អ្នកស្រុក និងភ្ញៀវទេសចរ នាំគ្នាងាកទៅរកប្រភពទឹកដូចជាទឹកបាញ់នៅទីក្រុងរ៉ូម ដើម្បីទទួលបានភាពត្រជាក់ ស្របពេលដែលប្រទេសអ៊ីតាលី កំពុងជួបរលកកម្តៅលើកដំបូងរបស់ខ្លួនក្នុងឆ្នាំនេះ ក្នុងនោះតំបន់ភាគខាងជើង និងតំបន់ភាគកណ្តាល រងផលប៉ះពាល់ខ្លាំងជាងគេ ពេលដែលសីតុណ្ហភាពកើនឡើងដល់ ៣៤-៣៥អង្សាសេ នៅតាមទីក្រុងជាច្រើន ។សញ្ញាធូរស្រាលដំបូងអាចនឹងកើតឡើងនៅថ្ងៃព្រហស្បតិ៍នេះ ពេលដែលភ្លៀងធ្លាក់ ត្រូវបានគេរំពឹងថា នឹងធ្វើឲ្យសីតុណ្ហភាពធ្លាក់ចុះ បើទោះបីជាទីក្រុង ៤ គឺទីក្រុង Turin, Bologna, Florence និងទីក្រុងរ៉ូម បន្តស្ថិតនៅក្នុងការប្រកាសអាសន្នពីរលកកម្តៅកម្រិតខ្ពស់ក៏ដោយ ។ដើម្បីការពារហានិភ័យពាក់ព័ន្ធនឹងរលកកម្តៅនេះ អភិបាលក្រុងរ៉ូម បានចុះហត្ថលេខាលើវិធានការតម្រូវឲ្យកម្មករសំណង់ និងកម្មករក្នុងវិស័យកសិកម្ម ត្រូវសម្រាកនៅទីកន្លែងត្រជាក់ អំឡុងពេលអាកាសធាតុក្តៅបំផុត ។គួរឲ្យដឹងថា របាយការណ៍របស់ទីភ្នាក់ងារអាកាសធាតុអង្គការសហប្រជាជាតិ (UN) និងការិយាល័យឧតុនិយមចក្រភពអង់គ្លេស បង្ហាញនៅថ្ងៃព្រហស្បតិ៍នេះថា សីតុណ្ហភាពសកលជាមធ្យម ត្រូវបានព្យាករថា នឹងឡើងដល់កម្រិតខ្ពស់បំផុត ក្នុងរយៈពេល ៥ឆ្នាំខាងមុខ ដោយសីតុណ្ហភាពអាកទិក ត្រូវបានគេរំពឹងថា នឹងឡើងក្ដៅលឿនជាងតំបន់ដទៃទៀត ៕

ប្រធានាធិបតីរុស្ស៊ីលោក Vladimir Putin មាននូវជំនួបកម្រិតខ្ពស់ជាមួយសមភាគីកាហ្សាក់ស្ថានលោក Kassym-Jomart Tokayev នាថ្ងៃព្រហស្បតិ៍នេះ ក្នុងទីក្រុង Astana នៅថ្ងៃទី ២នៃដំណើរទស្សនកិច្ចរបស់លោកទៅកាន់ប្រទេសនៅអាស៊ីកណ្តាលមួយនេះ ។លោក Tokayev បានកោតសរសើរភាពជាដៃគូយុទ្ធសាស្រ្ត និងទំនាក់ទំនងសម្ព័ន្ធមិត្តរវាងប្រទេសជិតខាងទាំង ២ ដែលត្រូវបានធ្វើឲ្យផ្លូវការនៅក្នុងសេចក្តីថ្លែងការណ៍រួមមួយថា “វាជាសសរស្តម្ភទាំង ៧នៃមិត្តភាព និងអ្នកជិតខាងល្អ” ។មេដឹកនាំកាហ្សាក់ស្ថានរូបនេះ បានថ្លែងអំណរគុណលោក Putin សម្រាប់ការគាំទ្រផែនការឲ្យសាងសង់រោងចក្រថាមពលនុយក្លេអ៊ែរនៅក្នុងប្រទេសរបស់លោក ។ កាហ្សាក់ស្ថាន រំពឹងថា រុស្ស៊ីនឹងផ្តល់ហិរញ្ញប្បទាន ៨៥ភាគរយនៃការសាងសង់រោងចក្រ ដែលគ្រោងដាក់ឲ្យដំណើរការនៅឆ្នាំ ២០៣៥-២០៣៦ ខាងមុខ ។ដោយឡែក លោក Putin កត់សម្គាល់ផងដែរថា រូបលោក និងលោក Tokayev បានលើកឡើងរួចទៅហើយពីវិស័យសំខាន់ៗជាច្រើននៃកិច្ចសហប្រតិបត្តិការរបស់ពួកគេ អំឡុងជំនួបកាលពីល្ងាចថ្ងៃពុធ ដែលជាថ្ងៃដំបូងនៃដំណើរទស្សនកិច្ចរបស់លោកទៅកាន់ប្រទេសកាហ្សាក់ស្ថាន ។សូមបញ្ជាក់ថា គណៈប្រតិភូរបស់លោក Putin រួមមានក្រុមមន្រ្តីជាន់ខ្ពស់ជាង ៣០រូប នៅក្នុងចំណោមសមាជិកគណៈរដ្ឋមន្រ្តី ក៏ដូចជាប្រធានក្រុមហ៊ុននុយក្លេអ៊ែររដ្ឋ Rosatom របស់រុស្ស៊ី ៕

អវកាសយានិករុស្ស៊ី ២នាក់របស់ក្រុមហ៊ុន Roscosmos បានដើរលើលំហរអាកាសនៅស្ថានីយអវកាសអន្តរជាតិ(ISS)ជាលើកដំបូងក្នុងឆ្នាំ ២០២៦នេះ ដើម្បីទទួលយកឧបករណ៍វិទ្យាសាស្រ្តដែលដាក់នៅក្រៅ ISS សម្រាប់ការស្រាវជ្រាវ ក៏ដូចជាដំឡើងកម្មវិធីថ្មី ដើម្បីពិសោធន៍សារធាតុវិទ្យុសកម្មរបស់ព្រះអាទិត្យ ។យោងតាមការអះអាងរបស់ទីភ្នាក់ងារអវកាសរុស្ស៊ី បានឲ្យដឹងថា លោក Sergey Kud-Sverchkov គឺជាមេបញ្ជាការបេសកកម្ម និងវិស្វករហោះហើរលោក Sergey Mikaev ត្រូវបានគេរំពឹងថា នឹងចំណាយពេលនៅលើលំហរអាកាសរយៈពេល ៥ម៉ោង ។ទោះបីជាយ៉ាងណាក៏ដោយ ក្រុមហ៊ុន Roscosmos និយាយនៅក្នុងសេចក្តីថ្លែងការណ៍ថា រយៈពេលជាង ៦ម៉ោង និង ៦នាទីនៅក្រៅស្ថានីយអវកាស អវកាសយានិកទាំង ២រូប បានសម្រេចការងារជាច្រើន ក្រោមកម្មវិធីវិទ្យាសាស្រ្តហោះហើរនៅ ISS ។ពួកគេបន្តថា ការងារធ្វើឡើងដោយអវកាសយានិករុស្ស៊ីទាំង ២រូប រួមមានទាំងការដំឡើងតេឡេស្កូបវិទ្យុសកម្ម ដែលត្រូវបានរចនាឡើង ដើម្បីអង្កេតព្រះអាទិត្យ ។ពួកគេកត់សម្គាល់ឃើញថា ឧបករណ៍នេះ នឹងជួយក្រុមអ្នកវិទ្យាសាស្រ្តប្រមែប្រមូលព័ត៌មានបន្ថែមទៀតពីការកើតឡើងអណ្តាតភ្លើងព្រះអាទិត្យ ហើយនិងជួយធ្វើឲ្យកាន់តែសុក្រឹតចំពោះការព្យាករពីព្យុះម៉ាញ៉េទិក និងកាត់បន្ថយហានិភ័យនៃបច្ចេកវិទ្យា និងហេដ្ឋារចនាសម្ព័ន្ធលើផែនដី និងនៅលើទីអវកាស ៕

រដ្ឋមន្រ្តីការបរទេសសហរដ្ឋអាមេរិកលោក Marco Rubio និយាយថា គុយបាមានបញ្ហាច្រើនណាស់ ខណៈដែលរូបលោកនិយាយពីការនាំចេញប្រេងវេណេស៊ុយអេឡាទៅកាន់សហរដ្ឋអាមេរិក ។លោក Rubio បន្តថា ប្រទេសមួយនេះ ត្រូវបានគ្រប់គ្រងដោយក្រុមកុម្មុយនិស្តដែលគ្មានសមត្ថភាព ។ ក្រុមកុម្មុយនិស្តមិនល្អនោះទេ ហើយក្រុមកុម្មុយនិស្តដែលគ្មានសមត្ថភាព រឹតតែមិនល្អទៅទៀត ។លោកនិយាយទៀតថា ប្រទេសគុយបា កាន់កាប់ដោយក្រុមហ៊ុន GAESA ដែលបានគ្រប់គ្រង ៧០ភាគរយនៃសេដ្ឋកិច្ចប្រទេសមួយនេះ ដូច្នេះហើយ ពុំមានប្រាក់របស់ក្រុមហ៊ុនណាមួយ បានទៅជួយពលរដ្ឋគុយបានោះទេ ។គួរឲ្យដឹងថា រដ្ឋបាលរបស់លោកប្រធានាធិបតី Donald Trump បាននឹងកំពុងបង្កើនសម្ពាធលើប្រទេសគុយបា ក្រោយប្រើប្រាស់កម្លាំងយោធាកាលពីខែមករា ដើម្បីទម្លាក់អំណាចរបស់ប្រធានាធិបតីវេណេស៊ុយអេឡាលោក Nicolas Maduro ។គុយបានបានក្លាយជាសត្រូវរបស់សហរដ្ឋអាមេរិកអស់រយៈពេលជាច្រើនទសវត្សរ៍មកហើយ ចាប់តាំងពីបដិវត្តន៍ឆ្នាំ ១៩៥៩របស់លោក Fidel Castro មកម្ល៉េះ ។លោក Trump ត្រូវបានគាំទ្រខ្លាំងដោយពលរដ្ឋកូនកាត់អាមេរិក-គុយបាប្រកាន់តឹង នៅរដ្ឋ Florida ដែលបានញុះញង់ឲ្យសហរដ្ឋអាមេរិកផ្លាស់ប្តូររបបគុយបា អស់រយៈពេលជាច្រើនទសវត្សរ៍មកហើយៗលោក Trump មកពីក្រុមសាធារណរដ្ឋ បានបញ្ជាក់យ៉ាងច្បាស់លាស់ថា លោកចង់មើលឃើញការផ្លាស់ប្តូរនៅប្រទេសគុយបា ៕

រដ្ឋាភិបាលអ៊ូហ្គង់ដា និយាយថា ពួកគេបានបិទព្រំដែនជាមួយប្រទេសជិតខាងកុងហ្គោ ដោយសារផលប៉ះពាល់បន្ទាន់ ដើម្បីទប់ស្កាត់ការរីករាលដាលឆ្លងជំងឺអេបូឡា ។អ្នកស្រី Diana Atwine គឺជាមន្រ្តីសុខភាពជាន់ខ្ពស់មួយរូបនិយាយប្រាប់សន្និសីទសារព័ត៌មានថា ព្រំដែននឹងត្រូវបិទរយៈពេល ៤សប្តាហ៍ លើកលែងតែក្រុមឆ្លើយតបជំងឺអេបូឡា ក្រុមជំនួយមនុស្សធម៌ និងប្រតិបត្តិការសន្តិសុខប៉ុណ្ណោះ ក៏ដូចជាការដឹកជញ្ជូនទំនិញ និងស្បៀងអាហារ ។អ្នកស្រីបន្តថា នរណាម្នាក់ដែលត្រូវបានអនុញ្ញាតឲ្យចូលប្រទេសអ៊ូហ្គង់ដា ចេញពីកុងហ្គោ នឹងត្រូវធ្វើចត្តាឡីស័ករយៈពេល ២១ថ្ងៃ ដោយខ្លួនឯង ។អ៊ូហ្គង់ដា បានរាយការណ៍ករណីឆ្លងជំងឺអេបូឡា ៧នាក់ និងករណីស្លាប់មនុស្សម្នាក់ នៅក្នុងការរីករាលដាលឆ្លងនេះ ដែលចំណុចកណ្តាលនៃការរីករាលដាល ស្ថិតនៅខេត្ត Ituri របស់កុងហ្គោ ។មកទល់នឹងពេលនេះ អង្គការសុខភាពពិភពលោក(WHO)បានរកឃើញករណីស្លាប់បានបញ្ជាក់ដោយសារជំងឺអេបូឡាចំនួន ១០នាក់ និងករណីស្លាប់សង្ស័យចំនួន ២២០នាក់ នៅក្នុងប្រទេសកុងហ្គោ ចាប់តាំងពីពាក់កណ្តាលខែឧសភារហូតមក ។ ពួកគេបានរកឃើញករណីឆ្លងសង្ស័យចំនួន ៩០០នាក់ផងដែរ ចាប់តាំងពីកុងហ្គោប្រកាសការរីករាលដាលឆ្លងជំងឺអេបូឡា កាលពីថ្ងៃទី ១៥ ខែឧសភា ។ស្ថានភាពសន្តិសុខនៅតំបន់ភាគខាងកើតកុងហ្គោ ដែលញាំញីដោយសារជម្លោះពាក់ព័ន្ធនឹងក្រុមប្រដាប់អាវុធអស់រយៈពេល ៣ទសវត្សរ៍មកហើយនោះ គឺជាឧបសគ្គដ៏ធំមួយ ក្នុងការចូលដល់តំបន់រីករាលដាលឆ្លងជំងឺអេបូឡា ។ សេវាកម្មសុខភាពរដ្ឋនៅតំបន់ដាច់ស្រយាលនៅខេត្ត Itur ពុំមាននោះទេ អស់រយៈពេលជាច្រើនទសវត្សរ៍មកហើយ ៕

ប្រធានាធិបតីបារាំងលោក Emmanuel Macron និយាយថា ន័រវែស បានយល់ព្រមចូលរួមឆ័ត្រនុយក្លេអ៊ែររបស់ខ្លួន ដើម្បីក្លាយជាប្រទេសចុងក្រោយគេ ទទួលយកការការពារនុយក្លេអ៊ែររបស់បារាំង ស្របពេលអឺរ៉ុបព្រួយបារម្ភចំពោះការប្តេជ្ញាចិត្តរបស់សហរដ្ឋអាមេរិក ក្នុងការរក្សាសន្តិសុខក្នុងតំបន់ ។ លោក Macron និយាយថា នាយករដ្ឋមន្រ្តីន័រវែសលោក Jonas Gahr យល់ព្រមឲ្យប្រទេសរបស់លោកចូលរួមឆ័ត្រនុយក្លេអ៊ែររបស់ពួកយើង ។ នេះគឺជាជំហានដ៏សំខាន់មួយ នៅក្នុងភាពជាដៃគូរបស់ពួកយើង ហើយវានឹងជំរុញកិច្ចសហប្រតិបត្តិការដ៏មហិច្ឆតាខ្ពស់របស់ពួកយើង ។ ខណៈពេលនោះដែរ លោក Gahr និយាយថា ន័រវែសមានព្រំដែនរួមចម្ងាយ ២០០គ.មជាមួយរុស្ស៊ី ដែលបច្ចុប្បន្នកំពុងធ្វើសង្រ្គាមពេញបន្ទុកដ៏ឃោឃៅជាមួយប្រទេសជិតខាងខ្លួនអ៊ុយក្រែន ។ លោកបន្តថា កាំភ្លើងធំនុយក្លេអ៊ែរធំបំផុតរបស់រុស្ស៊ីនៅចម្ងាយ ១០០គ.មប៉ុណ្ណោះពីព្រំដែនរបស់ពួកយើង នៅភាគខាងជើង ហើយដូចដែលរូបលោកនិយាយប្រាប់សម្ព័ន្ធមិត្តរបស់ពួកយើងអញ្ចឹងថា អាវុធទាំងនោះ មែនមែនផ្តោតជាចម្បងលើរូបលោកទេ ប៉ុន្តែវាគឺជាអាវុធយុទ្ធសាស្រ្តដែលធ្វើឲ្យកង្វល់ដល់សន្តិសុខមាតុភូមិសម្រាប់ប្រទេសជាច្រើនទៀត ។ សូមបញ្ជាក់ថា កាលពីខែមីនាកន្លងទៅ បារំាងស្នើឲ្យពង្រីកការការពារឆ័ត្រនុយក្លេអ៊ែររបស់ខ្លួនដល់ប្រទេសផ្សេងទៀតរបស់អឺរ៉ុប ៕

