជាខ្វះខាតច្រើនមែនទែន ជាពិសេសកម្លាំងពលកម្មខាងផ្នែកចំណេះ និងជំនាញវិស័យសណ្ឋាគារ និងបដិសណ្ឋារកិច្ចនេះ។លោកស្រី បន្ថែមទៀតថា សព្វថ្ងៃនេះ កម្ពុជានៅមានកង្វះខាតកម្លាំងពលកម្មជំនាញជាច្រើនវិស័យ ដែលទាមទាឲ្យមានការចូលរួមទាំងអស់គ្នា ទាំងរដ្ឋនិងឯកជន ក៏ដូចជាយុវជន ដើម្បីរួមគ្នាឆ្លើយតបឲ្យកាន់តែល្អប្រសើរឡើងបន្ថែមទៀត ក្នុងការទាក់ទាញភ្ញៀវទេសចរណ៍ និងអ្នកវិនិយោគឲ្យចូលមកបណ្តាក់ទុននៅកម្ពុជា ដើម្បីបង្កើតឱកាសការងារជូនប្រជាពលរដ្ឋ។ដើម្បីឆ្លើយតបឲ្យបានល្អទៅនឹងតម្រូវការទីផ្សារការងារបច្ចុប្បន្ន និងទៅអនាគត លោកស្រី ខៃ ចិន្តា បានចែករំលែកជាសារបន្ថែមដល់សិស្ស និស្សិត យុវជន និងអ្នកស្វែងករកការងារថា បើយុវជនមិនទាន់មានកិច្ចការងារធ្វើ ឬកំពុងរៀនជំនាញទូទៅហើយ គួរតែបន្ថែមមុខជំនាញមួយថែមទៀត និងឲ្យចំគោលដៅ នោះឱកាសការងារ ក៏ដូចជាអាទិភាពក៏ខុសគ្នារវាងអ្នកមិនមានជំនាញផងដែរ។បើតាមក្រសួងការងារ និងបណ្ដុះបណ្ដាលវិជ្ជាជីវៈ បច្ចុប្បន្ននេះ កម្ពុជាមានតម្រូវការកម្លាំងពលកម្មចំនួនជាង ៤ម៉ឺន ៦ពាន់កន្លែង សម្រាប់បម្រើទៅលើវិស័យធំៗ ចំនួន៣ ក្នុងនោះ វិស័យឧស្សាហកម្ម មានតម្រូវការចំនួនជាង ៣ម៉ឺន ៤ពាន់កន្លែង , វិស័យសេវាកម្ម ចំនួនជាង ៤,៥០០កន្លែង និងវិស័យកសិកម្មមានចំនួនជាង ៧ពាន់កន្លែង៕ អត្ថបទ ឈិត បូរ៉ាវី

