មន្ត្រីនៃនាយកដ្ឋានពន្លត់អគ្គិភ័យ បាននិយាយកាលពីថ្ងៃពុធ (ទី ២៧ ខែឧសភា)ថា ការធ្វើតេស្ត បានបញ្ជាក់ថា សារធាតុពុលបានចូលទៅក្នុងទន្លេកូឡុំប៊ី បន្ទាប់ពីស៊ីទែនស្តុកគីមីមួយ បានផ្ទុះបែក នៅរោងចក្រវេចខ្ចប់ Nippon Dynawave ក្នុងរដ្ឋវ៉ាស៊ីនតោន សហរដ្ឋអាមេរិក កាលពីថ្ងៃអង្គារ (ថ្ងៃទី ២៦ ខែឧសភា) ដែលបានសម្លាប់មនុស្សយ៉ាងហោចណាស់ពីរនាក់។ មន្ត្រីបានប្រាប់អ្នកយកព័ត៌មានកាលពីថ្ងៃពុធថា មនុស្ស ៩នាក់ នៅតែមិនទាន់រកឃើញ បន្ទាប់ពីហេតុការណ៍នោះ ដោយបន្ថែមថា កិច្ចខិតខំប្រឹងប្រែងស្តារឡើងវិញ បានចាប់ផ្តើម នៅព្រឹកថ្ងៃពុធ ហើយនឹង យឺតពេល។ លោក Matt Amos ប្រធានកងវរសេនាធំនៃនាយកដ្ឋានពន្លត់អគ្គិភ័យ Longview បាននិយាយថា បរិយាកាសស្តារឡើងវិញ នៅតែ«មានគ្រោះថ្នាក់ខ្លាំង»។អភិបាលរដ្ឋវ៉ាស៊ីនតោន លោក Bob Ferguson បាននិយាយថា៖«ទំហំ និងវិសាលភាពនៃសោកនាដកម្មនេះ គឺសោកនាដកម្មឧស្សាហកម្មដ៏សាហាវបំផុត នៅក្នុងប្រវត្តិសាស្ត្ររដ្ឋសម័យទំនើប។ អ្នកដឹងហើយថា នៅពេលណាដែលអ្នកកំពុងនិយាយអំពីអ្វីមួយដែលមានទំហំ និងវិសាលភាពបែបនេះ ផលប៉ះពាល់គឺ ធ្ងន់ធ្ងរណាស់»។លោក Scott Goldstein ប្រធាននាយកដ្ឋានពន្លត់អគ្គិភ័យ Cowlitz 2 បាននិយាយថា ពុំទាន់ច្បាស់ថាមនុស្ស ៩នាក់ ដែលបាត់ខ្លួននោះ នៅឯណាទេ ដោយបន្ថែមថា ពួកគេបានស្វែងរកតំបន់ដែលអាចស្វែងរកបាន។ គិតត្រឹមព្រឹកថ្ងៃពុធ យើងបានប្រកាសថា ឧប្បត្តិហេតុនេះ គឺជាការផ្លាស់ប្តូរពីការជួយសង្គ្រោះទៅជាការស្តារឡើងវិញ»៕

មេដឹកនាំនៃប្រទេសបារាំង និងន័រវែស បាននិយាយកាលពីថ្ងៃពុធថា ទីក្រុងអូស្លូនឹងចូលរួមគម្រោងទប់ស្កាត់នុយក្លេអ៊ែរដឹកនាំដោយទីក្រុងប៉ារីស ដើម្បីជំរុញសន្តិសុខ នៅលើទ្វីបនេះ។នៅពេលដែលលោក និងប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) បានប្រកាសនៅទីក្រុងប៉ារីសថា ប្រទេសទាំងពីរបានចុះហត្ថលេខាលើកតិកាសញ្ញាការពារជាតិ លោក Jonas Gahr Store នាយករដ្ឋមន្ត្រីនៃប្រទេសន័រវែស បាននិយាយថា៖«យើងកំពុងប្រឈមនឹងស្ថានភាពសន្តិសុខធ្ងន់ធ្ងរបំផុត ចាប់តាំងពីសង្គ្រាមលោកលើកទី២»។លោកបាននិយាយថា៖«ក្នុងរយៈពេល ៦ខែកន្លងមកនេះ យើងបានចូលទៅក្នុងកិច្ចព្រមព្រៀងការពារជាតិជាមួយទាំងអាល្លឺម៉ង់ និងចក្រភពអង់គ្លេស ហើយខ្ញុំមានសេចក្តីសោមនស្សរីករាយ ដែលយើងបានចុះហត្ថលេខាលើកិច្ចព្រមព្រៀងការពារជាតិដ៏ទូលំទូលាយជាមួយប្រទេសបារាំង នាពេលនេះ»។កាលពីខែមីនា លោក ម៉ាក្រុង បានបង្ហាញកម្មវិធីមួយ ដែលក្រោមកម្មវិធីនេះ បារាំងគឺជាប្រទេសដែលមានអាវុធនុយក្លេអ៊ែរតែមួយគត់របស់សហភាពអឺរ៉ុប នឹងប្រើប្រាស់ឃ្លាំងស្តុកអាវុធបរមាណូរបស់ខ្លួន ដើម្បីពង្រឹងសន្តិសុខ នៅលើទ្វីបនេះ៕

