អាជ្ញាធរអាកាសចរណ៍ស៊ីវិលរបស់ប្រទេសបាននិយាយថា យន្តហោះដឹកអ្នកដំណើរខ្នាតតូចមួយគ្រឿងបានធ្លាក់នៅភាគនិរតីនៃរដ្ឋធានី Juba របស់ប្រទេសស៊ូដង់ខាងត្បូង កាលពីថ្ងៃចន្ទ ទី ២៧ ខែមេសា ដោយបានសម្លាប់មនុស្សទាំងអស់ ១៤ នាក់នៅលើយន្តហោះ។ អាជ្ញាធរបាននិយាយនៅក្នុងសេចក្តីថ្លែងការណ៍ថា យន្តហោះនេះជាយន្តហោះ Cessna 208 Caravan ធ្វើប្រតិបត្តិការដោយក្រុមហ៊ុន CityLink Aviation កំពុងហោះហើរពីទីក្រុង Yei ទៅកាន់អាកាសយានដ្ឋានអន្តរជាតិ Juba នៅពេលនោះ យន្តហោះបានបាត់បង់ទំនាក់ទំនងជាមួយអ្នកគ្រប់គ្រងចរាចរណ៍ផ្លូវអាកាស។យន្តហោះនេះ បានហោះឡើងនៅម៉ោង ៩:១៥ ព្រឹក ម៉ោងក្នុងស្រុក ហើយបានបាត់បង់ទំនាក់ទំនងនៅម៉ោង ៩:៤៣នាទីព្រឹក ដោយមានអ្នកដំណើរ ១៣ នាក់ និងអាកាសយានិកម្នាក់។អ្នកស្លាប់ រួមមានជនជាតិកេនយ៉ាពីរនាក់ និងជនជាតិស៊ូដង់ខាងត្បូង ១២ នាក់។ របាយការណ៍បឋមបានបង្ហាញថា យន្តហោះបានធ្លាក់ដោយសារតែអាកាសធាតុមិនអំណោយផល ជាពិសេសការមើលឃើញទាប។យោងតាមកាកបាទក្រហមស៊ូដង់ខាងត្បូងបានឲ្យដឹងថា កិច្ចខិតខំប្រឹងប្រែងសង្គ្រោះមានភាពយឺតយ៉ាវ និងលំបាក។ លោក Joseph Lukak Charles ប្រធានសាខាកាកបាទក្រហមស៊ូដង់ខាងត្បូងនៅទីក្រុង Juba និយាយថា ប្រតិបត្តិការបានចំណាយពេលជាច្រើនម៉ោងដើម្បីបានទៅដល់កន្លែងធ្លាក់យន្តហោះ។

អ្នកនយោបាយ និងសង្គមស៊ីវិល បានបង្ហាញសុទិដ្ឋនិយមថា សេចក្តីព្រាងច្បាប់ស្តីពី​កាតព្វកិច្ច​យោធា គឺមានសារសំខាន់សម្រាប់ប្រទេសជាតិ សម្រាប់សង្គមជាតិ និងមាន​សារសំខាន់​សម្រាប់​យុវជន ពីព្រោះយុវជនជាកម្លាំងស្នូល នៃការអភិវឌ្ឍន៍ប្រទេសជាតិ។ ការចូលរួមកាតព្វកិច្ចយោធា គឺ​ជាការចូលរួមដើម្បីអភិវឌ្ឍន៍ខ្លួនឯង ពង្រឹងវិន័យខ្លួនឯង ជួយដល់សង្គមជាតិ និងក្រុមគ្រួសារ​ផងដែរ។បណ្ឌិត ហ៊ាង គឹមស្រឿន ប្រធានគណបក្សមហាសាមគ្គីជាតិខ្មែរ បានថ្លែងថា ច្បាប់កាតព្វកិច្ច​យោធា គឺពិតជាមានសារសំខាន់ ហើយក្នុងនាមជាប្រជាពលរដ្ឋ យុវជន យុវនារី ក្នុងនាមជា​ទំពាំង​ស្នងឫស្សី​មានកាតព្វកិច្ចចូលរួមការពារជាតិ និងកសាងអភិវឌ្ឍន៍ជាតិ។ ហើយកាតព្វកិច្ចយោធា គឺជាការចូលរួមចំណែកសម្រាប់ជាតិដ៏មហាធំធេង ហើយក្នុងនាមជារដ្ឋមួយជាជាតិសាសន៍មួយ គឺត្រូវបំពេញកាតព្វកិច្ចយោធាក្នុងការប្តេជ្ញាចិត្តនៅក្នុងការចូលរួមកសាងជាតិ មាតុភូមិកម្ពុជា។លោកស្រី ច័ន្ទ វឌ្ឍនា ប្រធានសមាគមយុវជនដើម្បីវឌ្ឍនភាពកម្ពុជាបានថ្លែងថា សេចក្តី​ព្រាង​ច្បាប់​ស្តីពី​កាតព្វកិច្ចយោធា គឺមានសារសំខាន់សម្រាប់ប្រទេសជាតិ សម្រាប់សង្គមជាតិ និង​មាន​សារ​សំខាន់សម្រាប់យុវជន ហើយនៅពេលដែលយុវជនបានចូលរួមនៅក្នុងការហ្វឹកហ្វឺនយោធា គឺ​ពង្រឹង​ទៅលើវិន័យនៃការរស់នៅរបស់ពួកគាត់ និងពង្រឹងទៅលើសមត្ថភាពរបស់ពួកគាត់ ដែល​ធ្វើ​ឲ្យ​ពួកគាត់ជាធនធានដ៏ល្អសម្រាប់សង្គមជាតិ។ជាមួយគ្នានេះ អ្នកនយោបាយ និងសមាគមយុវជន ដើម្បីវឌ្ឍនភាពកម្ពុជា បានអំពាវនាវ​ទៅ​ដល់​យុវជន និងយុវតីទាំងអស់ចូលរួមបំពេញកាតព្វកិច្ចយោធា ពីព្រោះ​យុវជន​ជា​កម្លាំង​ស្នូល​នៃ​ការ​អភិវឌ្ឍន៍​ប្រទេសជាតិ។ ហើយការចូលរួមកាតព្វកិច្ចយោធាមិនមែនជាបន្ទុក មិនមែន​ជាការ​បង្ខិត​បង្ខំ​នោះទេ ប៉ុន្តែជាការចូលរួមដើម្បីអភិវឌ្ឍន៍ខ្លួនឯង ពង្រឹងវិន័យខ្លួនឯង ជួយដល់សង្គមជាតិ និងក្រុមគ្រួសារផងដែរ។សូមជម្រាបថា កាលពីថ្ងៃទី២៣ ខែមេសា ឆ្នាំ២០២៦ កិច្ចប្រ​ជុំពេញ​អង្គ​គណៈរដ្ឋមន្ត្រីបានអនុម័តសេចក្តីព្រាងច្បាប់ស្តីពីកាតព្វកិច្ចយោធា និងត្រូវបានប្រកាសជា​ការ​ប្រញាប់។ សេចក្តីព្រាងច្បាប់នេះ មាន ៨ជំពូក និង ២០មាត្រា ត្រូវបានរៀបចំឡើងក្នុងគោល​បំណង​ដើម្បីអនុវត្តមាត្រា៤៩ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា។ សេចក្តីព្រាងច្បាប់នេះ ត្រូវ​បានរៀបចំឡើងក្នុងគោលបំណងដើម្បីអនុវត្តមាត្រា៤៩ថ្មី នៃ​រដ្ឋធម្មនុញ្ញ​នៃព្រះរាជា​ណា​ចក្រ​កម្ពុជា៕ អត្ថបទ៖ វង្ស សុភាព

ក្រសួងការបរទេសរុស្ស៊ី បាននិយាយកាលពីថ្ងៃចន្ទថា រុស្ស៊ីបានដាក់បន្ថែមមន្ត្រីសហភាពអឺរ៉ុប (EU)ចូលទៅក្នុងបញ្ជីខ្មៅ ដែលត្រូវបានហាមឃាត់មិនឱ្យចូលប្រទេស ក្នុងការឆ្លើយតបទៅនឹងកញ្ចប់ទណ្ឌកម្មទី២០ ធ្វើឡើងដោយទីក្រុង Brussels ទៅលើទីក្រុងមូស្គូ។ក្រសួងបាននិយាយនៅក្នុងសេចក្តីថ្លែងការណ៍ថា សហភាពអឺរ៉ុប បន្តការប៉ុនប៉ងរបស់ខ្លួនដើម្បីដាក់សម្ពាធលើរុស្ស៊ីដោយពង្រីកវិធានការរឹតត្បិតជាឯកតោភាគី ហើយចំណាត់ការដ៏បំផ្លិចបំផ្លាញរបស់ទីក្រុង Brussels បានរំលោភលើបទដ្ឋាននៃច្បាប់អន្តរជាតិយ៉ាងធ្ងន់ធ្ងរ។សេចក្តីថ្លែងការណ៍ បាននិយាយថា «យើងក៏បានដាក់វិធានការរឹតត្បិតប្រឆាំងនឹងសកម្មជនសង្គមស៊ីវិល និងអ្នកសិក្សាស្រាវជ្រាវនៅក្នុងបណ្តាប្រទេសអឺរ៉ុបដែលប្រកាន់ជំហរអរិភាពចំពោះរុស្ស៊ី ព្រមទាំងសមាជិកសភាជាតិនៃរដ្ឋសមាជិកសហភាពអឺរ៉ុប និងសភាអឺរ៉ុប ដែលបានបោះឆ្នោតគាំទ្រសេចក្តីសម្រេច និងសេចក្តីស្នើច្បាប់ប្រឆាំងរុស្ស៊ី»។រុស្ស៊ី ក៏បានហាមឃាត់អ្នកតំណាងនៃស្ថាប័នអឺរ៉ុប និងរដ្ឋសមាជិកសហភាពអឺរ៉ុប ដែលពាក់ព័ន្ធនឹងសេចក្តីសម្រេចលើការផ្តល់ជំនួយយោធាដល់អ៊ុយក្រែន មិនឱ្យចូលប្រទេសនេះផងដែរ។ ប្រធានក្រុមប្រឹក្សាអឺរ៉ុប លោក Antonio Costa បាននិយាយថា សហភាពអឺរ៉ុបបានអនុម័តកញ្ចប់ប្រាក់កម្ចីចំនួន៩០ពាន់លានអឺរ៉ូសម្រាប់អ៊ុយក្រែន រួមជាមួយនឹងទណ្ឌកម្មជុំទី២០ ប្រឆាំងនឹងរុស្ស៊ី។

