យោធាអ៊ីស្រាអែលបាននិយាយនៅថ្ងៃព្រហស្បតិ៍នេះថា ខ្លួនបានចាប់ផ្តើមការវាយប្រហារថ្មីលើហេដ្ឋារចនាសម្ព័ន្ធរបស់ក្រុមហេសបូឡានៅជុំវិញទីក្រុង Tyre ភាគខាងត្បូងប្រទេសលីបង់ បន្ទាប់ពីបានចេញការព្រមានឲ្យប្រជាជនជម្លៀសចេញ។កាលពីថ្ងៃពុធ អ៊ីស្រាអែលបានប្រកាសតំបន់ទាំងអស់នៅភាគខាងត្បូងនៃទន្លេ Zahrani របស់ប្រទេសលីបង់ ជាតំបន់ដែលមានចម្ងាយប្រហែល ៤០ គីឡូម៉ែត្រ (២៥ ម៉ាយ) ពីព្រំដែន រួមទាំងទីក្រុង Tyre ផងដែរ ជា «តំបន់ប្រយុទ្ធ» ហើយបានប្រាប់ប្រជាជនឲ្យជម្លៀសចេញ មុនការវាយប្រហារប្រឆាំងនឹងក្រុមហេសបូឡាដែលគាំទ្រដោយអ៊ីរ៉ង់។ការព្រមានយ៉ាងទូលំទូលាយនេះ ដែលជាលើកដំបូង ចាប់តាំងពីបទឈប់បាញ់នៅថ្ងៃទី ១៧ ខែមេសា បានកើតឡើង នៅពេលដែលប្រជាជនលីបង់ជាច្រើន បានព្យាយាមប្រារព្ធពិធីបុណ្យមូស្លីម Eid Al-Adha។នៅក្នុងបទបញ្ជាជម្លៀសថ្មីមួយដល់ប្រជាជននៅតំបន់ខ្លះនៃទីក្រុង Tyre នៅព្រឹកថ្ងៃព្រហស្បតិ៍នេះ យោធាអ៊ីស្រាអែល បាននិយាយថា ខ្លួនត្រូវបាន «បង្ខំឲ្យចាត់វិធានការយ៉ាងខ្លាំងក្លា» ប្រឆាំងនឹងក្រុមហេសបូឡា ហើយបានប្រកាសនៅក្នុងសេចក្តីថ្លែងការណ៍នៅពេលក្រោយនៅលើបណ្តាះ Telegram ថា ខ្លួនបានចាប់ផ្តើមការវាយប្រហារដែលខ្លួនបានអះអាងថា កំណត់គោលដៅលើហេដ្ឋារចនាសម្ព័ន្ធរបស់ក្រុមហេសបូឡា៕

ភ្នំពេញ៖ គិតត្រឹមថ្ងៃទី២៨ ខែឧសភា ឆ្នាំ២០២៦នេះ គឺមានរយៈពេលមួយឆ្នាំហើយដែលយោធាថៃបានបើកការបាញ់ប្រហារសម្លាប់យុទ្ធជនខ្មែរនៅលើទឹកដីខ្មែរក្នុងខេត្តព្រះវិហារ, ក្នុងពេលរំឭកដ៏ការឈឺចាប់នេះប្រមុខការពារជាតិបានអំពាវនាវដល់ខ្មែរគ្រប់រូប រួបរួមគ្នាជាធ្លុងមួយក្រោកឡើងលើកតម្កើងកិត្យានុភាពជាតិ និងរួមគ្នាការពារជាតិទោះត្រូវលះបង់ក្នុងតម្លៃណាក៏ដោយ។ ឯកឧត្តមនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអំពាវនាវតាមរយៈសំណេរនៅលើបណ្ដាញសង្គមហ្វេសប៊ុក នៅរសៀលថ្ងៃទី២៨ ខែឧសភា ឆ្នាំ២០២៦នេះថា ថ្ងៃនេះជាខួបមួយឆ្នាំ ដែលកងទ័ពថៃឈ្លានពានកម្ពុជា និងបាញ់សម្លាប់វីរៈកងទ័ពខ្មែរ ព្រឹន្ទបាលឯក សួន រោន ដែលបានពលីជីវិតនៅតំបន់មុំបី ស្ថិតក្នុងស្រុកជាំក្សាន្ត ខេត្តព្រះវិហារ។ ក្នុងឱកាសនេះ ប្រមុខការពារជាតិកម្ពុជា បានឧទ្ទិសចំពោះពលីកម្មវីរកងទ័ព សួន រោន បន្តដក់ជាប់ក្នុងដួងចិត្តកូនខ្មែរ និងដាស់ស្មារតីកូនខ្មែរគ្រប់រូបឱ្យប្រឹងប្រែង កាយចិត្ត បញ្ញាស្មារតី និងការប្រឹងប្រែងជាកំពែងការពារជាតិ និងកសាងជាតិឱ្យកាន់តែខ្លាំងក្លា ដើម្បីទប់ទល់មហិច្ឆតាដ៏សែនអាក្រក់ពិសពុលនៃកងទ័ពថៃ។ ឯកឧត្តមបានថ្លែងថា៖«សូមឱ្យក្តីឈឺចាប់នេះ ក្រើនរំលឹកកូនខ្មែរគ្រប់រូប រួបរួមគ្នាជាធ្លុងមួយ ដើម្បីក្រោកឡើងលើកតម្កើងកិត្យានុភាពជាតិ និងរួមគ្នាការពារជាតិទោះត្រូវលះបង់ក្នុងតម្លៃណាក៏ដោយ»។ ឯកឧត្តមបានឧទ្ទិស បុណ្យកងកុសលទាំងឡាយយិតយោងដួងវិញ្ញាណក្ខន្ធវីរៈកងទ័ពខ្មែរ សួន រោន បានទៅដល់ទីស្ងប់សុខ៕

នគរបាលម្នាក់បានប្រាប់ក្រុមអ្នកសារព័ត៌មាននៅកន្លែងកើតហេតុថាសិស្សសាលា១៦នាក់បានស្លាប់ក្នុងអគ្គិភ័យមួយនៅសាលារៀនមួយក្នុងទីប្រជុំជន Gilgil ចម្ងាយប្រហែល១២០គីឡូម៉ែត្រ ភាគខាងលិចរដ្ឋធានី Nairobi របស់ប្រទេសកេនយ៉ា។ លោកបានបន្ថែមថា សិស្សសាលាចំនួន៧៤នាក់ទៀត កំពុងព្យាបាលនៅមន្ទីរពេទ្យ បន្ទាប់ពីរងរបួស។យោងតាមកកាបាទក្រហម និងនគរបាលកេនយ៉ា ហេតុការណ៍អគ្គិភ័យនៅសាលារៀនសិស្សស្រី Utumishi បានចាប់ផ្ដើមនៅព្រឹកថ្ងៃព្រហស្បតិ៍នេះ នៅពេលសិស្សកំពុងលង់លក់ក្នុងដំណេក ។ នគរបាល បាននិយាយថា ប្រតិបត្តិការស្វែងរក និងសង្គ្រោះ កំពុងដំណើរការ ដោយក្រុមអាជ្ញាធរពុំទាន់បានកំណត់ពីមូលហេតុនៃអគ្គិភ័យនេះនៅឡើយទេ។ ស្នងការនគរបាលក្នុងតំបន់ លោក Masoud Mwinyi បាននិយាយថា នេះគឺជាស្ថានភាពដ៏សោកសៅបំផុត។អគ្គិភ័យនៅសាលារៀនក្នុងប្រទេសកេនយ៉ាពុំមែនជារឿងថ្មីទេ ដោយមានឧបទ្ទវហេតុដ៏រន្ធត់មួយចំនួនត្រូវបានរាយការណ៍ក្នុងរយៈពេលប៉ុន្មានឆ្នាំនេះ ។អន្តេវាសិកដ្ឋានផ្ទុកមនុស្សលើកចំនួន និងការបរាជ័យក្នុងការអនុវត្តន៍ការណែនាំវិធានការសុវត្ថិ តែងត្រូវបានស្ដីបន្ទោសចំពោះចំនួនមនុស្សស្លាប់ដ៏ច្រើន។ យោងតាមនគរបាល អគ្គិភ័យនេះ បានកើតឡើងនៅម៉ោងប្រហែល១ ព្រឹកថ្ងៃព្រហស្បតិ៍នេះ ហើយអណ្តាតភ្លើងលេបត្របាក់អន្តេវាសិកដ្ឋាន ដែលមានសិស្សកំពុងស្នាក់នៅប្រហែល២២០នាក់៕

