រូបភាពវីដេអូឃ្លីបទទួលបានដោយទីភ្នាក់ងារព័ត៌មានរ៉យទ័រនាថ្ងៃព្រហស្បតិ៍នេះ ឃើញអ្នកតាំងលំនៅនិគមន៍អ៊ីស្រាអែលម្នាក់ ចូលក្នុងរូងភ្នំ អំឡុងការវាយឆ្មក់លើសហគមន៍ប៉ាឡេស្ទីន Bedouin ជិតទីក្រុង Hebron ស្ថិតក្នុងតំបន់កាន់កាប់វ៉េសប៊ែង ជាទីដែលស្រ្តីជាម្តាយម្នាក់ និងកូនគាត់ម្នាក់រស់នៅ មុនពេលរុញពួកគេឲ្យដួល ពេលដែលគាត់ដើរកាត់ ។ រូបភាពវីដេអូឃ្លីបថតកាលពីថ្ងៃពុធនេះដែរ ឃើញគាត់វាយប្រហារសុនខរបស់ពួកគេផងដែរ ។ ទីភ្នាក់ងារព័ត៌មានរ៉យទ័រ អាចបញ្ជាក់ផ្ទៀងផ្ទាត់ទីតាំងរូងភ្នំនោះពីភ្នំ ទីវាល និងប្លង់ផ្លូវ ដែលត្រូវបានមើលឃើញនៅក្នុងវីដេអូ និងផ្គូរផ្គងជាមួយរូបភាពផ្កាយរណប ។ គួរឲ្យដឹងថា កាលពីសប្តាហ៍មុន អង្គការសហប្រជាជាតិ(UN) រាយការណ៍ថា ក្រុមអ្នកតាំងលំនៅនិគមន៍អ៊ីស្រាអែល បានបើកការវាយប្រហារយ៉ាងហោច ៤៩លើក ចន្លោះថ្ងៃទី ១២ និងថ្ងៃទី ១៨ ខែឧសភា បណ្តាលឲ្យកើតមានគ្រោះថ្នាក់ ឬការខូចខាតទ្រព្យសម្បត្តិរបស់ជនប៉ាឡេស្ទីន ។ ឧបទ្ទេវហេតុទាំងនេះ រួមមានទាំងការកើនឡើងការដុតបំផ្លាញដែលមានគោលដៅលើផ្ទះសម្បែងប្រជាពលរដ្ឋ ដីកសិដ្ឋាន រថយន្ត និងវិហារ ហើយតួលេខចុងក្រោយនេះ ធ្វើឲ្យការវាយប្រហាររបស់ក្រុមតាំងលំនៅនិគមន៍អ៊ីស្រាអែលក្នុងឆ្នាំនេះនៅតំបន់កាន់កាប់វ៉េសប៊ែង កើតឡើងជាង ៨៧០ឡើង លើសហគមន៍ ២២០កន្លែង ៕

ក្រសួងការបរទេសរុស្ស៊ី នៅ​ថ្ងៃព្រហស្បតិ៍ (ទី២៨ ខែឧសភា ឆ្នាំ២០២៦) នេះ បាន​លើក​ឡើង​ថា ការអនុញ្ញាតឲ្យ​ប្រព័ន្ធមីស៊ីលអាមេរិក ត្រូវបានដាក់ពង្រាយ នៅលើទឹកដីជប៉ុន ដែល​ជាផ្នែកមួយនៃសមយុទ្ធយោធា នឹងគំរាមកំហែងដល់សន្តិសុខនៃព្រំដែនភាគខាងកើតរបស់ប្រទេស​រុស្ស៊ី។អ្នកនាំពាក្យក្រសួងការបរទេស លោកស្រី Maria Zakharova បាននិយាយថា៖ «រុស្ស៊ីចាត់ទុកការផ្តល់ទឹកដីរបស់ខ្លួន ឲ្យ​មាន​ការ​ដាក់ពង្រាយប្រព័ន្ធមីស៊ីល Typhon របស់សហរដ្ឋអាមេរិក សម្រាប់​សម​យុទ្ធយោធាថា