ប្រទេសប៉ាគីស្ថាន និងអាហ្វហ្គានីស្ថាន បានចោទប្រកាន់គ្នាទៅវិញទៅមក ថា បានបើកការវាយប្រហារឆ្លងព្រំដែនជាថ្មី។ អាជ្ញាធរក្រុមតាលីបង់របស់ប្រទេសអាហ្វហ្គានីស្ថាន បាននិយាយកាលពីថ្ងៃចន្ទថា មនុស្សបួននាក់ត្រូវបានសម្លាប់នៅក្នុងការវាយប្រហារនៅខេត្ត Kunar ភាគខាងកើត។ មន្ត្រីប៉ាគីស្ថានបានរាយការណ៍ថា ជនស៊ីវិលយ៉ាងហោចណាស់បីនាក់ បានរងរបួសដោយការបាញ់កាំភ្លើងនៅស្រុកតំបន់ភ្នំ South Waziristan។ ការបន្តអំពើហិង្សា បានគំរាមកំហែងដល់ការចរចាសន្តិភាពដ៏ផុយស្រួយរវាងប្រទេសជិតខាងគ្នានេះ។ ប្រទេសទាំងពីរ បានព្រមព្រៀងគ្នាលើបទឈប់បាញ់ដ៏ផុយស្រួយកាលពីខែមីនា ដែលបានបញ្ឈប់អំពើហិង្សាដ៏បង្ហូរឈាមរយៈពេលជាច្រើនសប្តាហ៍។អ្នកនាំពាក្យរងរបស់ក្រុមតាលីបង់ លោក Hamdullah Fitrat បាននិយាយថា យោធាប៉ាគីស្ថាន បានបើកការវាយប្រហារដោយកាំភ្លើងត្បាល់ និងគ្រាប់រ៉ូកែត ដែលបានធ្វើឱ្យមនុស្ស ៤៥ នាក់រងរបួស។ លោកបាននិយាយថា និស្សិត ស្ត្រី និងកុមារ ស្ថិតក្នុងចំណោមអ្នករងរបួស ខណៈលំនៅឋាន និងសាកលវិទ្យាល័យ Sayed Jamaluddin Afghani ក្នុងក្រុង Asadabad នៃខេត្ត Kunar បានស្ថិតក្រោមការបាញ់ផ្លោង។អ្នកនាំពាក្យបានសរសេរនៅលើបណ្តាញផ្សព្វផ្សាយសង្គមថា «យើងថ្កោលទោសយ៉ាងខ្លាំងចំពោះការវាយប្រហារទាំងនេះ ធ្វើឡើងដោយរបបយោធាប៉ាគីស្ថាន ដែលប្រជាជនសាមញ្ញ គ្រឹះស្ថានសិក្សា និងស្ថាប័នអប់រំត្រូវបានដាក់គោលដៅ ហើយបានប្រកាសថា វាជាឧក្រិដ្ឋកម្មសង្គ្រាមដែលមិនអាចអត់ឱនឲ្យបាន»។ ក្រសួងព័ត៌មានប៉ាគីស្ថាន បានច្រានចោលរបាយការណ៍នេះថាជា «ការនិយាយកុហកយ៉ាងច្បាស់លាស់» ហើយបានទទូចថា ពុំមានការវាយប្រហារលើសាកលវិទ្យាល័យនោះទេ។ ទន្ទឹមនឹងនេះ អ្នកនាំពាក្យកងកម្លាំងព្រំដែនរបស់ប្រទេស បានពិពណ៌នាអំពីឧប្បត្តិហេតុនៅស្រុក South Waziristan ថាជាការប៉ះទង្គិចគ្នាធ្ងន់ធ្ងរបំផុតចាប់តាំងពីបទឈប់បាញ់ត្រូវបានប្រកាស។

