អង្គការយូនីសេហ្វ (UNICEF) បានព្រមាននៅ​ថ្ងៃសុក្រ (ទី២៩ ខែឧសភា ឆ្នាំ២០២៦) នេះ​ថា ការពង្រីកការគ្រប់គ្រងណាមួយរបស់អ៊ីស្រាអែល លើទឹកដី នៅក្នុងតំបន់ហ្កាហ្សា នឹង​នាំ​ឲ្យ​ប្រតិបត្តិការមនុស្សធម៌កាន់តែជួប​ការ​លំបាកក​បន្ថែម​ទៀត​ និងធ្វើឲ្យ​ស្ថានភាពរស់នៅរបស់កុមារកាន់តែអាក្រក់ទៅៗ ដែលប្រឈមរួច​ហើយ​ជាមួយ​នឹងការខ្វះខាតទឹក អនាម័យ និងសេវាសុខភាពយ៉ាងធ្ងន់ធ្ងរ។នៅទីក្រុងហ្សឺណែវ ប្រទេស​ស្វីស នៅពេលត្រូវ​បាន​សួរ ជុំវិញ​សេចក្ដី​រាយការណ៍ ពី​ផែនការរបស់នាយករដ្ឋមន្ត្រីអ៊ីស្រាអែល លោក Benjamin Netanyahu ដែល​ចង់​នាំយកតំបន់ហ្កាហ្សា ៧០​ភាគរយ​ឲ្យមក​ស្ថិតនៅក្រោមការគ្រប់គ្រងរបស់អ៊ីស្រាអែលនោះ​ អ្នកឯកទេសផ្នែកទំនាក់ទំនងរបស់អង្គការយូនីសេហ្វ លោក Salim Oweis បានប្រាប់អ្នកសារព័ត៌មានថា៖ «ប្រសិនបើរឿងនេះកើតឡើង កុមារកាន់តែច្រើនបន្ថែម​ទៀត នឹងរងទុក្ខវេទនា​»។លោក Oweis បាននិយាយថា ចំនួនប្រជាជន នៅតំបន់ហ្កាហ្សា កំពុងប្រមូលផ្តុំនៅក្នុងតំបន់ដែលកំពុងរួមតូចរួចទៅហើយ ដោយគ្រួសារនានា បានរស់​នៅ​យ៉ាង​ណែន​ណាន់តាន់តាប់​ប្រហែល ៤០​ភាគរយនៃ​ដែន​ដីនេះ​។ លោកបានបន្ត​ថា «ការរស់​នៅ​យ៉ាង​ចង្អៀតណែន នៅក្នុងកន្លែងតូច កំពុងបង្កបញ្ហាកាន់តែច្រើន» ដោយព្រមានថា ភាព​កកកុញនេះ​ បង្កើន​ការរីករាលដាលនៃជំងឺ ធ្វើឲ្យ​សេវាកម្មជាមូលដ្ឋានចុះខ្សោយ និងនាំ​ឲ្យ​គ្រួសារពិបាកបំពេញតម្រូវការរបស់កុមារ។លោកបានបញ្ជាក់​ថា ការធ្វើ​ឲ្យ​ដែន​ដីកាន់តែ​រួម​តូច​បន្ថែមទៀត អាចធ្វើឲ្យ​លទ្ធភាព​ចូលប្រើប្រាស់ជំនួយ​មនុស្សធម៌កាន់តែពិបាក។ការព្រមាននេះកើតឡើងនៅពេលដែលអង្គការយូនីសេហ្វ​ រាយការណ៍ពីស្ថានភាពសុខភាពកាន់តែអាក្រក់ទៅៗ ក្នុងចំណោមកុមារ នៅតំបន់​ហ្កាហ្សា។ លោក Oweis បានលើកឡើងពីចំនួនកើនឡើងនៃការឆ្លងមេរោគផ្លូវដង្ហើម រាគរូសស្រួចស្រាល់​ និងជំងឺស្បែក ដែល​ទាក់ទងនឹងស្ថានភាពអនាម័យកាន់តែយ៉ាប់យ៉ឺន និងកង្វះខាតទឹកស្អាត៕

