បាតុកម្ម និងការរំខានដល់ការដឹកជញ្ជូន បានកើតឡើងនៅទូទាំងប្រទេសអ៊ីតាលី នៅ​ថ្ងៃសុក្រ (ទី២៩ ខែឧសភា ឆ្នា២០២៦) ក្នុងអំឡុងពេលមាន​កូដកម្មទូទាំងប្រទេសរៀបចំឡើងដោយសហជីពមូលដ្ឋាន ដែលតវ៉ាប្រឆាំងនឹងការកើនឡើង​ការ​ចំណាយនៃ​ការ​​រស់នៅ អសន្តិសុខការងារ និងការបង្កើន​ការចំណាយផ្នែក​យោធា​។ការដើរដង្ហែ​ និងការជួបជុំគ្នា ដើម្បី​បង្ហាញ​ការ​ត​វ៉ានេះ ត្រូវបានគ្រោងធ្វើ​ឡើងនៅក្នុងទីក្រុងជាច្រើន រួមមានទីក្រុងរ៉ូម Milan, Naples, Bologna, Florence, Genoa, Turin, Palermo និង​ Catania។ កូដកម្មនេះត្រូវបានអំពាវនាវដោយសហជីពកម្មករមូលដ្ឋានជាច្រើន រួមមាន CUB, SGB, SI COBAS និង USI រួមជាមួយអង្គការគាំទ្រប៉ាឡេស្ទីន នៅក្នុងប្រទេសអ៊ីតាលី។ក្រុមបាតុករបានទាមទារប្រាក់ឈ្នួល និងប្រាក់សោធននិវត្តន៍ខ្ពស់ជាងមុន ការ​បញ្ចប់ការបណ្តេញចេញ និងការងារដែលមិនមានសុវត្ថិភាព និងការប្រឆាំងនឹងអ្វីដែលអ្នករៀបចំ បានពិពណ៌នាថា ជា «ការ​ចំណាស់​លខ្ពស់នៃ​ការរស់នៅ ដែលបង្កឡើងដោយសង្គ្រាម»។ក្រុមទាំងនោះក៏បានថ្កោលទោសផង​ដែរ​ ចំពោះ​ «ទង្វើ​ប្រល័យពូជសាសន៍ដែលកំពុងបន្តមាន​ លើ​ប្រជាជនប៉ាឡេស្ទីន និងលីបង់» និងបានអំពាវនាវឲ្យ​អ៊ីតាលីផ្អាកទំនាក់ទំនងនយោបាយ និងពាណិជ្ជកម្មជាមួយអ៊ីស្រាអែល។ក្រុមហ៊ុន​ផ្លូវដែករដ្ឋអ៊ីតាលី FS បានឲ្យដឹង​ថា កូដកម្មដាច់ដោយឡែកមួយ ដោយកម្មករផ្លូវដែក បានចាប់ផ្តើម​កាល​ពី​យប់ថ្ងៃព្រហស្បតិ៍ ហើយនឹងបន្តរហូតដល់ល្ងាចថ្ងៃសុក្រ ដែលធ្វើ​ឲ្យ​ប៉ះពាល់ដល់សេវាកម្មរថភ្លើងទូទាំងប្រទេស៕

ប្រទេស​កូរ៉េខាងត្បូងបានបង្ហាញពីឆន្ទៈរបស់ខ្លួន ក្នុងការចូលរួមក្នុងការសន្ទនាជាមួយកូរ៉េខាងជើង ហើយជឿជាក់ថា ទីក្រុងព្យុងយ៉ាងនឹងឆ្លើយតបនៅទីបំផុត ចំពោះកិច្ចប្រឹងប្រែងរបស់ទីក្រុងសេអ៊ូល ក្នុងការកែលម្អទំនាក់ទំនង។​ នេះបើយោងតាមរដ្ឋមន្ត្រីការបរទេស