ក្រុមហេសបូឡា នៅថ្ងៃព្រហស្បតិ៍ (ទី២៨ ខែឧសភា ឆ្នាំ២០២៦) នេះ បាន​ប្រកាស​ថា ខ្លួនបានធ្វើការវាយប្រហារចំនួន ៣៧លើក ដែលផ្តោតលើកងកម្លាំងអ៊ីស្រាអែល និងទីតាំងយោធា នៅភាគខាងត្បូងនៃ​ប្រទេសលីបង់ និងភាគខាងជើងអ៊ីស្រាអែល ក្នុងរយៈពេល ២៤ម៉ោងកន្លងមកនេះ ដោយបញ្ជាក់​ថាប្រតិបត្តិការនេះត្រូវបានធ្វើឡើង ដើម្បីការពារដែន​ដី​របស់​លីបង់ និងជាការឆ្លើយតបទៅនឹងការរំលោភលើបទឈប់បាញ់របស់អ៊ីស្រាអែល។ការវាយប្រហារទាំងនោះ រួមមានការវាយប្រហារដោយយានដ្រូន​បំពាក់គ្រឿង​ផ្ទុះ​ ការបាញ់ស្រោច​រ៉ូកែត​ និងការបាញ់មីស៊ីលប្រឆាំងរថក្រោះដែលផ្តោតលើ​ទីតាំង​ប្រមូលផ្តុំរបស់​កងទ័ពអ៊ីស្រាអែល យានយន្តយោធា និងទីតាំងយោធានៅភាគខាងត្បូងលីបង់ និងភាគខាងជើងអ៊ីស្រាអែល។ជាមួយ​គ្នា​នេះ ក្រុមប្រដាប់អាវុធនៅ​លីបង់មួយ​នេះ បានឲ្យ​ដឹង​ទៀតថា ខ្លួន​បានកំណត់គោលដៅលើប្រព័ន្ធ​ Iron Dome នៅឯទីតាំងយោធា Jal al-Allam នៅភាគខាងជើងអ៊ីស្រាអែល ដោយ​ប្រើប្រាស់​យានដ្រូន​បំពាក់​គ្រឿង​ផ្ទុះ ហើយ​បានវាយប្រហាររថក្រោះ Merkava និងយានយន្តវិស្វកម្មយោធាជាច្រើនគ្រឿងទៀត​។ក្រុមនេះក៏បានបន្ថែម​ផងដែរថា យុទ្ធជន​របស់ខ្លួន បានវាយប្រហារកងកម្លាំងអ៊ីស្រាអែល នៅចម្ងាយកៀក​គ្នា​ នៅតំបន់​ Zawtar al-Sharqiya ដោយវាយ​រុញ​ឲ្យ​ពួកគេដកថយ មុនពេលកងកម្លាំងអ៊ីស្រាអែលបើកការបាញ់ផ្លោងយ៉ាងខ្លាំង នៅក្នុងតំបន់នោះ៕

សៀមរាប៖ ខណ្ឌរដ្ឋបាលជលផលសៀមរាមរាប នៅថ្ងៃទី២៨ ខែឧសភា ឆ្នាំ២០២៦ បានប្រកាសថា ត្រីប្រមាណពីរតោនបានងាប់នៅកន្លែងអភិរក្សតាមោក ស្ថិតក្នុងឃុំកំពង់ឃ្លាំង ស្រុកសូទ្រនិគម កាលពីថ្ងៃទី២៧ ខែឧសភា ឆ្នាំ២០២៦ នាវេលាម៉ោង៤,៣០នាទី។ លោក លី តុងឃី ប្រធានសហគមន៍នេសាទកំពង់ឃ្លាំង ដែលបានកំពុងយាមការពារនៅកន្លែងអភិរក្សជលផលតាមោក បានបញ្ជាក់ថា មូលហេតុដែលបណ្តាលឱ្យត្រីងាប់នេះ គឺនៅប៉ុន្មានថ្ងៃនេះ អាកាសធាតុមានសភាពក្តៅខ្លាំង ហើយទឹកនៅកន្លែងអភិរក្សក៏រីងរាក់ខ្លាំង នៅសល់កម្ពស់ប្រមាណ០,១ម៉ែត្រ ទៅ០,៤ម៉ែត្រប៉ុណ្ណោះ ដែលធ្វើឱ្យទឹកក្តៅខ្លាំងរហូតដល់បាតដី មិនតែប៉ុណ្ណោះ ពុំមានខ្សល់បក់ទៀត ធ្វើឱ្យហប់ខ្សល់ខ្លាំង