ទោះបីជាប្រឈមទៅនឹងការបាត់បង់ចំណូល ក៏ដូចជាវិបត្តិនានាយ៉ាងណាក្តី រាជ​រដ្ឋាភិបាល​កម្ពុជា​បាន​ប្រកាស​សម្រេច នឹងគ្រោងដាក់​ឱ្យ​អនុវត្ត​ការ​លុប​បំបាត់​កម្រៃ​ស្កែន​កុង​តឺន័រ​ទាំង​ស្រុង​ចាប់​ពី​ថ្ងៃ​ទី​១ ខែឧសភា ឆ្នាំ២០២៦តទៅ ដើម្បីជួយសម្រួលខាងផ្នែកពាណិជ្ជកម្ម និងចូល​រួម​ចំណែក​ក្នុង​កាត់​បន្ថយប​ន្ទុកថ្លៃដឹកជញ្ជូន (ឡូជីស្ទីក)។ឯកឧត្តមបណ្ឌិត គុណ ញឹម រដ្ឋមន្ដ្រីប្រតិភូអមនាយករដ្ឋមន្ដ្រី និងជា​អគ្គនាយក​នៃ​អគ្គ​នាយក​ដ្ឋាន​គយ​ និងរដ្ឋាករកម្ពុជា ក្នុងពិធីបើក​សិក្ខាសាលា​ផ្សព្វ​ផ្សាយ​វិធា​ន​ការ​មុត​ស្រួច​ក្នុង​ការ​បង្ការ និង​បង្រ្កាប​អំពើ​រត់គេចពន្ធ និងការពង្រឹងអភិបាលកិច្ច កាលពីព្រឹកទី២៨ ខែមេសានេះ បាន​មាន​ប្រសាសន៍​ឱ្យ​ដឹងថា ក្នុងគោលបំណងសម្រាលបន្ទុករបស់ធុរជន និងប្រជាពលរដ្ឋ​ក្នុង​ស្ថាន​ភាព​នៃ​ការ​កើន​ឡើងខ្ពស់ប្រេងឥន្ធនៈជាសកល ដែលវិធានការទាំងនោះរួមមាន៖ ការបញ្ចុះពន្ធ និង​អាករ​ រថយន្តអគ្គិសនី និងមុខទំនិញចាំបាច់សំខាន់ៗមួយចំនួនទៀត និងការ​ដាក់​ពន្ធ​និង​អាករ​ជា​បន្ទុក​របស់​រដ្ឋលើការនាំចូលប្រេងនិងឧស្ម័នឥន្ធនៈ ដែលតាមរយៈវិធា​នការ​ជា​គោល​នយោបាយ​ទាំង​នេះ ​អគ្គនាយកដ្ឋានគយ និងរដ្ឋាករកម្ពុជា បាត់បង់ចំណូលប្រមាណជិត ៥០លាន​ដុល្លា​រ​ក្នុង​មួយ​ខែ។​នៅក្នុងអង្គសិក្ខាសាលានេះ ឯកឧត្តបណ្ឌិត បានបញ្ជាក់ថា ការដាក់ចេញវិធានការនេះ មាន​លក្ខណៈ​មុះ​មុត ម៉ឹងម៉ាត់ និងប្រាកដនិយម និងជាផ្នែកមួយ​កែ​ទម្រង់​ស៊ីជម្រៅ​របស់​រាជ​រដ្ឋាភិបាល​អាណត្តិ​កាល​ទី៧ ជាពិសេសការកែទម្រង់រដ្ឋបាលសាធារណៈ និងអភិបាលកិច្ច សំដៅ​ដោះ​ស្រាយ​នូវ​បញ្ហាប្រឈម និងបាតុភាពអសកម្មភាពរាំរៃនានាដែលកើតមានឡើងកន្លងមក។ ឯកឧត្តម បានបន្តថា កាលៈទេសៈដាក់ចេញនូវវិធានការមុតស្រួចទាំងនេះ គឺចាំបាច់​បំផុត​នា​ពេល​ដែល​កម្ពុជា​បាន និងកំពុងទទួលរងនូវឥទ្ធិពលដ៏ធ្ងន់ធ្ងរពីវិបត្តិស្រួចស្រាល គំរាមកំហែងដល់ជាតិ និង​សេដ្ឋកិច្ច នោះគឺព្យុះសង្ឃរា ៣ផ្ទួនគ្នា១. គឺសង្រ្គាមឈ្លានពានមកលើអធិបតេយ្យភាព និង​បូរណ​ភាពទឹកដីកម្ពុជាដោយប្រទេសថៃ ២.យុទ្ធនាការយ៉ាងក្តៅរបស់គគុកក្នុងការបង្រ្កាប ស្កេម​អន​ឡាញ (Scam Online) និងទី៣. សង្រ្គាមនៅប្រទេសអ៊ីរ៉ង់ និងវិបត្តិប្រេង​ឥន្ធនៈ​ដែល​កើត​ឡើង​ជា​បច្ច័យ​អវិជ្ជមានធ្ងន់ធ្ងរ។សូមបញ្ជាក់ថា សិក្ខាសាលាផ្សព្វផ្សាយវិធានការមុតស្រួចក្នុងការបង្ការនិងបង្រ្កាបអំពើរត់គេចពន្ធ និង​ការ​ពង្រឹងអភិបាលកិច្ច របស់អគ្គនាយកដ្ឋានគយ និងរដ្ឋាករកម្ពុជា នេះធ្វើ​ឡើង​ក្នុង​គោល​បំណង​ពិនិត្យ និងដោះស្រាយនូវ​បញ្ហា​និង​សំណូមពរ​នានា​របស់​វិស័យ​ឯកជ​នពា​ក់​ព័ន្ធ​នឹង​ការ​អនុវត្ត​នីតិ​វិធីគយ, ផ្សព្វផ្សាយអំពីគោល​នយោបាយ​របស់​រាជ​រដ្ឋាភិបាល​ក្នុង​ការ​បញ្ចុះ​ពន្ធ​ដើម្បី​ជួយ​ដល់​ជីវភាពរបស់ប្រជាពលរដ្ឋនិងកាត់បន្ថយតម្លៃប្រេងឥន្ធនៈ និងពិនិត្យ​លើ​សេចក្ដី​ព្រាង​កញ្ចប់​វិធាន​ការមុតស្រួចក្នុងការទប់ស្កាត់អំពើរត់គេចពន្ធនិងបន្លំពន្ធ និងកិច្ចសម្រួលពាណិជ្ជកម្ម និង​ការពង្រឹងអភិបាលកិច្ចក្នុងរដ្ឋបាលគយ៕ អត្ថបទ៖ ឈិត បូរ៉ាវី