លោក​ Cho Hyun ដែល​បានប្រាប់ទីភ្នាក់ងារសារព័ត៌មាន Yonhap នៅ​ក្នុងបទសម្ភាសន៍មួយដែលត្រូវ​បានចេញផ្សាយ នៅ​ថ្ងៃសុក្រ (ទី២៩ ខែឧសភា ឆ្នាំ២០២៦) នេះ។លោក Cho បាននិយាយថា ឆន្ទៈរបស់ទីក្រុងសេអ៊ូលក្នុងការចូលរួម ត្រូវបានបញ្ជូនទៅកាន់កូរ៉េខាងជើងតាមរយៈរដ្ឋមន្ត្រីការបរទេសសិង្ហបុរី លោក Vivian Balakrishnan ដែលទើបតែបានទៅទស្សនកិច្ចទីក្រុងព្យុងយ៉ាងថ្មីៗនេះ។លោក Cho បានបញ្ជាក់​ថា៖ «នៅពេលនេះ មិនមានសញ្ញាណាមួយដែលអាចមើលឃើញថា កូរ៉េខាងជើងនឹងវិលត្រឡប់មករកការសន្ទនាវិញទេ។ ប៉ុន្តែយើងបានបង្ហាញទាំងស្រុង​ពីឆន្ទៈរបស់យើង ក្នុងការចូលរួមក្នុងការសន្ទនា ហើយខ្ញុំជឿថា ប្រទេស​កូរ៉េខាងជើងនឹងឆ្លើយតបនៅទីបំផុត»។គួរបញ្ជាក់ថា ទំនាក់ទំនងអន្តរកូរ៉េ នៅតែមានភាពតានតឹង ខណៈដែលទីក្រុងព្យុងយ៉ាង បន្តពិពណ៌នា អំពីទំនាក់ទំនងជាមួយទីក្រុងសេអ៊ូល ក្រោមក្របខ័ណ្ឌ «រដ្ឋអរិភាព ២» ពោល​គឺ​មិន​មែនជា​​មិត្ត តែ​​ជា​សត្រូវ​។កាល​ពី​ថ្ងៃព្រហស្បតិ៍ បន្ទាប់ពីដំណើរទស្សនកិច្ចរបស់លោកទៅកាន់ប្រទេសកូរ៉េខាងជើង អ្នកការទូតជាន់ខ្ពស់​របស់សិង្ហបុរី បាននិយាយថា ទីក្រុងព្យុងយ៉ាង បច្ចុប្បន្នហាក់ដូចជាមិនព្រមចូលរួមជាមួយសហរដ្ឋអាមេរិក ឬកូរ៉េខាងត្បូងទេ ហើយផ្ទុយទៅវិញ កំពុងផ្តោតលើការពង្រឹងការពឹងផ្អែកលើខ្លួនឯង និងការទប់ស្កាត់យោធា៕

កងទ័ពអ៊ីស្រាអែល នៅ​ថ្ងៃសុក្រ (ទី២៩ ខែឧសភា ឆ្នាំ២០២៦) នេះ បាន​ឲ្យ​ដឹងថា ខ្លួនបានសម្លាប់មេបញ្ជាការជាន់ខ្ពស់មួយ​រូប​របស់​ក្រុម​ហាម៉ាស នៅក្នុងការវាយប្រហារមួយ​ដែលបានធ្វើឡើងនៅតំបន់​ហ្កាហ្សា កាលពីដើមសប្តាហ៍នេះ។កងទ័ពបានឲ្យដឹង​នៅក្នុងសេចក្តីថ្លែងការណ៍មួយថា លោក Imad Hassan Hussein Aslim គឺជាមេបញ្ជាការរង​នៃ​កងពលតូចក្រុងហ្កាហ្សា (Gaza City Brigade)។កងទ័ពបានបន្ថែមថា លោកក៏មាន​តួនាទីផងដែរ​ជា​មេបញ្ជាការកងវរសេនាតូច​ Zeitoun នៃកងពលតូច Qassam ដែលជាអង្គភាព​យោធារបស់ក្រុម​ហាម៉ាស។ យោធាបានចោទប្រកាន់ថា លោក Aslim បានចូលរួមក្នុងការវាយប្រហារកាល​ពី​ថ្ងៃទី៧ ខែតុលា ឆ្នាំ២០២៣។ដោយមិនបាន​បញ្ចេញឈ្មោះឲ្យ​ដឹង​ កង​ទ័ព​បាន​បន្ថែម​ថា ការវាយប្រហារដែលបានសម្លាប់លោក Aslim នេះ ក៏បានកំណត់គោលដៅលើ​មេបញ្ជាការរបស់​ក្រុម​ហាម៉ាសម្នាក់ទៀតផងដែរ។ មិនមានការអត្ថាធិប្បាយភ្លាមៗឡើយ​ ពីក្រុម​ហាម៉ាស ឬកងពលតូច Qassam ជុំវិញ​ការអះអាងរបស់អ៊ីស្រាអែលនេះ​។ការអះអាងចុងក្រោយបំផុតរបស់អ៊ីស្រាអែលនេះ កើតឡើងស្រប​ពេលមានការរំលោភបន្តបន្ទាប់ លើ​បទឈប់បាញ់ ដែលបានចូលជាធរមានកាលពីខែតុលាឆ្នាំមុន​។ យោងតាមក្រសួងសុខាភិបាលតំបន់​ហ្កាហ្សា បាន​ឲ្យ​ដឹង​ថា ជនជាតិប៉ាឡេស្ទីនចំនួន ៩២២នាក់ ត្រូវបានសម្លាប់ និង ២.៧៨៦នាក់រងរបួស ដោយសារការរំលោភលើបទឈប់បាញ់ ចាប់តាំងពីពេលនោះមក៕

អគ្គលេខាធិការអង្គការសុខភាពពិភពលោក(WHO)លោក Tedros Adhanom Ghebreyesus បានធ្វើដំណើរទៅដល់ទីក្រុង Kinshasa របស់សាធារណរដ្ឋប្រជាធិបតេយ្យកុងហ្គោ ដើម្បីសម្របសម្រួលការឆ្លើយតបនឹងការរីករាលដាលឆ្លងជំងឺអេបូឡានៅប្រទេសមួយនេះ ដោយរូបលោកព្រមានថា ជម្លោះ ការជម្លៀសខ្លួន និងការមិនទុកចិត្តគ្នា នឹងរារាំងដល់កិច្ចខិតខំប្រឹងប្រែងទប់ស្កាត់ជំងឺមួយនេះ ។ ថ្លែងពេលទៅដល់ទីក្រុង Kinshasa លោក Tedros ចាត់ទុកការរីករាលដាលឆ្លងជំងឺអេបូឡាថា ស្មុគស្មាញខ្លាំងណាស់ ហើយលោកជំរុញឲ្យមានបទឈប់បាញ់ ពីព្រោះថា អសន្តិសុខ និងកង្វះខាតស្បៀងអាហារ បានធ្វើឲ្យឆ្លើយតបកាន់តែលំបាកថែមមួយកម្រិតទៀត ។ លោកបានជំរុញផងដែរឲ្យមានការផ្តល់មូលនិធិអន្តរជាតិ ដោយរូបលោកបញ្ជាក់ថា ប្រហែល ១ភាគ ៣ប៉ុណ្ណោះ នៃការគាំទ្រទទួលបាន ។ បើគ្មានបុគ្គលិកសុខភាពទេនោះ វាពិតជាពិបាកជួយអ្នកដទៃខ្លាំងណាស់ ។ លោក Tedros