សារព័ត៌មាន CNN បានរាយការណ៍កាលពីថ្ងៃព្រហស្បតិ៍ ២៣មេសាសប្ដាហ៍នេះថា យោធាអាមេរិកកំពុងរៀបចំផែនការបន្ទាន់ដើម្បីវាយប្រហារប្រព័ន្ធការពារអ៊ីរ៉ង់នៅក្នុងច្រកសមុទ្រ Hormuz ប្រសិនបើបទឈប់បាញ់ដ៏ផុយស្រួយនេះដួលរលំ។ប្រភពព័ត៌មាននិយាយថាជម្រើសទាំងនេះ ស្ថិតក្នុងចំណោមប្រភេទគោលដៅជាច្រើនដែលកំពុងពិចារណា រួមមានការវាយប្រហារដោយផ្តោតជាពិសេសលើ "ការកំណត់គោលដៅផ្អែកលើទិន្នន័យជាក់ស្ដែង"នៃសមត្ថភាពអ៊ីរ៉ង់នៅជុំវិញច្រកសមុទ្រHormuz ឈូងសមុទ្រអារ៉ាប់ភាគខាងត្បូង និងឈូងសមុទ្រអូម៉ង់ ដោយលើកឡើងពីការវាយប្រហារដែលអាចកើតមានប្រឆាំងនឹងទូកវាយប្រហារលឿនតូចៗ នាវាដាក់មីន និងទ្រព្យសម្បត្តិផ្សេងទៀត ដែលបានជួយទីក្រុងតេអេរ៉ង់បិទផ្លូវទឹកសំខាន់ៗទាំងនោះ និងប្រើប្រាស់ជាកម្លាំងរុញច្រានលើសហរដ្ឋអាមេរិក។ការបិទនោះបានបង្កឱ្យមានការរង្គោះរង្គើយ៉ាងខ្លាំងនៅក្នុងសេដ្ឋកិច្ចពិភពលោក ដែលគំរាមកំហែងធ្វើឱ្យខូចដល់កិច្ចខិតខំប្រឹងប្រែងរបស់ប្រធានាធិបតី Donald Trump ក្នុងការកាត់បន្ថយអតិផរណារបស់សហរដ្ឋអាមេរិក ហើយបានកើតឡើងទោះបីជាមានបទឈប់បាញ់ផ្អាកការវាយប្រហាររបស់សហរដ្ឋអាមេរិកដែលបានចាប់ផ្តើមនៅថ្ងៃទី ៧ ខែមេសាក៏ដោយ។        ខណៈយោធាបានកំណត់គោលដៅកងទ័ពជើងទឹកអ៊ីរ៉ង់ ភាគច្រើននៃខែដំបូងនៃការទម្លាក់គ្រាប់បែកត្រូវបានផ្តោតលើគោលដៅឆ្ងាយពីច្រកសមុទ្រ ដែលនឹងអនុញ្ញាតឱ្យយោធាអាមេរិកវាយប្រហារបន្ថែមទៀតនៅខាងក្នុងទឹកដីអ៊ីរ៉ង់។ ផែនការថ្មីអំពាវនាវឱ្យមានយុទ្ធនាការទម្លាក់គ្រាប់បែកដែលផ្តោត កាន់តែខ្លាំងនៅជុំវិញផ្លូវទឹកយុទ្ធសាស្ត្រទាំងនោះ។ CNN ធ្លាប់បានរាយការណ៍ថា ចំនួនមីស៊ីលការពារឆ្នេរសមុទ្រភាគច្រើនរបស់ប្រទេសនេះនៅដដែល។ អ៊ីរ៉ង់ក៏មានទូកតូចៗជាច្រើនអាចប្រើដើម្បីវាយប្រហារលើនាវា ដែលធ្វើឱ្យកិច្ចខិតខំប្រឹងប្រែងរបស់សហរដ្ឋអាមេរិកក្នុងការបើកច្រកសមុទ្រមានភាពស្មុគស្មាញ។ប្រភពជាច្រើន រួមទាំងអ្នកសម្របសម្រួលការដឹកជញ្ជូនជាន់ខ្ពស់មួយរូបបានប្រាប់ CNNថា ការវាយប្រហារដោយយោធានៅជុំវិញច្រកសមុទ្រតែម្នាក់ឯងទំនងជាមិនអាចបើកផ្លូវទឹកឡើងវិញភ្លាមៗបានទេ ៕

ឯកឧត្តម ជុំ សុន្ទរី ឯកអគ្គរាជទូតតែងតាំង នៃព្រះរាជាណាចក្រកម្ពុជាប្រចាំប្រទេសជប៉ុន បានអញ្ជើញជួបសម្តែង ការគួរសមជាមួយ ឯកឧត្តមបណ្ឌិត តាណាកា អាតិហិកុ ប្រធានទីភ្នាក់ងារសហប្រតិបត្តិការអន្តរជាតិជប៉ុន (JICA) នៅថ្ងៃទី២៣ ខែមេសា ឆ្នាំ២០២៦ នៅទីស្នាក់ការកណ្តាល JICA ក្នុងទីក្រុងតូក្យូ។ក្នុងកិច្ចប្រជុំនេះ ឯកឧត្តមឯកអគ្គរាជទូត