ក្រុមមន្រ្តីក្នុងស្រុកនិយាយថា មនុស្សយ៉ាងហោច ២នាក់ បានស្លាប់ និងមនុស្ស ៥នាក់ផ្សេងទៀត កំពុងបាត់ខ្លួន ក្រោយទូកមួយគ្រឿង បានលិចក្នុងទន្លេគង្គា ស្ថិតនៅរដ្ឋភាគខាងកើត Bihar ប្រទេសឥណ្ឌា នាថ្ងៃព្រហស្បតិ៍នេះ ។ លោក Tyagarajan គឺជាចៅក្រមស្រុក Patna និយាយថា ទូកដឹកអ្នកស្រុកមួយគ្រឿង បានក្រឡាប់ ពេលជួបខ្យល់បោកបក់ខ្លាំង ។ ក្រុមជួយសង្រ្គោះ ត្រូវបានបញ្ជូនទៅកាន់ទន្លេ ដើម្បីស្វែងរកមនុស្សបាត់ខ្លួន បន្ទាប់ពីឧបទ្ទេវហេតុលិចទូកនេះកើតឡើង ។លោកTyagarajaនិយាយទៀតថា ពួកយើងទទួលបានព័ត៌មានពីទូកលិចនៅជិតភូមិ Sultanpur ដោយសារខ្យល់បោកបក់ខ្លាំង ហើយភ្លាមៗនោះ ក្រុមអាជ្ញាធរ បានដាក់ពង្រាយក្រុមជួយសង្រ្គោះ ឲ្យចុះប្រតិបត្តិការស្វែងមនុស្សបាត់ខ្លួន ។ លោកបន្តថា ការស៊ើបអង្កេតបឋមបង្ហាញថា មាននូវមនុស្ស ៧នាក់នៅលើទូក ហើយសាកសពមនុស្ស ២នាក់ ត្រូវបានរកឃើញ ខណៈមនុស្ស ៥នាក់ផ្សេងទៀត កំពុងបាត់ខ្លួន ។ ឧបទ្ទេវហេតុនេះដែរ បានកើតឡើង រយៈពេល ១សប្តាហ៍ប៉ុណ្ណោះ ក្រោយមនុស្សយ៉ាងហោច ៦នាក់ បានស្លាប់ និងមនុស្សជាច្រើននាក់ផ្សេងទៀត បាត់ខ្លួន ក្រោយទូកកម្សាន្តដឹកភ្ញៀវទេសចរមួយគ្រឿង ក្រឡាប់ក្នុងទន្លេ ស្ថិតក្នុងរដ្ឋភាគកណ្តាល Madhya Pradesh ៕

នៅថ្ងៃព្រហស្បតិ៍នេះ រដ្ឋមន្រ្តីការបរទេសសហភាពអឺរ៉ុប(EU) បានជួបជុំគ្នានៅក្នុងប្រទេសស៊ីប ដើម្បីពិភាក្សាលើយុទ្ធសាស្រ្តណាមួយនៅក្នុងកិច្ចប្រជុំនាពេលអនាគតជាមួយរុស្ស៊ី ស្របពេលដែលអ៊ុយក្រែនជំរុញឲ្យអឺរ៉ុបដើរតួជាអ្នកចរចាជាមួយទីក្រុងមូស្គូ ខណៈសហរដ្ឋអាមេរិកផ្តោតសំខាន់លើសង្រ្គាមរបស់ខ្លួនជាមួយអ៊ីរ៉ង់ ។EU បន្តគោលនយោបាយធ្វើឲ្យរុស្ស៊ីឯកា ចាប់តាំងពីការវាយលុកឆ្នាំ ២០២២របស់ទីក្រុងមូស្គូ លើអ៊ុយក្រែន ។ ពួកគេបានដាក់ទណ្ឌកម្មទីក្រុងមូស្គូ និងមានទំនាក់ទំនងការទូត និងនយោបាកម្រិតខ្ពស់តិចតួចប៉ុណ្ណោះ ជាមួយរុស្ស៊ី ។ប៉ុន្តែពេលដែលកិច្ចប្រជុំដឹកនាំដោយសហរដ្ឋអាមេរិក ដើម្បីបញ្ចប់សង្រ្គាម មានវឌ្ឍនភាពតិចតួច ហើយសង្រ្គាមបច្ចុប្បន្នឈានចូលដល់ឆ្នាំទី ៥ហើយនោះ ក្រុមមន្រ្តីអឺរ៉ុប និយាយថា EU គួរតែត្រៀមខ្លួនសម្រាប់ពេលវេលាមកដល់ ដើម្បីចូលរួមកិច្ចប្រជុំជាមួយទីក្រុងមូស្គូ ។ក្រុមរដ្ឋមន្រ្តីការបរទេសអឺរ៉ុប ត្រូវបានគេរំពឹងថា នឹងពិភាក្សាលើបុរេលក្ខខណ្ឌរបស់ពួកគេ សម្រាប់លទ្ធភាពណាមួយនៃកិច្ចប្រជុំ ហើយនិងអ្វីដែលអឺរ៉ុបមានគោលបំណងចង់សម្រេចឲ្យបាន បើសិនជាប្លុកមួយនេះ សម្រេចចិត្តចូលរួមកិច្ចចរចាជាមួយរុស្ស៊ី ៕