លោក ហ៊ី ស៊ឹម កសិករគំរូក្នុងសង្កាត់រុនតាឯកតេជោសែន ខេត្តសៀមរាប ប្រែក្លាយពីបុគ្គលម្នាក់ដែលគ្មានបទពិសោធន៍ ក្លាយជាកសិករគំរូទទួលបានជោគជ័យលើការដាំដើមទំពាំងបាយជូរ និងបានពង្រីកអាជីវកម្មរបស់ខ្លួនពីការដាំទំពាំងបាយជូរ១៨ដើម រហូតដល់ជាង២០០ដើម និងទទួលបានការគាំទ្រពីសំណាក់អាជីវករ និងប្រជាពលរដ្ឋ ជាមួយទីផ្សារកក់ទុកមុនយ៉ាងសកម្ម ព្រោះតែគុណភាព និងរសជាតិដ៏ឆ្ងាញ់ពិសា។លោក ហ៊ី ស៊ឹម បានបង្ហាញថា ការដាំដុះដំណាំទំពាំងបាយជូរ ត្រូវការចំណាយពេលវេលា និងការអត់ធ្មត់ខ្លាំង ជាពិសេសសិក្សាពីបច្ចេកទេសឱ្យបានត្រឹមត្រូវទើបអាចទទួលបានជោគជ័យ។ លោកថា ដំបូងគឺត្រូវជ្រើសរើសពូជដែលមានរសជាតិឆ្ងាញ់ និងមានទីផ្សារ ដោយត្រូវយកមកផ្សាំជាមួយពូជក្នុងស្រុក ដើម្បីឱ្យមានភាពធន់នឹងអាកាសធាតុក្នុងប្រទេសកម្ពុជា។ រីឯការថែទាំវិញ ដំណាំនេះត្រូវការយកចិត្តទុកដាក់ខ្ពស់តាំងពីទើបលូតលាស់ដំបូងរហូតដល់ការប្រមូលផល ដោយមិនអាចឱ្យត្រូវទឹកភ្លៀងច្រើនពេកនោះដែរ។ ចំណែកការដាក់ជី លោក ហ៊ី ស៊ឹម បានឱ្យដឹងថា ដំណាក់កាលនេះ ជាដំណាក់កាលសំខាន់ ដែលគប្បីប្រើប្រាស់ជីធម្មជាតិ ជំនួសឱ្យជីគីមី ដែលមានសុវត្ថិភាពទាំងអ្នកដាំដុះ និង បរិភោគ ខណៈដំណាំនេះ ចំណាយពេល៨ខែទើបទទួលផល និង អាចប្រមូលផលបន្តបន្ទាប់ផងដែរ។បើតាមការបញ្ជាក់របស់លោក ហ៊ី ស៊ឹម លោកចាប់ផ្ដើមដាំដុះទំពាំងបាយជូរក្នុងឆ្នាំ២០២៣ ដែលមានចំនួន១៨ដើមប៉ុណ្ណោះនៅជុំវិញផ្ទះ ដោយក្នុងពេលនោះ លោកមិនទាន់មានបច្ចេកទេសត្រឹមត្រូវក្នុងការដាំដុះនៅឡើយ និងកត្តាអាកាសធាតុ ធ្វើឱ្យដំណាំនេះខូចខាតយ៉ាងខ្លាំង។ លោកថា ដោយចិត្តមានះមិនបោះបង់ លោកបានស្វះស្វែង រករៀនបច្ចេកទេសពីអ្នកជំនាញ និងការស្វែងយល់ពីប្រភេទដំណាំនេះ ជាលទ្ធផលលោកអាចពង្រីកអាជីវកម្មរបស់ខ្លួន ពីការដាំទំពាំងបាយជូរ១៨ដើម រហូតដល់ជាង២០០ដើម ដែលទទួលបានការគាំទ្រច្រើនពីអតិថិជន ខណៈលោកអាចលក់បានតម្លៃ ៣ម៉ឺនរៀលក្នុងមួយគីឡូក្រាម៕ប្រភព៖ មន្ទីរព័ត៌មានខេត្តសៀមរាប