ធ្វើឱ្យមានកង្វះអ៊ុកស៊ីសែន ទើបធ្វើឱ្យត្រីងាប់។ នៅថ្ងៃទី២៨ ខែឧសភា នេះ ផ្នែករដ្ឋបាលជលផលដំដែក, សង្កាត់រដ្ឋបាលជលផលសូទ្រនិគម, រដ្ឋបាលឃុំកំពង់ឃ្លាំង និងកងកម្លាំងបង្រ្កាបបទល្មើនេសាទតំបន់ប្រតិបត្តិការសឹករងខេត្ត, កងពលតូច ង៧០ និងយោធភូមិភាគ៥ បានចុះទៅពិនិត្យមើលជាក់ស្តែងនៅកន្លែងកើតហេតុ អំពីត្រីងាប់នេះ។ ប្រភេទត្រីដែលងាប់ មានដូចជា ត្រីរៀល ត្រីក្រុស ត្រីឆ្ពិន ត្រីខ្មាន់ ត្រីឆ្លាំង និងត្រីក្រពាត់ ប្រហែលជា២០០០គីឡូក្រាម៕

ទីភ្នាក់ងារថាមពលអន្តរជាតិ (IEA) បានឲ្យ​ដឹនៅថ្ងៃព្រហស្បតិ៍ (ទី២៨ ខែឧសភា ឆ្នាំ២០២៦) នេះ​ថា សង្គ្រាម នៅ​តំបន់មជ្ឈិមបូព៌ា កំពុងជំរុញឲ្យ​ប្រទេសនានាបើកផ្លូវផ្គត់ផ្គង់ថ្មី និងងាកទៅរកធនធានក្នុងស្រុក ដើម្បីទប់ទល់នឹងវិបត្តិថាមពលដ៏ធំបំផុតរបស់ពិភពលោក។នាយកប្រតិបត្តិ IEA លោក Fatih Birol បាននិយាយ​ថា៖ «យើងកំពុងស្ថិតនៅក្នុងវិបត្តិសន្តិសុខថាមពលដ៏ធំបំផុត ដែល​ពិភពលោកបាន​ជួប​ប្រទះ​​ ហើយខ្ញុំជឿថា បញ្ហានេះ នឹងធ្វើ​ឲ្យ​មាន​ការកែប្រែយុទ្ធសាស្ត្រវិនិយោគឡើងវិញ នៅទូទាំងសកល​លោក ដោយមាន​ភាព​ស្រដៀង​ទៅនឹង​ការផ្លាស់ប្តូរដ៏ធំ​ ដែលថាមពលសកល​ធា្លប់​បានជួបប្រទះ​​ បន្ទាប់ពីមាន​វិបត្តិប្រេងនៅទសវត្សរ៍ឆ្នាំ១៩៧០»។នៅក្នុងរបាយការណ៍វិនិយោគថាមពលពិភពលោករបស់​ទីភ្នាក់ងារថាមពលនៃអង្គការ សម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (OECD) លោកបានបន្ថែមថា៖ «យើងកំពុងឃើញកិច្ចប្រឹងប្រែងកាន់តែខ្លាំងឡើង ដោយទាំង​ពី​ប្រទេសផលិត និងប្រទេសប្រើប្រាស់ ដើម្បីធ្វើពិពិធកម្មផ្លូវពាណិជ្ជកម្ម និងប្រភពថាមពល ដូចជាការជំរុញបំពង់បង្ហូរប្រេងថ្មី និងហេដ្ឋារចនាសម្ព័ន្ធផ្គត់ផ្គង់ផ្សេងទៀត ម្យ៉ាងវិញទៀត និងងាកទៅរកធនធានដែលមានក្នុងស្រុកកាន់តែច្រើនឡើង​»។គួរបញ្ជាក់ថា IEA ប៉ាន់ប្រមាណថា ការវិនិយោគលើថាមពលសកល នឹងឈានដល់ ៣,៤សែនកោដិដុល្លារ នៅឆ្នាំ២០២៦ ដែលខ្ពស់ជាងឆ្នាំមុនបន្តិច ដោយប្រហែល ២,២សែនោដិដុល្លារ ត្រូវបានចំណាយ​ទៅ​លើ​​បណ្តាញអគ្គិសនី ការស្តុក​ ឥន្ធនៈបំភាយឧស្ម័នទាប នុយក្លេអ៊ែរ ថាមពលកកើតឡើងវិញ ប្រសិទ្ធភាពថាមពល និងអគ្គិសនីភាវូបនីយ​កម្ម៕