បានសម្តែងការកោតសរសើរយ៉ាងស្មោះស្ម័គ្រចំពោះភាពជាដៃគូយូរអង្វែង និងដ៏មានតម្លៃបំផុតរបស់ JICA ជាមួយប្រទេសកម្ពុជា។ ឯកឧត្តម បានគូសបញ្ជាក់ពីការរួមចំណែកយ៉ាងសំខាន់របស់ JICA ចំពោះការអភិវឌ្ឍសេដ្ឋកិច្ចសង្គមរបស់ប្រទេសកម្ពុជា ជាពិសេសនៅក្នុងវិស័យសំខាន់ៗ ដូចជា ការអភិវឌ្ឍ ហេដ្ឋារចនាសម្ព័ន្ធ ការកសាងសមត្ថភាពធនធានមនុស្ស និងភាពធន់នឹងគ្រោះមហន្តរាយ។ កិច្ចខិតខំប្រឹងប្រែងទាំង នេះ បានដើរតួនាទីយ៉ាងសំខាន់ក្នុងការគាំទ្រដល់ការអភិវឌ្ឍ និងការធ្វើសមាហរណកម្មក្នុងតំបន់របស់ប្រទេសកម្ពុជា។ឯកឧត្តមឯកអគ្គរាជទូត ក៏បានគូសបញ្ជាក់ពីអាទិភាពអភិវឌ្ឍន៍របស់ប្រទេសកម្ពុជា ដោយសង្កត់ធ្ងន់លើកំណើនប្រកប ដោយចីរភាព ការធ្វើពិពិធកម្មសេដ្ឋកិច្ច ការអភិវឌ្ឍធនធានមនុស្ស ភាពធន់នឹងអាកាសធាតុ និងបរិវត្តកម្មឌីជីថល។ នៅក្នុងបរិបទនេះ ឯកឧត្តម បានបង្ហាញពីសំណើរបស់ប្រទេសកម្ពុជា សម្រាប់ការគាំទ្រជាបន្តបន្ទាប់ពី JICA នៅក្នុង វិស័យអាទិភាពសំខាន់ពីរ៖ ទីមួយ ហេដ្ឋារចនាសម្ព័ន្ធយុទ្ធសាស្ត្រ និងការតភ្ជាប់ រួមទាំងការពង្រីកកំពង់ផែស្វយ័ត ក្រុងព្រះសីហនុ ឱ្យក្លាយជាមជ្ឈមណ្ឌលភស្តុភារកម្មក្នុងតំបន់ ការអភិវឌ្ឍប្រព័ន្ធផ្គត់ផ្គង់ទឹក និងបញ្ជូនថាមពលក្នុង រាជធានីភ្នំពេញ និងទីក្រុងសំខាន់ៗ និងការពង្រីកការតភ្ជាប់ក្នុងតំបន់នៅតាមច្រករបៀងសេដ្ឋកិច្ចភាគខាងត្បូង ដើម្បី សម្រួលដល់ពាណិជ្ជកម្ម ការវិនិយោគ និងការផ្លាស់ប្តូររវាងប្រជាជននិងប្រជាជន នៅទូទាំងអនុតំបន់មេគង្គ ។ ទីពីរ ក្នុង ការអភិវឌ្ឍធនធានមនុស្ស និងការផ្លាស់ប្តូររវាងប្រជាជននិងប្រជាជន រួមទាំងការពង្រីកអាហារូបករណ៍ក្រោមកម្មវិធី JDS (ជំនួយឥតសំណងជប៉ុនសម្រាប់ការអភិវឌ្ឍធនធានមនុស្ស) ការបណ្តុះបណ្តាលបច្ចេកទេស ភាពជាដៃគូស្ថាប័ន និងការកសាងសមត្ថភាព ហើយនិងការបន្តចូលរួមរបស់អ្នកស្ម័គ្រចិត្ត JICA ដើម្បីរួមចំណែកដល់ការអភិវឌ្ឍជនបទ ក៏ដូចជាដើម្បីពង្រឹងចំណងមិត្តភាពរវាងប្រជាជននិងប្រជាជន។ លើសពីនេះ ឯកឧត្តមឯកអគ្គរាជទូត បានសម្តែងចំណាប់អារម្មណ៍របស់កម្ពុជា ក្នុងការពង្រឹងកិច្ចសហប្រតិបត្តិការជាមួយ JICA ក្នុងគំនិតផ្តួចផ្តើមបរិវត្តកម្មឌីជីថល និងសម្រេចឱ្យបាននូវ គោលដៅនៃប្រទេសកម្ពុជា ដែលគ្មានមីននៅឆ្នាំ២០៣០។ ភាគីទាំងពីរ បានផ្លាស់ប្តូរទស្សនៈលើកិច្ចសហប្រតិបត្តិការក្នុងវិស័យមួយចំនួន និងបានបញ្ជាក់ជាថ្មីនូវការប្តេជ្ញាចិត្ត រួមគ្នា ក្នុងការបង្កើនកិច្ចសហប្រតិបត្តិការ និងភាពជាដៃគូសម្រាប់ការអភិវឌ្ឍប្រកបដោយចីរភាព និងបរិយាប័ន្ន។

ភ្នំពេញ៖ នៅព្រឹកថ្ងៃទី២៤ ខែមេសា ឆ្នាំ២០២៦ នៅទីស្តីការក្រសួង ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការប្រទេសនិងសហប្រតិបត្តិការអន្តរជាតិ ជំនួបពិភាក្សាទ្វេភាគីជាមួយឯកឧត្តម Kestutis Budrys រដ្ឋមន្ត្រីការបរទេស នៃសាធារណរដ្ឋលីទុយអានី ក្នុងឱកាសដែលឯកឧត្តមអញ្ជើញមកបំពេញទស្សនកិច្ចផ្លូវការនៅកម្ពុជា។នៅក្នុងជំនួបភាគីទាំងពីរបានពិភាក្សាផ្ដល់ទៅលើការពង្រឹងនិងពង្រីកកិច្ចសហប្រតិបត្តិការលើគ្រប់វិស័យរវាងប្រទេសទាំងពីរ។

សហភាពអឺរ៉ុប បានផ្តល់ការអនុម័តចុងក្រោយចំពោះប្រាក់កម្ចីចំនួន៩០ពាន់លានអឺរ៉ូ (១០៥ពាន់លានដុល្លារ) សម្រាប់អ៊ុយក្រែន និងដាក់ទណ្ឌកម្មជុំថ្មីលើរុស្ស៊ី ជាការជំរុញដល់ទីក្រុងគីវបន្ទាប់ពីជម្លោះដែលបានអូសបន្លាយពេលយូរ។ វិធានការទាំងនេះ ត្រូវបានចុះហត្ថលេខាបន្ទាប់ពីប្រទេសហុងគ្រី និងប្រទេសស្លូវ៉ាគី បានទម្លាក់ចោលការជំទាស់ខណៈអ៊ុយក្រែនបានចាប់ផ្តើមផ្តល់លំហូរប្រេងឡើងវិញក្រោយការជួសជុលបំពង់បង្ហូរប្រេង Druzhba ដែលត្រូវបានបំផ្លាញ។ លោកស្រី Kaja Kallas ប្រធានគោលនយោបាយការបរទេសរបស់សហភាពអឺរ៉ុប បានបង្ហោះសារតាមអ៊ីនធឺណិតថា «ភាពជាប់គាំងបានបញ្ចប់ហើយ»។ «សេដ្ឋកិច្ចក្នុងសង្គ្រាមរបស់រុស្ស៊ី កំពុងស្ថិតនៅក្រោមភាពតានតឹងកាន់តែខ្លាំងឡើង ខណៈអ៊ុយក្រែនកំពុងទទួលបានការជំរុញដ៏សំខាន់»។ ជម្លោះនេះ បានរារាំងការគាំទ្ររបស់សហភាពអឺរ៉ុបចំពោះអ៊ុយក្រែននៅពេលដែលសហរដ្ឋអាមេរិកបានកាត់ជំនួយដល់ទីក្រុងគីវភាគច្រើន និងបានបន្ធូរបន្ថយទណ្ឌកម្មលើការនាំចេញប្រេងរបស់រុស្ស៊ីក្នុងអំឡុងពេលសង្គ្រាមរបស់សហរដ្ឋអាមេរិក និងអ៊ីស្រាអែល លើអ៊ីរ៉ង់។ នាយករដ្ឋមន្ត្រីដែលនឹងចាកចេញពីតំណែងរបស់ប្រទេសហុងគ្រី លោក Viktor Orban បានបរាជ័យយ៉ាងខ្លាំងក្នុងការបោះឆ្នោតនៅក្នុងខែនេះ ជាអ្នកដែលបានផ្អាកប្រាក់កម្ចីជាកម្លាំងចលករដើម្បីដាក់សម្ពាធលើអ៊ុយក្រែនឱ្យជួសជុលបំពង់បង្ហូរប្រេងមកពីរុស្ស៊ីទៅកាន់ប្រទេសរបស់លោក។ លោក Zelenskyy បាននិយាយនៅលើបណ្តាញ X ថា «ថ្ងៃនេះ ជាថ្ងៃដ៏សំខាន់មួយសម្រាប់ការការពារជាតិរបស់យើង និងសម្រាប់ទំនាក់ទំនងរបស់យើងជាមួយសហភាពអឺរ៉ុប។ ប្រាក់កម្ចីគាំទ្រដោយអឺរ៉ុបសម្រាប់អ៊ុយក្រែន ត្រូវបានបញ្ចេញ មានចំនួន៩០ពាន់លានអឺរ៉ូ ឬ១០៥ពាន់លានដុល្លារ ក្នុងរយៈពេលជាង២ឆ្នាំ»។ប្រទេសចំនួន២៧របស់សហភាពអឺរ៉ុប ក៏បានចុះហត្ថលេខាលើកញ្ចប់ទណ្ឌកម្មថ្មីប្រឆាំងទីក្រុងមូស្គូ ដែលត្រូវបានផ្អាកដោយប្រទេសហុងគ្រី និងប្រទេសស្លូវ៉ាគី ជុំវិញជម្លោះ។

ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ ឯកឧត្តម ហ៊ុន ម៉ានី បាន​ប្រកាស​អបអ​រ​សាទរ​​ចំពោះ ​ផ្លែផ្កាដ៏ត្រចះត្រចង់ នៃកិច្ចសន្ទនាយុទ្ធសាស្រ្ត«២+២» លើកទី១ របស់​រដ្ឋ​មន្រ្តី​ការ​បរទេស ​និងរដ្ឋមន្រ្តីការពារជាតិកម្ពុជា និងចិន ហើយកិច្ច​ប្រជុំ​ជា​ប្រវត្តិសាស្រ្ត​នេះ​បាន​ឯក​ភាព​គ្នា​សម្រេច​ឈាន​ដល់​បើក​កិច្ច​ប្រជុំ «៣+៣» នាពេលខាងមុខទៀតនោះ។តាមបណ្តាញសង្គមហ្វេសបុក នាព្រឹកថ្ងៃទី២៤ ខែមេសា ឆ្នាំ២០២៦នេះ ឯកឧត្តម ឧបនាយករដ្ឋ​មន្រ្តី ហ៊ុន ម៉ានី បានលើក​ឡើង​ថា សូម​ចូល​រួម​អបអរ​សាទរ​ចំពោះ​ភាព​ជោគ​ជ័យ​នៃ​កិច្ច​សន្ទ​នា​យុទ្ធ​សាស្ត្រ «២+២» លើកទីមួយរវាងរដ្ឋមន្ត្រីការបរទេស និង​រដ្ឋ​មន្ត្រី​ការពារ​ជាតិ នៃ​ព្រះរាជា​ណា​ចក្រ​កម្ពុជា​ និងសាធារណរដ្ឋប្រជាមានិតចិន ដែលជាយន្ត​ការ​យុទ្ធសាស្ត្រ​ដ៏​សំខាន់​ក្នុង​ការ​ធ្វើ​ឱ្យ​កាន់​តែ​ស៊ី​ជម្រៅ នៃទំនាក់ទំនងជាយុទ្ធសាស្ត្រ ជាពិសេស ការសម្រេច​ដំឡើង​កម្រិត​កិច្ច​សន្ទនា​នេះ​ទៅ​កម្រិត «៣+៣» ដោយមានការចូលរួមពីរដ្ឋមន្ត្រីក្រសួងមហាផ្ទៃកម្ពុជា និង​ក្រសួង​សន្តិសុខ​សាធារណៈចិនផងដែរ។ឯកឧត្តម ហ៊ុន ម៉ានី បានកត់​សម្គាល់​ឃើញ​ថា​ក្នុង​ក្រប​ខណ្ឌ​នៃ​ដំណើរ​ទស្សន​កិច្ច​ផ្លូវ​ការ​នេះ​ក៏​មាន​ជំនួប​សំខាន់​ៗ រួមមាន៖ ជំនួបរវាងសម្តេចតេជោ ហ៊ុន សែន ប្រធានព្រឹទ្ធសភា និងឯកឧត្តម វ៉ាង យី រដ្ឋមន្ត្រីក្រសួងការបរទេស ព្រមទាំងជំនួបរវាងសម្តេចធិបតីនាយករដ្ឋមន្ត្រី និងឯកឧត្តម វ៉ាង យី រដ្ឋមន្ត្រីក្រសួងការបរទេស និងឯកឧត្តម តុង ជុន រដ្ឋមន្ត្រីក្រសួងការពារជាតិ ដែល​បាន​បង្ហាញ​ច្បាស់​អំពី​ចំណងមិត្តភាពដ៏រឹងមាំរវាងប្រទេសយើងទាំងពីរ ទោះស្ថិត​ក្នុង​ស្ថាន​ការណ៍​ពិភ​ព​លោក​បច្ចុប្បន្ន​ដែល​មានការប្រែប្រួលមិនច្បាស់លាស់យ៉ាងណាក្តី។ឯកឧត្តម ហ៊ុន ម៉ានី បានរំលេចផងដែរថា ឆ្នាំ២០២៦ នេះ គឺជាខួបលើកទី៦៨ ទំនាក់ទំនង​កម្ពុជា​-ចិន ដែលបានចាក់ឫសយ៉ាងជ្រៅក្នុងប្រវត្តិសាស្ត្រ ដែលបានផ្តួចផ្តើមឡើងដោយ ព្រះ​ករុណា​ព្រះបាទ សម្តេចព្រះនរោត្តម សីហនុ ព្រះបរមរតនកោដ្ឋ និង ឯកឧត្តមប្រធាន ម៉ៅ សេទុង និងឯកឧត្តម ជូ អេងឡាយ និងត្រូវបានបន្តពូនជ្រុំដោយសម្តេចអគ្គមហាសេនាបតីតេជោ ហ៊ុន សែន រហូតមកដល់ សម្តេចមហាបវរធិបតី ហ៊ុន ម៉ាណែត និង ឯកឧត្តម ស៊ី ជីនពីង។ ជាពិសេស ការ​បន្តយកចិត្តទុកដាក់របស់មិត្តចិន ចំពោះការព្យាបាល​និង​ថែ​រក្សា​ព្រះរា​ជ​សុខ​ភាព​ថ្វាយ​ព្រះក​រុណា​ជា​អម្ចាស់ជីវិតលើត្បូង និងហ្លួងយាយជាដើម។ឯកឧត្តមឧបនាយករដ្ឋមន្រ្តី បានគូសបញ្ជាក់ទៀតថា