ក្រសួងទេសចរណ៍៖ ចរន្តទេសចរអន្តរជាតិមកទស្សនាកម្ពុជាបន្តងើបឡើងវិញ ក្នុងកម្រិតទាប

ក្នុងចន្លោះខែឧសភា ដល់ខែកញ្ញានេះ ជាទូទៅស្ថានភាពទេសចរណ៍កម្ពុជា គឺពុំសូវមានទេសចរជាតិ អន្តរជាតិដើរកម្សាន្តច្រើននោះទេ ដោយសារបញ្ហាមានភ្លៀងច្រើន ដែលគេតែងហៅថាជារដូវ Low Season ហើយបើតាមអ្នកនាំពាក្យក្រសួងទេសចរណ៍ ចរន្តទេសចរអន្តរជាតិមកទស្សនាកម្ពុជា ក្នុងអំឡុងពេលនេះ ហាក់មានកំណើនកើនឡើងគួរគត់សម្កាល់ ប៉ុន្ដែភ្ញៀវមិនសូវធ្វើដំណើរបម្លាស់ទីច្រើននោះទេ។ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានថ្លែងប្រាប់BTV នៅថ្ងៃទី១០ ខែកក្កដានេះថា កម្ពុជា នៅក្នុងអំឡុងពេលនេះ គឺមានភ្ញៀវទេសចរអន្តរជាតិមកទស្សនាកម្ពុជា មានកំណើនកើនឡើង ប៉ុន្តែកើនក្នុងកម្រិតទាប និងមិនអាចផ្គត់ផ្គង់តម្រូវការអាជីវកម្មទេសចរណ៍នៅកម្ពុជា បានគ្រប់សេចក្តីតម្រូវការ ខណៈភ្ញៀវទេសចរអន្តរជាតិ ដែលមកទស្សនានៅកម្ពុជា ក្នុងអំឡុងពេលនេះដែរ ភាគច្រើនមកទស្សនា ហាក់មិនសូវធ្វើដំណើរបម្លាស់ទីដើរទស្សនាច្រើននោះទេ។ឯកឧត្តម តុប សុភ័ក បន្តថា នៅក្នុងរដូវកាលទេសចរដើរកម្សាន្តតិចតួចនេះ ថ្នាក់ដឹកនាំក្រសួងទេសចរណ៍បានសហការជាមួយស្ថាប័នដៃគូ និងវិស័យឯកជន ធ្វើការងារ និងអនុវត្តគោលនយោបាយលើកទឹកចិត្តជាច្រើនដើម្បីជំរុញភាពទាក់ទាញ និងទទួលទេសចរអន្តរជាតិមកទស្សនាកម្ពុជាក្នុងរដូវកាលLow Season និងHigh Seasonឲ្យបានល្អប្រសើរ។លោកជំទាវ ឆាយ សៀវលីន ប្រធានសមាគមទីភ្នាក់ទេសចរណ៍កម្ពុជា CATA ថ្លែងទទួលស្គាល់ថា រៀងរាល់ឆ្នាំ ទេសចរណ៍កម្ពុជា ពីខែឧសភា ដល់ខែកញ្ញាទូទៅគឺពុំសូវមានទេសចរអន្តរជាតិច្រើននោះទេ ហើយនៅក្នុងឆ្នាំនេះ បើទោះ បណ្តាក្រុមហ៊ុនការីទេសចរណ៍ខិតខិតផ្សព្វផ្សាយគោលដៅទេសចរណ៍កម្ពុជា មានបញ្ចុះតម្លៃកញ្ចប់ផលិតផលទេសចរណ៍ និងផ្តល់ការលើកទឹកចិត្តការដើរកម្សាន្តនានាក៏ដោយ ក៏យើងនៅតែមិនអាចទទួលបានភ្ញៀវច្រើន ដូចក្នុងរដូវ High Season ចាប់ពីខែកញ្ញា រហូតដល់ខែមេសានេះដែរ។របាយការណ៍ក្រសួងទេសចរណ៍បានឲ្យដឹងថា ក្នុងរយៈពេល៥ ឆ្នាំ២០២៤នេះ កម្ពុជាទទួលបានទេសចរអន្តរជាតិមកទស្សនាប្រមាណ២លាន៦៤ម៉ឺននាក់កើនឡើង២២% ប្រៀបធៀបរយៈពេលដូចគ្នាឆ្នាំ២០២៣ ហើយបើធៀបរយៈពេលដូចគ្នាឆ្នាំ២០១៩ គឺទេសចរអន្តរជាតិមកទស្សនា ងើបឡើងវិញបានប្រមាណ៩០%នោះទេ៕ អត្ថបទ ស៊ុម សុខជា