អារ៉ាប៊ីសាអ៊ូឌីតកាលពីថ្ងៃពុធបានប្រកាសអំពីការគាំទ្រជាបន្ទាន់សម្រាប់ប្រទេសយេម៉ែន ក្នុងទម្រង់ជាផលិតផលប្រេងដែលមានតម្លៃ ១៥០ លានដុល្លារអាមេរិក។កម្មវិធីអភិវឌ្ឍន៍ និងកសាងឡើងវិញរបស់អារ៉ាប៊ីសាអ៊ូឌីតសម្រាប់ប្រទេសយេម៉ែន បាននិយាយនៅក្នុងការបង្ហោះមួយនៅលើប្រព័ន្ធផ្សព្វផ្សាយសង្គមX ថា ការគាំទ្រនេះមានបំណងបំពេញតម្រូវការប្រតិបត្តិការនៃប្រេងឥន្ធនៈ និងប្រេងម៉ាស៊ូតសម្រាប់រោងចក្រថាមពល នៅតាមបណ្តាខេត្តរបស់ប្រទេសយេម៉ែន។កម្មវិធីនេះបានបញ្ជាក់ថា ការគាំទ្រនេះ មានគោលបំណងបង្កើនស្ថិរភាពនៃប្រព័ន្ធអគ្គិសនី កែលម្អនិរន្តរភាពនៃសេវាកម្មជាមូលដ្ឋាន និងបន្ធូរបន្ថយការលំបាករបស់ប្រជាជនយេម៉ែន ដោយហេតុនេះចាំបាច់ត្រូវពង្រឹងសេវាកម្មសំខាន់ៗ និងគាំទ្រសកម្មភាពសេដ្ឋកិច្ច និងអភិវឌ្ឍន៍នៅក្នុងប្រទេសនេះ។ដោយត្រូវបានបង្កើតឡើងក្នុងឆ្នាំ ២០១៨ កម្មវិធីនេះដំណើរការក្រោមកិច្ចព្រមព្រៀងអភិវឌ្ឍន៍ដ៏ទូលំទូលាយរវាងរដ្ឋាភិបាលអារ៉ាប៊ីសាអ៊ូឌីត និងយេម៉ែន៕

មន្ត្រីជាន់ខ្ពស់ហេសបូឡាម្នាក់ បាននិយាយកាលពីថ្ងៃពុធថា៖«គ្មាននរណាម្នាក់គួរស្រមៃ»អំពីការរំសាយអាវុធរបស់ក្រុមនេះទេ បន្ទាប់ពីការវាយប្រហារតាមអាកាសដ៏សាហាវរបស់អ៊ីស្រាអែលនៅភាគខាងត្បូងប្រទេសលីបង់ កាលពីយប់ថ្ងៃអង្គារ។ ថ្លែងនៅពិធីរំលឹកវិញ្ញាណក្ខន្ធមួយនៅជាយក្រុងភាគខាងត្បូងនៃទីក្រុងបេរូត លោក Mahmoud Qomati សមាជិកក្រុមប្រឹក្សានយោបាយរបស់ក្រុមហេសបូឡា បាននិយាយថា ក្រុមនេះនឹងមិនប្រគល់អាវុធរបស់ខ្លួនឡើយ។ នេះបើយោងតាមទីភ្នាក់ងារសារព័ត៌មានជាតិលីបង់។ លោក Qomati បាននិយាយថា ក្រុមហេសបូឡា នឹងមិនប្តេជ្ញាចិត្តចំពោះបទឈប់បាញ់ណាមួយឡើយ ប្រសិនបើការកាន់កាប់របស់អ៊ីស្រាអែល ត្រូវបានពង្រឹងយ៉ាងខ្លាំងក្លានៅភាគខាងត្បូងនោះ»។ លោក Qomati ក៏បានចោទប្រកាន់មន្ត្រីលីបង់មួយចំនួនថា បានស្វែងរកគោលដៅក្រុមនេះ ដោយនិយាយថា ក្រុមហេសបូឡា មានឫសគល់យ៉ាងជ្រៅនៅក្នុងប្រទេសលីបង់ ហើយនឹងបន្ត «កាតព្វកិច្ចតស៊ូ» របស់ខ្លួន។ យោងតាមក្រសួងសុខាភិបាលសាធារណៈលីបង់ ការវាយប្រហារតាមអាកាសកាលពីយប់ថ្ងៃអង្គារ បានសម្លាប់មនុស្សយ៉ាងហោចណាស់ ៣៤នាក់ ក្នុងនោះមានកុមារផងដែរ និងរាប់សិបនាក់ទៀត រងរបួស៕