ចំណងមិត្តភាពនេះ កំពុង​បន្ត​រីក​ចម្រើន​កាន់​តែរឹ​ង​មាំឥតឈប់ឈរនៅគ្រប់កម្រិតនិងគ្រប់វិស័យ ជាដៃគូយុទ្ធសាស្ត្រគ្រប់ជ្រុងជ្រោយ និង​ជា​មិត្ត​ដែកថែបដ៏រឹងមាំ រួមគ្នាជំរុញការកសាងសហគមន៍វាសនារួមកម្ពុជា-ចិន គ្រប់​រដូវ​កាល​ក្នុង​យុគ​សម័យ​ថ្មី ដែលផ្តល់ផលជាផ្លែផ្កាជាក់ស្តែង និងកិច្ចសហប្រតិបត្តិការឈ្នះ-ឈ្នះ សម្រាប់​ប្រទេស និងប្រជាជនយើងទាំងពីរ ដែលបានបង្ហាញតាមរយៈសមិទ្ធផលថ្មីៗ រួមមាន ស្ពាន​មិត្ត​ភាព​ក​ម្ពុជា-ចិន មេគង្គក្រចេះ, ពហុកីឡដ្ឋានមរតកតេជោ, ផ្លូវល្បឿនលឿនភ្នំពេញ-ព្រះសីហនុ, ផ្លូវ​​ក្រវាត់ក្រុងទី៣, មន្ទីរពេទ្យមិត្តភាពកម្ពុជា-ចិន ព្រះកុសុមៈ, ផ្លូវជាតិលេខ១០ និងនាពេល​ថ្មី​ៗ​គម្រោង​វារីអគ្គិសនីបូមទឹកស្តុកទុក ស្ទឹងតាតៃលើ ខេត្តកោះកុង ក្នុងចំណោម​សមិទ្ធ​ផល​ជា​ច្រើន​ទៀត​៕ អត្ថបទ៖ បាន ចក់

ក្រុមមន្ត្រីរដ្ឋបាលអាមេរិកបាននិយាយកាលពីថ្ងៃព្រហស្បតិ៍២៣មេសាសប្ដាហ៍នេះថា សហរដ្ឋអាមេរិកមានបំណងអញ្ជើញប្រធានាធិបតីរុស្ស៊ីលោក Vladimir Putin ទៅកាន់កិច្ចប្រជុំកំពូលនៃក្រុមមេដឹកនាំប្រទេសមានសេដ្ឋកិច្ចលូតលាស់ទាំង២០ (G20) ដែលគ្រោងធ្វើនៅខែធ្នូ នៅឯរមណីយដ្ឋានវាយកូនហ្គោល Doral របស់ប្រធានាធិបតី Donald Trump ក្នុងទីក្រុង Miami ទោះបីជាការអញ្ជើញមិនទាន់ត្រូវបានផ្ញើក៏ដោយ ។ក្នុងសេចក្តីថ្លែងការណ៍មួយ ក្រសួងការបរទេសបាននិយាយថាលោកTrumpបានបញ្ជាក់យ៉ាងច្បាស់ថា រុស្ស៊ីត្រូវបានស្វាគមន៍ក្នុងការចូលរួមកិច្ចប្រជុំ G-20 ទាំងអស់ ខណៈអាមេរិកផ្តោតលើការផ្តល់ឲ្យកិច្ចប្រជុំកំពូលដ៏ជោគជ័យ និងមានផ្លែផ្កា។   មន្ត្រីរដ្ឋបាលជាន់ខ្ពស់មួយរូបបាននិយាយក្នុងលក្ខខណ្ឌមិនបញ្ចេញឈ្មោះទៅកាន់សន្និសីទសារព័ត៌មានថា មិនទាន់មានការអញ្ជើញជាផ្លូវការណាមួយត្រូវបានចេញនៅពេលនេះទេ ប៉ុន្តែរុស្ស៊ីគឺជាសមាជិក G-20 ហើយនឹងត្រូវបានអញ្ជើញឱ្យចូលរួមកិច្ចប្រជុំរដ្ឋមន្ត្រី និងកិច្ចប្រជុំកំពូលរបស់មេដឹកនាំ។ថ្លែងទៅកាន់ក្រុមអ្នកសារព័ត៌មាននៅការិយាល័យ Oval កាលពីថ្ងៃព្រហស្បតិ៍ លោក Trump បាននិយាយថា លោកមិនបានដឹងអំពីការអញ្ជើញលោក Putin ទេ ប៉ុន្តែលោកនឹងមិនជំទាស់ទេ។លោកប្រធានាធិបតីបាននិយាយថា ប្រសិនបើមេដឹកនាំរុស្ស៊ីមក វាប្រហែលជាមានប្រយោជន៍ខ្លាំងណាស់ ដោយបន្ថែមថា ។ទោះជាយ៉ាងណាក៏ដោយ លោកបាននិយាយថា លោកគិតថាលោក Putin នឹងចូលរួមប្រសិនបើត្រូវបានអញ្ជើញ។កិច្ចប្រជុំកំពូល G-20 គឺជាវេទិកាអន្តររដ្ឋាភិបាលមួយដែលរួមមានតំណាងនៃប្រទេសសេដ្ឋកិច្ចធំជាងគេបំផុតចំនួន១៩នៅលើពិភពលោក