ក្រសួងវប្បធម៌ និងវិចិត្រសិល្បៈ គ្រោងបើកមហោស្រពល្ខោនបាសាក់ទូទាំងប្រទេស ឆ្នាំ២០២៤

នាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ គ្រោងបើកមហោស្រពល្ខោនបាសាក់ទូទាំងប្រទេស នាខែតុលា ឆ្នាំ២០២៤ខាងមុខនេះ។ នេះបើយោងតាមការបញ្ជាក់របស់ប្រធាននាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ លោក ឈាង ឆដាភ័ក្រ បានថ្លែងប្រាប់BTV ព័ត៌មាន នាថ្ងៃនេះ។លោក បន្តថា ជារៀងរាល់ឆ្នាំនាយកដ្ឋាន តែងតែរៀបចំមហោស្រពបុរាណនេះឡើង ក្នុងគោលបំណងលើកទឹកចិត្តសិល្បករ សិល្បការិនី ដែលគាត់ប្រកបអាជីពទម្រង់សិល្បៈបុរាណនេះ។ មានន័យថាក្រសួង ក៏ដូចជានាយកដ្ឋាន បានយកចិត្តជាខ្លាំងទៅសិល្បករ សិល្បការិនី ហើយការរៀបចំមហោស្រពល្ខោនបាសាក់ គឺដើម្បីថែរក្សា ការពារ លើកស្ទួយ លើកទឹកចិត្តសិល្បករល្ខោនបាសាក់ និងដើម្បីផ្សព្វផ្សាយជូនដល់មហាជន ជាពិសេសយុវជន យុវនារី ដែលជាទំពាំងស្នងឫស្សីនៃប្រទេសជាតិ ឱ្យបានស្គាល់ និងស្វែងយល់អំពីល្ខោនបាសាក់ ព្រមទាំងរួមគ្នាគាំទ្រមរតកវប្បធម៌ខ្មែរ។ សូមបញ្ជាក់ផងដែរថា មហោស្រពល្ខោនបាសាក់ មិនគ្រាន់តែជាវេទិកា ប្រកួតប្រជែងយកពានរង្វាន់នោះទេ ប៉ុន្តែគឺជាទីកន្លែងជួបជុំសិក្សាស្វែងយល់ វាស់ស្ទង់សមត្ថភាព និងការចែករំលែកបទពិសោធ និងចំណេះដឹងផងដែរ។ ដូចនេះគោលដៅសំខាន់នៃការរៀបចំមហោស្រពល្ខោនបាសាក់ គឺដើម្បីផ្តល់ឱកាសក្នុងការសិក្សាពីចំណុចខ្លាំង និងចំណុចខ្សោយ លើផ្នែកតាក់តែងនិពន្ធរឿង ការដឹកនាំដំឡើងរឿង និងការសម្តែងជាដើម សំដៅពង្រឹងសមត្ថភាព និងលើកកម្ពស់វិស័យសិល្បៈទស្សនីយភាពមួយនេះ ដើម្បីឈានទៅដល់ការប្រកួតប្រជែងលើឆាក អន្តរជាតិ៕ អត្ថបទ រដ្ឋា

នាយកដ្ឋានសិល្បៈទស្សនីយភាព ខិតខំដំឡើងស្នាដៃថ្មីៗ ដែលកន្លងមកមានទម្រង់សិល្បៈមួយចំនួនមិនសូវមានសកម្មភាព

ចាស់ព្រឹទ្ធាចារ្យ សិល្បករ សិល្បការិនី នាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ ខិតខំហាត់សមដំឡើងស្នាដៃថ្មីៗ ដែលកន្លងមកមានទម្រង់សិល្បៈមួយចំនួនមិនសូវមានសកម្មភាព និងស្ទើតែបាត់បង់ ដូចជា៖ អាយ៉ៃរឿង និងល្ខោនបាមោជ្ជទ័យ។នេះបើយោងតាមការបញ្ជាក់របស់លោក ឈាង ឆដាភ័ក្រ ប្រធាននាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ បានថ្លែងប្រាប់BTV ព័ត៌មាន នាព្រឹកថ្ងៃទី៩ ខែកក្កដា ឆ្នាំ២០២៤នេះ។លោក ប្រធាននាយកដ្ឋាន បានលើកឡើងទៀតថា ក្នុងឆ្នាំ២០២៤នេះ នាយកដ្ឋាន បានបែងចែកការងារជា៣ផ្នែក ទី១. ការដំឡើងស្នាដៃថ្មី, ទី២. ការផ្សព្វផ្សាយ និងទី៣. ការបណ្តុះបណ្តាល។ ចំពោះការដំឡើងស្នាដៃថ្មី ក្នុងរយៈពេល៦ខែ ដើមឆ្នាំ២០២៤ នាយកដ្ឋាន បានដំឡើងស្នាដៃថ្មីជាច្រើន ដូចជា៖ របាំបែបទំនើបកម្ម របាំចម្រុះ របាំសហសម័យចំនួន២ ទម្រង់អាយ៉ៃរឿង និងថតឯកសារភ្លេងពិណពាទ្យចំនួន៣៣បទ និងចំណុចដែលសំខាន់មួយទៀតនោះ គឺបង្កើតទម្រង់ល្ខោនបាមោជ្ជទ័យ។ ជាមួយគ្នានោះ នាយកដ្ឋានបានធ្វើការផ្សព្វផ្សាយជាច្រើន ទាំងលក្ខណៈជាតិ និងលក្ខណៈអន្តរជាតិ។ ក្នុងនោះការផ្សព្វផ្សាយលក្ខណៈជាតិ បានធ្វើការសម្តែងល្ខោននិយាយរឿងផ្កាស្រពោន សម្តែងក្នុងកម្មវិធីទិវាវប្បធម៌ជាតិ៣មីនា សម្តែងក្នុងកម្មវិធីសំពតបទខ្មែរ សម្តែងក្នុងកម្មវិធីបុណ្យទន្លេលើកទី៨ ក្រោមអធិបតីភាពដ៏ខ្ពង់ខ្ពស់ជាទីបំផុតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រី្តនៃព្រះរាជាណាចក្រកម្ពុជា។ ដោយឡែកចំពោះកិច្ចការផ្សព្វផ្សាយជាលក្ខណៈអន្តរជាតិ បានធ្វើការសម្តែងនៅប្រទេសជប៉ុន ចិន ឥណ្ឌា ថៃ និងបណ្តាប្រទេសផ្សេងទៀត។ ជាពិសេសយើងបានបណ្តុះបណ្តាលលើជំនាញប៉ាក់ឌិន និងជំនាញថត សម្រាប់ផលិតឯកសាររបស់នាយកដ្ឋាន ព្រមទាំងបញ្ជូនមន្ត្រីទៅសិក្សាភាសាបរទេសផងដែរ។ជាចុងក្រោយលោក ឈាង ឆដាភ័ក្រ បានសំណូមដល់ប្រជាពលរដ្ឋ ជាពិសេសយុវជន ដែលជាទំពាំងស្នងឫស្សី ចូលរួមគាំទ្រ តាមរយៈព្រឹតិ្តការណ៍វប្បធម៌ផ្សេងៗ ព្រោះថាការចូលរួមរបស់ប្រជាពលរដ្ឋ ក៏ដូចជាយុវជន គឺជាសកម្មភាពមួយដ៏សំខាន់ និងធ្វើឲ្យមានការរីកចម្រើន និងបានរួមចំណែកក្នុងការថែរក្សា ការពារ ពង្រឹងនូវអត្តសញ្ញាណជាតិ លើកកម្ពស់វប្បធម៌ ប្រពៃណី និងទំនៀមទំលាប់ជាតិរបស់ខ្លួន ដូចពាក្យថា «កិច្ចថែរក្សា ការពារ បេតិកភណ្ឌវប្បធម៌ គឺជាភារកិច្ចរបស់កូនខ្មែរគ្រប់ៗរូប»៕ អត្ថបទ រដ្ឋា

បាងកក អ៊ែរវេយ៍ រៀបចំពិព័រណ៍ទេសចរណ៍ និងបង្ហាញជាផ្លូវការនូវបណ្ណ Cambodia Travel Pass នៅភ្នំពេញ