លោកអភិបាលខណ្ឌដូនពេញ ជំរុញដល់គណៈគ្រប់គ្រងសាលាបឋមសិក្សាទាំង៧សាលា ក្នុងមូលដ្ឋានខណ្ឌដូនពេញ បន្តអនុវត្តបង្រៀនឲ្យបានល្អនិងស្ដង់ដាល្អជាគំរូ ដល់សិស្សានុសិស្សដើម្បីក្លាយជាធនធានល្អ សម្រាប់ខ្លួនឯង សម្រាប់គ្រួសារ និងក្នុងសង្គមជាតិ ។ជាក់ស្ដែងនាព្រឹកថ្ងៃទី២៨ ខែឧសភា ឆ្នាំ២០២៦នេះ សាលាបឋមសិក្សាចតុមុខបានបើកកិច្ចប្រជុំ បូកសរុបការងារចុះពិនិត្យតាមដាន វាយតម្លៃនិងគាំទ្រការអនុវត្តស្ដង់ដារសាលាបឋមសិក្សាគំរូ ឆមាសទី១ ឆ្នាំសិក្សា២០២៥-២០២៦ ក្រោមវត្តមានលោក ជា ខេមា អភិបាលនៃគណៈអភិបាលខណ្ឌដូនពេញ មន្រ្តីនៃការិយាល័យអប់រំ និងគណៈគ្រប់គ្រងសាលាបឋមសិក្សាចតុមុខ រួមទាំងលោកគ្រូអ្នកគ្រូ ជាង១០០នាក់ផងដែរ នៅសាលាប្រជុំសាលាបឋមសិក្សាចតុមុខ ។លោក ហេង លេង ប្រធានការិយាល័យអប់រំ បានលើកឡើងផងដែរថា លោកគ្រូអ្នកគ្រូ ត្រូវបានយកចិត្តទុកដាក់ការបង្រៀន ការផ្សព្វផ្សាយ ដល់សិស្ស និងលក្ខណៈបច្ចេកទេសនៃការបង្រៀន ព្រោះជាសម័យឌីជីថល ដែលមានសកម្មភាពផ្សេង បង្ហោះក្នុងបណ្ដាញសង្គម ពីការរិះគន់ និងសសើរ ដូច្នេះ លោកគ្រូអ្នកគ្រូ ត្រូវមានទំនួលខុសត្រូវ ជាចាំបាច់។ក្នុងនោះដែរលោក ជា ខេមា អភិបាលខណ្ឌដូនពេញ បានលើកឡើងថា សូមថ្លែងអំណរអរគុណដល់គណៈគ្រប់គ្រងសាលា និងលោកគ្រូអ្នកគ្រូ នៅសាលាបឋមសិក្សាទាំង៧ បានបង្ហាត់បង្រៀនសិស្សានុសិស្សនៅសាលាបឋម ចាប់ពីថ្នាក់ទី១ រហូតដល់ថ្នាក់ទី៦ បានបណ្ដុះបណ្ដាលថ្នាក់សិស្សគឺថ្នាលដុសខាត ចំណេះដឹង និងទំលាប់ល្អក្នុងគ្រួសារ និងសង្គមជាតិ បន្តទៅថ្ងៃមុខ។ ជាពិសេសលោកអភិបាលសំណូមពរដល់គណៈគ្រប់គ្រង និងលោកគ្រូអ្នកគ្រូ មានបញ្ហាអ្វីត្រូវរកដំដោះស្រាយ និងត្រូវចេះសាមគ្គីផ្ទៃក្នុង។ក្នុងកិច្ចប្រជុំបូកសរុបនិងតាមដាននេះដែរ លោកអភិបាលក៏បានប្រគល់នៅប័ណ្ណសរសើរដល់លោកគ្រូ អ្នកគ្រូ ដែលមានស្នាដៃល្អ និងការបង្រៀនដល់សិស្សានុសិស្សមានចំណាត់ថ្នាក់ល្អប្រសើរផងដែរ៕អត្ថបទ៖ កុម្ភៈ