ជាជំហានមួយដែលគំរាមកំហែងដល់ព្រំដែនចុងបូព៌ារបស់រុស្ស៊ី»។លោកស្រី Zakharova បានបន្ត​ថា៖ «ទីក្រុងមូស្គូបានជូនដំណឹងម្តងហើយម្តងទៀតដល់ទីក្រុងតូក្យូ អំពីក្ដី​បារម្ភរបស់ខ្លួន ដែល​ថា ការដាក់ពង្រាយមីស៊ីលណាមួយ នៅក្នុងប្រទេសជប៉ុន មានផលប៉ះពាល់អវិជ្ជមានយ៉ាងធ្ងន់ធ្ងរ ទៅលើស្ថិរភាព និងសន្តិសុខនៃតំបន់អាស៊ី-ប៉ាស៊ីហ្វិក និងបង្កការគំរាមកំហែងដោយផ្ទាល់ដល់ព្រំដែនចុងបូព៌ារបស់យើង»។លោកស្រីបានបន្ថែម​ថា៖ «យើងក៏បានព្រមានជាប់ជានិច្ច​ដល់ភាគីជប៉ុន ប្រឆាំងនឹងការសម្រេចចិត្តបែបនេះ ដែលយើងនឹងចាត់ថ្នាក់ថា ជាការ​ធ្វើ​ដោយ​ចេតនា បង្ក​អរិភាព និងមិនអើពើនឹងផលប្រយោជន៍ជាតិរបស់សហព័ន្ធរុស្ស៊ី»៕

នា​ព្រឹកថ្ងៃព្រហស្បតិ៍ (ទី២៨ ខែឧសភា ឆ្នាំ២០២៦) នេះ មនុស្សយ៉ាង​តិច ៣នាក់ បានរងរបួស ដោយសារ​ការវាយប្រហារដោយចាក់នៅស្ថានីយ៍រថភ្លើង ក្នុងទីក្រុង Winterthur នៅ​ភាគឦសាននៃទីក្រុង Zurich ប្រទេសស្វីស។ នេះបើយោងតាមការ​ឲ្យ​ដឹង​ពី​នគរបាលខេត្ត​ Zurich។តាមរយៈ​សេចក្តីថ្លែងការណ៍ នគរបាល​បាន​ឲ្យដឹង​ថា ការវាយប្រហារនេះបានកើតឡើងភ្លាមៗ បន្ទាប់ពីម៉ោង ៨:៣០ព្រឹក ម៉ោងក្នុងស្រុក (ត្រូវ​នឹង​ម៉ោង ៦:៣០ ម៉ោង​សកល​) នៅពេលដែលបុរសម្នាក់ប្រដាប់ដោយអាវុធចុង​ស្រួច​ បានវាយប្រហារមនុស្សជាច្រើន នៅស្ថានីយ៍នោះ​។អាជ្ញាធរបានបញ្ជាក់​ថា ជនសង្ស័យត្រូវបានចាប់ខ្លួននៅកន្លែងកើតហេតុ។ រូប​គេ​ត្រូវបានគេ​បង្ហាញ​អត្តសញ្ញាណ​ថា ជាជនជាតិស្វីសអាយុ ៣១ឆ្នាំ។ជនរងគ្រោះទាំង ៣រូប​ ដែលសុទ្ធ​តែ​ជាជនជាតិស្វីសមាន​អាយុ ២៨ ៤៣ និង ៥២ឆ្នាំ ត្រូវបានបញ្ជូនទៅមន្ទីរពេទ្យ ដើម្បីព្យាបាលរបួស​។ នគរបាល​បានបន្ថែម​ថា ហេតុផលឈាន​ដល់​ការវាយប្រហារនេះ នៅតែស្ថិតក្រោមការស៊ើបអង្កេត​។ទីក្រុង Winterthur មានទីតាំងស្ថិតនៅភាគឦសាននៃទីក្រុង Zurich ហើយជាមជ្ឈមណ្ឌលផ្លូវដែកធំជាងគេមួយរបស់ប្រទេសស្វីស៕