និយាយដែរថា លោកនឹងធ្វើដំណើរទៅកាន់ទីក្រុងភាគខាងកើត Bunia ដើម្បីវាយតម្លៃស្ថានភាព ស្របពេលដែលអង្គការ WHO ត្រូវធ្វើការជាមួយដៃគូ ដើម្បីពន្លឿនការធ្វើតេស្តេវេជ្ជសាស្រ្ត សម្រាប់វ៉ាក់សាំង និងការព្យាបាល ដែលអាចចំណាយពេលច្រើនខែ ក្នុងការសម្រេចបាន ៕

ប្រធានាធិបតីក្វាតេម៉ាឡាលោក Bernardo Arevalo និយាយថា ប្រទេសរបស់លោកបានស្នើសុំកិច្ចសហប្រតិបត្តិការយោធាសហរដ្ឋអាមេរិក រួមទាំងសម្ភារៈ ការហ្វឹកហាត់ និងក្រុមអ្នកជំនាញ ដើម្បីជួយប្រតិបត្តិការរបស់ពួកគេប្រឆាំងនឹងការជួញដូរគ្រឿងញៀនខុសច្បាប់ ។ រដ្ឋាភិបាលកត់សម្គាល់ឃើញថា ផែនការរួមគ្នា បានបញ្ឈប់ប្រតិបត្តិការយោធារបស់សហរដ្ឋអាមេរិកលើទឹកដីក្វាតេម៉ាឡា ហើយវាបានធ្លាក់ទៅក្នុងកិច្ចព្រមព្រៀងទ្វេភាគីមានស្រាប់ ។ រដ្ឋាភិបាលនិយាយនៅក្នុងសេចក្តីថ្លែងការណ៍ថា ពុំមានកិច្ចព្រមព្រៀងណាមួយ អនុញ្ញាតឲ្យមានប្រតិបត្តិការយោធាបរទេសលើទឹកដីជាតិនោះទេ ។ ពួកគេបន្តថា លោក Arevalo និងរដ្ឋមន្រ្តីការពារជាតិក្វាតេម៉ាឡាលោក Henry Saenz បាននិយាយជាមួយរដ្ឋមន្រ្តីការពារជាតិសហរដ្ឋអាមេរិកលោក Pete Hegseth ដើម្បីបញ្ជាក់ពីលក្ខខណ្ឌសម្រាប់កិច្ចសហប្រតិបត្តិការរបស់សហរដ្ឋអាមេរិក ក្រោយលោក Saenz ស្នើសុំជំនួយ ។ កិច្ចព្រមព្រៀងនេះ មានបំណងពង្រីកយុទ្ធសាស្រ្តដែលបានអនុវត្តកាលពីឆ្នាំ ២០២៤ ។ លោក Arevalo និយាយប្រាប់ក្រុមអ្នកសារព័ត៌មានថា ពួកយើងបានពិភាក្សាលើលទ្ធភាពនៃការបង្កើនកិច្ចសហប្រតិបត្តិការដែលបានធ្វើឡើងនៅក្នុងក្របខណ្ឌកិច្ចព្រមព្រៀងទ្វេភាគីមានស្រាប់ ៕