នៅ​​ថ្ងៃព្រហស្បតិ៍ (ទី២៨ ខែឧសភា ឆ្នាំ២០២៦) នេះ របាយការណ៍​មួយ​របស់​ទីភ្នាក់ងារ​អាកាសធាតុ​អង្គការសហប្រជាជាតិ (UN) និង​ការិយាល័យ​ឧតុនិយម​​ចក្រភព​អង់គ្លេស ​បានបង្ហាញ​​ថា សីតុណ្ហភាព​សកល​ជា​មធ្យម ​ត្រូវ​បាន​ព្យាករ​ថា ​នឹង​ឡើង​ដល់​កម្រិត​ខ្ពស់​បំផុត ​ក្នុង​រយៈពេល​ ៥ឆ្នាំ​ខាងមុខ ដោយ​សីតុណ្ហភាព​​អាកទិក ​ត្រូវ​បាន​គេ​រំពឹង​ថា ​នឹង​ឡើង​ក្ដៅ​លឿន​ជាង​តំបន់​ដទៃ​ទៀត។របាយការណ៍​ប្រចាំឆ្នាំ​ដែល​ផ្តល់​ការព្យាករតាម​តំបន់ ​សម្រាប់​សីតុណ្ហភាព និងទឹក​​ភ្លៀង​ បានលើក​ឡើង​​ថា សីតុណ្ហភាព​មធ្យម​ជិត​ផ្ទៃផែន​​ដី​​ប្រចាំឆ្នាំ​ នឹង​មាន​ចន្លោះ​ពី ១,៣អង្សាសេ ទៅ​ ១,៩អង្សាសេ ពោល​គឺ​​លើស​ពី​សម័យ​មុន​ឧស្សាហកម្ម​ឆ្នាំ ១៨៥០-១៩០០។អ្នកវិទ្យាសាស្ត្រ​ស្រាវជ្រាវ ​នៅ​ការិយាល័យ​ឧតុនិយម​របស់​​ចក្រភព​អង់គ្លេស លោកស្រី​បណ្ឌិត Melissa Seabrook ​បាន​ប្រាប់​ទីភ្នាក់ងារ​សារព័ត៌មាន Reuters ថា៖ «មាន​ភស្តុតាង​ច្បាស់លាស់​ណាស់ ដែល​បង្ហាញ​​ថា អាកាសធាតុ​កំពុង​ឡើងក្ដៅ​ ហើយ​សីតុណ្ហភាព​មធ្យម​សកល ​កំពុង​បន្ត​ឡើងខ្ពស់​»។នៅក្នុង​កិច្ចព្រមព្រៀង​ទីក្រុង​ប៉ារីស​ឆ្នាំ២០១៥ រដ្ឋាភិបាលនានា​ ​បាន​ផ្ដល់​ការ​សន្យាថា ​នឹង​ព្យាយាម​ទប់ស្កាត់​ការកើនឡើង​សីតុណ្ហភាព​សកល​ជា​មធ្យម​មិន​ឲ្យ​លើស​ពី ១,៥អង្សាសេ​ ពោលគឹ​​លើស​ពី​កម្រិត​មុន​ឧស្សាហកម្ម ដែល​ព្រឹត្តិការណ៍​អាកាសធាតុអាក្រក់​​ធ្ងន់ធ្ងរ ​ត្រូវ​បាន​គេ​មើលឃើញ​ថា ​កើនឡើងកាន់តែ​ខ្លាំង​​។របាយការណ៍នេះបានឲ្យ​ដឹង​បន្ថែម​ថា វាទំនង​ជា​មាន​ភាគយ​ខ្ពស់​បំផុត​ ដែលថា សីតុណ្ហភាពជិតផ្ទៃផែនដីជាមធ្យមរបស់ពិភពលោក នឹងលើសពី ១,៥អង្សាសេជាបណ្តោះអាសន្ន ដែល​លើសពីកម្រិតមធ្យមឆ្នាំ ១៨៥០-១៩០០ យ៉ាងហោចណាស់រយៈពេល​មួយឆ្នាំ រវាងឆ្នាំ២០២៦ និងឆ្នាំ២០៣០​៕

មជ្ឈមណ្ឌលស្រាវជ្រាវការពារជាតិឈានមុខគេមួយ បាន​ឲ្យ​ដឹង​នៅថ្ងៃព្រហស្បតិ៍ (ទី២៨ ខែឧសភា ឆ្នាំ២០២៦) នេះ​ថា ជម្លោះ រវាងសហរដ្ឋអាមេរិក និងចិន ជុំវិញ​បញ្ហា​កោះតៃវ៉ាន់ នឹងបង្ក​ជា​ហានិភ័យមាន​ការកើនឡើងនូវ​ភាព​តាន​តឹង​ខាង​អាវុធនុយក្លេអ៊ែរ ដោយយោធាទាំង២ ទំនងជានឹងធ្វើប្រតិបត្តិការទូលំទូលាយដែលកំណត់គោលដៅលើ​មជ្ឈមណ្ឌលបញ្ជាការ និងទំនាក់ទំនងរបស់គូប្រជែង។នៅក្នុងការវាយតម្លៃយុទ្ធសាស្ត្រមុនកិច្ចប្រជុំការពារជាតិប្រចាំឆ្នាំដ៏ធំបំផុតរបស់អាស៊ី នៅប្រទេស​សិង្ហបុរី នា​ចុងសប្តាហ៍នេះ វិទ្យាស្ថានអន្តរជាតិ សម្រាប់ការសិក្សាយុទ្ធសាស្ត្រ (IISS) ដែលមានមូលដ្ឋាននៅទីក្រុងឡុងដ្រ៍ ប្រទេស​អង់គ្លេស បានឲ្យដឹង​ថា ពិភពលោកកំពុងស្ថិតនៅលើចំណុចកៀក​នឹង​ការប្រណាំងប្រជែងអាវុធនុយក្លេអ៊ែរថ្មីមួយ «ដែលមានតំបន់​អាស៊ី-ប៉ាស៊ីហ្វិកជាស្នូល»។ការវាយតម្លៃរបស់ IISS បានបង្ហាញ​ថា៖ «រដ្ឋក្នុងតំបន់ និងប្រទេសដែលមានផលប្រយោជន៍ជា​យុទ្ធសាស្ត្រ កំពុងពង្រីកឃ្លាំងអាវុធនុយក្លេអ៊ែររបស់ពួកគេ ខណៈដែលរដ្ឋមិន​មាន​អាវុធ​នុយក្លេអ៊ែរ កំពុងបន្តស្វែង​រក​សមត្ថភាពវាយប្រហារធម្មតារយៈចម្ងាយឆ្ងាយ ដោយ​ទាំង២ នេះ ផ្ដល់បញ្ហាប្រឈមដល់​​ស្ថិរភាពជា​យុទ្ធសាស្ត្រ»។បញ្ហាកោះ​តៃវ៉ាន់ រួមជាមួយនឹងជម្លោះ នៅអ៊ីរ៉ង់ និងភាពមិនប្រាកដប្រជា អំពីការប្តេជ្ញាចិត្តរបស់សហរដ្ឋអាមេរិក ចំពោះតំបន់នេះ ត្រូវបានគេរំពឹងថា នឹងលេចឡើង​នៅក្នុងកិច្ចសន្ទនា Shangri-La របស់ IISS។ សន្និសីទក្រៅផ្លូវការនេះ ដំណើរការពីថ្ងៃទី២៩​ ខែឧសភា ដល់ថ្ងៃទី៣១ ខែឧសភា ដោយទាក់ឲ្យមាន​ការ​មក​រួម​ប្រជុំ​គ្នានៃរដ្ឋមន្ត្រី ឧត្តមសេនីយ៍ ប្រមុខ​ចារកម្ម អ្នកការទូត អ្នកវិភាគ និងក្រុម​ហ៊ុន​ផលិតអាវុធ។គួរបញ្ជាក់​ថា ព្រឹត្តិការណ៍នេះកើតឡើងបន្ទាប់ពីមាន​ជំនួប​កំពូល រវាងប្រធានាធិបតីចិន លោក Xi Jinping និងសមភាគីអាមេរិក លោក​ Donald Trump នៅទីក្រុងប៉េកាំង កាលពីដើមខែឧសភា ដែលនាំឲ្យ​មានក្ដី​បារម្ភមួយចំនួន នៅក្នុងទីក្រុងតៃប៉ិ អំពីការប្តេជ្ញាចិត្តរបស់សហរដ្ឋអាមេរិក ក្នុងការជួយគាំទ្រដល់​ការ​ពារ​ខ្លួន​របស់​​​កោះស្វ័យ​គ្រប់គ្រងដោយលទ្ធិប្រជាធិបតេយ្យមួយ​នេះ​៕

ភ្នំពេញ៖ ក្រុមសិប្បករ បានលើកឡើងថា ក្រោយការបិទព្រំដែនគោកជាឯកតោភាគីរបស់ថៃជាមួយកម្ពុជាអស់រយៈពេលជិតមួយឆ្នាំមកនេះ សន្ទុះផលិតកម្មក្នុងស្រុកបានបង្ហាញពីសមត្ថភាពកាន់តែច្បាស់ ក្នុងការផ្គត់ផ្គង់ផលិតផលជាតិទៅកាន់ទីផ្សារទាំងក្នុងស្រុក និងក្រៅស្រុក ដែលកំពុងមានតម្រូវការកើនឡើង ដោយ​សារ​ស្មារតីពហិការទំនិញនាំចូលពីថៃរបស់ពលរដ្ឋខ្មែរ​ ហើយងាកមកប្រើប្រាស់ផលិតផលជាតិយ៉ាងផុលផុស ខណៈដែលផលិតក្នុងស្រុកមានការទទួលស្គាល់ទាំង គុណភាព អនាម័យ និងមាន​រសជាតិឆ្ងាញ់ មិនចាញ់ផលិតផលនាំចូល​។​ក្រុមសិប្បករ បានវាយតម្លៃថា ជិតមួយឆ្នាំមកនេះ ការកសាងសមត្ថភាព និងរក្សាបាននិរន្តរភាពនៃការផ្គត់ផ្គង់ផលិតផលជាតិនៅលើទីផ្សារគឺមានការរីកចម្រើនគួរអោយគត់សម្គាល់។ ជាក់ស្តែងខ្សែក្រវាត់ផលិតកម្មរបស់សហគ្រាសរបស់ពួកគេ កំពុងមមាញឹងខ្លាំង ដើម្បីផលិតផ្គត់ផ្គង់បម្រើឱ្យទីផ្សារក្នុងស្រុក​កំពុងកើនឡើង។ ពួកគេថា បច្ចុប្បន្ននេះ ផលិត​ផលជាតិច្រើនលើសលុប ត្រូវបានតាំងលក់នៅតាមផ្សារទំនើបនានានៅទូទាំងប្រទេស ជាពិសេស នៅតាមផ្សារទំនើបនៅរាជធានីភ្នំពេញ ដូចជា ផ្សារទំនើប ជីប ម៉ុង, ផ្សារទំនើប Lucky និងផ្សារទំនើប អ៊ីអន ជាដើម។ ក្រុមសិប្បករ បានអះអាងថា ការរីកចម្រើនទីផ្សារក្នុសស្រុកនាពេល​នេះ ក៏ដោយសារតែ មានការជួយជំរុញយ៉ាងខ្លាំង​ពីរាជរដ្ឋាភិបាល តាមរយៈក្រសួង-ស្ថាប័នជំនាញ ដែល​បានជួយទៅលើបច្ចេកទេស ការស្វែកទីផ្សារ និងការផ្តល់​ភាពអនុគ្រោះផ្នែកពន្ធសហគ្រាសក្នុងស្រុកទាំង​អស់​។ ស្របពេលមានសន្ទុះគាំទ្រពីពលរដ្ឋ ក្រុមសិប្បករទាំងនោះ នៅតែអំពាវនាវដល់អ្នកប្រើប្រាស់ទាំងអស់ បន្តគាំទ្រផលិតផលក្នុងស្រុកបន្ថែមទៀត ដើម្បី​ភាពរីកចម្រើន​សេដ្ឋកិច្ច និងសង្គមជាតិ​ ក៏ដូចជា បង្កើតឱកាសការងារជូនប្រជាពលរដ្ឋមូលដ្ឋានកាន់តែច្រើនឡើ​ង​។​ឯកឧត្ដម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម ថ្លែងក្នុងវេទិកាពិភាក្សាស្តីពី «សេដ្ឋកិច្ចកម្ពុជាឆ្នាំ២០២៦» នៅរសៀលថ្ងៃទី ២៥ ឧសភា ថា ស្មារតីរួបរួមរបស់ពលរដ្ឋខ្មែរ​ បាននាំឱ្យទំនិញតាមទីផ្សារមានដាក់លក់ផលិតផលក្នុងស្រុកប្រមាណ ៨០ភាគរយ ដែលអាចជំនួសឱ្យផលិតផលថៃ។  ឯកឧត្ដម បន្តថា ជាមួយគ្នា ក្រសួងពាណិជ្ជកម្មក៏កំពុងពង្រីកទីផ្សារថ្មីបន្ថែមទៀត ដើម្បីនាំចេញកសិផលទៅក្រៅប្រទេស ដូចជា ប្រទេស​ចិន ដែលជាទីផ្សារដ៏ធំសម្រាប់កម្ពុជា​ និងបណ្តាប្រទេសផ្សេងៗទៀតដូចជា រុស្ស៊ី អាហ្វ្រិក និងមជ្ឈិមបូព៌ា៕អត្ថបទ៖ ធូ វិរៈ