ប្រទេស​រុស្ស៊ី និងអាហ្វហ្គានីស្ថាន បានចុះហត្ថលេខាលើកិច្ចព្រមព្រៀង ស្តីពីកិច្ចសហប្រតិបត្តិការបច្ចេកទេសយោធា ក្នុងអំឡុងពេលមាន​វេទិកាសន្តិសុខអន្តរជាតិ នៅតំបន់មូស្គូ ខណៈដែលទីក្រុងមូស្គូបន្តពង្រីកទំនាក់ទំនងជាមួយអាជ្ញាធរដឹកនាំដោយតាលីបង់ នៅទីក្រុងកាប៊ុល។កិច្ចព្រមព្រៀងនេះត្រូវបានចុះហត្ថលេខា កាល​ពី​ល្ងាចថ្ងៃពុធ ដោយលេខាធិការក្រុមប្រឹក្សាសន្តិសុខរុស្ស៊ី លោក Sergei Shoigu និងរដ្ឋមន្ត្រីការពារជាតិអាហ្វហ្គានីស្ថាន លោក Mohammad Yaqoob។លោក Yaqoob បាននិយាយថា៖ «អន្តរកម្មជាមួយរុស្ស៊ី គឺមានសារៈសំខាន់ សម្រាប់ពួក​យើង។ អាហ្វហ្គានីស្ថាន និងរុស្ស៊ី មានទំនាក់ទំនងជា​ប្រវត្តិសាស្ត្រដ៏​យូរអង្វែង ហើយយើងចង់បន្តឆ្ពោះទៅមុខ ក្នុងទិសដៅនេះ។ ពួក​យើងបានពង្រីកទំនាក់ទំនងទ្វេភាគី»។ចំណែក​លោក Shoigu បានលើក​ឡើង​ថា ប្រទេសលោកខាងលិច គួរតែលុប​ចោល​ការ​​បង្កកទ្រព្យសម្បត្តិរបស់​អាហ្វហ្គានីស្ថាន ហើយ​ទទួលខុសត្រូវ ចំពោះការកសាងប្រទេសនេះ​ឡើងវិញ បន្ទាប់ពីមាន​វត្តមានយោធា ២ទសវត្សរ៍។លោកបានបញ្ជាក់​ថា៖ «យើងជឿជាក់ថា ប្រទេសលោកខាងលិចគួរតែ​លុប​ចោល​ការ​​​បង្កកទ្រព្យសម្បត្តិរបស់​អាហ្វហ្គានីស្ថាន ​ ទទួលស្គាល់យ៉ាងពេញលេញនូវការទទួលខុសត្រូវរបស់ពួកគេ ចំពោះវត្តមានរយៈពេល ២០​ឆ្នាំរបស់ពួកគេ នៅក្នុងប្រទេសអាហ្វហ្គានីស្ថាន និងទទួលបន្ទុក ចំពោះ​ការ​កសាងឡើងវិញ ក្រោយជម្លោះរបស់ប្រទេសនេះ​»។គួរបញ្ជាក់ថា កិច្ចព្រមព្រៀងនេះកើតឡើងក្នុង​ពេលដែល​ទីក្រុងមូស្គូ និងអាជ្ញាធរតាលីបង់ មានទំនាក់ទំនងកាន់តែខ្លាំងឡើងៗ៕

យោងតាមសេចក្ដី​រាយការណ៍​របស់​ប្រព័ន្ធផ្សព្វផ្សាយរដ្ឋ បាន​ឲ្យ​ដឹង​ថា ប្រទេសចិន នៅថ្ងៃព្រហស្បតិ៍ (ទី២៨ ខែឧសភា ឆ្នាំ២០២៦) នេះ បានសម្តែងក្ដី​បារម្ភ អំពីចំណាត់​ការ​របស់ប្រទេសជប៉ុន ក្នុងការបង្កើតក្រុមប្រឹក្សាស៊ើបការណ៍សម្ងាត់ជាតិ។សភាជប៉ុន ដោយមាន​ការបោះឆ្នោតសំឡេង​ភាគច្រើន កាល​ពី​ថ្ងៃពុធ បានអនុម័តច្បាប់មួយ ដើម្បីបង្កើតការិយាល័យនេះ ដែលមានគោលបំណងពង្រឹងសមត្ថភាពស៊ើបការណ៍សម្ងាត់របស់រដ្ឋាភិបាល។ក្រុមប្រឹក្សានេះនឹងត្រូវបានដឹកនាំដោយនាយករដ្ឋមន្ត្រីជប៉ុន ដោយមានការិយាល័យស៊ើបការណ៍សម្ងាត់ជាតិបម្រើជាផ្នែក​ប្រតិបត្តិការរបស់ខ្លួន ដោយច្របាច់​បញ្ចូល​គ្នានូវ​មុខងារស៊ើបការណ៍សម្ងាត់ដែលមាន​ការ​បែងចែក​របស់ប្រទេស ក្រោមបញ្ជាការបង្រួបបង្រួម។អ្នកនាំពាក្យក្រសួងការបរទេសចិន លោក Mao Ning បាននិយាយថា ទីក្រុងប៉េកាំងមានក្ដី​បារម្ភ អំពីការអភិវឌ្ឍពាក់ព័ន្ធ ដែលបានបង្កមានភាពចម្រូងចម្រាស និងការសង្ស័យ ទាំងក្នុង និងក្រៅប្រទេសជប៉ុន។ នេះបើយោងតាមរបាយការណ៍របស់សារព័ត៌មាន Xinhua។លោកស្រីបានបន្ថែម​ថា៖ «តាមប្រវត្តិសាស្ត្រ ទីភ្នាក់ងារស៊ើបការណ៍សម្ងាត់ជប៉ុន បានជួយបង្កើត​គ្រឹះមូល​ដ្ឋាន​ សម្រាប់យោធានិយមរបស់ជប៉ុន និងសង្គ្រាមឈ្លានពានរបស់ខ្លួន និងបានប្រព្រឹត្តបទឧក្រិដ្ឋរាប់មិនអស់ លើ​ប្រទេសជិតខាងអាស៊ី និងប្រជាជនជប៉ុន»។ លោកស្រី​ Mao បានជំរុញឲ្យ​មេដឹកនាំជប៉ុន «រៀនសូត្រ​ពី​មេរៀនប្រវត្តិសាស្ត្រ និងចាត់វិធានការ​ដោយប្រុងប្រយ័ត្ន»៕

ប្រធានាធិបតីអ៊ុយក្រែន លោក Volodymyr Zelenskyy បានប្រកាសនៅថ្ងៃព្រហស្បតិ៍ (ទី២៨ ខែឧសភា ឆ្នាំ២០២៦) នេះ​ថា លោកបានទៅ​ដល់ប្រទេសស៊ុយអែតហើយ​ ដែល​ជា​ដំណើរទស្សនកិច្ចការងារ។ក្នុងសេចក្តីថ្លែងការណ៍មួយ នៅ​លើកម្មវិធី​ផ្ញើសារ Telegram លោក Zelenskyy បានបញ្ជាក់​ថា លោកមានគម្រោងផ្តោតលើការពង្រឹងកិច្ចសហប្រតិបត្តិការការពារជាតិ និងធានាការគាំទ្រយោធាបន្ថែម សម្រាប់ប្រទេស​អ៊ុយក្រែន នៅក្នុងកិច្ចប្រជុំជាមួយមន្ត្រីស៊ុយអែត។លោកបានបន្ត​ថា៖ «ថ្ងៃនេះ ក្នុងដំណើរទស្សនកិច្ចការងារ នៅ​ប្រទេសស៊ុយអែត យើងកំពុងរៀបចំកញ្ចប់ការពារជាតិដ៏ធំមួយ សម្រាប់អ៊ុយក្រែន និងជាជំហានដ៏រឹងមាំមួយឆ្ពោះទៅរក​ការទទួល​បាន​យន្តហោះចម្បាំង Gripen