បូករួមទាំងសហភាពអឺរ៉ុប និងសហភាពអាហ្វ្រិក។ កិច្ចប្រជុំកំពូលដែលធ្វើឡើងជារៀងរាល់ឆ្នាំ គឺជាឱកាសមួយសម្រាប់មេដឹកនាំពិភពលោកពិភាក្សាអំពីបញ្ហាសកលដែលកំពុងកើតមាន។ប្រទេសរុស្ស៊ីបានខកខានការចូលរួមដោយផ្ទាល់ចាប់តាំងពីឆ្នាំ២០១៩ ដំបូងឡើយដោយសារតែជំងឺរាតត្បាតសកលCOVID-19 និងក្រោយមកដោយសារតែការវាយលុករបស់ខ្លួនលើអ៊ុយក្រែនក្នុងឆ្នាំ២០២២ និងដីកាចាប់ខ្លួនលោក Putin ជាបន្តបន្ទាប់ដែលត្រូវបានចេញដោយតុលាការឧក្រិដ្ឋកម្មអន្តរជាតិ។ លោក Putin ត្រូវបានចោទប្រកាន់ពីបទឧក្រិដ្ឋកម្មសង្គ្រាមទាក់ទងនឹងសង្គ្រាមអ៊ុយក្រែន៕

ប្រធានាធិបតីសហរដ្ឋអាមេរិក លោក Donald Trump បាននិយាយថា អ៊ីស្រាអែល និងលីបង់ បានព្រមព្រៀងបន្ថែមពេលបទឈប់បាញ់រវាងអ៊ីស្រាអែល និងក្រុមហេសបូឡា រយៈពេលបីសប្តាហ៍ទៀត បន្ទាប់ពីការចរចានៅឯសេតវិមាន កាលពីថ្ងៃព្រហស្បតិ៍ ទី ២៣ ខែមេសា។ លោក Trump បាននិយាយថា កិច្ចប្រជុំរវាងឯកអគ្គរដ្ឋទូតអ៊ីស្រាអែល និងលីបង់ប្រចាំសហរដ្ឋអាមេរិក បានដំណើរការទៅ «យ៉ាងល្អ»។ កិច្ចប្រជុំនេះ គឺជាការចរចាកម្រិតខ្ពស់លើកទីពីរ រវាងប្រទេសទាំងពីរ ចាប់តាំងពីសប្តាហ៍មុន។បទឈប់បាញ់ដំបូងរយៈពេល ១០ ថ្ងៃ ដែលបានចូលជាធរមានកាលពីថ្ងៃសុក្រសប្តាហ៍មុន នឹងផុតកំណត់នៅថ្ងៃចន្ទខាងមុខនេះ។ លោក Trump បាននិយាយនៅក្នុងសារមួយលើបណ្តាញសង្គមថា «សហរដ្ឋអាមេរិកនឹងធ្វើការជាមួយប្រទេសលីបង់ ដើម្បីជួយប្រទេសនេះការពារខ្លួនពីក្រុមហេសបូឡា»។លោកបាននិយាយបន្ថែមថា លោកទន្ទឹងរង់ចាំជួបផ្ទាល់ជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu និងប្រធានាធិបតីលីបង់ លោក Joseph Aoun «ក្នុងពេលឆាប់ៗនេះ»។ លោក Trump បានស្វាគមន៍ឯកអគ្គរដ្ឋទូតលីបង់ប្រចាំសហរដ្ឋអាមេរិក លោកស្រី Nada Hamadeh Moawad និងសមភាគីអ៊ីស្រាអែល លោក Yechiel Leiter នៅពេលពួកគេបានទៅដល់។បន្ថែមលើលោក Trump សហរដ្ឋអាមេរិកក៏ត្រូវបានតំណាងដោយអនុប្រធានាធិបតី លោក JD Vance និងរដ្ឋមន្ត្រីការបរទេស លោក Marco Rubio ។

ប្រធានាធិបតីអាមេរិក លោក Donald Trump បាននិយាយកាលពីថ្ងៃព្រហស្បតិ៍ ២៣ មេសាសប្ដាហ៍នេះ ថា សហរដ្ឋអាមេរិក មិនប្រញាប់ប្រញាល់បញ្ចប់សង្គ្រាមជាមួយអ៊ីរ៉ង់ទេ ប៉ុន្តែពេលវេលាជិតអស់ហើយ សម្រាប់សាធារណរដ្ឋអ៊ីស្លាមមួយនេះ ខណៈនាវាផ្ទុកយន្តហោះទីបីបានទៅដល់មជ្ឈិមបូព៌ា។ប្រព័ន្ធផ្សព្វផ្សាយអ៊ីរ៉ង់បានរាយការណ៍ពីការផ្ទុះលើរដ្ឋធានីតេអេរ៉ង់ ជាលើកដំបូងចាប់តាំងពីបទឈប់បាញ់កាន់តែយ៉ាប់យ៉ឺនក្នុងសង្គ្រាមមជ្ឈិមបូព៌ា បានចូលជាធរមានកាលពីពីរសប្តាហ៍មុន។ គេមិនច្បាស់ទេថាអ្វីជាមូលហេតុនៃការផ្ទុះនោះ ទោះបីជាប្រភពសន្តិសុខអ៊ីស្រាអែលបានប្រាប់សារព័ត៌មាន AFP ថា ប្រទេសរបស់ពួកគេមិនទាន់វាយប្រហារអ៊ីរ៉ង់នៅឡើយទេ។ទន្ទឹមនឹងនេះ ការចរចាសន្តិភាពនៅក្នុងប្រទេសប៉ាគីស្ថានកំពុងជាប់គាំង ដោយគ្មានសញ្ញានៃការវិលត្រឡប់ទៅរកការទូតដើម្បីបញ្ចប់ការប្រឈមដាក់គ្នានៅច្រកសមុទ្រ Hormuz នោះទេ។ ចាប់តាំងពីលោក Trump បានបន្ថែមពេលបទឈប់បាញ់ដោយគ្មានកំណត់ក្នុងសង្គ្រាមមជ្ឈិមបូព៌ា សហរដ្ឋអាមេរិក និងអ៊ីរ៉ង់ បានផ្លាស់ប្តូរការផ្តោតអារម្មណ៍របស់ពួកគេទៅច្រកសមុទ្រ Hormuz ជាផ្លូវទឹកត្រូវបានបិទ ដែលការនាំចេញប្រេង និងឧស្ម័នធម្មជាតិរាវមួយភាគប្រាំ ឆ្លងកាត់ជាធម្មតា។ លោក Trump បាននិយាយនៅលើបណ្តាញសង្គមថា រូបលោកមានពេលវេលាទាំងអស់នៅក្នុងពិភពលោក ប៉ុន្តែអ៊ីរ៉ង់មិនមានទេ ។ ពេលវេលាកំពុងរំកិលទៅមុខ ដោយបន្ថែមថា យោធាអ៊ីរ៉ង់ត្រូវបានបំផ្លាញ ហើយមេដឹកនាំរបស់ពួកគេលែងមានឱកាសនិយាយជាមួយពួកលោកទៀតហើយ ការបិទផ្លូវទឹកគឺតឹងរ៉ឹង និងរឹងមាំ ហើយចាប់ពីពេលនោះមក ស្ថានភាពកាន់តែធ្ងន់ធ្ងរ៕

ភ្នំពេញ៖ប្រមុខការទូតកម្ពុជា ឯកឧត្តមឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិ មានប្រសាសន៍ថា ឯកឧត្តម ត្រៀមធ្វើការយ៉ាងជិតស្និទ្ធជាមួយទូតថ្មីប្រទេសនូវែលសេឡង់ ដើម្បីជំរុញកិច្ចសហប្រតិបត្តិការប្រទេសទាំងពីរឱ្យកាន់តែប្រសើរឡើង។ឯកឧត្តមឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិ បានមានប្រសាសន៍បញ្ជាក់បែបនេះ ក្នុងឱកាសអនុញ្ញាតឱ្យឯកឧត្តម Jonathan Kings ឯកអគ្គរដ្ឋទូតនូវែលសេឡង់ប្រចាំកម្ពុជា ដែលមាននិវេសនដ្ឋាននៅទីក្រុងបាងកក ចូលជួបជម្រាបលាក្នុងឱកាសបញ្ចប់អាណត្តិបេសកកម្មការទូតនៅកម្ពុជានៅរសៀលថ្ងៃទី២៣ ខែមេសា ឆ្នាំ២០២៦នេះ។ នៅក្នុងជំនួប ឯកឧត្តមឧបនាយករដ្ឋមន្រ្តី បានកោតសរសើរ ឯកឧត្តមឯកអគ្គរដ្ឋទូត ចំពោះកិច្ចខិតខំប្រឹងប្រែង និងការចូលរួមចំណែកដ៏មានតម្លៃ ក្នុងការពង្រឹង និងពង្រីកទំនាក់ទំនង និងកិច្ចសហប្រតិបត្តិការទ្វេភាគីរវាងកម្ពុជា និងនូវែលសេឡង់ ក្នុងអាណត្តិបេសកកម្មការទូតរបស់ឯកឧត្តមឯកអគ្គរដ្ឋទូត។ ឯកឧត្តមឯកអគ្គរដ្ឋទូត បានសម្តែងការអរគុណចំពោះកិច្ចសហប្រតិបត្តិការដ៏ជិតស្និទ្ធរវាងប្រទេសទាំងពីរ និងបានកោតសរសើរអំពីការរីកចម្រើនគួរឱ្យកត់សម្គាល់របស់កម្ពុជា។ ឯកឧត្តមឯកអគ្គរដ្ឋទូតសង្ឃឹមយ៉ាងមុតមំាថា ស្មារតីនៃភាពជាដៃគូនេះ នឹងបន្ដរីកចម្រើន ដើម្បីជំរុញកិច្ចសហប្រតិបត្តិការកាន់តែប្រសើរឡើងសម្រាប់ផលប្រយោជន៍រួមនៃប្រទេសទាំងពីរ។ នៅចុងបញ្ចប់នៃជំនួប ឯកឧត្តមឧបនាយករដ្ឋមន្ត្រី បានសម្ដែងការជឿជាក់លើការបន្តរីកចម្រើននៃទំនាក់ទំនងរវាងប្រទេសទាំងពីរ និងត្រៀមធ្វើការយ៉ាងជិតស្និទ្ធជាមួយឯកអគ្គរដ្ឋទូតថ្មីនៃប្រទេសនូវែលសេឡង់ប្រចាំកម្ពុជា។

