ប្រធានាធិបតីវ៉េណេស៊ុយអេឡា លោកស្រី Delcy Rodriguez បានប្រកាសថា រដ្ឋាភិបាលរបស់សាធារណរដ្ឋនេះ នឹងត្រូវបានរៀបចំឡើងវិញ។លោកស្រីបានថ្លែងក្នុងអំឡុងពេលកិច្ចប្រជុំគណៈរដ្ឋមន្ត្រីដែលចាក់ផ្សាយដោយទូរទស្សន៍ Venezolana de Television ថា៖«ខ្ញុំកំពុងតែងតាំងអនុប្រធានផ្នែកសង្គមនិយម និងដែនដីរបស់វ៉េណេស៊ុយអេឡា លោក Hector Rodriguez ជាតំណាងមានការអនុញ្ញាតពីប្រធានាធិបតី ដែលទទួលបន្ទុករៀបចំរចនាសម្ព័ន្ធ និងរៀបចំរដ្ឋាភិបាលឡើងវិញ ព្រមទាំងបង្កើតរចនាសម្ព័ន្ធថ្មីរបស់ខ្លួន ដែលនឹងត្រូវគ្នានឹងការពិតថ្មីរបស់ប្រទេសនេះ។លោកស្រីបានបន្ថែមថា៖«ប្រទេសវ៉េណេស៊ុយអេឡា នឹងត្រូវបានបង្កើតជាថ្មី ដោយផ្អែកលើអត្តសញ្ញាណរបស់ខ្លួន និងប្រវត្តិសាស្ត្រនៃការតស៊ូ ដើម្បីសេរីភាព»៕

អនុរដ្ឋមន្ត្រីការបរទេសរុស្ស៊ី លោក Sergey Ryabkov បាននិយាយថា ឱកាសនៃមហាអំណាចនុយក្លេអ៊ែរដែលចូលរួមក្នុងការប្រឈមមុខដាក់គ្នាដោយអាវុធ កំពុងកើនឡើង។ លោកបានថ្លែងនៅក្នុងកិច្ចប្រជុំតុមូលស្តីពីស្ថិរភាពយុទ្ធសាស្ត្រនៃវេទិកាសន្តិសុខអន្តរជាតិថា៖«ជាលទ្ធផលនៃសកម្មភាពបំផ្លិចបំផ្លាញរួមគ្នារបស់លោកខាងលិច ការបែកបាក់ដ៏ជ្រៅ និងខ្លាំងក្លាមួយ បានលេចឡើង និងនៅតែបន្តកើតមានក្នុងចំណោមសមាជិកអចិន្ត្រៃយ៍ទាំង ៥ នៃក្រុមប្រឹក្សាសន្តិសុខអង្គការសហប្រជាជាតិ ដែលទាំងអស់សុទ្ធតែជាមហាអំណាចនុយក្លេអ៊ែរស្របច្បាប់»។លោកបានសង្កត់ធ្ងន់ថា៖«សកម្មភាពនេះនាំឲ្យមានការកើនឡើងនៃហានិភ័យយុទ្ធសាស្ត្រ ដែលខ្ញុំជឿថា វាច្បាស់ណាស់សម្រាប់មនុស្សគ្រប់គ្នា ដែលអាចបណ្តាឲ្យមានជម្លោះប្រដាប់អាវុធដោយផ្ទាល់រវាងប្រទេសទាំងនេះ ជាមួយនឹងផលវិបាកដ៏មហន្តរាយ»៕