ដែលពិតជានឹងធ្វើឲ្យ​ប្រយុទ្ធផ្លូវ​អាកាស​របស់យើងកាន់តែមានប្រសិទ្ធភាព»។ប្រធានាធិបតីអ៊ុយក្រែនបានបន្ថែម​ថា កិច្ចប្រជុំត្រូវបានគ្រោង​ធ្វើ​ឡើង​ជាមួយនាយករដ្ឋមន្ត្រីស៊ុយអែត លោក Ulf Kristersson រួមជាមួយនឹងកិច្ចពិភាក្សាទូលំទូលាយដែលពាក់ព័ន្ធនឹងគណៈប្រតិភូ និងតំណាងមកពីឧស្សាហកម្មការពារជាតិស៊ុយអែត។គួរបញ្ជាក់ថា ដំណើរទស្សនកិច្ចនេះកើតឡើង ក្នុងពេល​ដែលអ៊ុយក្រែនបន្តកិច្ចប្រឹងប្រែង ដើម្បីទទួលបានជំនួយយោធាបន្ថែមពីលោកខាងលិច រួមទាំងប្រព័ន្ធការពារដែនអាកាសកម្រិតខ្ពស់​ និងយន្តហោះចម្បាំងទំនើប​ៗ ស្រប​ពេលជម្លោះជាមួយរុស្ស៊ី មិន​ទាន់​បញ្ចប់​៕

រដ្ឋមន្ត្រីក្រសួងការពារជាតិចិន លោក Dong Jun នឹងមិនចូលរួមនោះទេ ក្នុងកិច្ចប្រជុំ Shangri-La នា​សប្តាហ៍ បន្ទាប់ពីទីក្រុងប៉េកាំងនៅថ្ងៃព្រហស្បតិ៍ (ទី២៨ ខែឧសភា ឆ្នាំ២០២៦) នេះ​ បានប្រាប់​ឲ្យដឹ​ងថា ខ្លួនកំពុងបញ្ជូនគណៈប្រតិភូ «អ្នកជំនាញ និងបញ្ញវន្ត» មកពីកងទ័ពរំដោះប្រជាជន (PLA) ទៅកាន់វេទិកាសន្តិសុខមួយ​នេះ​។អ្នកនាំពាក្យក្រសួងការពារជាតិ លោក Jiang Bin បាននិយាយនៅថ្ងៃទី២៨ ខែឧសភានេះ​ថា ប្រទេសចិននឹងត្រូវបានតំណាងដោយមន្ត្រីមកពីវិទ្យាស្ថានស្រាវជ្រាវដែលគ្រប់គ្រងដោយ PLA និងកងទ័ពជើងទឹក។ នៅឆ្នាំ២០២៥ ទីក្រុងប៉េកាំងក៏បានបញ្ជូនគណៈប្រតិភូកម្រិតស្រដៀងគ្នានេះទៅកាន់ព្រឹត្តិការណ៍នេះផងដែរ​។នេះគឺ​ជាឆ្នាំទី២ ហើយ ដែលរដ្ឋមន្ត្រីក្រសួងការពារជាតិចិន លោក Dong Jun នឹងមិនមាន​វត្ត​មាន​នៅ​ក្នុងព្រឹត្តិការណ៍នេះ។ ព្រឹត្តិការណ៍​នេះ​ផ្តល់នូវឱកាសដ៏កម្រ សម្រាប់អន្តរកម្ម រវាងប្រមុខការពារជាតិចិន និងសហរដ្ឋអាមេរិក។អំឡុង​ការជួបជុំឆ្នាំ២០២៥ នៅប្រទេសសិង្ហបុរី រដ្ឋមន្ត្រីក្រសួងការពារជាតិអាមេរិក លោក Pete Hegseth បានហៅប្រទេសចិនថា ជាការគំរាមកំហែងនៅក្នុងតំបន់ឥណ្ឌូ-ប៉ាស៊ីហ្វិក និងបានជំរុញឲ្យ​សម្ព័ន្ធមិត្តអាស៊ីបង្កើនការចំណាយ លើវិស័យការពារជាតិ ដែលធ្វើឲ្យទីក្រុងប៉េកាំងខឹងសម្បា។ មន្ត្រីនៅទីក្រុងប៉េកាំងបានឆ្លើយតប​វិញ​ថា មតិយោបល់បែបនេះបានបង្ខូចកេរ្តិ៍ឈ្មោះប្រទេសចិន និងរិះគន់ទីក្រុងវ៉ាស៊ីនតោនថា បាន​បង្កើតភាពតានតឹង នៅក្នុងតំបន់អាស៊ី-ប៉ាស៊ីហ្វិក។លោក Hegseth នឹងថ្លែងសុន្ទរកថាក្នុងវេទិកានេះ នៅសប្តាហ៍​នេះ៕

ប្រមុខ​អង្គការសុខភាពពិភពលោក (WHO) នៅថ្ងៃព្រហស្បតិ៍ (ទី២៨ ខែឧសភា ឆ្នាំ២០២៦) នេះ បាន​ប្រាប់​ឲ្យ​ដឹង​ថា លោកកំពុងធ្វើដំណើរទៅកាន់សាធារណរដ្ឋប្រជាធិបតេយ្យកុងហ្គោ ដើម្បីគាំទ្រសហការីដែលកំពុងប្រយុទ្ធប្រឆាំងនឹងការផ្ទុះឡើងនូវ​ជំងឺបណ្ដាល​ឲ្យមាន​មនុស្ស​ស្លាប់ គឺ​ Ebola ដោយបង្ហាញទំនុកចិត្តថា ពួកគេនឹងទទួល​បាន​ជោគជ័យ​លើ​វីរុស​នេះ។យោងតាមតួលេខចុងក្រោយរបស់ស្ថាប័ន​នេះ បាន​បង្ហាញ​ថា​ រហូតដល់ថ្ងៃទី២៤ ខែឧសភា WHO បានកត់ត្រាការស្លាប់ ដោយសារជំងឺ Ebola ចំនួន ១៩​នាក់ និងករណី​សង្ស័យ ២២៣នាក់ នៅកុងហ្គោ ចាប់តាំងពីការផ្ទុះឡើងនូវ​ជំងឺនេះ ត្រូវបានប្រកាសននា​ពាក់កណ្តាលខែឧសភានេះ ក្នុងចំណោមករណីដែលត្រូវបានបញ្ជាក់ និងសង្ស័យជាង ១.០០០ករណី។អគ្គនាយក WHO លោក Tedros Adhanom Ghebreyesus បារម្ភថា អសន្តិសុខនៅភាគខាងកើតកុងហ្គោ ដែលត្រូវបានញាំញីដោយជម្លោះអស់រយៈពេល ៣ទសវត្សរ៍មកហើយនោះ​ កំពុងធ្វើឲ្យ​ពិបាកខ្លាំងណាស់ ក្នុងការទប់ស្កាត់ការផ្ទុះឡើងនូវ​ជំងឺនេះ។លោកវេជ្ជបណ្ឌិត Tedros បានឲ្យ​ដឹង​នៅលើបណ្ដាញ​សង្គម X ថា៖ «ខ្ញុំកំពុងធ្វើដំណើរទៅកាន់សាធារណរដ្ឋប្រជាធិបតេយ្យកុងហ្គោ។ ជំងឺ Ebola បានកើត​ឡើង​ជា​ថ្មីទៀត​ហើយ។ ខេត្ត Ituri កំពុងរងផលប៉ះពាល់យ៉ាងខ្លាំង។ ខ្ញុំនឹងនៅទី​តាំង​ជាក់​ស្ដែង​ជាមួយក្រុម WHO ដៃគូ និងបុគ្គលិកសុខាភិបាលដ៏អស្ចារ្យរបស់យើង ដែលមិនដែលឈប់ប្រយុទ្ធឡើយ ដោយ​គ្រប់​គ្នា​ធ្វើការក្រោមការដឹកនាំរបស់រដ្ឋាភិបាលសាធារណរដ្ឋប្រជាធិបតេយ្យកុងហ្គោ»។លោកបាន​បន្ថែម​ថា៖ «១៦​លើក​មក​ហើយ​ ដែល​ប្រទេសនេះបានកម្ចាត់ជំងឺ Ebola។ លើក​ទី១៧ នឹងមិនខុសគ្នានោះ​ទេ។ ប៉ុន្តែយើងត្រូវតែធ្វើសកម្មភាពឥឡូវនេះ ជាមួយគ្នា»។គួរ​បញ្ជាក់​ថា មិនមានវ៉ាក់សាំង ឬការព្យាបាល សម្រាប់វីរុស​ Ebola ប្រភេទ Bundibugyo ដែលជាមូលហេតុនៃការផ្ទុះឡើងនូវ​ជំងឺនេះ នាពេលនេះ៕

ក្រសួងការពារជាតិ នៅទីក្រុងប៉េកាំងបានបញ្ជាក់​នៅថ្ងៃព្រហស្បតិ៍ (ទី២៨ ខែឧសភា ឆ្នាំ២០២៦) នេះ​ថា តៃវ៉ាន់មិនគួរ «រំខាន​» នោះទេ ដល់​បេសកកម្មកងទ័ពអាកាសចិន នៅជុំវិញកោះនេះ ដែលកំពុងកើតឡើងនៅក្នុងដែនអាកាសរបស់ចិន ដោយឆ្លើយតបទៅនឹងសមយុទ្ធរយៈពេល ១សប្តាហ៍ ដែលទីក្រុងតៃប៉ិរិះគន់​​។ប្រទេស​ចិនចាត់ទុកកោះ​តៃវ៉ាន់ដែលគ្រប់គ្រងដោយប្រជាធិបតេយ្យថា ជាទឹកដីរបស់ខ្លួន តែ​មាន​ការ​ជំទាស់​ពី​រដ្ឋបាលទីក្រុង​​តៃប៉ិ ហើយយន្តហោះចម្បាំង និងនាវាចម្បាំងរបស់ខ្លួន ធ្វើប្រតិបត្តិការ នៅជុំវិញកោះនេះស្ទើរតែរាល់ថ្ងៃ។ក្នុង​សប្ដាហ៍នេះ​ គឺ​នៅ​ថ្ងៃទី២៥ និងសប្ដាហ៍កន្លង​មក នៅ​ថ្ងៃទី១៩​ ខែឧសភា​ កោះ​តៃវ៉ាន់បានឲ្យ​ដឹង​ថា ចិនបានអនុវត្ត «ការល្បាតត្រៀមខ្លួនប្រយុទ្ធរួម» និងបានផ្សាយរូបភាពនៃនាវាចម្បាំងរបស់​ចិន ក៏ដូចជាយន្តហោះចម្បាំងចិនដែលត្រូវបានថត​ដោយ​យន្តហោះតៃវ៉ាន់។នៅទីក្រុងប៉េកាំងនៅពេលដែលត្រូវបានសុំឲ្យ​ធ្វើការ​អត្ថាធិប្បាយ ជុំវិញ​ការល្បាតទាំងនោះ អ្នកនាំពាក្យក្រសួងការពារជាតិចិន លោក Jiang Bin បាននិយាយថា៖ «កោះ​តៃវ៉ាន់ គឺជាផ្នែកមួយនៃប្រទេសចិន។ យន្តហោះរបស់យើងធ្វើសកម្មភាពយោធា នៅក្នុងដែនអាកាសរបស់​ប្រទេស​ចិន។ កងកម្លាំងប្រដាប់អាវុធ ទាម​ទារ​ឯករាជ្យរបស់​កោះ​តៃវ៉ាន់ គួរតែចៀសវាងការ​រំខាន និងការបង្ក​ហេតុ»។លោក Jiang បានបន្ថែម​ថា យោធាចិននឹងបន្តពង្រឹងការហ្វឹកហ្វឺន និងការត្រៀមខ្លួនប្រយុទ្ធរបស់ខ្លួន ចាត់វិធានការ ដើម្បីការពារអធិបតេយ្យភាព និងបូរណភាពទឹកដី និង «កម្ចាត់ចោលយ៉ាងទាំង​ស្រុង​នូវសកម្មភាពបំបែកខ្លួន និងការជ្រៀតជ្រែកពីខាងក្រៅណាមួយ»៕