ក្រុមហ៊ុនអាកាសចរណ៍ទី១ របស់ប្រទេសថៃ បាងកក អ៊ែរវេយ៍ (Bangkok Airways) បានប្រកាសបើកពិព័រណ៍ទេសចរណ៍ “Boutique Journey Travel Fair” និងបង្ហាញបណ្ណ Cambodia Travel Pass រយៈពេល ៣ថ្ងៃ ពីថ្ងៃទី៥ ដល់៧ ខែកក្កដា ឆ្នាំ២០២៤ នៅផ្សារទំនើបអ៊ីនអន ម៉ល សែនសុខ។នៅក្នុងកម្មវិធីនេះ អ្នកនាង អាម៉នរ៉ាត គង់សាវ៉ាត អនុប្រធានផ្នែកលក់ និងជាអនុប្រធានស្តីទីផ្នែកទីផ្សាររបស់ក្រុមហ៊ុន បាងកក អ៊ែរវេយ៍ បានបង្ហាញអារម្មណ៍រីករាយ និងលើកឡើងថា ពិតជារំភើបចំពោះការរៀបចំកម្មវិធីនេះឡើងនៅក្នុងប្រទេសកម្ពុជា។ អ្នកនាងបានឲ្យដឹងថា បណ្ណ Cambodia Travel Pass នឹងផ្តល់ជូននូវការធ្វើដំណើរប្រកបដោយភាពបត់បែន និងមានងាយស្រួលជូនដល់អ្នកប្រើប្រាស់ក្នុងការធ្វើដំណើរកាន់តែប្រសើរជាមួយបទពិសោធន៍ល្អៗ។លោក Komkrit Ngamwongwirot ប្រធានផ្នែកគណនេយ្យ បានមានប្រសាសន៍ថា គោលបំណងសំខាន់នៃកម្មវិធីនេះ គឺក្រុមហ៊ុនចង់ផ្តល់ជូនបន្ថែមនូវជម្រើសនៃការធ្វើដំណើរប្រកបដោយភាពបត់បែន ប្រណីតភាព និងងាយស្រួលជូនដល់អតិថិជនដ៏មានតម្លៃនៅកម្ពុជា។ លោកបន្ថែមថា កម្មវិធីនេះដែរ ក៏បានឆ្លុះបញ្ចាំងពីឆន្ទៈរបស់ក្រុមហ៊ុនក្នុងការនាំនូវសេវាកម្មដ៏ល្អឯក រួមជាមួយអត្ថប្រយោជន៍ជាច្រើនដ៏សម្បូរបែបផងដែរជូនដល់អតិថិជន។ ជាពិសេស បណ្ណ Cambodia Travel Pass ដែលអាចធ្វើដំណើរឥតកំណត់រយៈពេល ១ឆ្នាំ សម្រាប់ការហោះហើរ រវាងភ្នំពេញ-បាងកក និងសៀមរាប-បាងកក ក្នុងតម្លៃសរុប ២,៥៩០ដុល្លារ។ក្រុមហ៊ុនអាកាសចរណ៍ថៃ បាងកក អ៊ែរវេយ៍ បានបង្កើតឡើងក្នុងឆ្នាំ១៩៦៨ ដែលផ្តល់សេវាកម្មពេញលេញក្នុងការដឹកអ្នកដំណើរ។ តាមរយៈប្រតិបត្តិការប្រមាណ១០០ជើង ជារៀងរាល់ថ្ងៃពីអាកាសយានដ្ឋានសុវណ្ណាភូមិនៅបាងកក និងអាកាសយានដ្ឋានសាមុយ។ ក្រុមហ៊ុននេះ ភ្ជាប់អ្នកដំណើរទៅកាន់ទិសដៅហោះហើរប្រណីតៗប្រមាណជាង២០ នៅទូទាំងប្រទេសពិភពលោក និងក្នុងតំបន់អាស៊ី៕

ឯកឧត្តម កែវ រតនៈ ស្នើឱ្យមានការគ្រប់គ្រងអភិរក្សដីតំបន់បឹងព្រះពន្លៃឱ្យបានគង់វង្ស ជាសម្បត្តិរួម