ក្រុម​អ្នកជួយសង្គ្រោះ បានឲ្យ​ដឹង​ថា មនុស្ស ៥នាក់ ក្នុងចំណោម ៧នាក់ដែលជាប់នៅក្នុងរូងភ្នំលិចទឹករយៈពេល ១សប្តាហ៍ នៅក្នុងប្រទេសឡាវ ត្រូវបានរកឃើញនៅរស់រានមានជីវិត នា​ថ្ងៃពុធ (ទី២៧ ខែឧសភា ឆ្នាំ២០២៦) នេះ។តាម​រយៈ​ការ​បង្ហោះ​លើ​បណ្ដាញ​សង្គម ក្រុមជួយសង្គ្រោះឡាវឈ្មោះ​ Rescue Volunteer for People បានឲ្យ​ដឹងថា៖ «យើងបានរកឃើញមនុស្ស ៥នាក់នៅរស់រានមានជីវិត ហើយមានសុវត្ថិភាពទាំងអស់គ្នា​។ នៅមាន​មនុស្ស ២នាក់ទៀត​ដែលយើងកំពុងស្វែងរក»៕

នាព្រឹកថ្ងៃពុធ (ទី២៧ ខែឧសភា ឆ្នាំ២០២៦) នេះ ប្រជាជនមូស្លីម នៅទូទាំងទ្វីបអឺរ៉ុប បានទៅជួប​ជុំ​គ្នាក្នុង​វិហារឥស្លាម និងនៅ​តំបន់ដែល​ត្រូវ​បាន​កំណត់​ សម្រាប់​ការអធិដ្ឋាន​ ដើម្បីធ្វើការតាំង​ចិត្ត​ នៅក្នុងពិធី​​បុណ្យ​​ Eid al-Adha ដោយធ្វើ​ឲ្យ​ឱកាសដ៏ពិសិដ្ឋនេះ​មាន​នូវ​​ចំនួនមនុស្ស​​ដ៏​ច្រើន និងអារម្មណ៍សាមគ្គីភាពដ៏រឹងមាំ។នៅប្រទេសអ៊ីតាលី ប្រជាជនមូស្លីមរាប់ពាន់នាក់ នៅទីក្រុងរ៉ូម និងទីក្រុងជុំវិញ បានទៅ​ជួបជុំគ្នា នៅក្នុង​វិហារឥស្លាមដ៏​ធំរបស់​ទីក្រុងរ៉ូម ដើម្បី​ធ្វើ​ការអធិដ្ឋាន​ថ្ងៃបុណ្យ Eid។ ដោយសារតែអ្នកចូលរួមច្រើនលើសលប់ ការអធិដ្ឋាន​នត្រូវបានធ្វើ​ ៣ដង។អ្នកគោរពបូជាមកពីប្រទេសផ្សេងៗគ្នា ក្រោយមក បានរាក់​ទាក់​ និង​សួរ​សុខទុក្ខគ្នា​ទៅ​វិញ​ទៅមក សម្រាប់​បុណ្យ​ Eid នេះ​។ នៅទីក្រុងផ្សេង​ទៀទ ដូចជា Milan, Naples និង Turin វិហារអ៊ីស្លាមក៏ពេញទៅដោយអ្នកគោរពបូជាផងដែរ។ការ​អធិដ្ឋានក្នុង​ពិធី​បុណ្យ​នេះ​ ក៏​​មានផង​ដែរ​នៅ​ក្នុង​ប្រទេស​​ម៉ាល់ត៍ ស្វីស ហូឡង់​ អាល្លឺម៉ង់ អូទ្រីស ស៊ុយអែត​ និង​ក្រិក​​។ហើយ​មិន​ខុសគ្នាដែរ នៅ​បណ្ដាប្រទេស​ទូទាំងតំបន់បាល់កង់ ដែល​រួមទាំងកូសូវ៉ូ ម៉ាសេដូនី​​ខាងជើង អាល់បានី ប៊ុលហ្គារី បូស្ន៊ី និងហឺហ្សេហ្គោវីណា ស៊ែប៊ី ម៉ុងតេណេហ្គ្រោ និងក្រូអាត​ ប្រជាជនមូស្លីមបានប្រារព្ធពិធីបុណ្យ Eid al-Adha ជាមួយនឹងចំនួន​អ្នកជួបជុំគ្នាយ៉ាងច្រើនកុះករ​៕