ក្រុមហាម៉ាសប៉ាឡេស្ទីន នៅ​ថ្ងៃព្រហស្បតិ៍ (ទី២៨ ខែឧសភា ឆ្នាំ២០២៦) បាន​លើកឡើង​ថា ការបង្កើន​ការវាយប្រហាររបស់អ៊ីស្រាអែល លើជនស៊ីវិល នៅតំបន់ហ្កាហ្សា និងការសម្លាប់ជនជាតិប៉ាឡេស្ទីនជាង ២០នាក់ ក្នុងរយៈពេល ៤៨ម៉ោងកន្លងមកនេះ បង្ហាញថា ទីក្រុង Tel Aviv កំពុងប្រឹង​ប្រែង​វិលត្រឡប់ទៅរក «ការ​ពន្លឿន​សង្គ្រាមប្រល័យពូជសាសន៍» ដែលបានបន្តអស់រយៈពេល ២ឆ្នាំ។នៅក្នុងសេចក្តីថ្លែងការណ៍មួយ ក្រុមហាម៉ាសបានឲ្យ​ដឹង​ថា ការវាយប្រហារតាមអាកាសរបស់អ៊ីស្រាអែលដែលកំណត់គោលដៅលើអគារលំនៅឋាន​មួយកន្លែង នៅក្នុងទីក្រុងហ្កាហ្សាភាគ​កណ្តាល កាលពីយប់មិញ (ថ្ងៃពុធ) ដែលបានសម្លាប់ជនជាតិប៉ាឡេស្ទីន ១០នាក់ រួមទាំងកុមារ ២នាក់ និងស្ត្រី ២នាក់ផង​ដែរ​ និងរបួសរាប់សិបនាក់ទៀត គឺជា «ឧក្រិដ្ឋកម្មថ្មី» និង «ការរំលោភបំពានថ្មី​ និងជាក់ស្តែង» លើ​កិច្ចព្រមព្រៀងបទ​ឈប់បាញ់ដែលបានចុះហត្ថលេខានៅទីក្រុង Sharm el-Sheikh របស់ប្រទេស​អេហ្ស៊ីប។កិច្ចព្រមព្រៀងនេះបានកើតឡើងបន្ទាប់ពីសង្គ្រាមរយៈពេល ២ឆ្នាំ នៅតំបន់ហ្កាហ្សា ដែលបានចាប់ផ្តើមនៅថ្ងៃទី៨ ខែតុលា ឆ្នាំ២០២៣។ ហើយ​បើយោងតាមតួលេខពី​អាជ្ញាធរប៉ាឡេស្ទីន បាន​ឲ្យ​ដឹង​ថា ជនជាតិប៉ាឡេស្ទីនជាង ៧២.០០០នាក់ ត្រូវបានសម្លាប់ និងជាង ១៧២.០០០នាក់រងរបួស ខណៈ​មាន​ការបំផ្លិចបំផ្លាញយ៉ាងទូលំទូលាយដែលប៉ះពាល់ដល់ហេដ្ឋារចនាសម្ព័ន្ធស៊ីវិលប្រហែល ៩០ភាគរយ​។ក្រុមហាម៉ាសបានបន្ថែម​ថា ការវាយប្រហារកាន់តែខ្លាំងឡើងៗរបស់អ៊ីស្រាអែល លើជនស៊ីវិល នៅទូទាំងតំបន់ហ្កាហ្សា និងការសម្លាប់ជនជាតិប៉ាឡេស្ទីនជាង ២០​នាក់ក្នុងការវាយប្រហារដោយ​កំណត់គោលដៅលើសង្កាត់លំនៅឋាន ក្នុងរយៈពេល ២ថ្ងៃកន្លងមកនេះ បានបង្ហាញពីចេតនារបស់ប្រទេសនេះ​ ក្នុងការចាប់ផ្ដើម​ប្រតិបត្តិការយោធាទ្រង់ទ្រាយធំឡើង​វិញ៕