បឹងព្រះពន្លៃ ដែលមានមានឈ្មោះដើមថា បឹងព្រះពន្លាជ័យ គឺជាបឹងធម្មជាតិ មួយដ៏ធំលាតសន្ធឹងលើផ្ទៃដី២៧០ហិកតា ស្ថិតក្នុងឃុំផ្ទះរុង ស្រុកតាលោសែនជ័យ មានចម្ងាយ២៨គីឡូម៉ែត្រពីទីរួមខេត្តពោធិ៍សាត់ បឹងនេះជាតំបន់អេកូទេសចរណ៍មួយដ៏ទាក់ទាញ ព្រោះជាជំរំសត្វស្លាប និងជីវចម្រុះច្រើនប្រភេទ ។ដោយសារបឹងព្រះពន្លៃគឺជាសម្បត្តិធម្មជាតិដ៏មានសក្កានុពល របស់ស្រុកតាលោសែនជ័យ ដែលអាចផ្តល់អត្ថប្រយោជន៍យូរអង្វែងដល់ប្រជាពលរដ្ឋ ថ្មីៗឯកឧត្តម កែវ រតនៈ ប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តពោធិ៍សាត់ បានស្នើឱ្យមានការគ្រប់គ្រងអភិរក្សដីតំបន់បឹងព្រះពន្លៃឱ្យបានគង់វង្ស ជាសម្បត្តិរួម ហើយបឹងធម្មជាតិនេះមិនមែនជាកម្មសិទ្ធផ្តាច់មុខរបស់ប្រជាពលរដ្ឋខេត្តពោធិ៍សាត់ ឬជនណាម្នាក់ឡើង វាគឺជាសម្បត្តិរួមរបស់ប្រជាជនកម្ពុជាទាំងមូល ប្រសិនបើយើងទាំងអស់គ្នា មិនអាចថែរក្សាបានគឺមានមានន័យថាយើងគ្មានមាយាទ ។ក្នុងនោះដែរ រដ្ឋបាលខេត្តពោធិ៍សាត់ បានសម្រេចបង្កើតក្រុមការងារដើម្បីចុះត្រួតពិនិត្យ និងធ្វើបច្ចុប្បន្នភាពតំបន់បឹងព្រះពន្លៃ ដើម្បីកសាងផែនទី ក្នុងការស្នើសុំកំណត់ទំហំផ្ទៃបឹងឡើងវិញ និងរៀបចំផែនការ គ្រប់គ្រងធនធានធម្មជាតិ និងអភិរក្សវប្បធម៌ប្រវត្តិសាស្ត្រ ក្នុងតំបន់បឹងព្រះពន្លៃ ដោយធ្វើការអប់រំ ផ្សព្វផ្សាយ ឱ្យបានទូលំទូលាយ ការកាប់បំផ្លាញព្រៃឈើ ការចាប់សត្វព្រៃ និងការរុករានទន្ទ្រានដីយកមកធ្វើជាកម្មសិទ្ធិផ្ទាល់ខ្លួន។ ដោយបច្ចុប្បន្នមានប្រជាពលរដ្ឋរស់នៅអាស្រ័យផល ជុំវិញមាត់បឹងចំនួន២៦០ក្បាលដី ស្មើនឹង២៤២ហិកតា គិតជាគ្រួសារមានចំនួន២១៦គ្រួសារ ហើយអាងទឹកបឹងព្រះពន្លៃនេះ អាចស្រោចស្រពលើផ្ទៃដីស្រូវវស្សា បានពី៦៥០០ហិកតាទៅ១០.០០០ហិកតា និងស្រូវប្រាំង៤២០០ហិកតា ៕

ទេសភាពធម្មជាតិដ៏ស្រស់ត្រកាលជាចំណុចទាក់ទាញភ្ញៀវទេសចរឱ្យមកកម្សាន្តផ្លូវបុប្ផាលាក់ខ្លួននៅភ្នំ១៥០០