កម្ពុជាបាននិងកំពុងបង្កើនការយល់ពីគោលបំណង វិសាលភាព និងសកម្មភាពសេដ្ឋកិច្ចបៃតង ជាពិសេសការផ្តល់ឥណទាន សម្រាប់គម្រោងវិនិយោគបៃតង និងការធានាដល់ប្រតិបតិបត្តិការដែលមិនប៉ះពាល់ដល់បរិស្ថាន ដើម្បីជំរុញការវិនិយោគប្រកបដោយ ចីរភាព។លោកស្រី Elvira Morella នាយិកាគ្រប់គ្រងផ្នែកសេដ្ឋកិច្ច និងប្រឹក្សាយោបល់ នៃសាជីវកម្មហិរញ្ញវត្ថុអន្តរជាតិ (IFC) លើក ឡើងក្នុងពិធីសម្ពោធដាក់ឱ្យប្រើប្រាស់ជាផ្លូវការ ប្រព័ន្ធវដ្តករសាស្រ្តហិរញ្ញវត្ថុប្រកបដោយចីរភាព សម្រាប់វិស័យធនាគារនៅកម្ពុជា នៅថ្ងៃទី២៧ ខែមេសា ម្សិលមិញនេះថា ជុំវិញគម្រោងអភិវឌ្ឍន៍បៃតងនេះ ឃើញថា កម្ពុជាបាននិងកំពុងរឹតបន្តឹងដូចជា ការណែនាំ មានកំណត់លើអ្វីដែលមានលក្ខណៈសម្បត្តិគ្រប់គ្រាន់ជា "បៃតង" និង "ប្រកបដោយចីរភាព"។ បញ្ហានេះ ប្រទេសនៅក្នុងពិភពលោក បាននិងកំពុងគិតគូ និងជំរុញគម្រោងវិនិយោគប្រកបដោយចីភាព ក្នុងនោះសម្រាប់កម្ពុជា, ប្រព័ន្ធវដ្តករសាស្រ្តហិរញ្ញវត្ថុនេះពិតជាមាន សារៈសំខាន់ណាស់ និងជាមូលដ្ឋានគ្រឹះសម្រាប់ការអភិឌ្ឍសេដ្ឋកិច្ចបៃតងនៅកម្ពុជា ដើម្បីជំរុញធានាដល់ភាពធន់នៅក្នុងសេដ្ឋកិច្ច។ លោក រ័ត្ន សោភ័ណ ប្រធានសមាគមធនាគារនៅកម្ពុជា លើកឡើងថា ជុំវិញការអភិវឌ្ឍសេដ្ឋកិច្ចបៃតង ការផ្តល់ឥណទាន បៃតង និងការផ្តល់ឥណទានប្រកបដោយចីរភាព នេះគឺជានិន្នាការពិភពលោក ដែលបាននិងកំពុងគិតគូជុំវិញគម្រោងអភិវឌ្ឍន៍បៃតង នេះ ក្នុងនោះសម្រាប់កម្ពុជាក៏បាននិងកំពុងបន្តគិតគូរអំពីការអភិឌ្ឍបៃតងនេះដែរ ហើយនេះក៏ជាឱកាសដើម្បីឱ្យវិស័យធនាគារ ក៏ដូច ភាគីពាក់ព័ន្ធទាំងអស់ បង្កើននូវប្រតិបត្តិការរបស់ខ្លួន ក៏ដូចជាការផ្តល់ឥណទាននៃសេវានានាប្រកបដោយចីរភាព។លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា លើកឡើងថា សម្រាប់ការដាក់ចេញប្រព័ន្ធវដ្តករសាស្ត្រ ហិរញ្ញវត្ថុប្រកបដោយចីរភាពនេះ ក្នុងដំណាក់កាលដំបូងនេះ គឺសម្រាប់ប្រើប្រាស់ក្នុងវិស័យធនាគារ ប៉ុន្ដែមិនមែនមានន័យថា វិស័យ ផ្សេងទៀតមិនមានសិទ្ធិប្រើប្រាស់ប្រព័ន្ធវដ្តករសាស្ត្រនេះ ក្នុងការទទួលបានមូលនិធិ ឬការវិនិយោគបៃតងនោះទេ។ ផ្ទុយទៅវិញ ធនាគារជាតិនៃកម្ពុជា លើកទឹកចិត្តដល់គ្រប់ភាគីពាក់ព័ន្ធទាំងអស់ ឈានទៅសម្រេចបាននូវគោលដៅរួមទទួលយកប្រព័ន្ធវដ្តករ សាស្ត្រនេះទៅប្រើប្រាស់ ដើម្បីក្នុងការលើកកម្ពស់សកម្មភាពសេដ្ឋកិច្ចប្រកបដោយចីរភាពនៅក្នុងប្រទេសកម្ពុជា។ លើសពីនេះ ធនាគារជាតិនៃកម្ពុជា នឹងបន្តធ្វើបច្ចុប្បន្នកម្ម និងពង្រីកវិសាលភាពដល់ការបន្សំនឹងការប្រែប្រួលអាកាសធាតុ និងសិក្សាបញ្ចូលវិស័យ ដទៃទៀត ដោយសហការជាមួយក្រសួង-ស្ថាប័នពាក់ព័ន្ធ ដើម្បីឱ្យប្រព័ន្ធវដ្តករសាស្ត្រហិរញ្ញវត្ថុនៅដំណាក់កាលទី២ អាចអនុវត្តបាន កាន់តែទូលំទូលាយ៕អត្ថបទ៖ សុន រ៉ាឌី,