អង្គការឃ្លាំមើលសកលមួយកាលពីថ្ងៃអង្គារ បាននិយាយនៅក្នុងរបាយការណ៍ប្រចាំខែរបស់ខ្លួនស្តីពីសកម្មភាពរបស់ខ្លួននៅក្នុងប្រទេសនេះថា អាវុធគីមីរាប់សិបដើម ដែលមិនបានប្រកាស ត្រូវបានរកឃើញនៅក្នុងប្រទេសស៊ីរី។ អង្គការហាមឃាត់អាវុធគីមី (OPCW) បាននិយាយថា ក្រុមមួយត្រូវបានដាក់ពង្រាយនៅដើមខែនេះ ដើម្បីផ្ទៀងផ្ទាត់ភាពត្រឹមត្រូវ និងភាពពេញលេញនៃការប្រកាសរបស់ស៊ីរីអំពីឃ្លាំងអាវុធគីមីរបស់ខ្លួន។ការស្វែងរក ត្រូវបានអនុវត្តនៅទីតាំងដែលមិនបានប្រកាសមានអាទិភាពខ្ពស់មួយចំនួន នៅតំបន់ឆ្នេរ សមុទ្រភាគខាងជើង និងកណ្តាល ដោយមានការគាំទ្រពីអាជ្ញាធរស៊ីរី។របាយការណ៍នេះ បាននិយាយថា៖«គ្រាប់រំសេវគីមីដែលមិនបានប្រកាសរាប់សិបគ្រាប់ ដូចជាគ្រាប់បែកវាយប្រហារតាមអាកាស និងរ៉ូកែត ក៏ដូចជាសារធាតុគីមី និងឧបករណ៍ពាក់ព័ន្ធជាច្រើនទៀត ត្រូវបានរកឃើញនៅទីតាំងដែលមិនបានប្រកាសទាំងនេះ រួមជាមួយនឹងឯកសាររាប់ពាន់ទំព័រ»៕

មន្ត្រីឆ្មាំបដិវត្តន៍អ៊ីរ៉ង់ម្នាក់បាននិយាយនៅថ្ងៃពុធនេះថា ការបន្តសង្គ្រាមជាមួយសហរដ្ឋអាមេរិក ទំនងជាមិនកើតឡើងទេ ប៉ុន្តែបានព្រមានថា អ៊ីរ៉ង់បានត្រៀមខ្លួនរួចជាស្រេចប្រឆាំងនឹងការវាយប្រហារណាមួយ។លោក Mohammad Akbarzadeh អនុប្រធាននយោបាយនៃកងទ័ពជើងទឹកឆ្មាំបដិវត្តន៍ឥស្លាម ដែលត្រូវបានដកស្រង់សម្តីដោយទីភ្នាក់ងារសារព័ត៌មាន Tasnim បាននិយាយថា៖«លទ្ធភាពនៃសង្គ្រាមមានកម្រិតទាប ដោយសារតែភាពទន់ខ្សោយរបស់សត្រូវ កងកម្លាំងប្រដាប់អាវុធ កំពុងត្រៀមខ្លួនប្រយុទ្ធយ៉ាងពេញលេញ »។លោកបាននិយាយថា៖«យើងនឹងប្រែក្លាយតំបន់ពីទីក្រុង Chabahar ដល់ទីក្រុង Mahshahr ទៅជាទីបញ្ចុះសពសម្រាប់អ្នកឈ្លានពាន» ដោយដាក់ឈ្មោះកន្លែងនៅចុងនីមួយៗនៃឆ្នេរសមុទ្រភាគខាងត្បូងដ៏វែងរបស់អ៊ីរ៉ង់៕