នៅថ្ងៃសុក្រ (ទី២៩ ខែឧសភា ឆ្នាំ២០២៦) នេះ លោក Dmitry Medvedev អនុប្រធានក្រុមប្រឹក្សាសន្តិសុខដ៏មានឥទ្ធិពលរបស់រុស្ស៊ី បានព្រមានមេដឹកនាំអឺរ៉ុបថា យានដ្រូន​នឹងបន្តវង្វេងផ្លូវ​ចូលទៅក្នុងប្រទេសរបស់ពួកគេ និងធ្វើ​ឲ្យ​ប្រជាជនរបស់ពួកគេលែង​បាន​គេងលក់ស្រួល​ទៀត​ហើយ​។លោក Medvedev បាននិយាយបែបនេះ​បន្ទាប់ពីអង្គការណាតូ (NATO) បានចោទប្រកាន់ទីក្រុងមូស្គូថា មាន​​ទង្វើ​មិនប្រុងប្រយ័ត្ន ហើយបានប្ដេជ្ញាថា នឹង «ការពារទឹកដីសម្ព័ន្ធមិត្តគ្រប់អ៊ីញ​» ក្រោយ​រ៉ូម៉ានីបានប្រាប់​ថា យានដ្រូន​របស់រុស្ស៊ីបានធ្លាក់ចូលទៅក្នុងអគារផ្ទះល្វែងមួយកន្លែង នៅក្នុងរដ្ឋសមាជិករបស់​សម្ព័ន្ធភាព ក្នុងអំឡុងពេលមាន​ការ​វាយប្រហារលើប្រទេសជិតខាងអ៊ុយក្រែន។លោក Medvedev បានលើកឡើង​ថា ខ្លួននៅតែត្រូវការកំណត់ឲ្យ​បាន​ច្បាស់ថា តើ​យានដ្រូន​នោះជារបស់ប្រទេសណា ប៉ុន្តែបានបញ្ជាក់​ថា មេដឹកនាំ «ដ៏កម្សោយ​» របស់អឺរ៉ុប គួរតែឈប់បង្ហាញកំហឹង ចំពោះឧប្បត្តិហេតុនេះ ព្រោះពួកគេកំពុងចូលរួមដោយផ្ទាល់ នៅក្នុងសង្គ្រាម ប្រឆាំងនឹងរុស្ស៊ី។លោក Medvedev បាន​សង្កត់ធ្ងន់​នៅក្នុងសេចក្តីថ្លែងការណ៍មួយថា៖ «សូមឲ្យ​ពួកគេត្រៀមខ្លួន ព្រោះរឿងនេះនឹងបន្តកើតឡើង។ មានសង្គ្រាមកំពុងកើតឡើង! ហើយពលរដ្ឋនៃរដ្ឋសហភាពអឺរ៉ុប ក្នុងនាមជាប្រជាជននៃប្រទេសដែលមានសង្គ្រាម នឹងមិនអាចគេងលក់​ស្រួល​បានទេ»។លោកបានបន្ថែម​ថា ឧប្បត្តិហេតុបែបនេះ ទំនងជានឹងបន្តកើតមាន​នៅទី​កន្លែងដែលយានដ្រូនត្រូវបានផលិត សម្រាប់អ៊ុយក្រែន​៕

ការសិក្សាមួយដោយអង្គការបរិស្ថានមិនរកប្រាក់ចំណេញ រកឃើញថា មាសតម្លៃរាប់ពាន់លានដុល្លារ បន្តទាញយកប្រយោជន៍ដោយខុសច្បាប់នៅតំបន់ព្រៃជប់ភ្លៀងអាម៉ាហ្សូន របស់ប្រទេសប្រេសស៊ីល បើទោះបីជាមានកិច្ចខិតខំដោយលោកប្រធានាធិបតី Luiz Inacio Lula da Silva ដើម្បីបង្ក្រាបការជីករ៉ែខុសច្បាប់ទាំងនេះក៏ដោយ ។ ពេលឡើងកាន់អំណាចកាលពីឆ្នាំ ២០២៣ លោក Lula បានសន្យាថា នឹងលុបបំបាត់ចោលការជីករ៉ែមាសខុសច្បាប់ចេញពីតំបន់ជនជាតិភាគតិច ហើយនិងការពារតំបន់នោះ ក្រោយត្រូវបានពង្រីកអស់រយៈពេលជាច្រើនឆ្នាំ ជំរុញដោយលោកអតីតប្រធានាធិបតីស្នាំនិយម Jair Bolsonaro ។ កាលពីឆ្នាំមុន នគរបាលសហព័ន្ធប្រេស៊ីល រឹបអូសបានមាសខុសច្បាប់ទម្ងន់ ៤៤៧គ.ក ។ ទោះបីជាយ៉ាងណាក៏ដោយ ការសិក្សារបស់ក្រុមបរិស្ថាន រកឃើញថា ស្របពេលដែលតម្លៃមាសហក់ឡើងខ្ពស់ជាប់កំណត់ត្រា ខណៈអស្ថិរភាពភូមិសាស្រ្តនយោបាយដ៏តានតឹង ក្រុមអ្នកជីករ៉ែ បានសម្របខ្លួនដោយប្រើលិខិតអនុញ្ញាតពីកន្លែងដែលមានសកម្មភាពរុករករ៉ែ ដើម្បីក្លែងបន្លំប្រភពដើមរបស់មាសជីកបានដោយខុសច្បាប់ ។ ក្រុមបរិស្ថាន បានវិភាគលើតំបន់ព្រៃ ១៨៧កន្លែង ដែលមានការអនុញ្ញាតជីករ៉ែមាស ចេញដោយទីភ្នាក់ងាររ៉ែប្រេស៊ីល ANM នៅជិតតំបន់ជនជាតិភាគតិច និងតំបន់ការពារនៅក្នុងតំបន់ព្រៃជប់ភ្លៀងអាម៉ាហ្សូន ហើយពួកគេរកឃើញថា តំបន់ព្រៃ ៩៨កន្លែង គ្មានសញ្ញានៃការជីករ៉ែនោះទេ ។ ការសិក្សារបស់ពួកគេបញ្ជាក់ថា តំបន់ខ្យល់ទាំងនេះ ត្រូវបានប្រើប្រាស់ដើម្បីធ្វើឲ្យស្របច្បាប់ការលក់មាសទម្ងន់ ២៦,៨តោន មានតម្លៃប្រហែល ៣,៨៨ពាន់លានដុល្លារ ចន្លោះឆ្នាំ ២០១៨ និងខែមីនា ឆ្នាំ ២០២៦ ៕

ឥណ្ឌានិយាយនៅថ្ងៃសុក្រនេះថា ភ្លៀងធ្លាក់អំឡុងរដូវវស្សាដែលរារាំងដោយសារបាតុភូតអែល នីញ៉ូ ទំនងជាទាបជាងកម្រិតធម្មតា ក្នុងឆ្នាំ ២០២៦នេះ ជាលើកដំបូង ក្នុងរយៈពេល ៣ឆ្នាំ បង្កឲ្យមានក្តីបារម្ភដល់ទិន្នផលកសិកម្ម និងកំណើនសេដ្ឋកិច្ច ស្របពេលដែលពួកគេកំពុងទប់ទល់អតិផរណា បណ្តាលមកពីសង្រ្គាមអ៊ីរ៉ង់ ។ ជាសរសៃឈាមសេដ្ឋកិច្ចតម្លៃ ៤សែនកោដិដុល្លាររបស់ឥណ្ឌា រដូវវស្សានាំមកនូវភ្លៀងធ្លាក់ជិត ៧០ភាគរយ ដែលត្រូវការសម្រាប់ស្រោចស្រពដំណាំកសិកម្ម និងបំពេញស្រទាប់ទឹកក្រោមដី ហើយនិងអាងស្តុកទឹក ។ លោក Ravichandran គឺជារដ្ឋលេខាធិការក្រសួងវិទ្យាសាស្រ្តផែនដី និយាយថា ភ្លៀងមូសុងវស្សា