អាជ្ញាធរការពារជាតិនៅទីក្រុងតៃប៉ិ បាននិយាយថា កោះតៃវ៉ាន់បានប្រទះឃើញនាវាចម្បាំងចិនពីរគ្រឿងកំពុងធ្វើប្រតិបត្តិការនៅក្នុងដែនទឹកក្បែរកោះ ផាំង ហ៊ូ (Penghu) ក្នុងច្រកសមុទ្រតៃវ៉ាន់ ហើយបានបញ្ជូនកងទ័ពជើងទឹក និងកងទ័ពអាកាសរបស់ខ្លួនដើម្បីតាមដាន។ចិន ដែលចាត់ទុកកោះតៃវ៉ាន់គ្រប់គ្រងតាមបែបប្រជាធិបតេយ្យថាជាទឹកដីរបស់ខ្លួន បានបញ្ជូននាវាចម្បាំង និងយន្តហោះចម្បាំងរបស់ខ្លួនចូលទៅក្នុងដែនទឹក និងផ្ទៃមេឃជុំវិញកោះនេះស្ទើរតែរាល់ថ្ងៃ ដែលធ្វើឲ្យក្រុមអាជ្ញាធរកោះនេះស្ដីបន្ទោស។ខណៈអាជ្ញាធរការពារជាតិកោះតៃវ៉ាន់ផ្តល់ព័ត៌មានថ្មីៗប្រចាំថ្ងៃអំពីទីតាំងយន្តហោះយោធាចិន កោះនេះកម្រផ្តល់ព័ត៌មានលម្អិតអំពីកន្លែងដែលនាវាចម្បាំងចិនកំពុងធ្វើប្រតិបត្តិការណាស់ ជាទូទៅបាន ប្រទះឃើញតែនាវាផ្ទុកយន្តហោះ តែប៉ុណ្ណោះ ជាក់ស្ដែងដូចដែលបានកើតឡើងកាលពីសប្តាហ៍មុន។កាលពីល្ងាចថ្ងៃចន្ទ២៧មេសាសប្ដាហ៍នេះ អាជ្ញាធរកោះបាននិយាយថា នាវាពិឃាតចិនមួយគ្រឿង និងនាវាចម្បាំងមួយគ្រឿងបានចូលទៅក្នុងដែនទឹកនៅភាគនិរតីនៃកោះ Penghu ដែលជាទីតាំងមូលដ្ឋានកងទ័ពជើងទឹក និងកងទ័ពអាកាសសំខាន់ៗរបស់តៃវ៉ាន់ និងនៅជិតច្រកសមុទ្រខាងផ្នែករបស់កោះតៃវ៉ាន់៕

⁠មនុស្សយ៉ាងហោចណាស់១៤នាក់បានស្លាប់ និងជាង៨០នាក់បានរងរបួសនៅក្នុងការប៉ះទង្គិចគ្នារវាងរថភ្លើងពីរគ្រឿងនៅជិតរដ្ឋធានីហ្សាកាតា ប្រទេសឥណ្ឌូនេស៊ី និងមានរបាយការណ៍ថា អ្នកដំណើរនៅជាប់ខ្លួនក្នុងគំនរបាក់បែក ខណៈកិច្ចខិតខំប្រឹងប្រែងជួយសង្គ្រោះនៅបន្ត។អ្នកនាំពាក្យរបស់ក្រុមហ៊ុនរថភ្លើងដឹកជញ្ជូនអ្នកដំណើរ បានប្រាប់ទីភ្នាក់ងារសារព័ត៌មានរ៉យទ័រថា គ្រោះថ្នាក់កាលពីយប់ថ្ងៃច័ន្ទ បានកើតឡើងនៅស្ថានីយ៍រថភ្លើងទីក្រុង Bekasi ដែលនៅជិតគ្នាជាមួយទីក្រុងហ្សាកាតា រវាងខ្សែរថភ្លើងដឹកអ្នកដំណើរ និងរថភ្លើងដឹកជញ្ជូនផ្លូវឆ្ងាយមួយគ្រឿងផ្សេងទៀត។បុគ្គលិកសង្គ្រោះបន្ទាន់ នៅតែធ្វើការយ៉ាងសកម្មនៅកន្លែងកើតហេតុនៅព្រឹកថ្ងៃអង្គារនេះ ដោយមន្ត្រីម្នាក់បានប្រាប់ទីភ្នាក់ងារសារព័ត៌មាន AFP ថា មនុស្សមួយចំនួននៅតែជាប់ខ្លួនក្នុងគំនរបាក់បែកនៃរថភ្លើង។លោក Mohammad Syafii ប្រធានទីភ្នាក់ងារស្វែងរកនិងជួយសង្គ្រោះជាតិរបស់ប្រទេសឥណ្ឌូនេស៊ី បាននិយាយនៅព្រឹកថ្ងៃអង្គារនេះថា បច្ចុប្បន្នមានជនរងគ្រោះស្លាប់១៤នាក់ ហើយដំណើរការជម្លៀសនិងសង្គ្រោះ នៅបន្ត