ភ្នំពេញ៖ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិនៃកម្ពុជា បានមានជំនួបពិភាក្សាការងារជាមួយ ឯកឧត្តម Sihasak Phuangketkeow ឧបនាយករដ្ឋមន្ត្រី រដ្ឋមន្ត្រីការបរទេសថៃ ក្នុងឱកាសអញ្ជើញចូលរួមកិច្ចប្រជុំបើកចំហកម្រិតខ្ពស់របស់ក្រុមប្រឹក្សាសន្តិសុខអង្គការសហប្រជាជាតិ នាទីក្រុងញូវយ៉ក ដោយផ្តោតយ៉ាងសំខាន់លើវិធានការកសាងទំនុកចិត្តឡើងវិញ បន្ធូរបន្ថយភាពតានតឹងតាមព្រំដែន និងបន្តអនុវត្តយន្តការទ្វេភាគី។ក្នុងជំនួបនេះ ភាគីទាំងពីរបានផ្តោតយ៉ាងសំខាន់លើវិធានការកសាងទំនុកចិត្តឡើងវិញ ការបន្ធូរបន្ថយភាពតានតឹងតាមព្រំដែន ការបន្តអនុវត្តយន្តការទ្វេភាគី និងការស្តារប្រក្រតីភាពទ្បើងវិញនៃទំនាក់ទំនងប្រទេសទាំងពីរ។ ជំនួបពិភាក្សានេះ ជាការបន្តអនុវត្តតាមកិច្ចប្រជុំត្រីភាគីរវាងនាយករដ្ឋមន្ត្រីកម្ពុជា នាយករដ្ឋមន្រ្តីថៃ និងប្រធានាធិបតីហ្វីលីពីន នៅកោះសេប៊ូ កាលពីដើមខែនេះ៕

លោក Mithilesh Kumar សមាជិកសភាជាន់ខ្ពស់នៃសភាឥណ្ឌា បានប្រាប់សារព័ត៌មាន TASSថា ប្រទេសនេះ មានប្រវត្តិយូរអង្វែងនៃកិច្ចសហប្រតិបត្តិការយោធា-បច្ចេកទេសដ៏ជោគជ័យជាមួយរុស្ស៊ី ហើយមិនមានគម្រោងឈប់នាំចូលអាវុធពីរុស្ស៊ីទេ។ សមាជិកសភារូបនេះ ដែលទើបតែបានទៅទស្សនកិច្ចប្រទេសរុស្ស៊ីនាពេលថ្មីៗនេះ បាននិយាយថា៖«ឥណ្ឌាបានទិញអាវុធពីរុស្ស៊ីអស់រយៈពេលយូរមកហើយ បន្តនាំចូលវា ហើយនឹងមិនបញ្ឈប់ដំណើរការនេះឡើយ។ លោកនាយករដ្ឋមន្ត្រី ណារិនដ្រា ម៉ូឌី (Narendra Modi) កំពុងបន្តគោលនយោបាយឯករាជ្យ។ ឥណ្ឌាមានគម្រោងធ្វើមូលដ្ឋានីយកម្មផលិតកម្មយន្តហោះចម្បាំង Rafale របស់បារាំង និងយន្តហោះចម្បាំង Su របស់រុស្ស៊ី ព្រមទាំងយានដ្រូនផងដែរ៕