ត្រូវបានគេរំពឹងថា នឹងមាន ៩០ភាគរយប៉ុណ្ណោះនៃកម្រិតមធ្យមក្នុងឆ្នាំនេះ ។ លោកបន្តថា ឥទ្ធិពលអាកាសធាតុពីបាតុភូតអែល នីញ៉ូ ទំនងជាកើតមាននាពេលឆាប់ៗនេះ ហើយនិងធ្វើឲ្យប៉ះពាល់ដល់ការធ្លាក់ភ្លៀង អំឡុងរដូវវស្សាមានរយៈពេល ៤ខែ ចាប់ពីខែមិថុនា រហូតដល់ខែកញ្ញា ។ សូមបញ្ជាក់ថា បាតុភូតអែល នីញ៉ូ កើតមានឡើង ពេលដែលសីតុណ្ហភាពមហាសមុទ្រកើនឡើងហួសកម្រិតធម្មតានៅតំបន់ភាគកណ្តាល និងតំបន់ភាគខាងកើតមហាសមុទ្រប៉ាស៊ីហ្វិក ធ្វើឲ្យអាកាសធាតុមានស្ថានភាពក្តៅ និងស្ងួតជាងមុននៅតំបន់អាស៊ីអាគ្នេយ៍ និងតំបន់ផ្សេងទៀតលើពិភពលោក ៕

ប្រធានាធិបតីរ៉ូម៉ានី លោក Nicusor Dan បានប្រកាសថា បន្ទាប់ពីមាន​ឧប្បត្តិហេតុ ពាក់ព័ន្ធនឹងយានដ្រូន ប្រទេស​រ៉ូម៉ានីបានសម្រេចបិទស្ថានកុងស៊ុលរុស្ស៊ី ប្រចាំទីក្រុង Constanta និង​​ប្រកាសថា អគ្គកុងស៊ុល គឺ​ជាបុគ្គលដែលមិនត្រូវបានស្វាគមន៍ ដោយ​ចំណាត់​ការ​នេះ បាន​កើត​ឡើង​បន្ទាប់ពីរូប​លោក​បើក​កិច្ចប្រជុំក្រុមប្រឹក្សាការពារជាតិជាន់ខ្ពស់របស់ប្រទេស ដែលបានពិភាក្សាអំពីផលវិបាកនៃការធ្លាក់យាន​ដ្រូន​លើផ្ទះមួយខ្នង ក្នុងទីក្រុង Galati។យោងតាមការកត់សម្គាល់ដែលបានចាក់ផ្សាយនៅលើគេហទំព័ររបស់រដ្ឋបាលប្រធានាធិបតី លោកប្រធានាធិបតី បានបញ្ជាក់​ថា៖ «ក្នុងស្ថានភាពនេះ អគ្គកុងស៊ុលរុស្ស៊ី ប្រចាំទីក្រុង Constanta ត្រូវបានប្រកាសថា ជាបុគ្គលដែលមិនត្រូវបានស្វាគមន៍ ហើយស្ថានកុងស៊ុលរុស្ស៊ី ប្រចាំទីក្រុង Constanta នឹងត្រូវបិទ។គួរបញ្ជាក់ថា នៅ​មុននេះ ក្រសួងការពារជាតិរ៉ូម៉ានីបានរាយការណ៍ថា យានដ្រូន​ ១គ្រឿង បានធ្លាក់មកលើដំបូលអគារដែល​មាន​គ្រួសារច្រើន​រស់​នៅ ក្នុងទីក្រុង Galati។ រដ្ឋាភិបាលទីក្រុង Bucharest បានស្តីបន្ទោសរុស្ស៊ី ចំពោះឧប្បត្តិហេតុនេះ។ក្រសួងការបរទេសរ៉ូម៉ានីក៏បានឲ្យ​ដឹង​ផងដែរថា ខ្លួនបានកោះអញ្ជើញ​ឯកអគ្គរដ្ឋទូតរុស្ស៊ី ដើម្បីឲ្យ​មក​ស្ដាប់​ អំពីវិធានការការទូត ដែលនឹងត្រូវធ្វើឡើង ដើម្បី​ជាការឆ្លើយតប​៕