នាដើមរដូវវស្សានេះ គឺជាពេលដែល ផ្លូវបុប្ផាលាក់ខ្លួន ឬផ្លូវអន្ទង់អាំង ភ្នំ១៥០០ ស្រុកវាលវែង មានទេសសភាពស្រស់ស្អាតបំផុត ហើយមានភ្ញៀវទេសចរណ៍ចូលមកកំសាន្តច្រើន ជាពិសេស គឺថ្ងៃចុងសប្តាហ៍ ដោយសារទេសភាពធម្មជាតិស្រស់ស្អាត ហើយមានផ្លូវងាយស្រួលធ្វើដំណើរ និងពុំទាន់មានភ្លៀងធ្លាក់ខ្លាំង ។ ភ្ញៀវទេសចរដែលបានមកកម្សាន្តនៅផ្លូវបុប្ផាលាក់ខ្លួន ឬផ្លូវអន្ទងអាំង ភ្នំ១៥០០ បានបង្ហាញក្តីរីករាយ និងអារម្មណ៍ស្រស់ស្រាយនៅពេលបានមកកម្សាន្តនៅផ្លូវអន្ទង់អាំង ភ្នំ១៥០០ ដោយសារឃើញភាពស្រស់ស្អាត នៃបរិស្ថានធនធានព្រៃឈើធម្មជាតិ ដែលមានតម្លៃមិនអាចកាត់ថ្លៃបាន។ ដោយសារតែធនធានព្រៃឈើធម្មជាតិ ជាចំណុចទាក់ទាញរបស់ផ្លូវបុប្ផាលាក់ខ្លួន ឬផ្លូវអន្ទង់អាំង ភ្នំ១៥០០ ស្រុកវាលវែង ហើយភ្ញៀវទេសចរបានធ្វើដំណើរយ៉ាងវែងឆ្ងាយមកទីនេះ ដោយមានក្តីរំពឹង និងប្រាថ្នាចង់ឃើញពីទេសភាពដ៏ត្រកាលនៃធនធានធម្មជាតិ ហេតុដូចនេះហើយ សម្តេច ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា សម្រេចកំណត់ឱ្យដាក់តំបន់ជុំវិញ “ផ្លូវបុប្ផាលាក់ខ្លួន” ឬ ផ្លូវអន្ទង់អាំង នៅភ្នំ១៥០០ ស្រុកវាលវែង ខេត្តពោធិ៍សាត់ ជាតំបន់អភិរក្សធម្មជាតិ ដើម្បីបម្រើដល់វិស័យទេសចរណ៍ធម្មជាតិ ជូនប្រជាពលរដ្ឋក្នុង និងក្រៅស្រុក។ បើវាស់ត្រង់មានតំបន់ផ្លូវបុប្ផាលាក់ខ្លួន ឬផ្លូវអន្ទង់អាំង ប្រវែងត្រឹមតែ ៤គីឡូម៉ែត្រ តែបើវាស់តាមប្រវែងដែលបត់បែងចុះឡើងវិញមានប្រវែងដល់ទៅ ១០គីឡូម៉ែត្រឯណោះ ដូច្នេះយើងត្រូវរក្សាអភិរក្សតំបន់នេះទុកជាអត្ថប្រយោជន៍ជាតិរយៈពេលវែង។ គួរឱ្យដឹងដែរថា ចំណុចផ្លូវបុប្ផាលាក់ខ្លួន ឬផ្លូវអន្ទង់អាំង ជាផ្នែកមួយនៃផ្លូវជាតិលេខ ៥៥ដែលមានប្រវែងសរុប ១៨២,១៦ គ.ម ចាប់ពីខេត្តពោធិ៍សាត់ (ផ្លូវជាតិលេខ ៥ គីឡូម៉ែត្រលេខ ១៩១) ទៅដល់ វាលវែង-ថ្មដា (ព្រំដែនកម្ពុជា-ថៃ) ដែលសម្ពោធបើកឱ្យប្រើប្រាស់ជាផ្លូវការ ស្របជាមួយការបើកការដ្ឋានសាងសង់ ផ្លូវជាតិលេខ ១០ ប្រវែងសរុប ១៩៨,៧១ គ.ម ចាប់ពី ខេត្តបាត់ដំបង (សំឡូត) កាត់ខេត្តពោធិ៍សាត់ (វាលវែង) ទៅដល់ខេត្តកោះកុង(ក្រុងខេមរភូមិន្ទ) កាលពីថ្ងៃទី០៩ ខែមីនា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហើយក្នុងពេលនោះ សម្តេចបានប្រសិទ្ធនាមជាផ្លូវបុប្ផាលាក់ខ្លួន៕ អត្ថបទ&រូបភាព៖ ពៅភិរុណ