រុស្ស៊ី និងអាហ្វហ្គានីស្ថានបានចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការយោធា-បច្ចេកទេស កាលពីថ្ងៃពុធ។កិច្ចព្រមព្រៀងនេះត្រូវបានចុះហត្ថលេខានៅវេទិកាសន្តិសុខអន្តរជាតិលើកដំបូងដែលរៀបចំដោយក្រុមប្រឹក្សាសន្តិសុខរុស្ស៊ី។វេទិកាសន្តិសុខអន្តរជាតិលើកទី ១ ក្រោមការឧបត្ថម្ភរបស់ក្រុមប្រឹក្សាសន្តិសុខរុស្ស៊ី កំពុងត្រូវបានធ្វើឡើងចាប់ពីថ្ងៃទី ២៦ ដល់ថ្ងៃទី ២៩ ខែឧសភា នៅតំបន់មូស្គូ។វេទិកានេះមានកិច្ចប្រជុំអន្តរជាតិប្រចាំឆ្នាំលើកទី ១៤ របស់តំណាងជាន់ខ្ពស់ដែលទទួលខុសត្រូវចំពោះបញ្ហាសន្តិសុខ កិច្ចប្រជុំពហុភាគីចំនួន ៦(BRICS សម្ព័ន្ធភាពរដ្ឋឯករាជ្យ (CIS), រុស្ស៊ី-អាស៊ាន, រុស្ស៊ី-អាស៊ីកណ្តាល, រុស្ស៊ី-ប្រទេសតំបន់ Sahel និងសន្និសីទសម្រាប់ប្រទេសអាហ្វ្រិក) ព្រឹត្តិការណ៍ចំនួន ២១ ក្នុងទម្រង់ជាតុមូល សន្និសីទ កិច្ចពិភាក្សាជាក្រុម និងកិច្ចប្រជុំជាយុទ្ធសាស្ត្រ។ វេទិកានេះ ក៏មានការតាំងពិព័រណ៍ចំនួន ២៥ ផងដែរ ហើយសារព័ត៌មាន TASS គឺជាដៃគូប្រព័ន្ធផ្សព្វផ្សាយរបស់វេទិកានេះ៕

ទីក្រុងតេអេរ៉ង់បានវាយប្រហារមូលដ្ឋានទ័ពអាកាសអាមេរិកមួយ ដើម្បីសងសឹកចំពោះការវាយប្រហារពេញមួយយប់លើអ៊ីរ៉ង់។ នេះបើតាមការរាយការណ៍របស់កងឆ្មាំបដិវត្តន៍ឥស្លាម (IRGC)។យោងតាមរបាយការណ៍ បន្ទាប់ពីទីតាំងមួយនៅជិតអាកាសយានដ្ឋាននៃទីក្រុង Bandar Abbas របស់អ៊ីរ៉ង់ ត្រូវបានបាញ់ប្រហារ អ៊ីរ៉ង់បានកំណត់គោលដៅលើមូលដ្ឋានទ័ពអាកាសអាមេរិក ដែលជាកន្លែងចាប់ ផ្តើមការវាយប្រហារ។ដោយដកស្រង់សម្តីមន្ត្រីអាមេរិកម្នាក់ ទីភ្នាក់ងារសារព័ត៌មានរ៉យទ័រ បានរាយការណ៍នាពេលមុននេះថា សហរដ្ឋអាមេរិកបានធ្វើការវាយប្រហារថ្មី នៅក្នុងប្រទេសអ៊ីរ៉ង់ ដោយកំណត់គោលដៅលើទីតាំងយោធាមួយ ដែលត្រូវបានចោទប្រកាន់ថា បានគំរាមកំហែងដល់កងកម្លាំងអាមេរិក និងចរាចរណ៍ផ្លូវសមុទ្រពាណិជ្ជកម្មនៅក្នុងច្រកសមុទ្រហ័រមូស៕