ក្រុមធម្មយាត្រាមូស្លីម បានជួបជុំគ្នានៅថ្ងៃសុក្រនេះ ដើម្បីធ្វើពិធីគប់ដុំថ្មអារក្ស នៅទីក្រុង Mina របស់ប្រទេសអារ៉ាប៊ីសាអ៊ូឌីត ។ ក្រុមធម្មយាត្រាមកពីទូទាំងពិភពលោក បានគប់ដុំថ្មលើជញ្ជាំងថ្មដ៏ធំមួយដែលតំណាងឲ្យការបដិសេធន៍អំពើអាក្រក់ ។ទង្វើបែបនេះ រំឭកដល់ការបដិសេធរបស់ព្យាការី Ibrahim ចំពោះការល្បួងរបស់សាតាំង ។ សូមបញ្ជាក់ថា ពិធីបុណ្យហាជិ ស្ថិតនៅក្នុងចំណោមសសរស្តមទាំង ៥នៅក្នុងសាសនាអ៊ិស្លាម ហើយនិងតម្រូវឲ្យរៀបចំពិធីម្តងក្នុងមួយជីវិតសម្រាប់ជនមូស្លីមម្នាក់ ដែលមានសមត្ថភាពផ្នែកហិរញ្ញវត្ថុ និងរាងកាយ ក្នុងការធ្វើដំណើរ ។ ពិធីបុណ្យនេះដែរ រំឭកដល់ការតាំងចិត្តរបស់ព្យាការី Ibrahim ដើម្បីពលីកូនប្រុសរបស់លោកតាមការបញ្ជារបស់ព្រះ ៕

ភ្លើងឆេះព្រៃបានឆាបឆេះតំបន់ព្រៃក្រាស់នៅតំបន់ភ្នំភាគខាងជើង Shimlaប្រទេសឥណ្ឌាកាលពីថ្ងៃព្រហស្បតិម្សិលមិញស្របពេលដែលអាកាសធាតុក្តៅខ្លាំង កំពុងវាយប្រហារតំបន់ជាច្រើននៅក្នុងប្រទេសមួយនេះ ។ ចំណែកឯភ្លើងឆេះព្រៃទ្រង់ទ្រាយធំមួយទៀតបានឆាបឆេះតំបន់ភ្នំនៅរដ្ឋភាគខាងជើង HimachalPradesh និងរដ្ឋ Uttarakhand កាលពីដើមសប្តាហ៍នេះនិងបន្តឆាបឆេះរហូតដល់ពាក់កណ្តាលសប្តាហ៍ បណ្តាលឲ្យខូចខាតដៃព្រៃអស់ជាច្រើនហិចតា ។ អណ្តាតភ្លើង ត្រូវបានគេមើលឃើញរីករាលដាលយ៉ាងឆាប់រហ័សនៅលើដីព្រៃបង្កការគំរាមកំហែងធ្ងន់ធ្ងរដល់ព្រៃបៃតងក្នុងតំបន់នោះ ។ សារព័ត៌មានក្នុងស្រុករាយការណ៍ថា ភ្លើងឆេះព្រៃថ្មីៗត្រូវបានគេរាយការណ៍ផងដែរនៅទីក្រុងតំបន់ភ្នំ Kasauliនិង Shimla ស្ថិតក្នុងរដ្ឋ HimachalPradesh ជាទីដែលកងទ័ពអាកាសឥណ្ឌា បានដាក់ពង្រាយឧទ្ធម្ភាគចក្របំពាក់ដោយធុងទឹកដើម្បីពន្លត់អណ្តាតភ្លើង ។ សូមបញ្ជាក់ថា ប្រទេសឥណ្ឌាតែងតែមើលឃើញករណីភ្លើងឆេះព្រៃកើនឡើងពេលដែលសីតុណ្ហភាពហក់ឡើងខ្ពស់នៅពាក់កណ្តាលខែមីនា រហូតដល់រដូវវស្សាចាប់ផ្តើមនៅខែមិថុនា៕