លោកជំទាវ ជ្រឹង បុទុមរង្សី រដ្ឋលេខាធិការ និងជាតំណាងដ៏ខ្ពង់ខ្ពស់ ឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ បានអញ្ជើញជាអធិបតីភាពក្នុងកម្មវិធី «បទបង្ហាញស្ដីពីការវិនិយោគជូនមន្ត្រីការទូតកម្ពុជា» រៀបចំឡើងក្រោមកិច្ចសហការរវាងក្រុមការងារសម្របសម្រួលការទូតសេដ្ឋកិច្ច នៃក្រសួងការបរទេស និងសហប្រតិបត្តិការអន្តរជាតិ និងក្រុមប្រឹក្សាអភិវឌ្ឍន៍កម្ពុជា នៅទីស្តីការក្រសួង នៅថ្ងៃទី២៩ ខែឧសភា ឆ្នាំ២០២៦។ បទបង្ហាញខាងលើធ្វើឡើងក្នុងទម្រង់ Hybrid ដោយមាន ឯកឧត្ដម ឡោ ទិត្យច័ន្ទសុភក្តិ ទីប្រឹក្សាអមក្រុមប្រឹក្សាអភិវឌ្ឍន៍កម្ពុជា ចូលរួមជាវាគ្មិនកិត្តិយសធ្វើបទបង្ហាញ និងមានការចូលរួមពីមន្ត្រីការទូតទាំងក្នុង និងក្រៅប្រទេសប្រមាណ ១០០ នាក់។ បទបង្ហាញនេះ រៀបចំឡើងក្នុងគោលបំណងពង្រឹងការយល់ដឹងរបស់មន្ត្រីការទូត ជាពិសេសមន្ត្រីដែលកំពុងបម្រើការងារនៅតាមស្ថានតំណាងកម្ពុជានៅបរទេស លើច្បាប់វិនិយោគថ្មីរបស់កម្ពុជា បរិយាកាសវិនិយោគ/ពាណិជ្ជកម្ម ការលើកទឹកចិត្ត អត្រាលើកលែងពន្ធ សក្ដានុពលវិនិយោគ និងគន្លឹះសំខាន់ៗក្នុងការទាក់ទាញវិនិយោគិនបរទេសមកកម្ពុជា។

អំឡុង​ការសន្ទនាជាមួយអធិការបតីអូទ្រីស លោក Christian Stocker ប្រធានាធិបតីអ៊ុយក្រែន លោក Volodymyr Zelenskyy បាននិយាយថា​ បើ​យោង​តាមទិន្នន័យស៊ើបការណ៍សម្ងាត់ រុស្ស៊ីកំពុងរៀបចំការវាយប្រហារទ្រង់ទ្រាយធំថ្មី លើទីក្រុង និងសហគមន៍របស់​ប្រទេស​អ៊ុយក្រែន។លោក Zelenskyy បានសរសេរនៅលើឆាណែល​ Telegram របស់លោកនៅ​ថ្ងៃសុក្រ (ទី២៩ ខែឧសភា ឆ្នាំ២០២៦) នេះ​ថា៖ «សូមថ្លែងអំណរគុណចំពោះការចូលរួមរំលែកទុក្ខ ទាក់ទងនឹងការវាយប្រហារតាមអាកាសឥតឈប់ឈររបស់រុស្ស៊ី។ យើង​បាន​ជម្រាបជូនលោក​អធិការបតី អំពីទិន្នន័យស៊ើបការណ៍សម្ងាត់របស់យើង ដែល​ថា រុស្ស៊ីកំពុងរៀបចំការវាយប្រហារទ្រង់ទ្រាយធំថ្មីលើទីក្រុង