នាយករដ្ឋមន្ត្រីអ៊ីរ៉ាក់ លោក Ali al-Zaidi កាលពីថ្ងៃពុធ បានជំរុញឲ្យក្រុមប្រដាប់អាវុធទាំងអស់ នៅក្នុងប្រទេសនេះ ធ្វើប្រតិបត្តិការក្រោមអំណាចរបស់រដ្ឋ។ នេះបើយោងតាមការិយាល័យប្រព័ន្ធផ្សព្វផ្សាយរបស់ លោក al-Zaidi។ ការអំពាវនាវរបស់លោក al-Zaidi បានកើតឡើងជាការឆ្លើយតបទៅនឹងសេចក្តីថ្លែងការណ៍មួយដែលចេញដោយការិយាល័យរបស់បព្វជិតស៊ីអ៊ីតអ៊ីរ៉ាក់ លោក Muqtada al-Sadr មេដឹកនាំចលនាជាតិស៊ីអ៊ីត ដែលបានប្រកាសបំបែកសាខាប្រដាប់អាវុធរបស់ខ្លួន គឺ Saraya al-Salam ចេញពីចលនានេះ និងបានបញ្ជាឲ្យបុគ្គលិករបស់ខ្លួន ធ្វើសមាហរណកម្មទៅក្នុងរដ្ឋ។ដោយសរសើរចលនានេះ លោក al-Zaidi បានចាត់ទុកគំនិតផ្តួចផ្តើមនេះថា ជាជំហានដ៏សំខាន់មួយឆ្ពោះទៅរកការពង្រឹងស្ថិរភាពផ្ទៃក្នុង ដោយពង្រឹងគោលការណ៍នៃការរឹតបន្តឹងអាវុធចំពោះរដ្ឋ និងគាំទ្រកងកម្លាំងសន្តិសុខ។ នេះបើយោងតាមសេចក្តីថ្លែងការណ៍របស់ការិយាល័យប្រព័ន្ធផ្សព្វផ្សាយរបស់លោក al-Zaidi។លោក al-Zaidi ក៏បានអំពាវនាវឲ្យក្រុមប្រដាប់អាវុធទាំងអស់ដើរតាម «មាគ៌ាជាតិដែលមានការទទួល ខុសត្រូវ និងធ្វើប្រតិបត្តិការក្រោមឆត្ររបស់រដ្ឋ» ដោយសង្កត់ធ្ងន់ថា រដ្ឋគឺជាអាជ្ញាធរតែមួយគត់ដែលមានសិទ្ធិផ្តាច់មុខក្នុងការគ្រប់គ្រងអាវុធ និងអនុវត្តច្បាប់៕

ឯកអគ្គរដ្ឋទូតឡាវ ថ្លែងថា ចំណងមិត្តភាព​យូរអង្វែងកម្ពុជា-ឡាវ បានប្រែក្លាយពីទំនាក់ទំនងទ្វេភាគី មកជាទំនាក់ទំនងភាពជាដៃគូ យុទ្ធសាស្ត្រគ្រប់ជ្រុងជ្រោយ ដែលធ្វើឱ្យប្រទេសទាំងពីរសម្រេចបាននូវលទ្ធផលជាផ្លែផ្កា ក្នុងវិស័យពាណិជ្ជកម្ម វិនិយោគ ថាមពល និង វិស័យហិរញ្ញវត្ថុ​ជាដើម។​ឯកឧត្តម Sonexay VANNAXAY ឯកអគ្គរដ្ឋទូតវិសាមញ្ញនិងពេញសមត្ថភាព នៃសាធារណរដ្ឋប្រជាធិបតេយ្យប្រជាមានិតឡាវ ប្រចាំនៅព្រះរាជាណាចក្រកម្ពុជា នៅក្នុងជំនួបសម្តែងការគួរសម ​និងពិភាក្សាការងារជាមួយ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២៦ ខែឧសភា ឆ្នាំ២០២៦, ឯកឧត្តមឯកអគ្គរដ្ឋទូត​ បានវាយតម្លៃខ្ពស់ ចំពោះកិច្ចខិតខំប្រឹងប្រែង​របស់រាជរដ្ឋាភិបាលកម្ពុជា ដែលសម្រេចបាននូវស្ថេរភាពម៉ាក្រូសេដ្ឋកិច្ច និងការអភិវឌ្ឍលើ គ្រប់វិស័យ និងបានលើកឡើងឱ្យដឹងថា ឆ្នាំនេះគឺជាខួបលើកទី ៧០ នៃការបង្កើតទំនាក់ទំនងការទូតជាមួយគ្នាប្រទេ​ស​ទាំងពីរ ដោយ បានត្រៀមរៀបចំប្រារព្ធពិធីអបអរសាទរទាំងនៅរាជធានីភ្នំពេញ និងនៅទីក្រុងវៀងចន្ទន៍។ឯកឧត្តមឯកអគ្គរដ្ឋទូត បន្តថា ចំណងមិត្តភាព​យូរអង្វែងនេះបានប្រែក្លាយពីទំនាក់ទំនងទ្វេភាគី មកជាទំនាក់ទំនងភាពជាដៃគូ យុទ្ធសាស្ត្រគ្រប់ជ្រុងជ្រោយ ជាពិសេសភាពជាអ្នកជិតខាងល្អ និងយូរអង្វែង ដែលបានធ្វើឱ្យប្រទេសទាំងពីរសម្រេចបាននូវលទ្ធផលជា ផ្លែផ្កា ក្នុងវិស័យជាច្រើនរួមមាន៖ ពាណិជ្ជកម្ម, វិនិយោគ, ថាមពល និងវិស័យហិរញ្ញវត្ថុ​ជាដើម។​ ឯកឧត្តមឯកអគ្គរដ្ឋទូត​ក៏បាន ថ្លែងអំណរគុណដល់រាជរដ្ឋាភិបាលកម្ពុជាផងដែរ ដែលបានផ្តល់ការគាំទ្រ និងជំនួយជាបន្តបន្ទាប់ដល់ប្រទេសឡាវ ជាពិសេស​ក្នុងអំឡុង ពេលដែលឡាវធ្វើជាប្រធានអាស៊ានឆ្នាំ២០២៤ និងក្នុងដំណាក់កាលនៃការរាតត្បាតជំងឺកូវីដ-១៩ កន្លងមក ។ក្នុងជំនួបនោះ, ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ស្វាគមន៍យ៉ាងកក់ក្តៅ បាននិងអបអរសាទរ ចំពោះឯកឧត្តម ឯកអគ្គរដ្ឋទូត ដែលត្រូវបានរដ្ឋាភិបាលនៃសាធារណរដ្ឋប្រជាធិបតេយ្យប្រជាមានិតឡាវ តែងតាំងជាឯកអគ្គរដ្ឋទូតវិសាមញ្ញប្រចាំនៅ កម្ពុជា,​ ឯកឧត្តមអឧបនាយករដ្ឋមន្ត្រី ក៏បានវាយតម្លៃខ្ពស់ចំពោះកិច្ចសហប្រតិបត្តិការដ៏ល្អ និងទំនាក់ទំនងភាពជាដៃគូយុទ្ធសាស្ត្រ គ្រប់ជ្រុងជ្រោយនៃប្រទេសទាំងពីរកម្ពុជា-ឡាវកន្លងមក និងបានជម្រាបជូនភ្ញៀវអំពីសមិទ្ធិផលនៃកម្មវីធីកំណែទម្រង់ និងវិធានការនានា ដែលកម្ពុជាបានដាក់ឲ្យអនុវត្ត និងសម្រេចកន្លងមក ដើម្បីធានាបាននូវស្ថេភាពម៉ាក្រូសេដ្ឋកិច្ច អភិវឌ្ឍន៍សង្គម-សេដ្ឋកិច្ច និងលំនឹង ជីវភាពប្រជាពលរដ្ឋដូចជា កម្មវិធីកែទម្រង់ការគ្រប់គ្រងហិរញ្ញវត្ថុសាធារណ:ដែលបច្ចុប្បន្ននេះ ស្ថិតក្នុងដំណាក់កាលទី៤ ដើម្បីធានាបាន នូវប្រសិទ្ធភាព នៃថវិកាទាំងក្នុងផ្នែកវិភាជន៍ ទាំងក្នុងផ្នែកប្រតិបត្តិការ និងស័ក្តិសិទ្ធភាពនៃការផ្តល់សេវាសាធារណ:ផងដែរ ។ឯកឧត្តមអគ្គបណ្ឌិតសភាចារ្យ បន្ថែមថា ចំពោះកិច្ចសហប្រតិបត្តិការទ្វេភាគី ជាក់ស្តែងរដ្ឋាភិបាលនៃប្រទេសទាំងពីរ ក៏បាន សម្រេចនូវកិច្ចព្រមព្រៀងស្តីពីការចៀសវាងការយកពន្ធត្រួតគ្នា, រដ្ឋបាលគយកម្ពុជា និងរដ្ឋបាលគយឡាវ ក៏បានចុះអនុស្សរណៈយោគ យល់គ្នា ស្តីពីកិច្ចសហប្រតិបត្តិការនិងការ ជួយគ្នាទៅវិញទៅមកក្នុងការ​ងារ​គយ ដើម្បីជំរុញរំហូរទំនិញដោយសេរីរវាងប្រទេសទាំងពីរ ផងដែរ៕ អត្ថបទ៖ សុន រ៉ាឌី,