ភ្នំពេញ៖ ក្រសួងពាណិជ្ជកម្ម​បាន​ធ្វើ​បច្ចុប្បន្ន​ភាព​ជូន​ដំណឹង​ថ្មី​ចំពោះ​តម្លៃ​លក់​រាយ​ប្រេង​ឥន្ធនៈ​នៅ​ព្រះរា​ជា​ណាចក្រកម្ពុជា អនុវត្តចាប់ពី ថ្ងៃទី២៤ ខែមេសា ឆ្នាំ២០២៦ រហូតដល់ថ្ងៃជូន​ដំណឹង​បន្ទាប់​ ក្នុងនោះប្រេងសាំងឡើងពី៤៩៥០ ដល់ ៥០០០ រៀល/លីត្រ ខណៈម៉ាស៊ូត​ធ្លាក់​ចុះ​ពី​៥៧០០ ​មកសល់ត្រឹម ៥ ៤០០ រៀល/លីត្រ។ តាមសេចក្តីជូនដំណឹង ក្រសួងពាណិជ្ជកម្មបានបញ្ជាក់ថា យោងប្រកាសអន្តរក្រសួង ចុះថ្ងៃទី២២ ខែ​មីនា ឆ្នាំ២០២២ របស់ក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម និងក្រសួងរ៉ែ និង​ថាមពល ស្តីពីការកំណត់រូបមន្តសម្រាប់កែសម្រួលថ្លៃលក់រាយប្រេងឥន្ធនៈនៅកម្ពុជា និង​យោង​លើ​ការ​ព្រមព្រៀង លើរូបមន្តកំ​ណត់​តម្លៃ​ជាមួយ​ក្រុម​ហ៊ុន​ប្រេង​ឥន្ធនៈ​ដែល​ប្រកប​អាជីវ​កម្ម​នៅ​កម្ពុជា​។យោងការប្រែប្រួលនៃតម្លៃប្រេងឥន្ធនៈលើទីផ្សារក្នុងតំបន់និងអន្តរជាតិ, រាជរដ្ឋាភិបាល បាន​បន្ត​បញ្ចុះ​ចំនួន ៦,៥សេនដុល្លារ/លីត្រ ក្នុងគោលបំណងជួយសម្រួលដល់ជីវភាពរបស់ប្រជាព។ រាជ​រដ្ឋាភិបាល បន្តបញ្ចុះ ១សេនដុល្លារ/លីត្របន្ថែមទៀត ដោយសារថ្លៃ​ប្រេង​សាំង​អន្តរជាតិ​ឡើង​លើស​ពី ៩០ដុល្លារ/បារ៉ែល និងប្រេងម៉ាស៊ូតអន្តរជាតិ ឡើងលើស ១០០ដុល្លារ/បារ៉ែល ៣. ពន្ធ​គយ ​០ (សូន្យ) ន្យ) ដុល្លារ និង ៤. ផ្អែកតាមសភាពការណ៍ និងថ្លៃ​ប្រេង​ឥន្ធនៈ​បន្ត​កើន​ឡើង​នៅ​ទីផ្សារអន្តរជាតិ ក៏ដូចជាថ្លៃដឹកជញ្ជូននិងថ្លៃធានារ៉ាប់រងមានការកើនឡើងខ្ពស់ សម្តេច​ធិបតី​នាយក​រដ្ឋ​មន្ត្រីបានសម្រេចបញ្ចុះអាករបន្ថែមលើប្រេងសាំង និងប្រេងម៉ាស៊ូតមក ០ (សូន្យ) ដុល្លារ​, បញ្ចុះអាករពិសេសលើប្រេងសាំងពី ៣០% មក ១៥% និង ប្រេងម៉ាស៊ូត ពី ៤% មក ០% និងបញ្ចុះអាករលើតម្លៃបន្ថែមលើប្រេងសាំងពី ១០% មក ៤% និងប្រេងម៉ាស៊ូត ពី ១០% មក ០% ដោយរាជរដ្ឋាភិបាលទទួលបន្ទុកជំនួសសរុបចំនួន ៦% សម្រាប់ប្រេងសាំង និង ១០% សម្រាប់ប្រេងម៉ាស៊ូត។សេចក្ដី​ជូនដំណឹងបញ្ជាក់ថា៖«ដូច្នេះថ្លៃលក់រាយប្រេងឥន្ធនៈត្រូវអនុវត្ត ចាប់ពីថ្ងៃទី២៤ ខែមេសា ឆ្នាំ​២០២៦ រហូតដល់ថ្ងៃជូនដំណឹងបន្ទាប់ គឺត្រូវលក់ ៥០០០រៀលលីត្រ សម្រាប់​ប្រេង​សាំង​ធម្មតា​ (Gasoline 92) និង ៥៤០០រៀល/លីត្រ សម្រាប់ប្រេងម៉ាស៊ូត (Gasoil 10ppm)»៕