ប្រទេសវ៉េណេស៊ុយអេឡាកាលពីថ្ងៃអង្គារ បានដោះលែងមន្ត្រីយោធាចំនួន ៨នាក់ ដែលជាប់ពន្ធនាគារពីបទរៀបចំផែនការផ្តួលរំលំអតីតប្រធានាធិបតីលោក នីកូឡាស ម៉ាឌូរ៉ូ ដែលជាអ្នកទោសនយោបាយចុងក្រោយបង្អស់ដែលត្រូវបានដោះលែង បន្ទាប់ពីមេដឹកនាំផ្តាច់ការរូបនេះ ត្រូវបានផ្តួលរំលំ។ប្រទេសវ៉េណេស៊ុយអេឡាបានដោះលែងអ្នកទោសនយោបាយរាប់រយនាក់ ចាប់តាំងពីកងកម្លាំងអាមេរិកបានចាប់ខ្លួនលោក ម៉ាឌូរ៉ូ ក្នុងការវាយឆ្មក់ដ៏គួរឲ្យភ្ញាក់ផ្អើលមួយទៅលើរដ្ឋធានីការ៉ាកាស កាលពីខែមករា។មន្ត្រីទាំង ៨នាក់នេះ មានទំនាក់ទំនងជាមួយ«ករណីទាហានឆត្រយោង» របស់ប្រទេសវ៉េណេស៊ុយអេឡា ដែលពួកគេត្រូវបានចោទប្រកាន់ក្នុងឆ្នាំ ២០១៧ ពីបទធ្វើរដ្ឋប្រហារប្រឆាំងនឹងលោក ម៉ាឌូរ៉ូ។លោកឧត្តមសេនីយ៍ Raul Baduel អតីតជំនួយការជិតស្និទ្ធរបស់អ្នកកាន់តំណែងមុនរបស់លោក ម៉ាឌូរ៉ូ គឺលោក Hugo Chavez ដែលជាអ្នកសង្គមនិយមជ្រុល គឺនៅក្នុងចំណោមអ្នកដែលត្រូវបានជាប់ពន្ធនា គារ៕

អ៊ីស្រាអែល បាននិយាយ​នៅ​ថ្ងៃពុធ​នេះថា ខ្លួនបានសម្លាប់ប្រធានក្រុមអង្គភាព​​ប្រដាប់អាវុធដែលទើបតែងតាំងថ្មីរបស់ក្រុមហាម៉ាសនៅតំបន់​ហ្កា​​​ហ្សា ប៉ុន្មានថ្ងៃបន្ទាប់ពីខ្លួនបានសម្លាប់អ្នកកាន់តំណែងមុនរបស់លោក​​ ខណៈកំពុងបង្កើនសម្ពាធយោធានៅហ្កា​ហ្សា និងពង្រីកប្រតិបត្តិការនៅលីបង់។យោធាអ៊ីស្រាអែលបាននិយាយថាលោក Mohammad Odeh ត្រូវបានសម្លាប់នៅក្នុងប្រតិបត្តិការមួយនៅហ្កា​ហ្សាកាលពីថ្ងៃអង្គារ ​​​​២៦​​ឧសភា​ សប្ដាហ៍នេះ​​។សាច់ញាតិម្នាក់របស់លោក​ Odeh បានបញ្ជាក់ពីការស្លាប់របស់លោក​ទៅកាន់សារព័ត៌មាន​ Reuters ហើយបាននិយាយថាពិធីបុណ្យសពនឹងធ្វើឡើងបន្ទាប់ពីពិធីបួងសួង​ពេល​ថ្ងៃត្រង់នៅទីក្រុងហ្កា​ហ្សា។ក្រុមហាម៉ាសពុំ​​ទាន់បានចេញសេចក្តីថ្លែងការណ៍ជាផ្លូវការនៅឡើយទេ ប៉ុន្តែសេចក្តីថ្លែងការណ៍មួយពីក្រុមគ្រួសាររបស់លោក​ បាននិយាយថាលោក​​ត្រូវបានសម្លាប់រួមជាមួយប្រពន្ធ និងកូនប្រុសរបស់លោក​។មន្ត្រីសុខាភិបាលហ្កា​​ហ្សាបាននិយាយថាមនុស្ស៦​​នាក់ រួមទាំងស្ត្រីយ៉ាងហោចណាស់ម្នាក់ត្រូវបានសម្លាប់ និងជាង២០​នាក់ផ្សេងទៀតបានរងរបួសក្នុងការវាយប្រហាររបស់អ៊ីស្រាអែលដូចគ្នា ​​ដែលបានបំផ្លាញជាន់ខាងលើនៃអគារអឹផាតមិនមួយនៅក្នុងសង្កាត់ Rimal ក្នុងទីក្រុងហ្កា​ហ្សា។ ក្រុម​អ្នកសង្គ្រោះនៅតែស្ថិតនៅកន្លែងកើតហេតុដើម្បីស្វែងរកអ្នករងរបួសបន្ថែមទៀត៕