ភ្នំពេញ៖ ជនជាតិចិន០៤នាក់ ដែលសកម្មចូលបន្លំលួចលុយ ក្នុងផ្ទះដូរប្រាក់វីងជាច្រើនកន្លែង ក្នុងរាជធានីភ្នំពេញ ត្រូវបានកម្លាំងនគរបាលរាជធានីភ្នំពេញ បើកការស្រាវជ្រាវបង្ក្រាបបាននៅចំណុច សណ្ឋាគារអន្តជាតិ ផ្លូវ ១២២ កែង២២៥ ក្រុម១២ ភូមិ៦ សង្កាត់ផ្សារដេប៉ូ៣ ខណ្ឌទួលគោក ។ ការបង្ក្រាបនេះ ធ្វើឡើងដោយកម្លាំងនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ សហការជាមួយនគរបាលខណ្ឌទួលគោក ខណ្ឌកំបូល និងខណ្ឌច្បារអំពៅ ក្រោមបទបញ្ជាផ្ទាល់ដោយលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ។ក្រុមជនសង្ស័យមានឈ្មោះ ១-ឈ្មោះ YANG FU DE , ទី២ឈ្មោះ TAN YANGY ភេទប្រុស , ទី៣ឈ្មោះ WANG YINFU និងទី៤ឈ្មោះ CHEN ZHIQIN ។ក្រុមទាំងនេះ បានធ្វើសកម្មភាព០៣លើក ដោយ ករណីទី១ ប្រព្រឹត្តិឡើងកាលពីថ្ងៃទី២១ ខែឧសភា ឆ្នាំ២០២៦ វេលាម៉ោង០៩ និង០៤នាទីព្រឹក ស្ថិតនៅចំណុចផ្ទះលេខ ៩២Aផ្លូវco1 ភូមិក្ដីតាកុយ សង្កាត់វាល់ស្បូវ ខណ្ឌច្បារអំពៅ រាជធានីភ្នំពេញ ។ករណីទី២ ប្រព្រឹត្តិទៅនៅថ្ងៃទី២២ ខែឧសភាឆ្នាំ២០២៦ នៅចំណុចលេខ ១៣៩ផ្លូវ បេតុងភូមិចុងព្រែក សង្កាត់ព្រែកឯង ខណ្ឌច្បារអំពៅ ។ ករណីទី៣ ប្រព្រឹត្តិទៅនៅថ្ងែទី២៦ ខែឧសភាឆ្នាំ២០២៦ ស្ថិតក្នុងភូមិខ្ចៅ សង្កាត់បឹងធំ ខណ្ឌកំបូល រាជធានីភ្នំពេញ ។បច្ចុប្បន្ន ក្រុមជនសង្ស័យ ត្រូវបញ្ជូនខ្លួនទៅកាន់ការិយាល័យនគរបាលព្រហ្មទណ្ឌកម្រិតស្រាល ដើម្បីចាត់វិធានការទៅតាមផ្លូវច្បាប់ ៕ លីហេង

ភ្នំពេញ៖ នាព្រឹកថ្ងៃទី២៨ ខែឧសភា ឆ្នាំ២០២៦ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា អញ្ជើញជាអធិបតីដ៏ខ្ពង់ខ្ពស់ចូលរួម «ពិធីបើកយុទ្ធនាការ ១ម៉ឺនរៀល ១ម៉ឺននាក់» ឆ្នាំ២០២៦ «ពិធីសំណេះសំណាលជាមួយគណៈកម្មការទ្រទ្រង់មូលនិធិគន្ធបុប្ផាកម្ពុជា» និង «ពិធីសំណេះសំណាល និងប្រគល់-ទទួលថវិកាបរិច្ចាគពីវិស័យឯកជន ជូនមូលនិធិគន្ធបុប្ផាកម្ពុជា» ។ថ្លែងប្រសាសន៍ស្វាគមន៍ក្នុងអារម្មណ៍រំភើបរីករាយ លោកជំទាវបណ្ឌិតបានពាំនាំប្រសាសន៍សួរសុខទុក្ខរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជូនដល់គណៈអធិបតី និងភ្ញៀវកិត្តិយសទាំងអស់ដែលមានវត្តមានក្នុងពិធីបើកនេះ។ លោកជំទាវបណ្ឌិត ថែមទាំងកោតសរសើរ និងថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំក្រសួង-ស្ថាប័ន បណ្តាវិស័យឯកជន ដៃគូពាក់ព័ន្ធ និងប្រជាពលរដ្ឋ ដែលមានទឹកចិត្តសប្បុរសយ៉ាងធំធេង ចូលរួមគាំទ្រ មូលនិធិគន្ធបុប្ផា ទាំងកម្លាំងកាយចិត្ត និងធនធាន នាពេលកន្លងមក ដែលជាការបង្ហាញយ៉ាងច្បាស់ថា មិនថានៅទីកន្លែងណា មិនថាពេលវេលាណា ខ្មែរតែងតែបារម្ភ ស្រឡាញ់ និងយកចិត្តទុកដាក់គ្នាទៅវិញទៅមក ហើយតែងតែជួយគ្នាទៅតាមគ្រប់មធ្យោបាយ។ បន្ថែមពីនេះ លោកជំទាវបណ្ឌិត បានបញ្ជាក់ថា ការរៀបចំយុទ្ធនាការនេះគឺដើម្បីចូលរួមអបអរសាទរទិវាកុមារអន្តរជាតិ ១ មិថុនា ការបំផុសសកម្មភាពកៀរគរមូលនិធិសប្បុរសធម៌ ជាសំខាន់គឺការបំផុសស្មារតី ខ្មែរជួយខ្មែរដល់ប្រជាពលរដ្ឋខ្មែរគ្រប់ស្រទាប់វណ្ណៈមាន សិស្ស និស្សិត មន្ត្រីរាជការគ្រប់ក្រសួង-ស្ថាប័ន គ្រឹះស្ថានឯកជន និងសាធារណៈទាំងក្នុង និងក្រៅប្រទេស ក្រោមមូលបទ “ទោះក្នុងកាលៈទេសៈណាក៏ដោយ ខ្មែរនៅតែជួយខ្មែរ” ។ លោកជំទាវបណ្ឌិត បានបង្ហាញក្តីសង្ឃឹមយ៉ាងមុតមាំបន្ថែមទៀតថា យុទ្ធនាការ “១ម៉ឺនរៀល ១ម៉ឺននាក់” របស់មូលនិធិគន្ធបុប្ផាកម្ពុជា នឹងក្លាយជាព្រឹត្តិការណ៍ប្រចាំឆ្នាំដ៏ធំមួយ ក្នុងចំណោមព្រឹត្តិការណ៍សំខាន់ៗដទៃទៀត ដើម្បីរម្លឹក និងបំផុសចលនាចូលរួមបរិច្ចាគពីគ្រប់មជ្ឈដ្ឋាន ដើម្បីរួមគ្នារក្សានិរន្តរភាពនៃកិច្ចដំណើរការរបស់មន្ទីរពេទ្យគន្ធបុប្ផា ដែលកំពុងមានបេសកកម្មសង្រ្គោះជីវិតមាតា ទារក និងកុមារនៅកម្ពុជា ប្រកបដោយគុណភាព មិនរើសអើង និងដោយមិនគិតថ្លៃ ជាពិសេសកុមារដែលមកពីគ្រួសារក្រីក្រ និងងាយរងគ្រោះ ក៏អាចទទួលបានសេវាពិនិត្យ និងព្យាបាលប្រកបដោយគុណភាពផងដែរ។សូមរំលឹកផងដែរថា បន្ទាប់ពីដំណើរការឡើងវិញនៅឆ្នាំ១៩៩២ ដោយលោកវេជ្ជបណ្ឌិត បេអាត រិចឈ្នឺរ (Beat Richner) មន្ទីរពេទ្យគន្ធបុប្ផាទាំងនៅរាជធានីភ្នំពេញ និងនៅខេត្តសៀមរាប បានផ្តល់នូវសេវាព្យាបាលប្រកបដោយគុណភាព និងជួយសង្គ្រោះអាយុជីវិតកុមារកម្ពុជា រួមទាំងស្ត្រីមានផ្ទៃពោះរាប់លាននាក់ ដោយឥតគិតថ្លៃ ក្នុងរយៈពេលជាង ៣ទសវត្សរ៍កន្លងមកនេះ។ ដើម្បីលើកកម្ពស់ ជ្រោមជ្រែង និងបន្តបេសកកម្មមនុស្សធម៌ដ៏ថ្លៃថ្លានេះ នៅឆ្នាំ២០១៨ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានផ្តួចផ្តើមបង្កើត “មូលនិធិគន្ធបុប្ផា” ដែលជាមូលនិធិផ្លូវការតែមួយគត់ បើកទទួលមូលនិធិសប្បុរសធម៌ពីគ្រប់ប្រភពស្របច្បាប់នានាទាំងក្នុង និងក្រៅប្រទេស។

មេដឹកនាំកោះតៃវ៉ាន់ លោក ឡៃ ឆឹងតឺ(Lai Ching-te) បានជំរុញឱ្យសហរដ្ឋអាមេរិក បន្តលក់អាវុធ ដោយបានលើកឡើងពីចំណងមិត្តភាពដ៏រឹងមាំរវាងភាគីទាំងពីរ ទោះបីជាមានសម្ពាធពីប្រទេសចិនក៏ដោយ។ លោក ឡៃ បានថ្លែងនៅក្នុងព្រឹត្តិការណ៍មួយក្នុងទីក្រុងតៃប៉ិ។ លោកបាននិយាយសំដៅទៅលើក្របខ័ណ្ឌច្បាប់ ដែលគ្រប់គ្រងការលក់អាវុធទៅឱ្យកោះតៃវ៉ាន់។ លោក ឡៃ និយាយថា «ខ្ញុំសង្ឃឹមយ៉ាងមុតមាំថា ទំនាក់ទំនងរឹងមាំដូចថ្មដែលកោះតៃវ៉ាន់ និងសហរដ្ឋអាមេរិក បានកសាងឡើងរយៈពេលជាច្រើនទសវត្សរ៍ បង្កើតឡើងដោយផ្អែកលើច្បាប់ស្តីពីទំនាក់ទំនងកោះតៃវ៉ាន់ និងឯកសារធានាចំនួន៦ច្បាប់ នឹងបន្តធ្វើឱ្យស៊ីជម្រៅ និងពង្រឹង តាមរយៈកិច្ចសហប្រតិបត្តិការកាន់តែប្រសើរ»។ ដោយនិយាយសំដៅទៅលើប្រទេសចិន លោក ឡៃ បានបន្ថែមថា កោះតៃវ៉ាន់ នឹងមិនអត់ឱនដល់ការផ្លាស់ប្តូរណាមួយចំពោះស្ថានភាពសន្តិភាព និងស្ថិរភាពនៃច្រកសមុទ្រតៃវ៉ាន់ឡើយ។ លោក Trump បាននិយាយថា ការលក់អាវុធដែលអាចកើតមានទៅឱ្យកោះតៃវ៉ាន់ អាចត្រូវបានប្រើប្រាស់ជាទម្ងន់នៃការចរចា ហើយលោកមានឆន្ទះសន្ទនាជាមួយលោក ឡៃ មុនពេលធ្វើការសម្រេចចិត្ត។ ប្រទេសចិនបានជំទាស់ទៅនឹងការលក់នេះ ហើយបានជំរុញឱ្យសហរដ្ឋអាមេរិកឈប់បញ្ជូនសញ្ញាខុស អំពីឯករាជ្យភាពរបស់កោះតៃវ៉ាន់។

ភ្នំពេញ៖ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត សហប្រធានកិត្តិយស នៃមូលនិធិគន្ធបុប្ផាកម្ពុជា​ បានថ្លែងថា ការចូលរួមបរិច្ចាគនូវធនធាន ដើម្បីគាំទ្រដល់មន្ទីរពេទ្យគ​ន្ធបុប្ផា ក្នុង “យុទ្ធនាការ ១ម៉ឺនរៀល ១ម៉ឺននាក់” ឬតាមរយៈសកម្មភាពផ្សេងៗ គឺបង្ហាញពីទឹកចិត្តសប្បុរសធម៌របស់ប្រជាពលរដ្ឋខ្មែរ ក្នុងការជួយសង្គ្រោះដល់កុមារ ទារក និងស្ត្រីមានផ្ទៃពោះឲ្យមានសុខភាពល្អ ។ ក្នុងឱកាសអញ្ជើញជាអធិបតីក្នុងពិធី “បើកយុទ្ធនាការ១ម៉ឺនរៀល ១ម៉ឺននាក់” ឆ្នាំ២០២៦ និង “ពិធីសំណេះសំណាល ជាមួយគណៈកម្មការទ្រទ្រង់ មូលនិធិគន្ធបុប្ផាកម្ពុជា” និង “កម្មពិធីសំណេះសំណាល និងប្រគល់-ទទួលថវិកាបរិច្ចាគពីវិស័យឯកជន ជូនមូលនិធិគន្ធបុប្ផាកម្ពុជា” នៅថ្ងៃទី២៨ ខែឧសភា​ ឆ្នាំ២០២៦ លោកជំទាវបណ្ឌិត មានប្រសាស​ន៍ថា យុទ្ធនាការនេះ ដើម្បីចូលរួមអបអរសាទរទិវាកុមារអន្តរជាតិ១ មិថុនា ការបំផុសសកម្មភាពកៀរគរមូលនិធិសប្បុរសធម៌ ហើយជាការសំខាន់ទៀតនោះ គឺការបំផុសស្មារតីខ្មែរជួយខ្មែរ ទៅដល់ប្រជាពលរដ្ឋគ្រប់ស្រទាប់វណ្ណៈ មានសិស្ស និស្សិត មន្ត្រីរាជការគ្រប់ក្រសួង-ស្ថាប័ន គ្រឹះស្ថានឯកជន និងសាធារណៈទាំងក្នុង និងក្រៅប្រទេស ក្រោមមូលបទ “ទោះក្នុងកាលៈទេសៈណាក៏ដោយ ខ្មែរនៅតែជួយខ្មែរ” ។ លោកជំទាវបណ្ឌិត ពេជ​ ចន្ទមុន្នី ហ៊ុនម៉ាណែត បានបង្ហាញនូវក្តីសង្ឃឹមយ៉ាងមុតមាំថា យុទ្ធនាការ “១ម៉ឺនរៀល ១ម៉ឺននាក់” របស់មូលនិធិគន្ធបុប្ផាកម្ពុជា នឹងក្លាយជាព្រឹត្តិការណ៍ប្រចាំឆ្នាំដ៏ធំមួយ ក្នុងចំណោមព្រឹត្តិការណ៍សំខាន់ៗដទៃទៀត ដើម្បីរម្លឹក និងបំផុសចលនាចូលរួមបរិច្ចាគពីគ្រប់មជ្ឈដ្ឋាន ដើម្បីរួមគ្នារក្សានូវនិរន្តរភាព នៃកិច្ចដំណើរការរបស់មន្ទីរពេទ្យគន្ធបុប្ផា ដែលកំពុងមានបេសកកម្មសង្រ្គោះជីវិតមាតាទារក និងកុមារនៅកម្ពុជា ប្រកបដោយគុណភាព មិនរើសអើង និងដោយមិនគិតថ្លៃ ជាពិសេសកុមារដែលមកពីគ្រួសារក្រីក្រ និងងាយរងគ្រោះ ក៏អាចទទួលបានសេវាពិនិត្យ និងព្យាបាលប្រកបដោយគុណភាពផងដែរ ។ ជាមួយនេះ លោកជំទាវបណ្ឌិត បានកោតសរសើរ និងថ្លែងនូវអំណរគុណ ចំពោះថ្នាក់ដឹកនាំក្រសួង-ស្ថាប័ន បណ្តាវិស័យឯកជន ដៃគូពាក់ព័ន្ធ និងប្រជាពលរដ្ឋ ដែលមានទឹកចិត្តសប្បុរសយ៉ាងធំធេង ចូលរួមគាំទ្រ មូលនិធិគន្ធបុប្ផា ទាំងកម្លាំងកាយចិត្ត និងធនធាន នាពេលកន្លងមក ដែលជាការបង្ហាញយ៉ាងច្បាស់ថា មិនថានៅទីកន្លែងណា មិនថាពេលវេលាណា ខ្មែរតែងតែបារម្ភ ស្រឡាញ់ និងយកចិត្តទុកដាក់គ្នាទៅវិញទៅមក ហើយតែងតែជួយគ្នាទៅតាមគ្រប់មធ្យោបាយ ។ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបរធនបាល នៃមូលនិធិគន្ធបុប្ផា មានប្រសាសន៍ថា ក្នុងមួយថ្ងៃៗ  មន្ទីរពេទ្យគន្ធបុប្ផា​ត្រូវការចំណាយថវិកាតិចចំនួន ១២ម៉ឺនដុល្លារ​ ឬ​ប្រមាណ៤៣លានដុល្លារអាម៉េរិក ក្នុងមួយឆ្នាំ ដើម្បីរក្សានិរន្តរភាពនៃដំណើរការរបស់មន្ទីរពេទ្យ ទាំងនៅរាជធានីភ្នំពេញ និងទាំងនៅខេត្តសៀមរាប ដែលមានការផ្តល់សេវាពិនិត្យ និងព្យាបាលទារក និងកុមារ រួមទាំងសេវាសម្ភពដោយឥតគិតថ្លៃ ប្រកបដោយគុណភាព និងមិនមានការរើសអើង​ ។ក្នុងពេលចូលរួមបរិច្ចាគថវិកាគាំទ្រដល់មន្ទីរពេទ្យគន្ធបុប្ផា ឯកឧត្តម ខូយ រីដា អភិបាលខេត្តពោធិ៍សាត់ បានថ្លែថា ការចូលរួមបរិច្ចាគនេះ គឺបង្ហាញពីការយកចិត្តទុកដាក់ ពីសុខភាពរបស់ទំពាំងស្នងឫស្សី ដើម្បីឲ្យពួកគេមានសុខភាពល្អ បន្តវេនអភិវឌ្ឍន៍ប្រទេសជាតិ ហើយឯកឧត្តមប្ដេជ្ញានឹងជួយផ្សព្វផ្សាយបន្ត ទៅដល់មន្ត្រីរាជការ និងប្រជាពលរដ្ឋ ក្នុងខេត្តពោធិ៍សាត់ ចូលរួមបរិច្ចាគថវិកា ក្នុងយុទ្ធនាការនេះ ។សូមរំលឹកថា បន្ទាប់ពីដំណើរការឡើងវិញនៅឆ្នាំ១៩៩២ ដោយលោកវេជ្ជបណ្ឌិត បេអាត រិចឈ្នឺរ (Beat Richner) មន្ទីរពេទ្យគន្ធបុប្ផាទាំងនៅរាជធានីភ្នំពេញ និងនៅខេត្តសៀមរាប បានផ្តល់នូវសេវាព្យាបាលប្រកបដោយគុណភាព និងជួយសង្គ្រោះអាយុជីវិតកុមារកម្ពុជា រួមទាំងស្ត្រីមានផ្ទៃពោះរាប់លាននាក់ ដោយឥតគិតថ្លៃ ក្នុងរយៈពេលជាង ៣ទសវត្សរ៍កន្លងមកនេះ ។ ដើម្បីលើកកម្ពស់ ជ្រោមជ្រែង និងបន្តបេសកកម្មមនុស្សធម៌ដ៏ថ្លៃថ្លានេះ នៅឆ្នាំ២០១៨ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានផ្តួចផ្តើមបង្កើត “មូលនិធិគន្ធបុប្ផា” ដែលជាមូលនិធិផ្លូវការតែមួយគត់ បើកទទួលមូលនិធិសប្បុរសធម៌ពីគ្រប់ប្រភពស្របច្បាប់នានាទាំងក្នុង និងក្រៅប្រទេស ៕ អត្ថបទ បាន សុខរិទ្ធិ