និងសហគមន៍របស់​បរ្ទេស​អ៊ុយក្រែន។ វាមានសារៈសំខាន់ខ្លាំងណាស់ដែលមានការឆ្លើយតបរួមគ្នាពីដៃគូរបស់យើង ចំពោះការបាញ់ផ្លោងទាំងនេះ ជាពិសេសក្នុងការផ្គត់ផ្គង់ប្រព័ន្ធប្រឆាំងបាលីស្ទិក»។ ថ្នាក់​ដឹកនាំ​ទាំង២ ក៏បានពិភាក្សាផង​ដែរ អំពីដំណើរការនៃការធ្វើសមាហរណកម្មអឺរ៉ុបរបស់អ៊ុយក្រែន។ ហើយ​លោក Zelenskyy បានកត់សម្គាល់ថា៖ «យើងរំពឹងថា នៅដើមខែមិថុនា ​ក្រុមចរចា​ទី១ នឹងត្រូវបានចាប់ផ្ដើម​ឡើង​។ នេះជារឿងយុត្តិធម៌ ខណៈ​ប្រជាជន​អ៊ុយក្រែនសមនឹងទទួលបានវា។ ខ្ញុំសូមថ្លែងអំណរគុណដល់អូទ្រីស សម្រាប់ការចែករំលែកទស្សនៈនេះយ៉ាងពេញលេញ»។លើសពីនេះ ភាគីទាំង​២ ក៏​បានពិភាក្សាផងដែរ អំពីកិច្ចសហប្រតិបត្តិការ ក្នុងរង្វង់​អង្គការអន្តរជាតិ។ ជាមួយ​គ្នានេះ លោក​ប្រធានាធិបតីអ៊ុយក្រែន បានណែនាំក្រុមអ្នកការទូតឲ្យ​ធ្វើការលើបញ្ហា ពាក់ព័ន្ធជាមួយសហការីអូទ្រីស នៅកម្រិតរបស់ពួកគេ៕

យោងតាមរបាយការណ៍ប្រព័ន្ធផ្សព្វផ្សាយក្នុងស្រុក បានឲ្យ​ដឹង​ ជាលើកដំបូង​ ប្រទេស​ជប៉ុនបានបញ្ជាក់​នៅ​ថ្ងៃសុក្រ (ទី​២៩ ខែឧសភា ឆ្នាំ២០២៦) នេះ​ថា ខ្លួននឹងដាក់ពង្រាយបុគ្គលិកយោធាទៅកាន់បេសកកម្មរបស់​អង្គការ (NATO)​ ដែលគាំទ្រអ៊ុយក្រែន នៅក្នុង​ប្រទេសអាល្លឺម៉ង់ជាលើកដំបូង។សារព័ត៌មាន​ Kyodo News បាន​រាយការណ៍ថា ក្រសួងការពារជាតិបានឲ្យ​ដឹង​ថា សមាជិក ៤នាក់នៃកងកម្លាំងស្វ័យ​ការពាររបស់ខ្លួន នឹងឈរជើងនៅឯទីស្នាក់ការកណ្តាលជំនួយសន្តិសុខ និងបណ្តុះបណ្តាលរបស់អង្គការណាតូ​ សម្រាប់អ៊ុយក្រែន នៅទីក្រុង​ Wiesbaden ភាគខាងលិចប្រទេសអាល្លឺម៉ង់ ដោយចាប់ផ្តើមពី​ថ្ងៃចន្ទសប្ដាហ៍​ក្រោយ សម្រាប់ការងាររយៈពេល ១ឆ្នាំ។ការដាក់ពង្រាយនេះ រួមមានសមាជិក ២នាក់នៃកងកម្លាំងស្វ័យ​ការពារដែន​គោក​ ម្នាក់មកពីកងកម្លាំងស្វ័យ​ការពារដែន​ទឹក​ និងម្នាក់មកពីកងកម្លាំងស្វ័យ​ការពារដែន​អាកាស។ យោងតាមក្រសួង បាន​ឲ្យ​ដឹង​ទៀត​ថា​ មន្ត្រីទាំងនោះភាគច្រើននឹងដោះស្រាយភារកិច្ចសម្របសម្រួល