ដូច្នេះចំនួនពិតប្រាកដនៃជនរងគ្រោះនៅមិនទាន់បានកំណត់ច្បាស់នៅឡើយ។លោក Syafii បាននិយាយថា កិច្ចខិតខំប្រឹងប្រែងដើម្បីជួយសង្គ្រោះអ្នកដែលនៅជាប់ខ្លួននៅក្នុងគំនរបាក់បែក មានភាពស្មុគស្មាញដោយសារតែទីតាំងហើយក្រុមអ្នកជួយសង្គ្រោះកំពុងធ្វើការ ខណៈមានការខូចខាតធ្ងន់ធ្ងរដល់ទូរថភ្លើង។ លោក Syafii និយាយថា បុគ្គលិកសង្គ្រោះបានកាត់ចេញកម្ទេចកម្ទីបាក់បែក និងនាំអ្នកដែលជាប់ខ្លួននៅក្នុងទូរថភ្លើងចេញ នេះបើយោងតាមគេហទំព័រ Kompas.com។

លោក Abbas Araghchi រដ្ឋមន្ត្រីការបរទេសអ៊ីរ៉ង់កាលពីថ្ងៃចន្ទ ២៧មេសាសប្ដាហ៍នេះ បានជួបពិភាក្សាជាមួយប្រធានាធិបតីរុស្ស៊ីលោក Vladimir Putin នៅទីក្រុង St. Petersburg ដោយប្រធានាធិបតីរុស្ស៊ីបានប្រាប់អ្នកការទូតអ៊ីរ៉ង់រូបនេះ ថា លោកសង្ឃឹមថានឹងមានសន្តិភាពឆាប់ៗនេះ។ទីក្រុងមូស្គូ ដែលជាសម្ព័ន្ធមិត្តរបស់អ៊ីរ៉ង់ រហូតមកដល់ពេលនេះ នៅតែច្រានចោលការជាប់ពាក់ព័ន្ធនឹងជម្លោះមជ្ឈិមបូព៌ា ខណៈខ្លួននៅតែបន្តសង្គ្រាមទ្រង់ទ្រាយធំលើអ៊ុយក្រែន។ ប៉ុន្តែលោក Putin កាលពីថ្ងៃចន្ទនោះដែរ បានផ្តល់ការគាំទ្រដល់អ៊ីរ៉ង់ ដោយនិយាយថា លោកសង្ឃឹមថានឹងមានសន្តិភាពឆាប់ៗនេះ ហើយអ៊ីរ៉ង់នឹងឆ្លងកាត់ "ដំណាក់កាលដ៏លំបាក" នៃសង្គ្រាមនេះ នេះបើយោងតាមទីភ្នាក់ងារសារព័ត៌មានរដ្ឋរបស់រុស្ស៊ី។ទីភ្នាក់ងារសារព័ត៌មានរុស្ស៊ី RIA បានដកស្រង់សម្តី លោកប្រធានាធិបតីរុស្ស៊ីក្នុងអំឡុងពេលជួបជាមួយលោក Araghchi ដោយនិយាយថា សម្រាប់ផ្នែករបស់ពួកលោក ពួកលោកនឹងធ្វើគ្រប់យ៉ាងដែលបម្រើផលប្រយោជន៍របស់អ្នក និងផលប្រយោជន៍ប្រជាជនទាំងអស់នៅក្នុងតំបន់ ដើម្បីឱ្យសន្តិភាពអាចសម្រេចបានឆាប់តាមដែលអាចធ្វើទៅបាន។លោក Araghchi បានទៅដល់ប្រទេសរុស្ស៊ីកាលពីថ្ងៃចន្ទ២៧មេសាសប្ដាហ៍នេះ បន្ទាប់ពីការធ្វើដំណើរទៅកាន់ប្រទេសដែលជាអ្នកជួយសម្របសម្រួល គឺ ប៉ាគីស្ថាន និងអូម៉ង់ ដើម្បីពិភាក្សាអំពីជម្លោះមជ្ឈិមបូព៌ា ខណៈកិច្ចខិតខំប្រឹងប្រែងសន្តិភាពរវាងទីក្រុងតេអេរ៉ង់ និងទីក្រុងវ៉ាស៊ីនតោន នៅតែត្រូវបានផ្អាក។ដំណើរទស្សនកិច្ចរបស់លោកAraghchiកើតឡើងស្របពេលការចរចាជាប់គាំងជាមួយអាមេរិក ខណៈភាគីទាំងពីរបានបដិសេធការទាមទារជាច្រើនរបស់គ្នាទៅវិញទៅមក។កាលពីថ្ងៃសៅរ៍ ប្រធានាធិបតីអាមេរិក លោក Donald Trump បានលុបចោលដំណើរទស្សនកិច្ចដែលបានគ្រោងទុកទៅកាន់ទីក្រុងអ៊ីស្លាម៉ាបាដ ដោយបេសកជនរបស់លោក គឺលោក Steve Witkoff និងលោក Jared Kushner ដោយនិយាយថា ការចរចានៅទីនោះនឹងប្រៀបដូចជាការអង្គុយនិយាយគ្នាពីរឿងឥតប្រយោជន៍ ៕