បណ្ដាញសង្គម

ព័ត៌មានថ្មីៗ

លោកTrump៖ កងកម្លាំងអ៊ីស្រាអែល អាចចាប់ផ្តើមប្រយុទ្ធឡើងវិញ នៅហ្កាហ្សាឱ្យតែលោកថា ហាម៉ាសមិនគោរពបទឈប់បាញ់

នគរបាលមន្ទីរប្រឆាំងបទល្មើសគ្រឿងញៀន ចុះឆ្មក់បង្ក្រាបទីតាំងអគារមួយកន្លែងឃាត់ខ្លួន មនុស្សប្រុសស្រីជាច្រើននាក់

ព្រឹកនេះ សម្តេចធិបតី អញ្ជើញជាអធិបតីក្នុងពិធីបើកកិច្ចប្រជុំថ្នាក់រដ្ឋមន្រ្តីអាស៊ានគ្រោះមហន្តរាយ

៤ខែចុងក្រោយឆ្នាំនេះសមត្ថកិច្ចកម្ពុជាបានបញ្ជូនមុខសញ្ញាមេខ្លោង និងបក្ខពួក៧៥នាក់ទៅតុលាការ និងបានឃាត់ខ្លួនជនសង្ស័យជាង ៣ ៤០០ នាក់ ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា

សម្តេចរដ្ឋសភាធិបតី ឃួន សុដារី អញ្ជើញដឹកនាំគណៈប្រតិភូរដ្ឋសភា និវត្តន៍មកកាន់មាតុប្រទេសវិញ ក្រោយបញ្ចប់ការចូលរួមកិច្ចប្រជុំថ្នាក់ដឹកនាំពិភពលោកស្តីពីស្រ្តី នៅទីក្រុងប៉េកំាង ប្រទេសចិន

ចរន្តនៃក្រុមជ្រុលនិយមថៃបាននិងកំពុងទិតៀនវាយប្រហារយ៉ាងចាស់ដៃទៅលើលោកជំទាវសមាជិកព្រឹទ្ធសភា Angkhana Neelapaijit រហូតដាក់សម្ពាធឲ្យលោកជំទាវ

ដានជើងដាយណូស័រប្រវែងជាង ២០០ម៉ែត្រ ត្រូវបានរកឃើញនៅកន្លែងយកថ្មអង់គ្លេស

មនុស្សរាប់សិបនាក់ ចូលសម្រាកព្យាបាលក្នុងមន្ទីរពេទ្យនៅទុយនីស៊ី ស្របពេលជួបវិបត្តិបរិស្ថាន

ក្រសួងការបរទេសចិនអះអាងថា សង្រ្គាមពាណិជ្ជកម្មគ្មានអ្នកឈ្នះនោះទេ ស្របពេលភាពតានតឹងជាមួយអាមេរិក

សម្ដេចតេជោ ហ៊ុន សែន មិនបានបន្ទន់ជំហរទៅអង្វរថៃឱ្យបើកព្រំដែនជាមួយថៃនៅថ្ងៃទី២០ តុលា ដូចការចុះផ្សាយឡើយ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877