និងទំនាក់ទំនងដែលភ្ជាប់ទៅនឹងសកម្មភាពគាំទ្រ និងបណ្តុះបណ្តាលយោធា សម្រាប់អ៊ុយក្រែន។មន្ត្រីបានសង្កត់ធ្ងន់ថា បុគ្គលិកទាំងនោះនឹងមិនចូលរួមក្នុងប្រតិបត្តិការប្រយុទ្ធទេ ហើយមិនប្រឈមមុខនឹងលទ្ធភាពផ្ទាល់នៃការចូលរួម ក្នុងការប្រយុទ្ធឡើយ។ទីក្រុងតូក្យូបានបញ្ជាក់​ថា ការដាក់ពង្រាយនេះមានបំណងពង្រឹងសមត្ថភាពការពារជាតិរបស់ជប៉ុន ដោយរៀនសូត្រពីសង្គ្រាមនៅអ៊ុយក្រែន ជាពិសេសការ​វិវត្ត​នៃ​ទម្រង់សង្គ្រាមសម័យទំនើបដែលត្រូវបានគេសង្កេតឃើញ អំឡុងជម្លោះរុស្ស៊ី-អ៊ុយក្រែន៕

ប្រមុខអង្គការណាតូលោក Mark Rutte និយាយនៅថ្ងៃសុក្រនេះថា អង្គការរបស់លោកត្រៀមខ្លួនរួចរាល់ ដើម្បីការពាររាល់មីលីម៉ែត្រនៃទឹកដីសម្ព័ន្ធមិត្តរបស់ខ្លួន បន្ទាប់ពីយានដ្រូនធ្លាក់ត្រូវអគារផ្ទះល្វែងនៅប្រទេសសមាជិករ៉ូម៉ានី អំឡុងការវាយប្រហារនៅពេលយប់របស់រុស្ស៊ីលើប្រទេសជិតខាងអ៊ុយក្រែន ។ក្រុមអាជ្ញាធររ៉ូម៉ានីនិយាយថា យានដ្រូនមួយគ្រឿងបានធ្លាក់លើដំបូលប្លុកអគារផ្ទះល្វែងកម្ពស់ ១០ជាន់ នៅទីក្រុងភាគអាគ្នេយ៍ Galati អំឡុងការវាយប្រហារពេលយប់របស់រុស្ស៊ីលើប្រទេសជិតខាងអ៊ុយក្រែននាថ្ងៃសុក្រនេះ បង្កឲ្យផ្ទុះជាអគ្គិភ័យកើតឡើង ហើយនិងបណ្តាលឲ្យមនុស្ស ២នាក់ រងរបួស ។ ក្រសួងការពារជាតិរ៉ូម៉ានី និយាយនៅថ្ងៃសុក្រនេះថា រ៉ូម៉ានី ដែលជាសមាជិករបស់អង្គការណាតូ និងសហភាពអឺរ៉ុប មានព្រំដែនរួមគ្នាជាមួយអ៊ុយក្រែនប្រវែង ៦៥០គ.ម ហើយបានមើលឃើញ យានដ្រូនរុស្ស៊ីបំពានដែនអាកាសរបស់ពួកគេ ២៨លើក ចាប់តាំងពីទីក្រុងមូស្គូ ចាប់ផ្តើមវាយប្រហារកំពង់ផែទីក្រុងគីវ នៅតាមដងទន្លេ Danube ។លោក Rutte និយាយនៅក្នុងសារបង្ហោះលើបណ្តាញព័ត៌មានសង្គម Xថា ទង្វើដ៏ធ្វេសប្រហែសរបស់រុស្ស៊ី គឺជាគ្រោះថ្នាក់សម្រាប់ពួកយើងទាំងអស់គ្នា ។ លោកបន្តថា កាលពីយប់មិញបង្ហាញជាថ្មីម្តងទៀតថា ផលវិបាកនៃសង្គ្រាមឈ្លានពានខុសច្បាប់របស់ពួកគេ មិនបញ្ឈប់ត្រឹមព្រំដែននោះទេ ។ដោយឡែក ប្រធានគណៈកម្មការអឺរ៉ុបលោកស្រី Ursula von Der Leyen និយាយនៅលើបណ្តាញព័ត៌មានសង្គម Xដែរថា សង្រ្គាមឈ្លានពានរបស់រុស្ស៊ី បានឆ្លងខ្សែបន្ទាត់មួយទៀតហើយ ។ លោកស្រីថា ការឈ្លានពានយានដ្រូនរុស្ស៊ី បានវាយប្រហារតំបន់មានមនុស្សរស់នៅច្រើន នៅរ៉ូម៉ានី បណ្តាលឲ្យជនស៊ីវិលរងរបួស នៅលើទឹកដីសហភាពអឺរ៉ុប ។ ពួកយើងឈរខាងសាមគ្គីភាពយ៉ាងពេញទំហឹងជាមួយរ៉ូម៉ានី និងពលរដ្ឋរបស់ពួកគេ ។ ស្របពេលដែលពួកយើងបន្តពង្រឹងសន្តិសុខ និងការទប់ទល់របស់ពួកយើង ជាពិសេសនៅតាមព្រំដែនភាគខាងកើតរបស់ពួកយើង ពួកយើងនឹងបន្តបង្កើនសម្ពាធលើរុស្ស៊ី ហើយពួកយើងនឹងត្រៀមកញ្ចប់ទណ្ឌកម្មទី ២១ ៕

ឧបនាយករដ្ឋមន្រ្តីអ៊ុយក្រែនលោក Oleksiy Kuleba និយាយនៅថ្ងៃសុក្រនេះថា យានដ្រូនរុស្ស៊ី បានវាយប្រហារនាវាដឹកទំនិញ ៣គ្រឿងដោតទង់ជាតិបរទេស កាលពីយប់ថ្ងៃព្រហស្បតិ៍ ពេលដែលពួកគេធ្វើដំណើរតាមច្រករបៀងនាំចេញតាមសមុទ្ររបស់អ៊ុយក្រែន ស្ថិតក្នុងសមុទ្រខ្មៅ ។យោងតាមការអះអាងរបស់កងទ័ពជើងទឹកអ៊ុយក្រែន បានឲ្យដឹងថា នាវាមួយគ្រឿងដែលរងការវាយប្រហារ គឺជានាវាដឹកទំនិញរបស់ទួរគី ដែលធ្វើដំណើរក្រោមទង់ជាតិវ៉ានូអាទូ ហើយនិងធ្វើដំណើរឆ្ពោះទៅកាន់ប្រទេសទួរគី ចេញពីកំពង់ផែនៅតំបន់ Odesa ។ពួកគេបន្តថា ការវាយប្រហារនេះ បណ្តាលឲ្យកើតមានអគ្គិភ័យ ហើយនិងការជម្លៀសខ្លួននាវិករងរបួស ២នាក់ ហើយនាវាមួយគ្រឿងនេះ មានផ្ទុកទំនិញនៅពេលរងវាយប្រហារនោះ ។លោក Kuleba និយាយនៅលើបណ្តាញព័ត៌មានសង្គម Telegramថា ការវាយប្រហាររបស់រុស្ស៊ី បណ្តាលឲ្យកើតមានអគ្គិភ័យនៅលើនាវា ប៉ុន្តែត្រូវបានពន្លត់វិញហើយដោយក្រុមនាវិក ។អាជ្ញាធរកំពង់ផែសមុទ្រអ៊ុយក្រែន និយាយថា នាវាទាំង ៣គ្រឿងនេះ ដោតទង់ជាត់វ៉ានូអាទូ កូម៉ូរូស និងប៉ាណាម៉ា ។សូមបញ្ជាក់ថា រុស្ស៊ីមានគោលដៅម្តងហើយម្តងទៀតលើផ្លូវនាំចេញសមុទ្រ អំឡុងសង្រ្គាមរយៈពេលជាង ៤ឆ្នាំកន្លងមកនេះ ចាប់តាំងពីពួកគេវាយលុកអ៊ុយក្រែន ៕