រដ្ឋមន្ត្រីការបរទេសចិន លោក Wang Yi បានទៅ​ដល់កាណាដាហើយ កាល​ពី​ថ្ងៃព្រហស្បតិ៍ (ទី២៨ ខែឧសភា ឆ្នាំ២០២៦) ក្នុងដំណើរទស្សនកិច្ចផ្លូវការរយៈពេល ៣ថ្ងៃ ដែលជាការ​មាន​នូវ​ទស្សនកិច្ចបែប​នេះ​លើកដំបូងទៅ​កាន់ប្រទេសនេះ ក្នុងរយៈពេល ១ទសវត្សរ៍។នៅលើវេទិកាបណ្ដាញ​សង្គម X រដ្ឋមន្ត្រីការបរទេសកាណាដា លោកស្រី Anita Anand បានសរសេរថា៖ «ខ្ញុំទន្ទឹងរង់ចាំស្វាគមន៍សមភាគីចិនរបស់ខ្ញុំ គឺលោក​រដ្ឋមន្ត្រី Wang Y សម្រាប់ដំណើរទស្សនកិច្ចលើកដំបូងមក​កាន់ប្រទេសកាណាដា ដោយរដ្ឋមន្ត្រីការបរទេសចិន ក្នុងរយៈពេល ១ទសវត្សរ៍»។ដំណើរទស្សនកិច្ចរបស់លោក កំពុងធ្វើឡើងបន្ទាប់ពីមាន​ដំណើរទស្សនកិច្ចរយៈពេល ៤ថ្ងៃរបស់នាយករដ្ឋមន្ត្រីកាណាដា លោក Mark Carney ទៅកាន់ប្រទេសចិន ក្នុងខែមករាឆ្នាំនេះ ដែលជាដំណើរទស្សនកិច្ចលើកដំបូងរបស់នាយករដ្ឋមន្ត្រីកាណាដា គិត​ចាប់តាំងពីឆ្នាំ២០១៧។មុននេះ នៅក្នុងសេចក្តីថ្លែងការណ៍មួយ រដ្ឋាភិបាលកាណាដាបានឲ្យ​ដឹង​ថា លោក Wang និង​លោកស្រី​ Anand នឹងជួបគ្នានៅទីក្រុងអូតាវ៉ា ដើម្បីពិភាក្សាអំពីការអនុវត្តភាពជាដៃគូយុទ្ធសាស្ត្រកាណាដា-ចិន ដែលត្រូវបានធ្វើបច្ចុប្បន្នភាព។គួរ​ដឹង​ថា ពាណិជ្ជកម្មទ្វេភាគី រវាងប្រទេស​ចិន និងកាណាដា មានចំនួន ១២៥,១ពាន់លានដុល្លារ នៅឆ្នាំ២០២៥៕

ស្របពេលដែលរលកកម្តៅដូចនៅពាក់កណ្តាលរដូវក្តៅ កំពុងកម្លោចតំបន់មួយចំនួនរបស់ព័រទុយហ្គាល់រួចទៅហើយក្នុងខែឧសភានោះ កងទ័ព និងក្រុមអនុរក្សព្រៃឈើ បានព្យាយាមបោសសម្អាតិកម្ទេចកម្ទីឈើសល់ពីព្យុះធ្ងន់ធ្ងរកាលពីដើមឆ្នាំ ២០២៦នេះ មុនពេលរដូវភ្លើងឆេះព្រៃ ចាប់ផ្តើម ។ នៅតំបន់ភាគកណ្តាល Serta ដែលស្ថិតក្នុងចំណោមតំបន់រងផលប៉ះពាល់ធ្ងន់ធ្ងរបំផុតដោយសារព្យុះ គ្រឿងចក្រធុនធ្ងន់ និងទាហាន កំពុងធ្វើការក្នុងព្រៃជ្រៅ ដើម្បីឈូសឆាយដើមឈើបាក់ បែកឈើ ដែលដើរតួជាឥន្ធនៈសម្រាប់ភ្លើងឆេះព្រៃ ។ ពួកគេបានបើកផ្លូវចូលសម្រាប់ក្រុមភ្នាក់ងារពន្លត់អគ្គិភ័យផងដែរ នៅពេលដែលភ្លើងឆេះព្រៃកើតឡើង ។ លោកសាស្រ្តាចារ្យ Jose Miguel Pereira ដែលជាអ្នកជំនាញភ្លើងឆេះព្រៃ និយាយប្រាប់ទីភ្នាក់ងារព័ត៌មានរ៉យទ័រថា ព្យុះបង្កឲ្យមានឥន្ធនៈភ្លើងឆេះព្រៃនៅលើដី ដែលបណ្តាលឲ្យគ្រោះថ្នាក់ដល់ភ្លើងឆេះព្រៃ ។ ព័រទុយហ្គាល់រកឃើញភាគរយខ្ពស់ជាងគេបំផុតនៃភ្លើងឆេះព្រៃ នៅសហភាពអឺរ៉ុប ។ កាលពីរដូវក្តៅមុន អេស្ប៉ាញ និងព័រទុយហ្គាល់ មើលឃើញរលកកម្តៅរយៈពេល ១៦ថ្ងៃ ដែលជារលកកម្តៅដ៏ខ្លាំងក្លាបំផុតជាប់កំណត់ត្រា ហើយនិងជួយឲ្យកើតមានភ្លើងឆេះព្រៃ ។ ក្រុមអ្នកវិទ្យាសាស្រ្តនិយាយថា ហេតុការណ៍អាកាសធាតុក្តៅបែបនេះ នឹងកើតឡើងកាន់តែញឹកញាប់ជាងមុន ដោយសារបម្រែបម្រួលអាកាសធាតុបង្កឡើងដោយសារមនុស្ស ៕

ចំនួនប្រជាជនជប៉ុន បានធ្លាក់ចុះមកត្រឹមជាង ១២៣លាននាក់ ដែលជាការថយ​ចុះច្រើនបំផុតមិនធ្លាប់មានរបស់ប្រទេសនេះ ក្នុងរយៈពេល ៥ឆ្នាំ។ នេះបើយោងតាមទិន្នន័យជំរឿនបឋមឆ្នាំ២០២៥ ដែលត្រូវបាន​រាយការណ៍ដោយទូរទស្សន៍ NHK នៅថ្ងៃសុក្រ (ទី២៩ ខែឧសភា ឆ្នាំ២០២៦) នេះ។ក្រសួងកិច្ចការផ្ទៃក្នុងរបស់ជប៉ុន បានឲ្យ​ដឹង​ថា ចំនួនប្រជាជន គឺ ១២៣.០៤៩.៥២៤នាក់ គិតត្រឹមថ្ងៃទី១ ខែតុលា ឆ្នាំ២០២៥ ដោយ​ធ្លាក់ចុះជាង ៣លាននាក់ ឬ ២,៥ភាគរយ ពីចំនួន​ជំរឿនកាលពី​មុនដែលបានធ្វើឡើងក្នុងឆ្នាំ២០២០។តួលេខចុងក្រោយបំផុតនេះ គឺជាការធ្លាក់ចុះចំនួនប្រជាជនជា​លើកទី៣ ជាប់គ្នា ចាប់តាំងពីជប៉ុនបានកត់ត្រាការធ្លាក់ចុះជាលើកដំបូងក្នុងឆ្នាំ២០១៥។ ប្រទេសនេះបានធ្វើជំរឿនជាតិរៀងរាល់ប្រាំឆ្នាំម្តង ចាប់តាំងពីឆ្នាំ១៩២០​។ទោះបីជាចំនួនប្រជាជនថយចុះក៏ដោយ ក៏​ចំនួនគ្រួសារបានកើនឡើងដល់កំណត់ត្រា ៥៧​,១លានគ្រួសារ ខណៈដែលចំនួនមនុស្សក្នុង ១គ្រួសារ បានធ្លាក់ចុះពី ២,២៦នាក់ មកត្រឹម ២,១៥នាក់។ មន្ត្រីបាននិយាយថា និន្នាការនេះឆ្លុះបញ្ចាំងពីចំនួនមនុស្សចាស់ដែលកំពុងរស់នៅតែម្នាក់ឯង មាន​កាន់តែច្រើនឡើង។ក្រសួងត្រូវបានគេរំពឹងថា នឹងចេញផ្សាយតួលេខជំរឿនចុងក្រោយនៅខែកញ្ញា៕